Lyuk

12 As dis de bi, bɔku bɔku pipul dɛn bin de gɛda ɛn dɛn bin so bɔku dat dɛn bin de mas mas dɛn kɔmpin dɛn. Nain Jizɔs bigin fɔ tɔk fɔs to in disaypul dɛn se: “Una tek tɛm wit di Faresi dɛn yist, we na ipokrit biznɛs. 2  Natin nɔ de we dɛn tek tɛm kip we nɔ go kɔmɔt na do, ɛn no sikrit nɔ de we pipul dɛn nɔ go no bɔt. 3 So ɛnitin we una tɔk na ples we dak, dɛn go yɛri am na ples we layt de, ɛn ɛnitin we una tɔk saful wan insay rum, dɛn go tɔk am pantap os. 4 Pantap dat, mi padi dɛn, a de tɛl una se una nɔ fred di wan dɛn we de kil di bɔdi bɔt nɔ ebul fɔ du natin afta dat. 5 Lɛ a sho una udat fɔ fred: Una fred di Wan we gɛt rayt fɔ trowe di bɔdi na Gɛɛna* afta i dɔn kil am. Fɔ tru a de tɛl una se na da Wan de una fɔ fred. 6 Dɛn de sɛl fayv sparo* dɛn fɔ tu kɔyn we nɔ gɛt bɛtɛ valyu,* nɔto so? Stil, Gɔd nɔ de fɔgɛt ɛniwan pan dɛn. 7 Ɛn i ivin no ɔmɔs ia de na una ed. Una nɔ fred, una valyu pas bɔku sparo* dɛn.

8 “A de tɛl una se ɛnibɔdi we se i no mi bifo mɔtalman, mɔtalman Pikin insɛf go se i no am bifo Gɔd in enjɛl dɛn. 9 Bɔt ɛnibɔdi we dinay mi bifo mɔtalman, mɔtalman Pikin go dinay am bifo Gɔd in enjɛl dɛn. 10 Gɔd go fɔgiv ɛnibɔdi we tɔk sɔntin agens mɔtalman Pikin, bɔt i nɔ go fɔgiv ɛnibɔdi we tɔk bad bɔt di oli spirit. 11 We dɛn kɛr una go bifo bɔku pipul dɛn,* rula dɛn, ɛn di wan dɛn we gɛt pawa, una nɔ wɔri bɔt aw una go tɔk ɔ wetin una go tɔk, 12 bikɔs di oli spirit go tich una wetin fɔ tɔk da sem tɛm de.”

13 Na de pɔsin na di krawd tɛl am se: “Ticha, tɛl mi brɔda lɛ i gi mi mi yon prɔpati pan di tin dɛn we wi papa lɛf fɔ wi.” 14 Jizɔs tɛl am se: “Udat mek mi jɔj ɔ midulman fɔ una tu?” 15 Dɔn i tɛl dɛn se: “Una opin una yay ɛn tek tɛm mek una nɔ want ɔltin fɔ unasɛf,* bikɔs ilɛk pɔsin gɛt bɔku tin dɛn, nɔto dat de gi am layf.” 16 Dɔn i gi dɛn wan ɛgzampul. I se: “Wan jɛntriman in land bin gɛt bɔku tin dɛn fɔ avɛst. 17 So i bigin tɔk na in at se, ‘Wetin a fɔ du naw we a nɔ gɛt say fɔ kip di tin dɛn we a plant?’ 18 Dɔn i tɔk se, ‘Na dis a go du: A go brok mi stɔ dɛn ɛn bil big wan dɛn; na de a go kip ɔl mi wit* ɛn ɔl di tin dɛn we a gɛt, 19 ɛn a go tɛl misɛf* se: “Yu* dɔn gɛt bɔku gud tin dɛn we yu dɔn kip ɛn i go te bifo dɛn dɔn; so tek am izi, it, drink, ɛn ɛnjɔy yusɛf.”’ 20 Bɔt Gɔd tɛl am se, ‘Yu na pɔsin we nɔ de tink. Dis nɛt dɛn go tek yu layf.* Udat naw go gɛt di tin dɛn we yu dɔn kip?’ 21 Na so i go bi to pɔsin we de kip jɛntri fɔ insɛf, bɔt i nɔ jɛntri na Gɔd in yay.”

22 Dɔn i tɛl in disaypul dɛn se: “Na dat mek a de tɛl una se una lɛf fɔ wɔri bɔt una layf* we i kam pan wetin una go it ɔ bɔt una bɔdi we i kam pan wetin una go wɛr, 23 bikɔs layf* bɛtɛ pas it ɛn di bɔdi bɛtɛ pas klos. 24 Una tink bɔt di bɔd* dɛn: Dɛn nɔ de plant sid ɔ avɛst, ɛn dɛn nɔ gɛt stɔ; bɔt Gɔd de fid dɛn. Una nɔ tink se una bɛtɛ pas bɔd dɛn? 25 Uswan pan una we de wɔri go ebul fɔ ad ivin shɔt tɛm* pan in layf? 26 So, if una nɔ ebul fɔ du smɔl tin lɛk dis, wetin mek una fɔ wɔri bɔt di ɔda tin dɛn? 27 Una tink bɔt aw di flawa* dɛn de gro: Dɛn nɔ de wok ɔ so klos; bɔt a de tɛl una se pan ɔl we Sɔlɔmɔn bin gɛt bɔku fayn fayn tin dɛn, i nɔ bin de drɛs fayn lɛk wan pan dɛn flawa ya. 28 If na so Gɔd de drɛs dɛn flawa ya we de ya tide ɛn tumara dɛn put dɛn na ovin, i go mɔs gi una klos, una we gɛt smɔl fet! 29 So una lɛf fɔ wɔri bɔt wetin una go it ɛn wetin una go drink. Una lɛf fɔ wɔri pasmak; 30 na ɔl dɛn tin ya di pipul dɛn na di ɔda neshɔn dɛn de rɔnata, bɔt una Papa no se una nid dɛn tin ya. 31 Una put Gɔd in Kiŋdɔm fɔs na una layf, ɛn Gɔd go gi una dɛn tin ya.

