Mared Na Fayn Gift We Gɔd Dɔn Gi Wi

1, 2. (a) We wi kin si pipul dɛn we jɔs mared, wetin wi kin tink bɔt? Wetin mek wi kin tink bɔt dɛn tin dɛn de? (b) Us kwɛstyɔn dɛn wi go tɔk bɔt na dis chapta?

YU KIN gladi fɔ go pan mared? Bɔku pipul dɛn kin gladi fɔ go, bikɔs dɛn program ya kin fayn. Yu kin si di ɔkɔ ɛn di yawo drɛs fayn fayn wan. Bɔt nɔto dat nɔmɔ, yu kin si am na dɛn fes se, dɛn rili gladi! Da de de, dɛn kin jɔs de smayl, ɛn i kin tan lɛk se dɛn gɛt fɔ ɛnjɔy layf gud gud wan.

² Bɔt yu go gri se bɔku kɔnfyushɔn de insay mared tide. We wi kin si pipul dɛn we jɔs mared, wi kin want mek dɛn mared kɔmɔt fayn, bɔt wi kin bigin tink bɔt dɛn kwɛstyɔn ya: ‘Dɛn go gɛt gladi at na dɛn mared? Dɛn mared go las?’ I lɛf to di maredman ɛn di mareduman fɔ ansa dɛn kwɛstyɔn ya, bay di we aw dɛn de abop pan Gɔd ɛn bay di we aw dɛn de du wetin Gɔd se mared pipul dɛn fɔ du. (Rid Prɔvabs 3:5, 6.) Dɛn fɔ du dis fɔ mek Gɔd kɔntinyu fɔ lɛk dɛn. Naw, lɛ wi tɔk bɔt aw di Baybul ansa dɛn 4 kwɛstyɔn ya: Wetin mek pɔsin kin want fɔ mared? If yu want mared, udat yu go mared to? Aw yu go rɛdi yusɛf fɔ mared layf? Ɛn wetin go ɛp mared pipul dɛn fɔ ɛnjɔy dɛn mared?

 3. Wetin mek i nɔ fayn fɔ mek pɔsin mared fɔ rizin we nɔ impɔtant?

³ Sɔm pipul dɛn fil se wan men tin we de mek pɔsin gladi, na mared. Dɛn kin fil se pas dɛn mared bifo dɛn gɛt gladi at. Bɔt dat nɔto tru! Jizɔs na pɔsin we nɔ bin mared. I bin tɔk se di wan dɛn we nɔ mared, gɛt gift ɛn i bin ɛnkɔrej dɛn fɔ lɛf so, if dɛn ebul. (Matyu 19:11, 12) Di apɔsul Pɔl insɛf bin tɔk bɔt di bɛnifit dɛn we pɔsin go gɛt if i nɔ mared. (Fɔs Lɛta Fɔ Kɔrint 7:32-38) Bɔt Jizɔs ɛn Pɔl nɔ bin pas lɔ se pawpa pɔsin nɔ fɔ mared. Di Baybul ivin se ɛnibɔdi we de tich se i nɔ fayn fɔ mared, de tich sɔntin we kɔmɔt frɔm dɛn “dɛbul” dɛn. (Fɔs Lɛta To Timoti 4:1-3) Di wan dɛn we nɔ mared, gɛt plɛnti bɛnifit if dɛn nɔ want fɔ mek natin stɔp dɛn fɔ put ɔl dɛn at fɔ du Jiova in wok. So i nɔ go fayn fɔ mek pɔsin mared fɔ rizin we nɔ impɔtant. Dis min se pɔsin nɔ fɔ jɔs mared bikɔs in kɔmpin dɛn de mared.

