Romans

1 Pɔl, we na Krays Jizɔs in slev we i kɔl fɔ bi apɔsul ɛn we i pik fɔ prich Gɔd in gud nyuz, na in de rayt to una. 2 Na dis gud nyuz Gɔd bin prɔmis bifo tɛm tru in prɔfɛt dɛn na di oli Skripchɔ dɛn. 3 Di gud nyuz na bɔt in Pikin, we na wan pan Devid in gret gret granpikin dɛn we dɛn bɔn as mɔtalman. 4 Bɔt di pawa we di oli spirit gɛt mek i gɛt layf bak we i day, ɛn dis sho se in na Gɔd in Pikin. Dis Pikin na Jizɔs Krays wi Masta. 5 Na in mek wi gɛt Gɔd in spɛshal gudnɛs* ɛn dis apɔsul wok, so dat pipul dɛn na ɔl di neshɔn dɛn go obe am, bikɔs dɛn gɛt fet pan am, ɛn dis de briŋ ɔnɔ to in nem. 6 Na frɔm dɛn neshɔn ya dɛn kɔl unasɛf fɔ kam bi Jizɔs Krays in yon. 7 A de rayt to ɔl di wan dɛn we de na Rom we Gɔd rili lɛk, ɛn we i dɔn kɔl fɔ bi oli wan dɛn:

Lɛ Gɔd, wi Papa, ɛn Masta Jizɔs Krays dɛn spɛshal gudnɛs* ɛn pis de pan una.

8 Fɔs, a de tɛl mi Gɔd tɛnki fɔ una ɔl tru Jizɔs Krays, bikɔs pipul dɛn de tɔk bɔt una fet ɔlsay na di wɔl. 9 Gɔd, we a de sav wit ɔl mi at* we a de prich di gud nyuz bɔt in Pikin, na mi witnɛs fɔ se ɛnitɛm we a de pre, a de pre fɔ una, 10 ɛn a de beg se if i pɔsibul dis tɛm lɛ a gɛt di chans fɔ kam to una naw if na dat Gɔd want. 11 A rili want fɔ si una, so dat a go gi una sɔm gift dɛn we gɛt fɔ du wit Gɔd biznɛs fɔ mek una tinap tranga wan; 12 wetin a de tray fɔ se na dat, wi go ɛnkɔrej wisɛf; a go ɛnkɔrej una wit mi fet ɛn unasɛf go ɛnkɔrej mi wit una fet.

13 Mi brɔda dɛn, a want mek una no se a dɔn plan bɔku tɛm fɔ kam to una, so dat a go gɛt bɛnifit we a de wit una, jɔs lɛk aw a dɔn gɛt bɛnifit na ɔda neshɔn dɛn, bɔt te naw a nɔ ebul fɔ kam. 14 A gɛt dɛt fɔ pe to Grik ɛn fɔrina* dɛn, ɛn to di wan dɛn we gɛt sɛns ɛn di wan dɛn we nɔ gɛt sɛns; 15 so a rili want fɔ prich di gud nyuz to una bak na Rom. 16 A nɔ de shem fɔ prich di gud nyuz. Infakt, na di pawaful tin dat we Gɔd de yuz fɔ sev ɛnibɔdi we gɛt fet; na di Ju dɛn fɔs, dɔn di Grik dɛn. 17 Di wan dɛn we gɛt fet de si se Gɔd de yuz di gud nyuz fɔ sho se i de du wetin rayt ɛn dat de mek dɛn gɛt mɔ fet, jɔs lɛk aw dɛn rayt se: “Bɔt di wan we de du wetin rayt go liv bikɔs i gɛt fet.”