32 “Ship dɛn we nɔ bɔku, una nɔ fred, bikɔs una Papa dɔn gri fɔ gi una di Kiŋdɔm. 33 Una sɛl una prɔpati dɛn ɛn gi gift dɛn to po pipul dɛn.* Una mek pɔs dɛn we nɔ de pwɛl fɔ put mɔni, dat min se una fɔ kip jɛntri we nɔ go ɛva dɔn na ɛvin, usay tifman nɔ go go nia ɛn bɔgbɔg nɔ go it am. 34 Bikɔs usay una jɛntri de, na de bak una at go de.

35 “Una drɛs ɛn rɛdi* ɛn layt una lamp dɛn. 36 Una fɔ tan lɛk pipul dɛn we de wet fɔ dɛn masta we dɔn kɔmɔt pan mared de kam na os, so dat we i kam ɛn nak di domɔt, dɛn go opin fɔ am wantɛm wantɛm. 37 Di slev dɛn we dɛn masta kam mit de wach go gladi. A de tɛl una fɔ tru se i go wɛr klos fɔ wok ɛn mek dɛn sidɔm na* di tebul; dɔn i go kam ɛn sav dɛn. 38 If i kam na nɛt,* ɔ ivin ali mɔnin* ɛn mit dɛn rɛdi, dɛn go gladi! 39 Bɔt wan tin we una fɔ no na dat, if di pɔsin we gɛt di os bin no ustɛm di tifman de kam, i nɔ bin fɔ gri lɛ i brok kam insay in os. 40 Unasɛf fɔ rɛdi bikɔs mɔtalman Pikin go kam di tɛm we una nɔ de tink se i go kam.”

41 Dɔn Pita tɔk se: “Masta, na wi nɔmɔ yu de gi dis ɛgzampul, ɔ yu gɛt fɔ tɛl ɔlman?” 42 Di Masta se: “Udat rili na di savant* we fetful ɛn we gɛt sɛns, we in masta go put oba in ɔda savant dɛn fɔ de gi dɛn di it we dɛn fɔ gɛt di rayt tɛm? 43 Da slev de go gladi if in masta kam mit am de du dat! 44 Fɔ tru, a de tɛl una se i go mek i de oba ɔl wetin i gɛt. 45 Bɔt if da slev de tɔk na in at se, ‘Mi masta de westɛm fɔ kam,’ ɛn i bigin fɔ bit di ɔda savant dɛn ɛn it ɛn drink ɛn chak, 46 da slev de in masta go kam di de we i nɔ bin de fil se i go kam ɛn di tɛm we i nɔ no, ɛn i go pɔnish am bad bad wan ɛn put am usay di wan dɛn we nɔ fetful de. 47 Dɔn di masta go rili bit da slev we no wetin in masta want, bɔt i nɔ rɛdi ɔ du wetin i tɛl am fɔ du. 48 Bɔt di wan we nɔ ɔndastand ɛn i du sɔntin we fɔ mek dɛn bit am, dɛn go bit am, bɔt dɛn nɔ go bit am tumɔs. Fɔ tru, ɛnibɔdi we dɛn gi mɔ, dɛn go ɛkspɛkt mɔ frɔm am, ɛn ɛnibɔdi we dɛn put oba bɔku tin, dɛn go ɛkspɛkt mɔ frɔm am.

49 “A kam fɔ layt faya na di wɔl, so wetin lɛf fɔ lɛ a du igen if di faya dɔn ɔlrɛdi kech? 50 Fɔ tru, a gɛt fɔ baptayz, ɛn mi at rili pwɛl te da tɛm de pas! 51 Una tink se a kam fɔ briŋ pis na di wɔl? Nɔ, a kam fɔ mek wanwɔd nɔ de. 52 Frɔm naw, fayv pipul dɛn we de na wan os nɔ go gɛt wanwɔd; tri go de agens tu ɛn tu go de agens tri. 53 Dɛn nɔ go gɛt wanwɔd, papa go de agens in bɔypikin ɛn bɔypikin go de agens in papa, mama go de agens in galpikin ɛn galpikin go de agens in mama, mɔdɛnlɔ go de agens in dɔtɛnlɔ ɛn dɔtɛnlɔ go de agens in mɔdɛnlɔ.”

54 Dɔn i tɛl di pipul dɛn se: “We una si klawd de gɛda na di wɛst, una kin tɔk wantɛm wantɛm se, ‘Big briz ɛn ebi ren de kam,’ ɛn na so i kin bi. 55 Ɛn we una kin si se briz de blo frɔm di sawt, una kin se, ‘Di ples de kam wam pasmak,’ ɛn na so i kin bi. 56 Una na ipokrit dɛn. Una no aw di wɛda go tan lɛk we una wach di wɔl ɛn di skay, bɔt wetin mek una nɔ no wetin de apin naw? 57 Wetin mek una nɔ go disayd fɔ unasɛf wetin rayt? 58 Fɔ ɛgzampul, we yu de na rod de go to wan rula wit pɔsin we una tu gɛt kes, tray fɔ sɛtul di prɔblɛm wit am so dat i nɔ go kɛr yu go to di jɔj, ɛn di jɔj gi yu to di prizin ɔfisa, ɛn di prizin ɔfisa put yu na prizin. 59 A de tɛl yu se yu nɔ go kɔmɔt de pas te yu pe ɔl yu mɔni.*