Wɔship Gɔd Di Rayt We

 1. Udat go tɛl wi di rayt we fɔ wɔship Gɔd?

BƆKU rilijɔn dɛn de tɔk se dɛn de tich di tru tin bɔt Gɔd. Bɔt dat nɔ pɔsibul bikɔs, rilijɔn dɛn de tich difrɛn tin dɛn bɔt udat Gɔd bi ɛn aw wi fɔ wɔship am. Aw wi go no di rayt we fɔ wɔship Gɔd? Na Jiova nɔmɔ go ebul tɛl wi aw fɔ wɔship am.

 2. Aw yu go ebul lan di rayt we fɔ wɔship Gɔd?

² Jiova dɔn gi wi di Baybul so dat wi go lan aw fɔ wɔship am di rayt we. So we yu stɔdi di Baybul, Jiova go ɛp yu fɔ bɛnifit frɔm di tin dɛn we i de tich yu bikɔs i bisin bɔt yu.—Ayzaya 48:​17.

 3. Wetin Gɔd want wi fɔ du?

³ Sɔm pipul dɛn se Gɔd gri wit ɔl rilijɔn, bɔt nɔto so Jizɔs bin tich wi. I se: “Nɔto ɔlman we de kɔl mi, ‘Masta, Masta’ go go usay Gɔd de rul na ɛvin. Na dɛn wan nɔmɔ we du wetin mi Papa, we de na ɛvin, want, go go de.” So i fayn fɔ mek wi lan bɔt wetin Gɔd want ɛn du am. Dis rili impɔtant bikɔs Jizɔs bin se di wan dɛn we nɔ de obe Gɔd tan lɛk pipul dɛn we de “du bad.”—Matyu 7:​21-23.

 4. Wetin Jizɔs bin se bɔt pɔsin we de du wetin Gɔd want?

⁴ Jizɔs bin wɔn wi se i nɔ go rili izi fɔ wi we want fɔ du wetin Gɔd want. I se: “Una pas na di smɔl get, bikɔs if una pas na di get we big ɛn fri, i go mek una day, ɛn bɔku pipul dɛn de waka de; bɔt di get we go gi layf, in smɔl ɛn i at fɔ waka, ɛn na wan wan pipul dɛn de fɛn am.” (Matyu 7:​13, 14, NW) Di rod we at fɔ waka, ɔ di rayt we fɔ wɔship Gɔd, go mek pipul gɛt layf we go de sote go. Di big rod, ɔ di rɔŋ we fɔ wɔship Gɔd go mek pipul dɛn day. Bɔt Jiova nɔ want mek ɛnibɔdi day. I de gi ɔlman di chans fɔ lan bɔt am.—Pita In Sɛkɔn Lɛta 3:​9, NW.

 5. Aw yu go ebul no di wan dɛn we de wɔship Gɔd di rayt we?

⁵ Jizɔs se wi go ebul no di wan dɛn we de wɔship Gɔd di rayt we. Wi go du dis bay we wi chɛk di tin dɛn we dɛn biliv ɛn di tin dɛn we dɛn de du. I se: “Una go no dɛn bay wetin dɛn de du.” Ɛn i tɔk bak se: “Tik we gud go bia gud tin fɔ it.” (Matyu 7:​16, 17) Dis nɔ min se di wan dɛn we de wɔship Gɔd pafɛkt. Bɔt Gɔd in savant dɛn kin tray fɔ du wetin rayt ɔltɛm. Naw wi de kam tɔk bɔt wetin go ɛp wi fɔ no di wan dɛn we de wɔship Gɔd di rayt we.

6, 7. Wetin mek na di Baybul go ɛp wi fɔ wɔship Gɔd di rayt we? Wetin wi go lan frɔm Jizɔs in ɛgzampul?