18 Gɔd we de na ɛvin de sho se i vɛks pan pipul dɛn we nɔ gɛt rɛspɛkt fɔ am ɛn pipul dɛn we nɔ de du wetin rayt; dɛn de du tin dɛn we nɔ rayt fɔ mek pipul dɛn nɔ no di trut. 19 Di tin dɛn we fɔ mek dɛn no Gɔd, dɛn de si am klia wan, bikɔs Gɔd dɔn sho dɛn . 20 Frɔm we Gɔd mek di wɔl, mɔtalman dɔn de no Gɔd in kwaliti dɛn klia klia wan, pan ɔl we dɛn nɔ de si dɛn, lɛk in pawa we go de sote go ɛn tin dɛn we de sho se in na Gɔd, bikɔs dɛn de si am pan di tin dɛn we i mek, so dat dɛn nɔ go gɛt ɛni ɛkskyuz. 21 Pan ɔl we dɛn bin no Gɔd, dɛn nɔ ɔnɔ am as Gɔd, ɛn dɛn nɔ tɛl am tɛnki. Di we aw dɛn bin de tink nɔ mek sɛns, ɛn dɛn nɔ ebul fɔ ɔndastand. 22 Pan ɔl we dɛn bin de se dɛn gɛt sɛns, dɛn dɔn tɔn fulman, 23 ɛn dɛn dɔn tek di ɔnɔ we Gɔd, we nɔ de day,* fɔ gɛt ɛn gi am to imej dɛn we tan lɛk mɔtalman we de day,* bɔd dɛn, animal dɛn we gɛt 4 fut, ɛn animal dɛn we de drɛg na grɔn.

24 Bikɔs dɛn bin want fɔ du wetin dɛn want, Gɔd lɛf dɛn fɔ liv dɔti layf, so dat dɛn bɔdi nɔ go gɛt wan rɛspɛkt. 25 Dɛn disayd fɔ biliv lay ɛn nɔ biliv di tru bɔt Gɔd. Dɛn de rili ɔnɔ* ɛn sav di tin dɛn we Gɔd mek, bɔt dɛn nɔ de rili ɔnɔ ɛn sav Gɔd we mek dɛn tin dɛn de, di wan we fɔ gɛt di prez sote go. Emɛn. 26 Na dat mek we i kam pan mami ɛn dadi biznɛs, Gɔd lɛf dɛn mek dɛn du am da disgresful we; dɛn uman dɛn nɔ de du mami ɛn dadi biznɛs di we aw Gɔd mek dɛn fɔ du am, 27 semweso, di man dɛn nɔ de du mami ɛn dadi biznɛs wit di uman dɛn, dɛn de rili fil fɔ du mami ɛn dadi biznɛs wit dɛn kɔmpin man dɛn bad bad wan; dɛn de du dɔti dɔti tin ɛn dɛn de gɛt di pɔnishmɛnt we dɛn fɔ gɛt fɔ di bad we dɛn du.

28 Bikɔs dɛn nɔ tink se dɛn nid fɔ no Gɔd,* Gɔd lɛf dɛn fɔ de tink di we we nɔ rayt, fɔ du di tin dɛn we pɔsin nɔ fɔ du. 29 Ɛn dɛn bin de du ɔlkayn tin we nɔ rayt, dɛn wikɛd, dɛn want ɔltin fɔ dɛnsɛf, dɛn bad, dɛn de milɛ, dɛn de kil pɔsin, dɛn lɛk plaba, dɛn de ful pipul dɛn, dɛn de malis, dɛn de kongosa, 30 dɛn de tɔk bad bɔt pɔsin biɛn in bak, dɛn et Gɔd, dɛn rud, dɛn prawd, dɛn de bost, dɛn de plan fɔ du bad,* dɛn nɔ de obe dɛn mama ɛn papa, 31 dɛn nɔ de ɔndastand, dɛn nɔ de kip to agrimɛnt, dɛn nɔ lɛk dɛn kɔmpin mɔtalman, ɛn dɛn nɔ gɛt sɔri-at. 32 Pan ɔl we dɛn no wetin Gɔd want klia klia wan ɛn dɛn no se di wan dɛn we de du dɛn tin ya fit fɔ day, dɛn nɔ jɔs de kɔntinyu fɔ du dɛn, bɔt dɛn de sɔpɔt di wan dɛn bak we de du dɛn tin ya.