Sam

145 A go ɔnɔ yu, E mi Gɔd we na Kiŋ,

A go prez yu nem sote go.

 2 A go prez yu ol de;

A go prez yu nem sote go.

 3 Jiova gret, ɛn i fit fɔ gɛt prez;

Pɔsin nɔ go ebul fɔ ɔndastand aw i gret.

 4 Jɛnɛreshɔn afta jɛnɛreshɔn go prez yu wok dɛn;

Dɛn go tɔk bɔt di pawaful tin dɛn we yu dɔn du.

 5 Dɛn go tɔk bɔt yu glori ɛn ɔnɔ,

Ɛn a go tek tɛm tink gud gud wan bɔt yu wɔndaful wok dɛn.

 6 Dɛn go tɔk bɔt di wɔndaful tin dɛn we yu dɔn du,

Ɛn a go tɔk bɔt aw yu gret.

 7 Dɛn go gladi pasmak we dɛn mɛmba di bɔku gud tin dɛn we yu dɔn du,

Ɛn dɛn go ala wit gladi-at bikɔs ɔf di we aw yu de du wetin rayt.

 8 Jiova gɛt sɔri-at, ɛn i de sho masi;

I nɔ de vɛks kwik, ɛn i gɛt pasmak lɔv we nɔ de chenj.

 9 Jiova gud to ɔlman,

Ɛn ɔl in wok dɛn de sho klia wan se i de sho masi.

10 Ɔl yu wok dɛn go ɔnɔ yu, E Jiova,

Ɛn di wan dɛn we nɔ de kɔmɔt biɛn yu go prez yu.

11 Dɛn go tɔk bɔt di ɔnɔ we yu gɛt as Kiŋ,

Ɛn dɛn go tɔk bɔt aw yu pawaful,

ל [Lemɛd]

12 Fɔ mek mɔtalman dɛn no di pawaful tin dɛn we yu dɔn du

Ɛn di glori ɛn ɔnɔ we yu gɛt as Kiŋ.

13 Yu Kiŋdɔm go de sote go,

Ɛn yu go kɔntinyu fɔ rul frɔm jɛnɛreshɔn to jɛnɛreshɔn.

14 Jiova de es ɔl di wan dɛn we fɔdɔm,

Ɛn i de es ɔl di wan dɛn we butu.

15 Na yu ɔlman de luk to fɔ ɛp;

Yu de gi dɛn tin fɔ it we di rayt tɛm rich.

16 Yu opin yu an,

Ɛn yu de mek ɔltin we gɛt layf gɛt wetin dɛn want.

17 Jiova de du wetin rayt pan ɔl wetin i de du

Ɛn di tin dɛn we i de du de sho se i fetful.

18 Jiova de nia ɔl di wan dɛn we de kɔl am;

I de nia ɔl di wan dɛn we de kɔl am wit ɔl dɛn at.

19 I de mek di wan dɛn we de fred am gɛt wetin dɛn want;

I de yɛri we dɛn kray to am fɔ ɛp, ɛn i de sev dɛn.

20 Jiova de protɛkt ɔl di wan dɛn we lɛk am,

Bɔt i go dɔnawe wit ɔl di wikɛd wan dɛn.

21 A go tɔk fɔ prez Jiova;

Lɛ ɔltin we gɛt layf* prez in nem sote go.