⁶ Wi fɔ yuz di Baybul we wi de wɔship. Di Baybul se: “Na Gɔd tɛl pipul ɔltin we rayt nain Buk, ɛn ɔl dɛn tin de gud fɔ mek pipul lan di tru tin, fɔ mek dɛn no dɛn tin we dɛn de du we nɔ rayt, fɔ mek dɛn wan we nɔ de du rayt bigin du wetin rayt, ɛn fɔ tɛl dɛn aw fɔ liv di layf we Gɔd want dɛn fɔ liv, so dat ɛnibɔdi we de du Gɔd wok go gɛt ɔl wetin i fɔ gɛt ɛn bi wetin i fɔ bi so dat i go ebul du ɔl kayn gud wok lɛkɛ aw i fɔ du am.” (Sɛkɛn Lɛta To Timoti 3:​16, 17) Di apɔsul Pɔl bin rayt to di Kristian dɛn se: “Wɛn wi tɛl una Gɔd in mɛsej, una lisin ɛn una biliv se nɔto mɛsej we mɔtalman briŋ, bɔt na Gɔd in wɔd ɛn na Gɔd in wɔd fɔ tru.” (Fɔs Lɛta Fɔ Tɛsalonayka 2:​13) Wi go wɔship Gɔd di rayt we if wi fala wetin de na in Wɔd, di Baybul. Nɔto di we aw mɔtalman de tink, di tin dɛn we wi bɔn mit, ɔ ɛni ɔda tin go ɛp wi fɔ wɔship Gɔd di rayt we.

⁷ Ɔltin we Jizɔs bin de tich kɔmɔt frɔm Gɔd in Wɔd. (Rid Jɔn 17:​17.) Bɔku tɛm i bin de kot frɔm di Skripchɔ. (Matyu 4:​4, 7, 10) Di wan dɛn we de wɔship Gɔd di rayt we de fala Jizɔs in ɛgzampul ɛn ɔl wetin dɛn de tich kɔmɔt frɔm di Baybul.

 8. Wetin Jizɔs bin tich wi bɔt aw fɔ wɔship Jiova?

⁸ Na Jiova nɔmɔ wi fɔ wɔship. Sam 83:​18 (NW) se: “Lɛ pipul dɛn no se, yu we nem Jiova, na yu wangren de oba ɔlman na di wɔl.” Jizɔs bin want mek pipul dɛn rili no udat na di tru Gɔd, ɛn i bin de tich pipul dɛn bɔt Gɔd in nem. (Rid Jɔn 17:​6, NW.) Jizɔs bin se: “Pɔsin fɔ nil dɔŋ bifo Gɔd [“Jiova,” NW] we nain Masta ɛn pre to am ɛn nain nɔmɔ i fɔ wok fɔ.” (Matyu 4:​10) So as Gɔd in savant dɛn, wi fɔ falamakata Jizɔs in ɛgzampul. Na Jiova nɔmɔ wi de wɔship, wi de yuz in nem, wi de tich ɔda pipul dɛn bɔt in nem ɛn wetin i go du fɔ wi.

9, 10. Aw wi go sho se wi lɛk wi kɔmpin dɛn?

⁹ Wi nid fɔ lɛk pipul dɛn wit ɔl wi at. Jizɔs bin tich in disaypul dɛn fɔ lɛk dɛnsɛf. (Rid Jɔn 13:​35.) I nɔ mata usay wi kɔmɔt, wi kɔlchɔ, ɔ if wi po ɔ wi jɛntri. Di lɛk we wi lɛk wisɛf fɔ mek wi gɛt wanwɔd as brɔda ɛn sista dɛn. (Lɛta Fɔ Kɔlɔse 3:​14) So na dat mek wi nɔ de fɛt wɔ ɛn kil ɔda pipul dɛn. Di Baybul se: “Gɔd in pikin dɛn ɛn Setan in pikin dɛn difrɛn: ɛnibɔdi we nɔ de du wetin rayt ɛn we nɔ lɛk in kɔmpin, nɔto Gɔd in yon pikin.” Ɛn i tɔk bak se: “Wi fɔ lɛk wi kɔmpin mɔtalman; Wi nɔ fɔ tan lɛk Ken we bin kil in brɔda; Ken bin [de to] Setan.”—Jɔn In Fɔs Lɛta 3:​10-12; 4:​20, 21.

¹⁰ Wi de yuz wi tɛm, wi trɛnk, ɛn di tin dɛn we wi gɛt fɔ ɛp ɛn ɛnkɔrej wisɛf. (Di Ibru Pipul Dɛn 10:​24, 25) Wi de “du gud to ɔlman.”—Lɛta Fɔ Galeshya 6:​10.

