Jiova Gi di “Prayz fɔ Fri Bɔku Pipul Dɛn”

1, 2. Aw di Baybul tɔk bɔt di kayn we aw mɔtalman de? Wetin na di wangren tin we go sev wi?

“ƆLTIN we gɛt layf de kɔntinyu fɔ pini togɛda ɛn dɛn de fil pen.” (Romans 8:​22) Di apɔsul Pɔl bin yuz dɛn wɔd dɛn de fɔ tɔk bɔt di sɔri we mɔtalman sɔri. Na mɔtalman yay, i tan lɛk natin nɔ de fɔ du fɔ fri wi frɔm sɔfa, sin, ɛn day. Bɔt Jiova nɔ tan lɛk mɔtalman we nɔ ebul du ɔltin. (Di Nɔmba Dɛm 23:​19) Di Gɔd we lɛk jɔstis dɔn mek we fɔ mek wi kɔmɔt insay dis prɔblɛm. I du dat bay we i pe di prayz fɔ fri mɔtalman.

² Da prayz de na di bɛst gift we Jiova dɔn ɛva gi mɔtalman. Dat dɔn mek am pɔsibul fɔ mek wi go fri frɔm sin ɛn day. (Ɛfishians 1:​7) Ɛn i dɔn mek wi gɛt op fɔ gɛt layf we go de sote go; fɔ sɔm dɛn na ɛvin ɛn ɔda wan dɛn na Paradays na dis wɔl. (Lyuk 23:​43; Jɔn 3:​16; 1 Pita 1:​4) Bɔt wetin rili na di prayz we Jiova pe fɔ fri wi? Aw dis tich wi se Jiova in jɔstis na in pas ɔl ɔda jɔstis?

 3. (a) Wetin mek nid bin de fɔ pe prayz fɔ fri mɔtalman? (b) Wetin mek Gɔd nɔ go jɔs ridyus di pɔnishmɛnt we na day, fɔ Adam in pikin dɛn?

³ Nid bin de fɔ pe prayz fɔ fri mɔtalman bikɔs ɔf Adam in sin. Bikɔs Adam nɔ bin obe Gɔd, dat bin mek i pas gi in pikin dɛn sik, pwɛlat, pen, ɛn day. (Jɛnɛsis 2:​17; Romans 8:​20) Gɔd nɔ go jɔs du tin bay aw i de fil ɔ ridyus di pɔnishmɛnt we Adam in pikin dɛn fɔ gɛt we na day. If i du dat, i go tan lɛk se i de go agens in yon lɔ we se: “Sin in pe na day.” (Romans 6:​23) Ɛn if Jiova bin fɔ dɔn go agens in yon jɔstis, na soso prɔblɛm bin fɔ de ɔlsay na di wɔl ɛn pipul dɛn fɔ jɔs de brok lɔ.

4, 5. (a) Aw Setan lay pan Gɔd? Wetin mek nid bin de fɔ lɛ Jiova sɔlv dɛn prɔblɛm dɛn de? (b) Aw Setan bin lay pan Jiova in fetful savant dɛn?

⁴ As wi bin lan na Chapta 12, we Adam ɛn Iv nɔ bin gri fɔ obe Gɔd, dat bin kam wit siriɔs prɔblɛm dɛn. Setan bin pwɛl Gɔd in gudnem. I bin de tɔk se Jiova na layman ɛn na rula we jɔs de du wetin i want ɛn nɔ de mek pipul dɛn gɛt fridɔm. (Jɛnɛsis 3:​1-5) Setan bin tɔk bak se Gɔd dɔn fel bay we i tan lɛk se i dɔn pwɛl wetin Gɔd want, we na fɔ mek dis wɔl ful-ɔp wit pipul dɛn we de du wetin rayt. (Jɛnɛsis 1:​28; Ayzaya 55:​10, 11) If Jiova nɔ bin fɔ dɔn sɔlv dis prɔblɛm, bɔku ɔda enjɛl dɛn bin fɔ dɔn lɛf fɔ gɛt kɔnfidɛns pan di we aw i de rul.