 4. Aw gud mared kin mek pikin dɛn gro fayn?

⁴ Bɔt naw, pɔsin go aks se, gud rizin dɛn de we go mek pɔsin mared? Yɛs, gud rizin dɛn de. Mared sɛf na fayn gift we Gɔd dɔn gi wi. (Rid Jɛnɛsis 2:18.) So i gɛt sɔm bɛnifit dɛn ɛn i kin ivin briŋ kam bɔku blɛsin. Fɔ ɛgzampul, na gud mared go mek pɔsin ɛnjɔy famili layf. Pikin dɛn nid fɔ gro na gud famili wit dɛn mama ɛn papa we lɛk dɛn, we de tren dɛn ɛn we de sho dɛn wetin fɔ du. (Sam 127:3; Lɛta Fɔ Ɛfisɔs 6:1-4) Bɔt nɔto fɔ bɔn pikin nɔmɔ mek pɔsin fɔ mared.

5, 6. (a) Us bɛnifit Ɛkliziastis 4:9-12 tɔk bɔt we i kam pan tayt padi biznɛs? (b) Aw mared go tan lɛk tri rop we dɛn tay togɛda?

⁵ Lɛ wi tɔk bɔt di men skripchɔ na dis chapta ɛn di vas dɛn we de nia am. I se: “I bɛtɛ fɔ tu pipul fɔ wok pas wan, bikɔs dɛn go gɛt bɛtɛ bɛnifit fɔ dɛn wok. Bikɔs if wan pɔsin fɔdɔm, di ɔda wan go es am ɔp; bɔt trɔbul go mit di wan we in wangren de wok; we i go fɔdɔm, nɔbɔdi nɔ go de fɔ es am. Ɛn if dɛn tu pipul lidɔm togɛda, kol nɔ go kech dɛn; bɔt i nɔ pɔsibul fɔ lidɔm yu wan ɛn kol nɔ kech yu. If pɔsin atak wan pɔsin, i go ebul bit am. Bɔt if na dɛn tu di pɔsin atak, dɛn go ebul bit di wan we atak dɛn. Tri rop go at fɔ kɔt.”​—Ɛkliziastis 4:9-12.

⁶ Dis skripchɔ de tɔk mɔ bɔt aw i fayn fɔ gɛt padi. Na insay mared, pɔsin go gɛt in tayt tayt padi. Lɛk aw dis skripchɔ tɔk, di padi biznɛs we de insay mared kin mek di man ɛn in wɛf ɛp dɛnsɛf, ɛnkɔrej dɛnsɛf ɛn protɛkt dɛnsɛf. Mared go fayn mɔ if di man ɛn in wɛf ad wan ɔda impɔtant pɔsin insay di mared. Di we aw di vas tɔk, sho se tu rop go izi fɔ kɔt. Bɔt tri rop we dɛn tay togɛda go at fɔ kɔt. If maredman ɛn mareduman de put Jiova fɔs na dɛn layf, dɛn mared go tan lɛk da tri rop we dɛn tay togɛda. We di maredman ɛn in wɛf tek Jiova in biznɛs siriɔs, dɛn mared go las.

7, 8. (a) Us advays Pɔl bin gi di wan dɛn we nɔ mared? (b) Wetin di Baybul se we ɛp wi fɔ no aw mared rili tan lɛk?

⁷ Na pipul dɛn we dɔn mared nɔmɔ Gɔd de alaw fɔ du mami ɛn dadi biznɛs ɛn ɛnjɔy dɛnsɛf. Na insay mared, Gɔd se pipul dɛn fɔ si mami ɛn dadi biznɛs as tin we dɛn fɔ ɛnjɔy. (Prɔvabs 5:18) We pɔsin yɔŋ, tɛm kin de we i kin fil fɔ du mami ɛn dadi biznɛs bad bad wan. Bɔt ivin we i kin dɔn pas da tɛm de, i kin stil de gɛt dɛn filin dɛn de. If i nɔ kɔntrol dɛn filin dɛn de, i go mek i du dɔti ɔ bad bad tin. Gɔd bin tɛl Pɔl fɔ rayt sɔntin bɔt dɛn wan dɛn we nɔ mared. I bin se: “If una nɔ ebul kɔntrol unasɛf, una fɔ mared: i bɛtɛ fɔ mared pas fɔ sɔfa bikɔs una want man ɔ uman bad bad.”​—Fɔs Lɛta Fɔ Kɔrint 7:9, 36; Jems 1:15.