11. Wetin mek wi fɔ gri se na tru Jizɔs wi fɔ pas fɔ go to Gɔd?

¹¹ Wi nid fɔ obe Jizɔs bikɔs na tru am wi fɔ pas fɔ go to Gɔd. Di Baybul se: “Nɔbɔdi nɔ de na [di] wɔl we ebul sev pɔsin; na Jizɔs nɔmɔ ebul sev pɔsin.” (Di Apɔsul Dɛn Wok [Akt] 4:​12) Insay Chapta 5 na dis buk, wi bin lan se Jiova sɛn Jizɔs na dis wɔl fɔ gi in layf fɔ sev mɔtalman dɛn we de obe am. (Matyu 20:​28) Jiova dɔn pik Jizɔs fɔ rul di wɔl as Kiŋ. Na in mek di Baybul tɛl wi se wi fɔ obe Jizɔs if wi want fɔ gɛt layf we go de sote go.—Rid Jɔn 3:​36.

12. Wetin mek wi nɔ de put an pan pɔlitiks?

¹² Wi nɔ fɔ put an pan pɔlitiks. Jizɔs nɔ bin put an pan pɔlitiks. We dɛn bin de jɔj am, i bin tɛl di rula na Rom we na Paylet se: “Mi Kiŋdɔm nɔ gɛt ɛnitin fɔ du wit dis wɔl.” (Rid Jɔn 18:​36, NW.) Jɔs lɛk Jizɔs, wisɛf nɔ de ɛva kɔmɔt biɛn Gɔd in Kiŋdɔm we de na ɛvin; na dat mek ilɛk usay wi de, wi nɔ de put an pan pɔlitiks. Bɔt, di Baybul tɛl wi se wi fɔ obe “dɛn wan we de rul na di kɔntri.” (Lɛta Fɔ Rom 13:​1) Wi de obe di lɔ dɛn na di kɔntri we wi de. Bɔt if di lɔ nɔ gri wit wetin Gɔd in lɔ dɛn se, wi de falamakata di apɔsul dɛn we se: “Wi fɔ du wetin Gɔd tɛl wi fɔ du, wi nɔ gɛt fɔ du wetin mɔtalman tɛl wi fɔ du.”—Di Apɔsul Dɛn Wok 5:​29; Mak 12:​17.

13. Wetin wi de prich bɔt Gɔd in Kiŋdɔm?

¹³ Wi biliv se na Gɔd in Kiŋdɔm nɔmɔ go sɔlv di prɔblɛm dɛn na di wɔl. Jizɔs bin se “pipul go tɛl ɔlman na [di] wɔl di gud nyuz bɔt wɛn Gɔd go rul di wɔl.” (Rid Matyu 24:​14.) No mɔtalman gɔvmɛnt nɔ de we go ebul fɔ du wetin Gɔd in Kiŋdɔm go du fɔ wi. (Sam 146:​3) Jizɔs bin tich wi fɔ pre fɔ Gɔd in Kiŋdɔm we i se: “Mek yu rul wi [“Lɛ yu Kiŋdɔm kam,” NW]. Mek wetin yu want, bi na dis wɔl, lɛkɛ aw i de bi na ɛvin.” (Matyu 6:​10) Di Baybul tɛl wi se Gɔd in Kiŋdɔm go dɔnawe wit ɔl mɔtalman gɔvmɛnt ɛn na in nɔmɔ “go tinap sote go.”—Daniɛl 2:​44.

14. Udat dɛn yu tink se de wɔship Gɔd di rayt we?

¹⁴ Afta we yu dɔn stɔdi dɛn pɔynt ya, aks yusɛf dɛn kwɛstyɔn dɛn ya: ‘Udat dɛn de yuz di Baybul fɔ tich? Udat dɛn de tɛl ɔda pipul dɛn bɔt Gɔd in nem? Udat dɛn rili de sho se dɛn lɛk dɛnsɛf ɛn biliv se na Gɔd bin sɛn Jizɔs fɔ sev wi? Udat dɛn nɔ de put an pan pɔlitiks? Udat dɛn de prich se na Gɔd in Kiŋdɔm nɔmɔ go sɔlv wi prɔblɛm dɛn?’ Na Jiova Witnɛs dɛn nɔmɔ de du dat.—Ayzaya 43:​10-12.

15. Wetin wi fɔ du if wi want mek Gɔd gri wit di we aw wi de wɔship am?

¹⁵ Wi nɔ jɔs fɔ biliv se Gɔd de. Di dɛbul dɛnsɛf biliv se Gɔd de, bɔt dɛn nɔ de obe am. (Jems 2:​19) If wi want fɔ mek Gɔd gri wit di we aw wi de wɔship am, wi nɔ fɔ jɔs gri se i de bɔt wi fɔ du wetin i se.