⁵ Setan bin lay bak pan Jiova in fetful savant dɛn bay we i tɔk se dɛn jɔs de sav Gɔd fɔ dɛn yon bɛnifit ɛn if dɛn gɛt prɔblɛm, dɛn nɔ go kɔntinyu fɔ fetful to Gɔd. (Job 1:​9-11) Dɛn prɔblɛm dɛn ya bin siriɔs pas di bad tin dɛn we de apin to mɔtalman. Jiova bin si se nid de fɔ mek i ansa Setan in lay lay tɔk dɛn. Bɔt aw Gɔd go sɔlv dɛn prɔblɛm dɛn ya ɛn sev mɔtalman?

 6. Wetin na sɔm we dɛn we di Baybul yuz fɔ tɔk bɔt di we aw Gɔd sev mɔtalman?

⁶ Di we aw Jiova sɔlv di prɔblɛm sho se i rili gɛt sɔri-at ɛn i lɛk jɔstis, di kayn we we no mɔtalman nɔ ɛva du am. Bɔt i bin du am simpul wan. Sɔm we dɛn we di Baybul tɔk bɔt di prayz fɔ fri mɔtalman na fɔ bay, fɔ mek ɔl ɔda tin dɛn kam bak to Gɔd, fɔ gɛt pis wit Gɔd, ɛn fɔ fɔgiv. (Sam 49:​8; Daniɛl 9:​24; Galeshians 3:​13; Koloshians 1:​20; Ibruz 2:​17) Bɔt di bɛst we aw fɔ tɔk bɔt am na di wɔd dɛn we Jizɔs insɛf sɛf bin tɔk. I bin se: “Mɔtalman Pikin . . . nɔ kam fɔ mek pipul dɛn bi in savant, bɔt i kam fɔ bi savant ɛn fɔ gi in layf as prayz fɔ fri [Grik wɔd, lyʹtron] bɔku pipul dɛn.”—Matyu 20:​28.

7, 8. (a) Wetin di “prayz fɔ fri pɔsin” min na di Baybul? (b) Aw di prayz fɔ fri pɔsin gɛt fɔ du wit sɔntin we ikwal?

⁷ Wetin di prayz fɔ fri pɔsin min? Di Grik wɔd we dɛn yuz fɔ prayz fɔ fri pɔsin kɔmɔt frɔm wan vab we min “fɔ lus, fɔ fri.” Dɛn kin yuz am fɔ tɔk bɔt di mɔni we dɛn kin pe fɔ fri pɔsin we dɛn kapchɔ pan wɔ. So di prayz fɔ fri pɔsin min di mɔni we dɛn kin pe fɔ bay sɔntin bak. Insay di Ibru Skripchɔ dɛn, di “prayz fɔ fri pɔsin” (koʹpher) kɔmɔt frɔm wan vab we min “fɔ kɔba.” Fɔ ɛgzampul, Gɔd tɛl Noa fɔ “kɔba” (wan ɔda we aw dɛn translet di sem wɔd) di ak wit ta. (Jɛnɛsis 6:​14) Dis ɛp wi fɔ ɔndastand se prayz fɔ fri pɔsin kin min bak fɔ kɔba sin.

⁸ I impɔtant fɔ no se di Theological Dictionary of the New Testament tɔk se dis wɔd (koʹpher) “kin min ikwal,” ɔ sɔntin we fit. So dɛn bin shep di kɔba fɔ di agrimɛnt bɔks fɔ mek i fit pan di bɔks. Semweso, fɔ pe di prayz fɔ fri pɔsin, ɔ kɔba sin, nid fɔ ikwal to ɔ kɔba fayn fayn wan, di prɔblɛm we sin dɔn kɔz. Na dat mek di Lɔ we Gɔd gi di Izrɛlayt dɛn bin se: “I fɔ bi layf fɔ layf, yay fɔ yay, tit fɔ tit, an fɔ an ɛn fut fɔ fut.”—Ditarɔnɔmi 19:​21.