⁸ Plɛnti rizin de we mek pɔsin kin want fɔ mared, bɔt ilɛk uskayn rizin yu gɛt, i go fayn fɔ mek yu tink bɔt wetin rili de insay mared. Pɔl bin se di wan dɛn we mared kin gɛt “trɔbul.” (Fɔs Lɛta Fɔ Kɔrint 7:28) Di prɔblɛm dɛn we kin mit di wan dɛn we mared nɔ kin mit di wan dɛn we nɔ mared. If yu disayd fɔ mared, wetin yu go du fɔ mek yu nɔ gɛt bɔku prɔblɛm dɛn, ɛn wetin yu go du fɔ mek yu gɛt plɛnti blɛsin ɛn kolat na yu mared? Wan tin we yu go du, na fɔ tek tɛm pik udat yu go mared to.

9, 10. (a) Us advays Pɔl bin gi fɔ sho se i nɔ fayn fɔ mek Kristian mared pɔsin we nɔ de sav Jiova? (b) Wetin kin apin to di wan dɛn we kin mared pɔsin we nɔ de sav Jiova?

⁹ Gɔd bin tɛl Pɔl fɔ rayt wan impɔtant tin we pɔsin fɔ du we i de fɛn udat fɔ mared. I se: “Una nɔ fɔ jɔyn an wit dɛn pipul we nɔ biliv Gɔd.” (Sɛkɛn Lɛta Fɔ Kɔrint 6: 14) If yu tay tu animal dɛn we nɔ gɛt di sem ayt ɛn trɛnk, fɔ wok togɛda, wetin go apin? Dɛn ɔl tu go sɔfa. Semweso, if pɔsin we de sav Jiova, mared to pɔsin we nɔ de sav Jiova, wetin yu fil se go apin? Dɛn go gɛt bɔku prɔblɛm na dɛn mared-os. If wan pan dɛn want fɔ du wetin Jiova want, bɔt di ɔda wan nɔ de tek dat siriɔs, dis kin mek dɛn gɛt bɔku kɔnfyushɔn ɛn palava na dɛn mared-os. Wetin mek dis kin apin? I kin apin bikɔs dɛn ɔl tu nɔ de si wan we. Na dat mek Pɔl tɔk se, if Kristian want fɔ mared, di pɔsin we i fɔ mared to “fɔ bi Kristiɛn.”​—Fɔs Lɛta Fɔ Kɔrint 7:39.

¹⁰ Sɔm Kristian dɛn we nɔ mared yet kin fil se, i bɛtɛ fɔ mared pɔsin we nɔto Kristian pas fɔ de so nɔmɔ in wangren. Sɔm kin disayd nɔ fɔ du wetin di Baybul se, ɛn mared to pɔsin we nɔ de sav Jiova. Bɔt plɛnti tɛm, dɛn mared nɔ kin kɔmɔt fayn. Di wan dɛn we kin du dis, nɔ kin ebul du di tin dɛn we impɔtant na layf wit di pɔsin we dɛn mared to. Di tɛm we yu go spɛn yu wangren, go pas di wan we yu bin de spɛn di tɛm we yu nɔ bin dɔn mared yet. Bɔt plɛnti Kristian dɛn de we nɔ mared yet, we de stil du wetin Gɔd in Wɔd se we i kam pan mared. (Rid Sam 32:8.) Dɛn op se wande wande dɛn go mared, bɔt dɛn de wet te dɛn gɛt pɔsin we insɛf de wɔship Jiova.

