LƐSIN 39

Aw Gɔd De Si Blɔd?

Printɛd Ɛdishɔn

Blɔd rili impɔtant. If wi nɔ bin gɛt blɔd, nɔn pan wi nɔ fɔ de alayv. Na Gɔd we mek wi nɔmɔ gɛt rayt fɔ tɛl wi aw fɔ yuz blɔd. Wetin i dɔn tɔk bɔt blɔd? Na tin we wi fɔ it, ɔ tek, ɔ gi pɔsin? Ɛn aw wi go disayd fɔ du di rayt tin we i kam pan blɔd biznɛs?

1. Aw Jiova de si blɔd?

Jiova bin tɛl di wan dɛn we de wɔship am di tɛm we dɛn bin de rayt di Baybul se: “Na insay di blɔd layf de.” (Livitikɔs 17:14, NWT) To Jiova, blɔd tinap fɔ layf. So bikɔs layf na oli gift frɔm Gɔd, dat min se blɔd bak oli.

2. Us we Gɔd bin se wi nɔ fɔ yuz blɔd?

Jiova bin tɛl di wan dɛn we de wɔship am bifo di Kristian dɛn tɛm nɔ fɔ it blɔd. (Rid Jɛnɛsis 9:4 ɛn Lɛvitikɔs 17:10.) I ripit dis lɔ we di gɔvnin bɔdi bin tɛl Kristian dɛn fɔ “kɔntinyu fɔ avɔyd . . . blɔd.”—Rid Akt 15:28, 29.

Wetin i min fɔ avɔyd blɔd? If dɔktɔ tɛl yu fɔ avɔyd rɔm, yu nɔ go drink am. Bɔt yu go it sɔntin we gɛt rɔm ɔ yu go mek dɛn pas am na yu ven? Nɔ! Yu nɔ go du dat. Semweso, we Gɔd se wi fɔ avɔyd blɔd, dat min se wi nɔ fɔ drink blɔd ɔ it animal we dɛn nɔ kɔt in trot. Ɛn wi nɔ fɔ it ɛnitin we dɛn dɔn miks wit blɔd.

Wetin wi go se bɔt di we aw dɔktɔ dɛn de yuz blɔd? Sɔm we dɛn we dɛn kin yuz blɔd de go agens Gɔd in lɔ. Dɛn we dɛn de na we dɛn de gi di wan ol blɔd, ɔ ɛni wan pan in 4 men pat dɛn, dat na di rɛd sɛl, wayt sɛl, pletlɛt, ɛn plasma. Ɔda we dɛn aw dɛn kin yuz blɔd nɔ de go agens Gɔd in lɔ klia klia wan. Fɔ ɛgzampul, sɔm we dɛn aw dɛn kin yuz blɔd gɛt fɔ du wit di smɔl smɔl tin dɛn we dɛn kin pul kɔmɔt pan wan pan di men pat dɛn pan di blɔd. Sɔntɛnde, dɛn kin yuz di pɔsin in yon blɔd. We wi de tink bɔt wetin fɔ du, ɔlman fɔ disayd fɔ insɛf.a—Galeshians 6:5.

LAN MƆ

Lan bɔt aw wi go disayd fɔ du di rayt tin we i kam pan tritmɛnt dɛn we gɛt fɔ du wit blɔd.

3. Disayd fɔ tek tritmɛnt dɛn we go mek Jiova gladi

Aw yu go disayd fɔ tek tritmɛnt dɛn we gri wit di we aw Gɔd de si blɔd? Ple di VIDIO, dɔn una tɔk bɔt wetin mek i impɔtant fɔ du di tin dɛn we de dɔŋ ya.

VIDIO: Aw Wi Go Disayd bɔt Tritmɛnt dɛn we Gɛt fɔ Du Wit Blɔd (5:47)

Pre fɔ sɛns.—Jems 1:5.
Du risach fɔ no Baybul prinsipul dɛn ɛn aw yu go aplay dɛn.—Prɔvabs 13:16.
Tray fɔ no wetin dɛn go ebul du na di say we yu de.
Tray fɔ no us tritmɛnt dɛn yu nɔ go tek atɔl.
Mek shɔ se wetin yu disayd fɔ du go mek yu gɛt klin kɔnshɛns.—Akt 24:16.b
Mɛmba se nɔbɔdi nɔ fɔ tɛl yu wetin fɔ du we i kam pan tin dɛn we gɛt fɔ du wit yu kɔnshɛns; yu man ɔ yu wɛf, ɛlda, ɔ ivin yu Baybul ticha nɔ fɔ tɛl yu wetin fɔ du.—Romans 14:12.
Rayt wetin yu dɔn disayd.

Pikchɔ Dɛn: Wan man de disayd wetin fɔ du we i kam pan tritmɛnt. 1. I de pre. 2. I de yuz di Baybul, buk ɛn magazin dɛn, ɛn tablɛt fɔ du risach. 3. I de tɔk to in dɔktɔ.

4. Jiova Witnɛs dɛn de luk fɔ di bɛst tritmɛnt

I pɔsibul fɔ obe Gɔd in lɔ bɔt blɔd ɛn stil gɛt di bɛst tritmɛnt. Ple di VIDIO.