 9. Wetin mek fetful man dɛn bin de mek animal sakrifays dɛn? Aw Jiova bin de si dɛn kayn sakrifays dɛn de?

⁹ Frɔm Ebɛl in tɛm, fetful man dɛn bin dɔn de mek animal sakrifays dɛn to Gɔd. We dɛn bin de du so, dɛn bin de sho se dɛn no se dɛn na sina dɛn ɛn dɛn nid pɔsin fɔ fri dɛn, ɛn dɛn gɛt fet pan di prɔmis we Gɔd mek fɔ fri dɛn tru in “pikin.” (Jɛnɛsis 3:​15; 4:​1-4; Lɛvitikɔs 17:​11; Ibruz 11:​4) Jiova bin gladi fɔ dɛn sakrifays dɛn de, ɛn i bin mek dɛn gɛt tayt padi biznɛs wit am. Bɔt animal sakrifays dɛn bin jɔs tinap fɔ sɔntin we gɛt fɔ kam. Animal dɛn nɔ go rili ebul fɔ kɔba mɔtalman sin, bikɔs mɔtalman valyu pas dɛn. (Sam 8:​4-8) So na dat mek di Baybul se: “I nɔ pɔsibul fɔ mek man kaw ɛn got dɛn blɔd pul sin kɔmɔt.” (Ibruz 10:​1-4) So dɛn sakrifays dɛn de bin jɔs de sho di tru tru prayz we Gɔd gɛt fɔ pe fɔ fri wi.

10. (a) Na to udat di pɔsin we Gɔd yuz fɔ fri wi, fɔ ikwal? Wetin mek? (b) Wetin mek na wan pɔsin bin nid fɔ day?

¹⁰ Di apɔsul Pɔl se: “Adam mek ɔlman de day.” (1 Kɔrintians 15:​22) Fɔ lɛ Gɔd pe di prayz fɔ fri mɔtalman, pafɛkt pɔsin we in layf ikwal to Adam in yon nid fɔ day. (Romans 5:​14) No ɔda pɔsin nɔ bin gɛt di kayn layf we Adam bin gɛt; so bay da we de, di skel fɔ jɔstis nɔ bin balans. Na pafɛkt mɔtalman, dat na pɔsin we nɔ de pan di day we Adam in pikin dɛn fɔ day, go ebul fɔ gi “di ɛgzakt prayz fɔ fri ɔlman.” Da pɔsin in layf fɔ ikwal to Adam in yon. (1 Timoti 2:​6) Nid nɔ de fɔ mek bɔku bɔku pipul dɛn day fɔ ɛniwan pan Adam in pikin dɛn. Di apɔsul Pɔl bin ɛksplen se: “Na . . . wan man [Adam] mek sin kam na di wɔl ɛn sin briŋ day.” (Romans 5:​12) So “ɛnti na wan man briŋ day,” “na wan man bak” Gɔd yuz fɔ fri mɔtalman. (1 Kɔrintians 15:​21) Aw?

11. (a) Aw di pɔsin we Gɔd yuz fɔ fri wi “tes day fɔ ɔlman”? (b) Wetin mek Adam ɛn Iv nɔ fɔ bɛnifit frɔm di prayz we Gɔd yuz fɔ fri wi? (Luk di futnot.)

¹¹ Jiova bin arenj fɔ lɛ wan pafɛkt man gri fɔ sakrifays in layf. Romans 6:​23 tɔk se: “Sin in pe na day.” We di pɔsin we Gɔd yuz fɔ fri wi sakrifays in layf, i go “tes day fɔ ɔlman.” Dat min se i de pe prayz fɔ Adam in sin. (Ibruz 2:​9; 2 Kɔrintians 5:​21; 1 Pita 2:​24) Di prayz fɔ fri mɔtalman go briŋ kam wɔndaful blɛsin dɛn. I go pul kɔmɔt di day we Adam in pikin dɛn bin fɔ day bay we i pul kɔmɔt di pawa we sin gɛt.a—Romans 5:​16.