11. Wetin go ɛp yu fɔ fɛn gud pɔsin fɔ mared? (Rid di bɔks we se “Wetin A De Luk fɔ Pan Pɔsin we A Want Mared?”)

¹¹ Bɔt dis nɔ min se yu fɔ mared to ɛnibɔdi bikɔs i de sav Jiova. If yu want fɔ mared, na fɔ fɛn pɔsin we rili lɛk Jiova. Ɛn fɛn pɔsin we in abit dɛn, ɛn aw i want yuz in layf fɔ sav Jiova, gri wit yu yon. Di fetful slev dɔn rayt ɛn print bɔku tin dɛn bɔt mared we go ɛp wi. I go fayn mek yu pre ɛn rid dɛn tin ya, ɛn yuz di tin dɛn we yu dɔn lan fɔ ɛp yu fɔ disayd udat yu go mared.a—Rid Sam 119:105.

12. Na plɛnti ples dɛn, wetin mama ɛn papa dɛn kin du we dɛn pikin want fɔ mared? Us fayn ɛgzampul de na di Baybul we go gayd mama ɛn papa dɛn bɔt dis?

¹² Na plɛnti ples dɛn, na mama ɛn papa dɛn kin pik man ɔ wɛf fɔ dɛn pikin dɛn. Bɔku pipul dɛn we de na dɛn say dɛn de, kin gri se dɛn mama ɛn papa dɛn gɛt sɛns pas dɛn ɛn dɛn sabi bɔku tin na layf pas dɛn, so dɛn go ebul fɔ pik gud pɔsin fɔ dɛn fɔ mared. Bɔku tɛm, dɛn mared ya kin kɔmɔt fayn jɔs lɛk aw i bin de bi trade trade. Fɔ ɛgzampul, Ebraam bin sɛn in savant fɔ go fɛn wɛf fɔ in pikin we na Ayzak. Dis na fayn ɛgzampul fɔ mama ɛn papa dɛn we go want fɔ du di sem tin. We Ebraam bin de fɛn wɛf fɔ in pikin, i nɔ bin de luk fɔ mɔni ɔ pɔsin we gɛt ay pozishɔn. Bifo dat, i du ɔlkayn tin fɔ fɛn gud wɛf fɔ in pikin. We min se i fɛn wɛf we de wɔship Jiova.b​—Jɛnɛsis 24:3, 67.

13-15. (a) Aw Prɔvabs 24:27 go ɛp man we want mared? (b) Wetin uman go du fɔ rɛ di insɛf fɔ mared?

¹³ If yu want fɔ mared, i go fayn mek yu aks yusɛf dis kwɛstyɔn, ‘A rili rɛdi fɔ mared?’ Nɔto jɔs wetin yu de tink bɔt lɔv, mami ɛn dadi biznɛs, kip kɔmpin, ɔ fɔ bɔn pikin, go mek yu no if yu rili rɛdi fɔ mared. Bifo dat, ɛni man ɔ uman we want fɔ mared fɔ tink bɔt di tin dɛn we i gɛt fɔ du na di mared-os.

¹⁴ If man de luk fɔ wɛf, i fɔ tink gud wan bɔt dis tin we di Baybul se: “Mek yu plan gud, mek yu fam ɛn plant bifo yu de se yu de bil os.” (Prɔvabs 24:27) Wetin dis vas de tray fɔ tɛl wi? Insay dis vas, fɔ “bil os” min fɔ mared ɛn bɔn pikin dɛn. Trade trade, we man kin want fɔ mared ɛn bɔn pikin dɛn, i fɔ aks insɛf dis kwɛstyɔn: ‘A rɛdi fɔ kia fɔ ɛn sɔpɔt mi wɛf ɛn di pikin dɛn we wi go bɔn tumara bambay?’ Di fɔs tin we di man gɛt fɔ du, i gɛt fɔ mek fam fɔs. Semweso tide, pɔsin we want fɔ mared fɔ rɛdi fɔ kia fɔ in wɛf ɛn pikin dɛn. Di man fɔ wok, wans i gɛt wɛlbɔdi. Gɔd in Wɔd tɔk se man we nɔ kia fɔ in famili wɔs pas pɔsin we nɔ biliv pan Gɔd wande. Di man fɔ gi dɛn tin fɔ it ɛn ɔda tin dɛn we dɛn nid, i fɔ no aw dɛn de fil, ɛn i fɔ tich dɛn bɔt Gɔd.​—Rid Fɔs Lɛta To Timoti 5:8.

