Wan Man we Bin Gɛt Maynd

WE PIPUL dɛn bigin plɛnti na di wɔl, bɔku pan dɛn bin de du bad bad tin dɛn jɔs lɛk Ken. Bɔt wan man bin de we difrɛn, i nɔ bin tan lɛk dɛn bad pipul ya. In nem na Inɔk, ɛn na in de na dis pikchɔ so. Inɔk na bin man we gɛt maynd. Ɔl di ɔda pipul dɛn bin de du bad bad tin dɛn, bɔt Inɔk bin stil de sav Gɔd.

Yu no wetin mek di pipul dɛn da tɛm de bin de du bɔku bad tin dɛn? Udat yu tink se mek Adam ɛn Iv it di frut we Gɔd tɛl dɛn nɔ fɔ it? Na bin wan bad enjɛl. Di Baybul kɔl am Setan. Ɛn i de tray fɔ mek ɔlman du bad.

Wan de, Jiova Gɔd mek Inɔk tɛl di pipul dɛn sɔntin we dɛn nɔ want yɛri. I tɛl dɛn se: ‘Wande, Gɔd go kam pul ɔl di bad pipul dɛn na di wɔl.’ I mɔs bi se di pipul dɛn vɛks we dɛn yɛri wetin Inɔk tɔk. Sɔntɛm dɛn bin ivin want kil am. So Inɔk fɔ gɛt maynd fɔ tɛl di pipul dɛn bɔt wetin Gɔd gɛt fɔ du to dɛn.

Gɔd nɔ mek Inɔk de wit dɛn bad pipul ya fɔ lɔng. Na fɔ 365 ia nɔmɔ Inɔk liv. Wetin mek wi se Inɔk nɔ liv lɔng, pan ɔl we i ol 365 ia we i day? Na bikɔs pipul dɛn da tɛm de bin trɔng pas wi ɛn dɛn bin gɛt lɔng layf pas wi fafawe. Luk o, Inɔk in pikin we nem Mɛtyusila, bin ol 969 ia we i day!

We Inɔk day, di pipul dɛn kɔntinyu fɔ du bad mɔ ɛn mɔ. Di Baybul se ‘na bad dɛn bin de tink bɔt ɔltɛm, ɛn na fɛt fɛt bin ful-ɔp di wɔl.’

Yu no wan tin we mek bad bin bɔku na di wɔl da tɛm de? Na bikɔs Setan bin dɔn gɛt wan nyu we fɔ mek pipul dɛn du bad. Wi go lan bɔt da nyu we de na di ɔda stori.