12. Gi ɛgzampul fɔ sho aw bɔku pipul dɛn go bɛnifit we pɔsin pe wangren dɛt.

¹² Fɔ ɛgzampul, imajin se yu de na wan tɔŋ usay bɔku pan una de wok na wan big kɔmni. Dɛn de pe yu ɛn yu neba dɛn bɔku mɔni fɔ una wok, ɛn una de liv gud layf. Una kɔntinyu fɔ liv da we de te di de we dɛn lɔk di kɔmni. Dɛn lɔk di kɔmni bikɔs di maneja kɔrɔpt, we mek di kɔmni in mɔni dɔn. Dat mek yu ɛn yu neba dɛn nɔ gɛt wok igen, ɛn una nɔ ebul fɔ kia fɔ una famili. Maredman ɛn in wɛf, pikin dɛn, ɛn ɔda pipul dɛn go sɔfa bikɔs ɔf wan man in kɔrɔpshɔn. Ɛni op de? Yɛs! Wan jɛntriman disayd fɔ ɛp. I no di we aw pipul dɛn bin de bɛnifit frɔm di kɔmni. Ɛn i bin de fil sɔri fɔ di bɔku bɔku pipul dɛn we bin de wok de ɛn dɛn famili dɛn. So i pe di dɛt we di kɔmni bin gɛt ɛn opin am bak. Da wan dɛt we di man pe go briŋ gladi-at to di bɔku wokman dɛn, dɛn famili dɛn, ɛn ɔda pipul dɛn. Semweso, we Gɔd pe fɔ Adam in dɛt, dat go bɛnifit bɔku bɔku pipul dɛn.

13, 14. (a) Aw Jiova gi di prayz fɔ fri mɔtalman? (b) Na to udat dɛn pe dis prayz? Wetin mek nid bin de fɔ da kayn pemɛnt de?

¹³ Na Jiova nɔmɔ go ebul fɔ gi di “Yɔŋ Ship we de pul sin na di wɔl.” (Jɔn 1:​29) Bɔt Gɔd nɔ bin jɔs sɛn ɛni enjɛl fɔ sev mɔtalman. Bifo dat, i gi di Wan we go gi di bɛst ansa to di lay lay tɔk dɛn we Setan bin de tɔk bɔt Jiova in savant dɛn. Jiova mek di sakrifays we pas ɔl bay we i sɛn in wangren Pikin we “bin de mek i gladi ɛvride.” (Prɔvabs 8:​30) Gɔd in Pikin bin rɛdi fɔ “lɛf ɔltin we i gɛt” na ɛvin. (Filipians 2:​7) Jiova yuz mirekul fɔ transfa in fɔs Bɔypikin in layf ɛn in kwaliti dɛn na wan Ju vajin we nem Meri, in bɛlɛ. (Lyuk 1:​27, 35) As mɔtalman, dɛn go kɔl am Jizɔs. Bɔt akɔdin to lɔ, dɛn go kɔl am di sɛkɔn Adam, bikɔs i ikwal pafɛkt wan to Adam. (1 Kɔrintians 15:​45, 47) So Jizɔs go sakrifays in layf as di prayz fɔ fri mɔtalman.

¹⁴ Na to udat dɛn go pe di prayz fɔ fri mɔtalman? Sam 49:​7 tɔk klia wan se na to “PAPA GƆD.” Bɔt yu go de wɔnda, nɔto Jiova bin arenj fɔ pe di prayz fɔ fri mɔtalman? Yɛs, bɔt dis nɔto jɔs simpul tin, lɛk aw pɔsin de pul mɔni na wan pɔkit ɛn put na ɔda pɔkit. Wi fɔ ɔndastand se dis prayz nɔto lɛk we pɔsin de yuz mɔni fɔ pe fɔ sɔntin, bɔt i gɛt fɔ du wit lɔ. We Jiova mek arenjmɛnt fɔ mek pɔsin pe di prayz fɔ fri mɔtalman, pan ɔl we i go nid fɔ pe ay prayz, Jiova pruv se i de du tin akɔdin to in pafɛkt jɔstis.—Jɛnɛsis 22:​7, 8, 11-13; Ibruz 11:​17; Jems 1:​17.