¹⁵ Ɛni uman we disayd fɔ mared dɔn gri fɔ du bɔku tin. Di Baybul tɔk bɔt sɔm tin dɛn we mareduman fɔ du ɛn sɔm fayn abit dɛn we i fɔ gɛt fɔ ɛp in man ɛn kia fɔ di famili. (Prɔvabs 31:10-31) Pipul dɛn we de ɔri ɔri fɔ mared ɛn we nɔ de tink bɔt wetin dɛn gɛt fɔ du insay mared, de sho se dɛn jɔs de tink bɔt dɛnsɛf nɔmɔ, ɛn dɛn nɔ de tink bɔt wetin dɛn gɛt fɔ du fɔ di pɔsin we dɛn gɛt fɔ mared to. Bɔt di tin we impɔtant pas ɔl, ɛnibɔdi we want fɔ mared gɛt fɔ rɛdi fɔ du wetin Gɔd want mared pipul dɛn fɔ du.

16, 17. Us skripchɔ dɛn di wan dɛn we want mared fɔ tink bɔt?

¹⁶ Fɔ rɛdi fɔ mared min fɔ tink gud gud wan bɔt wetin Gɔd dɔn tɛl maredman ɛn mareduman fɔ du. Di man gɛt fɔ no wetin i min fɔ de oba ɔlman na di famili. Bɔt dis nɔ gi am di rayt fɔ wikɛd in famili. Bifo dat, i fɔ falamakata di we aw Jizɔs bin de trit di wan dɛn we bin de fala am. (Lɛta Fɔ Ɛfisɔs 5:23) Semweso, uman fɔ no di fayn wok we i gɛt na di famili. Di uman fɔ aks insɛf dis kwɛstyɔn, ‘A rɛdi fɔ put misɛf ɔnda mi man we na in Gɔd dɔn put oba mi?’ (Fɔs Lɛta Fɔ Kɔrint 11:3) I fɔ mɛmba bak se, i de ɔnda wetin Jiova ɛn Jizɔs tɛl am fɔ du. (Lɛta Fɔ Galeshya 6:2) So we i mared, i go gɛt fɔ de ɔnda wan ɔda pɔsin bak, we na in man. I fɔ aks insɛf se, ‘A go rɛdi fɔ sɔpɔt mi man ɛn put misɛf ɔnda am, pan ɔl we mi man nɔ pafɛkt?’ If i nɔ rɛdi fɔ du dat, i nɔ fɔ mared.

¹⁷ Ɛnibɔdi we mared, fɔ rɛdi fɔ gi in kɔmpin di spɛshal tin dɛn we i go nid. (Rid Lɛta Fɔ Filipay 2:4.) Pɔl bin rayt se: “Ɛvri man we mared fɔ lɛk in wɛf lɛkɛ aw i lɛk insɛf, ɛn ɔl mared uman fɔ rɛspɛkt in man.” Gɔd in spirit bin ɛp Pɔl fɔ no se man dɛn gɛt wan spɛshal tin we dɛn want lɛ uman du fɔ dɛn, dat na fɔ rɛspɛkt dɛn. Ɛn uman dɛnsɛf gɛt wan spɛshal tin we dɛn want mek man dɛn du fɔ dɛn, dat na fɔ lɛk dɛn.​—Lɛta Fɔ Ɛfisɔs 5:21-33.

