Wan Lɛta Frɔm Gɔd

DUYA tɛl mi, us buk na yu bɛst buk?— Sɔm pikin dɛn lɛk buk we de tɔk bɔt animal dɛn. Ɔda wan dɛn lɛk buk we gɛt bɔku pikchɔ. Wi kin ɛnjɔy fɔ rid dɛn buk dɛn de.

Bɔt di bɛst buk dɛn na di wan dɛn we de tɔk di tru tin bɔt Gɔd. Wan buk de we impɔtant pas ɔl dɛn ɔda buk dɛn. Yu no us buk dande?— Na di Baybul.

Wetin mek di Baybul rili impɔtant?— Na bikɔs na frɔm Gɔd i kɔmɔt. I de tɛl wi bɔt Gɔd ɛn di gud tin dɛn we i gɛt fɔ du fɔ wi. I de tɛl wi bak wetin wi fɔ du fɔ mek i gladi. I tan lɛk lɛta we Gɔd rayt to wi.

Gɔd bin fɔ dɔn rayt di Baybul na ɛvin ɛn gi am to mɔtalman. Bɔt i nɔ du dat. Pan ɔl we na Gɔd in mɛsej de insay di Baybul, i yuz in savant dɛn na dis wɔl fɔ rayt di tin dɛn we de insay di Baybul.

Aw Gɔd du dat?— Fɔ lɛ wi ebul fɔ no aw i du am, lɛ wi tink bɔt dis. We wi kin yɛri pɔsin in vɔys na redio, di pɔsin we de tɔk kin de fa fa say. We wi de wach tɛlivishɔn, wi kin ivin si pipul dɛn we de na ɔda kɔntri dɛn, ɛn wi kin yɛri wetin dɛn kin tɔk.

Mɔtalman kin ivin go na di mun, pan ɔl we i de fa fa say, ɛn dɛn kin de de ɛn sɛn mɛsej na di wɔl. Yu bin no dat?— If mɔtalman ebul fɔ du dat, yu nɔ tink se Gɔd ebul fɔ sɛn mɛsej frɔm ɛvin?— Yɛs, i ebul! Ɛn i bin dɔn du am lɔng lɔng tɛm bifo mɔtalman mek redio ɛn tɛlivishɔn.

Wan tɛm Mozis bin yɛri we Gɔd de tɔk. Mozis nɔ bin ebul fɔ si Gɔd, bɔt i bin yɛri Gɔd in vɔys. Bɔku bɔku pipul dɛn bin de de we dis bin apin. Infakt, da de de Gɔd mek wan big big mawnten trimbul, tɔnda bin de krak, ɛn laytin bin de flash. Di pipul dɛn bin no se na Gɔd de tɔk, bɔt dɛn bin de fred bad bad wan. So dɛn tɛl Mozis se: “Lɛ in tɔk to dɛn bikɔs dɛn go yɛri, bɔt if PAPA GƆD tɔk, dɛn go day.” Leta Mozis rayt di tin dɛn we Gɔd tɔk. Ɛn wetin Mozis rayt de insay di Baybul.—Ɛksodɔs 20:​18-21.

Na Mozis rayt di fɔs fayv buk dɛn na di Baybul. Bɔt nɔto in nɔmɔ rayt di Baybul. Gɔd yuz lɛk 40 man dɛn so fɔ rayt difrɛn pat dɛn na di Baybul. Dɛn man ya bin de na di wɔl trade trade, ɛn i te bifo dɛn dɔn fɔ rayt di Baybul. I tek lɛk 1,600 ia so bifo dɛn dɔn fɔ rayt di Baybul! Wan tin we kin mek wi sɔprayz na dat pan ɔl we dɛn man ya nɔ bin ɛva sabi dɛnsɛf, ɔltin we dɛn rayt gri, wan pɔsin nɔ rayt wan tin dɔn di ɔda wan rayt ɔda tin.

Sɔm pan di man dɛn we Gɔd yuz fɔ rayt di Baybul na man dɛn we bɔku pipul dɛn sabi. Fɔ ɛgzampul, Mozis na bin shɛpad, bɔt leta i bin bi lida fɔ di Izrɛlayt dɛn. Sɔlɔmɔn na bin kiŋ ɛn insay in tɛm, i bin jɛntri ɛn gɛt sɛns pas ɔlman na di wɔl. Bɔt bɔku pipul dɛn nɔ sabi sɔm ɔda pipul dɛn we Gɔd yuz fɔ rayt di Baybul. Lɛk Emɔs so, in bin de kia fɔ stik dɛn we de bia wan frut we dɛn kɔl fig.