15. Wetin mek nid bin de fɔ mek Jizɔs sɔfa ɛn day?

¹⁵ Insay di ia 33, Jizɔs Krays bin gri fɔ sɔfa so dat i go pe di prayz fɔ fri mɔtalman. I bin gri fɔ mek dɛn lay pan am we mek dɛn arɛst am, jɔj am se i gilti, ɛn dɛn nel am na stik fɔ mek i day. Yu tink se nid bin de fɔ lɛ Jizɔs sɔfa so pasmak wan? Yɛs, bikɔs dɛn nid fɔ sɛtul di chalenj we Setan bin chalenj di rizin we mek Gɔd in savant dɛn de waka tret wit am. So i impɔtant we Gɔd nɔ bin alaw Ɛrɔd fɔ kil Jizɔs di tɛm we i bin smɔl. (Matyu 2:​13-18) Bɔt we Jizɔs tɔn bigman, i bin ebul fɔ tinap tranga wan agens Setan in atak dɛn bikɔs i bin rili ɔndastand di prɔblɛm.b Jizɔs bin sho klia wan se Jiova gɛt savant dɛn we de kɔntinyu fɔ fetful to am pan ɔl we bad tin de mit dɛn. I du dat bay we i kɔntinyu fɔ bi pɔsin “we nɔ de kɔmɔt biɛn Gɔd, we inosɛnt, we nɔ dɔti, we difrɛn frɔm sina dɛn” pan ɔl we dɛn bin trit am bad. (Ibruz 7:​26) No wɔnda jɔs bifo Jizɔs day, i ala lawd wan se: “I dɔn dɔn!”—Jɔn 19:​30.

16, 17. (a) Aw Jizɔs kɔntinyu in wok fɔ fri mɔtalman? (b) Wetin mek nid bin de fɔ mek Jizɔs apia “bifo Gɔd fɔ wi sek”?

¹⁶ Jizɔs bin nid fɔ dɔn in wok fɔ fri mɔtalman. Di tɔd de afta Jizɔs day, Jiova gi am layf bak. (Akt 3:​15; 10:​40) We Jiova du dis impɔtant tin, i nɔ jɔs blɛs in Pikin fɔ we i fetful, bɔt I gi am di chans fɔ wok as Ay Prist so dat i go dɔn di wok fɔ fri mɔtalman. (Romans 1:​4; 1 Kɔrintians 15:​3-8) Di apɔsul Pɔl bin ɛksplen se: “We Krays kam as ay prist . . . , i go insay di oli ples, i nɔ go wit got dɛn blɔd ɛn yɔŋ man kaw dɛn blɔd, bɔt i go wit in yon blɔd; na wan tɛm nɔmɔ i du am, ɛn i dɔn mek wi fri sote go. Krays nɔ ɛnta na oli ples we dɛn mek wit an, we tan lɛk di rial wan, bɔt na insay ɛvin i go, ɛn apia naw bifo Gɔd fɔ wi sek.”—Ibruz 9:​11, 12, 24.

¹⁷ Krays nɔ bin kɛr in mɔtalman blɔd go na ɛvin. (1 Kɔrintians 15:​50) Bifo dat, i bin kɛr go wetin da blɔd de tinap fɔ, dat na di valyu fɔ in pafɛkt layf we i bin gɛt as mɔtalman. Dɔn we i go to Gɔd, i gi am di valyu ɔf di layf we i sakrifays fɔ fri mɔtalman. Jiova bin tek da sakrifays de? Yɛs, ɛn wi no dat bay wetin apin Pɛntikɔst insay di ia 33, we oli spirit kam pan 120 disaypul dɛn na Jerusɛlɛm. (Akt 2:​1-4) Pan ɔl we wetin bin apin bin mek di disaypul dɛn gladi, dat na bin jɔs wan pan di blɛsin dɛn we mɔtalman go gɛt frɔm di prayz we Gɔd pe fɔ fri wi.

18, 19. (a) Us tu grup dɛn dɔn ebul fɔ kam bak to Gɔd tru Krays in blɔd? (b) Wetin na sɔm pan di bɛnifit dɛn we di “bɔku bɔku pipul dɛn” de ɛnjɔy naw ɛn tumara bambay?