18. Wetin mek pipul dɛn we de wach dɛnsɛf fɔ mared, fɔ kɔntrol dɛnsɛf?

¹⁸ We man ɛn uman kin de wach dɛnsɛf fɔ mared, dɛn kin de spɛn tɛm togɛda. Bɔt dɛn nɔ fɔ jɔs yuz da tɛm de, fɔ ɛnjɔy dɛnsɛf. Na tɛm we di man ɛn di uman fɔ lan aw fɔ trit dɛnsɛf fayn, ɛn fɔ si if i go fayn fɔ mek dɛn mared. Ɛn na tɛm bak fɔ mek dɛn kɔntrol dɛnsɛf. Wetin mek? Bikɔs we tu pipul dɛn lɛk dɛnsɛf, if dɛn nɔ tek tɛm, dɛn go want fɔ du sɔntin we na mared pipul dɛn nɔmɔ fɔ du. Bɔt, if dɛn lɛk dɛnsɛf tru tru wan, dɛn nɔ go du ɛnitin we go ambɔg dɛn kɔmpin in padi biznɛs wit Gɔd. (Fɔs Lɛta Fɔ Tɛsalonayka 4:6) So if yu ɛn sɔmbɔdi de wach unasɛf fɔ mared, tray fɔ kɔntrol yusɛf. If yu ebul kɔntrol yusɛf, dat go ɛp yu we yu de liv yu layf, ilɛksɛf yu mared ɔ yu nɔ mared.

19, 20. Aw di we we Kristian dɛn de si mared fɔ difrɛn frɔm di we aw pipul dɛn de si am? Gi ɛgzampul.

¹⁹ If man ɛn uman want mek dɛn mared las, dɛn fɔ no wetin i rili min fɔ de biɛn di pɔsin we dɛn want fɔ mared. Insay dɛn stori buk ɛn fim dɛn, di stori kin dɔn we di man ɛn di uman mared. Na pan stori buk ɛn fim dɛn nɔmɔ dis kin apin. Bɔt mared nɔto di ɛnd, na di biginin. Mared na tin we Jiova mek fɔ las. (Jɛnɛsis 2:24) Bɔt o-ya, nɔto so pipul dɛn de si mared na di wɔl tide. Insay sɔm kɔntri dɛn, pipul dɛn kin tɔk se mared na lɛk rop we dɛn tay togɛda. Dɛn nɔ kin no se dis tɔk we dɛn kin tɔk de sho aw bɔku pipul de tink bɔt mared. Na tru se ɛni rop we dɛn tay, fɔ de togɛda ɔltɛm, bɔt wi fɔ no bak se i kin izi fɔ tay ɛn i kin izi fɔ lus.

²⁰ Bɔku pipul dɛn kin si mared as tin we nɔ fɔ las. Dɛn kin go insay de bikɔs dɛn fil se i go gi dɛn wetin dɛn want, bɔt dɛn kin rɛdi fɔ kɔmɔt de we dɛn gɛt bɔku prɔblɛm dɛn. Yu mɛmba we di Baybul bin se mared tan lɛk rop? Di rop we dɛn kin mek fɔ dɛn ship we de na wata, kin trɔŋ ɛn i kin las. Dɛn nɔ kin mek am fɔ lɛ i cham-cham ɔ pwɛl ilɛk uskayn briz mit am na wata. Semweso, Gɔd mek mared fɔ lɛ i las. Jizɔs bin se: “Mek nɔbɔdi nɔ pat man ɛn uman we Gɔd dɔn jɔyn lɛkɛ wan pɔsin.” (Matyu 19:6) If yu want fɔ mared, yu fɔ tink bɔt mared di sem we. Bɔt yu fil se dis go mek mared nɔ swit? Nɔ.

