1 Jɔn

4 Di wan dɛn we a rili lɛk, una nɔ biliv ɔlkayn mɛsej we tan lɛk mɛsej we kɔmɔt frɔm Gɔd, una tɛst di mɛsej fɔ si if i kɔmɔt frɔm Gɔd, bikɔs bɔku lay lay prɔfɛt dɛn de naw na di wɔl.

2 Na dis we una go no if di mɛsej kɔmɔt frɔm Gɔd: Ɛni mɛsej we gri se Jizɔs Krays bin dɔn kam as mɔtalman na mɛsej we kɔmɔt frɔm Gɔd. 3 Bɔt ɛni mɛsej we nɔ tɔk dat bɔt Jizɔs nɔ kɔmɔt frɔm Gɔd. Pantap dat, dis na mɛsej we kɔmɔt frɔm di pɔsin we de agens Krays we una bin dɔn yɛri se de kam, ɛn i dɔn ɔlrɛdi kam na di wɔl.

4 Smɔl pikin dɛn, na frɔm Gɔd una kɔmɔt ɛn una dɔn win dɛn, bikɔs di wan we gɛt wanwɔd wit una pas di wan we gɛt wanwɔd wit di wɔl. 5 Dɛn kɔmɔt na di wɔl; na dat mek dɛn de tɔk tin dɛn we kɔmɔt na di wɔl ɛn di wɔl de lisin to dɛn. 6 Na frɔm Gɔd wi kɔmɔt. Ɛnibɔdi we de lan bɔt Gɔd de lisin to wi; ɛnibɔdi we nɔ kɔmɔt frɔm Gɔd nɔ de lisin to wi. Na dis we wi de no di tru mɛsej we kɔmɔt frɔm Gɔd ɛn di lay lay mɛsej we nɔ kɔmɔt frɔm Gɔd.

7 Di wan dɛn we a rili lɛk, una lɛ wi kɔntinyu fɔ lɛk wi kɔmpin dɛn, bikɔs lɔv kɔmɔt frɔm Gɔd, ɛn ɛnibɔdi we de sho lɔv na Gɔd in pikin ɛn i no Gɔd. 8 Ɛnibɔdi we nɔ de sho lɔv nɔ no Gɔd yet, bikɔs Gɔd na lɔv. 9 Na dis we Gɔd sho se i lɛk wi, we i sɛn in wangren Pikin we insɛf sɛf mek, fɔ kam na di wɔl so dat i go mek wi gɛt layf. 10 Na dis na di lɔv: nɔto fɔ se wi bin dɔn lɛk Gɔd, bɔt na in lɛk wi ɛn sɛn in Pikin as sakrifays fɔ wi sin dɛn so dat wi go gɛt pis wit Gɔd.

11 Di wan dɛn we a rili lɛk, if na so Gɔd lɛk wi, dat min se wisɛf nid fɔ lɛk wi kɔmpin dɛn. 12 Nɔbɔdi nɔ wande si Gɔd. If wi kɔntinyu fɔ lɛk wi kɔmpin dɛn, Gɔd go kɔntinyu fɔ de wit wi ɛn in lɔv go kɔmplit insay wi. 13 Na dis mek wi no se wi stil gɛt wanwɔd wit am, ɛn i gɛt wanwɔd wit wi, bikɔs i dɔn gi wi in spirit. 14 Pantap dat, wisɛf sɛf dɔn si, ɛn wi de tɔk se di Papa dɔn sɛn in Pikin fɔ kam sev di wɔl. 15 Ɛnibɔdi we gri se Jizɔs na Gɔd in Pikin, Gɔd go kɔntinyu fɔ gɛt wanwɔd wit am ɛn insɛf gɛt wanwɔd wit Gɔd. 16 Ɛn wi dɔn no ɛn biliv se Gɔd lɛk wi.

Gɔd na lɔv, ɛn di wan we kɔntinyu fɔ sho lɔv go kɔntinyu fɔ gɛt wanwɔd wit Gɔd ɛn Gɔd insɛf go kɔntinyu fɔ gɛt wanwɔd wit am. 17 Na dis we lɔv dɔn kɔmplit insay wi, so dat wi go fil fri fɔ tɔk* jɔjmɛnt de, bikɔs jɔs lɛk aw da pɔsin de, na so wisɛf de na dis wɔl. 18 Fred nɔ de insay lɔv, bɔt lɔv we pafɛkt de pul* fred kɔmɔt, bikɔs fred de mek wi nɔ du bɔku tin. Fɔ tru, di wan we de fred, in lɔv nɔ kɔmplit. 19 Wi de sho lɔv, bikɔs na in fɔs lɛk wi.

20 If ɛnibɔdi se, “A lɛk Gɔd,” bɔt i et in brɔda, da pɔsin de na layman. Di wan we nɔ lɛk in brɔda, we i dɔn si, nɔ go ebul fɔ lɛk Gɔd, we i nɔ wande si. 21 Ɛn i gi wi dis lɔ, we se ɛnibɔdi we lɛk Gɔd fɔ lɛk in brɔda bak.