16. Wetin mek wi fɔ pul an pan lay lay rilijɔn?

¹⁶ If wi want fɔ mek Gɔd gri wit di we aw wi de wɔship am, wi fɔ pul an pan lay lay rilijɔn. Di prɔfɛt Ayzaya bin rayt se: “Kɔmɔt to am go, go mek unasɛf klin na PAPA GƆD [“Jiova,” NW] in yay.” (Ayzaya 52:​11; Sɛkɛn Lɛta Fɔ Kɔrint 6:​17) Na dat mek wi nid fɔ pul an pan ɛnitin we go mek wi nɔ wɔship Gɔd di rayt we.

17, 18. Wetin na “Babilɔn we ɔlman no”? Wetin mek i fayn fɔ mek yu kɔmɔt de kwik kwik wan?

¹⁷ Wetin na lay lay rilijɔn? Na ɛni rilijɔn we de tich wi fɔ wɔship Gɔd di we we nɔ gri wit wetin de na in Wɔd, di Baybul. Di Baybul kɔl lay lay rilijɔn “Babilɔn we ɔlman no [“Babilɔn di Gret,” NW].” (Rɛvɛleshɔn 17:​5) Wetin mek? Afta di Ebi Ebi Ren insay Noa in tɛm, bɔku tin dɛn we dɛn de tich insay lay lay rilijɔn bin bigin na Babilɔn. Dɛn lay lay tichin dɛn de bigin go ɔlsay na di wɔl. Fɔ ɛgzampul, di pipul dɛn we bin de na Babilɔn, bin de wɔship tri gɔd dɛn we jɔyn togɛda. Semweso insay wi yon tɛm, bɔku rilijɔn dɛn de tich se Gɔd na tri pɔsin; bɔt di Baybul tɔk klia wan se na wan Gɔd nɔmɔ de we na Jiova, ɛn Jizɔs na in Pikin. (Jɔn 17:​3) Di pipul dɛn we bin de na Babilɔn bin biliv bak se pat de insay pɔsin, we de kɔntinyu fɔ liv afta di pɔsin dɔn day, ɛn da pat de kin sɔfa na ɛlfaya. Dat nɔto tru.—Luk Ɛndnot 14 na pej 213, Ɛndnot 17 na pej 214, ɛn Ɛndnot 18 na pej 215.

¹⁸ Gɔd bin dɔn tɔk se i nɔ go te igen, i go donawe wit ɔl dɛn lay lay rilijɔn dɛn. (Rɛvɛleshɔn 18:​8) Yu no wetin mek i fayn fɔ kɔmɔt na lay lay rilijɔn kwik kwik wan? Jiova Gɔd want mek yu du dat bifo i let.—Rɛvɛleshɔn 18:​4.

19. We yu disayd fɔ sav Jiova, aw i go ɛp yu?

¹⁹ We yu disayd fɔ kɔmɔt na lay lay rilijɔn ɛn sav Jiova, sɔm pan yu padi ɔ fambul dɛn nɔ kin ɔndastand wetin yu dɔn disayd fɔ du, ɛn dɛn kin ivin mek tin nɔ izi fɔ yu. Bɔt Jiova nɔ go lɛf yu. Yu go jɔyn wan big famili we de ɔlsay na di wɔl we rili lɛk dɛnsɛf, ɛn yu go gɛt di op fɔ de sote go insay Gɔd in nyu wɔl. (Mak 10:​28-30) Sɔntɛm sɔm pan yu padi ɛn fambul dɛn we nɔ bin want yu fɔ sav Jiova go disayd leta fɔ stɔdi di Baybul.

20. Wetin mek i impɔtant fɔ wɔship Gɔd di rayt we?

²⁰ I nɔ go te igen, Gɔd go dɔnawe wit ɔl di bad bad tin dɛn ɛn na in Kiŋdɔm go rul di wɔl. (Pita In Sɛkɔn Lɛta 3:​9, 13, NW) Da tɛm de go rili fayn! Ɔlman go wɔship Jiova di we aw i want wi fɔ wɔship am. So i impɔtant fɔ mek yu du sɔntin naw ɛn wɔship Gɔd di rayt we.