VIDIO: Intavyu wit Profɛsɔ Masimo P. Franchi. (1:36)

Rid Taytɔs 3:2, dɔn una tɔk bɔt dis kwɛstyɔn:

Wetin mek wi fɔ tek tɛm tɔk to wi dɔktɔ dɛn ɛn tɔk to dɛn wit rɛspɛkt?

Wan tɛst tyub we gɛt blɔd we sheb to di 4 men pat dɛn we mak as A, B, C, ɛn D.

Kristian nɔ fɔ tek am	Kristian fɔ disayd
A. Blɔd plasma	Frakshɔn dɛn frɔm plasma
B. Wayt sɛl	Frakshɔn dɛn frɔm wayt sɛl
C. Pletlɛt	Frakshɔn dɛn frɔm pletlɛt
D. Rɛd sɛl	Frakshɔn dɛn frɔm rɛd sɛl

5. Tritmɛnt dɛn we gɛt fɔ du wit blɔd frakshɔn dɛn

Blɔd gɛt 4 men pat dɛn, dat na di rɛd sɛl, wayt sɛl, pletlɛt, ɛn plasma. Dɛn 4 men pat dɛn ya gɛt bɔku smɔl smɔl pat dɛn we dɛn kɔl blɔd frakshɔn dɛn.c Dɛn kin yuz di blɔd frakshɔn dɛn pan mɛrɛsin dɛn we kin ɛp fɔ fɛt sik dɛn ɔ ɛp pɔsin fɔ stɔp fɔ blid.

We i kam to blɔd frakshɔn dɛn, ɔlman we na Kristian fɔ yuz in kɔnshɛns we di Baybul dɔn tren fɔ disayd wetin fɔ du. Sɔm kin disayd se dɛn nɔ go tek ɛni tritmɛnt we go mek dɛn tek mɛrɛsin ɔ du tɛst ɔ du ɔpreshɔn we gɛt fɔ du wit blɔd frakshɔn dɛn. Ɔda pipul dɛn kin fil se dɛn kɔnshɛns de alaw dɛn fɔ tek blɔd frakshɔn dɛn.

We yu de disayd wetin fɔ du, tink bɔt dɛn kwɛstyɔn dɛn ya:

Aw a go ɛksplen to dɔktɔ wetin mek a nɔ de gri fɔ tek sɔm blɔd frakshɔn dɛn? Aw a go ɛksplen to dɔktɔ wetin mek a gri fɔ tek sɔm blɔd frakshɔn dɛn?

IF PƆSIN AKS YU: “Wetin mek i bad fɔ tek blɔd?”

Wetin yu tink?

WETIN YU DƆN LAN?

Jiova nɔ want wi fɔ yuz blɔd di rɔng we.

Rivyu

Wetin mek Jiova de si blɔd as sɔntin we oli?
Aw wi no se di lɔ we Gɔd gi fɔ se wi fɔ avɔyd blɔd aplay to fɔ gi ɔ tek blɔd?
Aw wi go disayd fɔ du di rayt tin we i kam pan di we aw dɔktɔ dɛn de yuz blɔd?

Di det we a dɔn dis lɛsin:

Gol

Yuz di atikul dɛn we de na di say we se Du Mɔ Risach fɔ ɛp yu fɔ disayd we i kam to (1) fɔ gi ɔ tek blɔd, (2) tritmɛnt dɛn we gɛt blɔd frakshɔn dɛn, ɛn (3) aw fɔ yuz yu yon blɔd we i kam pan ɔpreshɔn ɔ blɔd tɛst. Dɔn rayt wetin yu disayd fɔ du.

Ɔda Gol:

Ɔda Gol

DU MƆ RISACH

Wetin yu fɔ tink bɔt bifo yu disayd if yu go tek ɛni tritmɛnt we gɛt fɔ du wit yu yon blɔd?

“Kwɛstyɔn dɛn we Pipul dɛn Kin Aks” (Di Wachtawa, Ɔktoba 15, 2000)

Wetin yu fɔ tink bɔt we yu de disayd if yu fɔ tek blɔd frakshɔn dɛn?

“Kwɛstyɔn dɛn we Pipul dɛn Kin Aks” (Di Wachtawa, Jun 15, 2004)

Wetin ɛp wan dɔktɔ fɔ biliv se di we aw Jiova de si blɔd mek sɛns?

“A Gri wit di We Aw Gɔd De Si Blɔd” (Awek!, Disɛmba 8, 2003)

Lan aw di ɛlda dɛn we de na di Ɔspitul Lezɔn Kɔmiti de sɔpɔt dɛn brɔda ɛn sista dɛn.

Jiova De Sɔpɔt di Wan dɛn We Sik (10:23)

a Rid Lɛsin 35, “Aw Wi Go Disayd fɔ Du di Rayt Tin Dɛn.”

b Rid wetin de na pɔynt 5 we se “Tritmɛnt dɛn we gɛt fɔ du wit blɔd frakshɔn dɛn,” ɛn Ɛndnot 3, we se “Mɛrɛsin, Tɛst, ɛn Ɔpreshɔn dɛn we Gɛt fɔ Du Wit Blɔd.”

c Sɔm dɔktɔ dɛn kin si di 4 men pat dɛn pan blɔd as frakshɔn dɛn. So yu go nid fɔ ɛksplen wetin yu dɔn disayd fɔ du we i kam to fɔ tek blɔd ɔ fɔ tek di rɛd sɛl dɛn, wayt sɛl dɛn, pletlɛt dɛn, ɔ plasma.