¹⁸ Insay di lɛta we Pɔl bin rayt to di Kristian dɛn we bin de na Kolose, i bin ɛksplen se Gɔd bin gladi fɔ mek ɔl ɔda tin dɛn kam bak to Am bay we I yuz Jizɔs in blɔd we i sakrifays fɔ mek pis. Pɔl bin ɛksplen bak se na tu difrɛn grup dɛn Gɔd bin briŋ kam bak to insɛf, dat na “di tin dɛn na ɛvin” ɛn “di tin dɛn na di wɔl.” (Koloshians 1:​19, 20; Ɛfishians 1:​10) Di fɔs grup na 144,000 Kristian dɛn we Gɔd dɔn gi di op fɔ bi prist dɛn na ɛvin ɛn we gɛt fɔ rul as kiŋ dɛn wit Krays Jizɔs. (Rɛvɛleshɔn 5:​9, 10; 7:​4; 14:​1-3) Fɔ wan tawzin ia, dɛn go mek pipul dɛn we de obe Gɔd bigin fɔ ɛnjɔy smɔl smɔl di bɛnifit dɛn we di prayz fɔ fri mɔtalman gɛt.—1 Kɔrintians 15:​24-26; Rɛvɛleshɔn 20:​6; 21:​3, 4.

¹⁹ “Di tin dɛn na di wɔl” na di wan dɛn we go ɛnjɔy pafɛkt layf na Paradays we go de na dis wɔl. Rɛvɛleshɔn 7:​9-17 se dɛn na di “bɔku bɔku pipul dɛn” we go sev insay di “big big trɔbul.” Bɔt dɛn nɔ nid fɔ wet te da tɛm de fɔ ɛnjɔy dɛn bɛnifit dɛn de. Dɛn dɔn ɔlrɛdi “was dɛn lɔng klos insay di Yɔŋ Ship in blɔd ɛn mek dɛn wayt.” Bikɔs dɛn sho se dɛn gɛt fet pan di prayz we Gɔd gi fɔ fri mɔtalman, ivin naw dɛn de gɛt spɛshal bɛnifit dɛn frɔm da prayz de. Gɔd de tek dɛn as in padi dɛn we de du wetin rayt! (Jems 2:​23) Jizɔs in sakrifays dɔn mek am pɔsibul fɔ lɛ dɛn “go bifo Gɔd in tron, di Gɔd we de gi spɛshal gudnɛs ɛn fil fri fɔ pre to am.” (Ibruz 4:​14-16) We dɛn sin, dɛn go gɛt tru tru fɔgivnɛs. (Ɛfishians 1:​7) Pan ɔl we dɛn nɔ pafɛkt, dɛn de ɛnjɔy klin kɔnshɛns. (Ibruz 9:​9; 10:​22; 1 Pita 3:​21) Fɔ kam bak to Gɔd, nɔto sɔntin we wi de op fɔ gɛt, bɔt na sɔntin we de apin naw! (2 Kɔrintians 5:​19, 20) Insay Krays in Wan Tawzin Ia Rul, smɔl smɔl dɛn “nɔ [go] bi slev igen to bɔdi we de rɔtin,” ɛn dɛn go “gɛt di wɔndaful fridɔm as Gɔd in pikin dɛn.”—Romans 8:​21.

20. We yu tink gud gud wan bɔt di prayz we Gɔd gi fɔ fri mɔtalman, aw dat de afɛkt yu?

²⁰ Lɛ wi “tɛl Gɔd tɛnki tru Jizɔs Krays” fɔ di prayz we i pe fɔ fri wi! (Romans 7:​25) I tan lɛk se di arenjmɛnt we Gɔd mek fɔ fri mɔtalman na simpul tin, bɔt i rili wɔndaful. (Romans 11:​33) Wi go sho se wi gladi fɔ di prayz we Gɔd gi fɔ fri mɔtalman bay we wi tek tɛm tink gud gud wan bɔt am. We wi du dat, i go tɔch wi at ɛn wi go kam nia wi Gɔd we lɛk jɔstis mɔ ɛn mɔ. Jɔs lɛk wan pan di man dɛn we rayt di sam buk, wi gɛt bɔku rizin dɛn fɔ prez Jiova bikɔs “i lɛk jɔstis, ɛn i lɛk fɔ du tin di rayt we.”—Sam 33:​5, NWT.