Wan ɔda man we rayt di Baybul na bin dɔktɔ. Yu sabi in nem?— In nem na Lyuk. Wan ɔda man we Gɔd bin yuz fɔ rayt di Baybul bin de gɛda taks. In nem Matyu. Wan ɔda wan na bin lɔya; i bin rili sabi di Ju dɛn lɔ we i kam pan Gɔd biznɛs. I rayt bɔku buk dɛn na di Baybul pas ɛni ɔda pɔsin. Yu no in nem?— Na in nem Pɔl. Ɛn Jizɔs in disaypul dɛn we nem Pita ɛn Jɔn, dɛnsɛf rayt sɔm pat dɛn na di Baybul, ɛn dɛn na bin fishaman dɛn.

Bɔku pan dɛn man ya we rayt di Baybul rayt bɔt tin dɛn we Gɔd gɛt fɔ du tumara bambay. Aw yu fil se dɛn no bɔt dɛn tin ya bifo dɛn apin?— Na Gɔd bin de tɛl dɛn.

Bay di tɛm we Jizɔs bin de na di wɔl, dɛn bin dɔn rayt bɔku pat na di Baybul. Mɛmba se Jizɔs bin de na ɛvin. I bin no wetin Gɔd bin dɔn du. Yu tink se i bin biliv se na frɔm Gɔd di Baybul kɔmɔt?— Yɛs, i bin biliv.

We Jizɔs bin de tɔk to pipul dɛn bɔt di tin dɛn we Gɔd dɔn du, i bin de rid am na di Baybul. Sɔntɛnde i bin de tɛl dɛn wetin di Baybul se ɔfɛd. Jizɔs kam tɛl wi mɔ tin dɛn bɔt Gɔd. Jizɔs bin se: ‘A go tɛl di pipul dɛn na di wɔl wetin di wan we sɛn mi tɛl mi.’ (Jɔn 8:​26) Jizɔs bin dɔn yɛri bɔku tin dɛn frɔm Gɔd bikɔs i bin de wit am. Na insay us buk wi go rid di tin dɛn we Jizɔs bin se?— Na insay di Baybul. Dɛn rayt dɛn de fɔ lɛ wi rid am.

We Gɔd yuz mɔtalman dɛn fɔ rayt di Baybul, dɛn rayt am insay di langwej we pipul dɛn bin de tɔk ɛvride. So dɛn rayt bɔku pat na di Baybul insay Ibru, sɔm pat dɛn de insay Arameik, ɛn bɔku pat dɛn de bak insay Grik. Bɔku pipul dɛn tide nɔ no aw fɔ rid dɛn langwej ya, so dɛn dɔn rayt di Baybul insay ɔda langwej dɛn bak. Tide di wan ol Baybul ɔ sɔm pat pan am de insay pas 2,800 langwej dɛn. Jɔs tink bɔt dat! Di Baybul na lɛta we Gɔd rayt to ɔlman we de na di wɔl. So ilɛk ɔmɔs langwej dɛn dɔn rayt am insay, di mɛsej we de de na frɔm Gɔd i kɔmɔt.

Di tin dɛn we de insay di Baybul impɔtant fɔ wi ɔl. Pan ɔl we i dɔn te we dɛn rayt am, i de tɛl wi bɔt tin dɛn we de apin na di wɔl tide. Ɛn i de tɛl wi bak bɔt tin dɛn we Gɔd gɛt fɔ du tumara bambay. Di tin dɛn we de de rili fayn. I de gi wi op.

Di Baybul de tɛl wi bɔt aw Gɔd want mek wi liv wi layf. I de tɛl wi bɔt wetin gud ɛn wetin bad. Dis na tin we yu ɛn mi nid fɔ no. I de tɛl wi bɔt pipul dɛn we bin du bad tin ɛn wetin apin to dɛn so dat wi nɔ go gɛt di prɔblɛm dɛn we dɛn bin gɛt. I de tɛl wi bak bɔt pipul dɛn we bin du wetin gud ɛn di gud tin dɛn we apin to dɛn. Ɔl dɛn tin ya de na di Baybul fɔ wi yon bɛtɛ wan.

Bɔt fɔ lɛ wi bɛnifit frɔm di tin dɛn we de na di Baybul, wi fɔ no di ansa to wan impɔtant kwɛstyɔn. Di kwɛstyɔn na: Udat gi wi di Baybul?— Na tru, na Gɔd gi wi am. Bɔt aw wi go sho se wi rili gɛt sɛns?— Na we wi de lisin to Gɔd ɛn du wetin i se.

So wi fɔ fɛn tɛm fɔ rid di Baybul togɛda. We wi gɛt lɛta frɔm pɔsin we wi lɛk, wi kin rid am bɔku tɛm bikɔs di lɛta impɔtant to wi. Na so di Baybul insɛf fɔ impɔtant to wi bikɔs na lɛta we wi gɛt frɔm di Pɔsin we lɛk wi pas ɔlman. Na lɛta we kɔmɔt frɔm Gɔd we lɛk wi.