21. Aw maredman ɛn mareduman fɔ si dɛnsɛf? Wetin go ɛp dɛn fɔ du dat?

²¹ Di maredman ɛn di mareduman fɔ si dɛnsɛf di we aw Gɔd want lɛ dɛn si dɛnsɛf. If dɛn ɔl tu tray fɔ si di gud abit ɛn tin dɛn we dɛn kɔmpin de du, i go ɛp fɔ mek dɛn ɛnjɔy dɛn mared-os ɛn dɛn go gɛt kolat. Yu fil se i bad fɔ tink dis kayn we bɔt yu man ɔ yu wɛf, pan ɔl we i nɔ pafɛkt? Jiova nɔ de fil se dis na bad tin, ɛn wi biliv se i de tink gud bɔt wi pan ɔl we wi nɔ pafɛkt. Na dat mek wan pɔsin we rayt sɔm pat dɛn na di Sam buk bin tɔk se: “PAPA GƆD, if yu bin de kɔnt ɔl di bad we wi de du, PAPA GƆD, udat fit fɔ tinap bifo yu?” (Di Sam Dɛm 130:3) Maredman ɛn mareduman dɛn fɔ tink gud tin bɔt dɛnsɛf, ɛn dɛn fɔ de fɔgiv dɛnsɛf.​—Rid Lɛta Fɔ Kɔlɔse 3:13.

22, 23. Aw Ebraam ɛn Sera dɛn ɛgzampul na gud ɛgzampul fɔ mared pipul dɛn tide?

²² Di mɔ we mared de te, na di mɔ i de kam wit gladi at. Di Baybul tɔk bɔt Ebraam ɛn Sera dɛn mared di tɛm we dɛn bin dɔn ol. Yu tink se dɛn layf nɔ bin gɛt wan prɔblɛm? Nɔ, dɛn bin gɛt prɔblɛm dɛn. Fɔ ɛgzampul, tink bɔt aw i nɔ bin izi fɔ Sera we i bin dɔn pas 60 ia fɔ lɛf di fayn fayn os we i bin de na wan tɔŋ we dɛn kɔl Ɔ ɛn go de na tɛnt te i day. Bɔt, pan ɔl dis, i bin put insɛf ɔnda in man. Sera bin de ɛp ɛn sɔpɔt Ebraam, ɛn i bin de ɛp fɔ mek wetin Ebraam plan fɔ du, kɔmɔt fayn. Sera nɔ bin jɔs de rɛspɛkt in man usay pipul dɛn de si. Ivin “nain at,” i bin de kɔl in man, masta. (Jɛnɛsis 18:12; Pita In Fɔs Lɛta 3:6)c Di rɛspɛkt we i bin gɛt fɔ Ebraam bin kɔmɔt na in at.

²³ Bɔt dat nɔ min se Ebraam ɛn Sera bin de si ɔltin di sem we. Wan tɛm, i bin tɛl Ebraam fɔ du sɔntin we bin “mɔna Ebraam bad.” Bɔt Jiova bin tɛl Ebraam fɔ lisin to in wɛf, so Ebraam bin put insɛf dɔŋ ɛn du wetin in wɛf se. Dis bin mek ɔlman na di famili gladi. (Jɛnɛsis 21:9-13) Ɔlman we dɔn mared; ivin di wan dɛn we dɔn mared fɔ lɔng tɛm kin lan bɔku tin frɔm Ebraam ɛn Sera dɛn mared.

24. Uskayn mared kin mek pipul dɛn prez Jiova Gɔd? Wetin mek dɛn mared ya kin mek pipul dɛn prez Jiova?

²⁴ Insay di kɔngrigeshɔn tide, plɛnti pipul dɛn dɔn mared ɛn dɛn gɛt gladi at na dɛn mared-os. Wetin mek? Na bikɔs di uman dɛn rili de rɛspɛkt dɛn man dɛn, di man dɛn lɛk dɛn wɛf dɛn ɛn dɛn de ɔna dɛn, ɛn dɛn ɔl de tray tranga wan fɔ put Jiova in biznɛs fɔs na dɛn layf. If yu disayd fɔ mared, tek tɛm pik udat yu go mared, rɛdi gud gud wan fɔ mared layf, ɛn du ɔl wetin yu ebul fɔ du fɔ mek kolat ɛn lɔv de na yu mared-os. Dat kin mek ɔda pipul dɛn prez Jiova ɛn i go mek Gɔd kɔntinyu fɔ lɛk yu.