Fet​—Na Kwaliti we De Ɛp Wi fɔ Gɛt Trɛnk

FET de mek wi gɛt bɔku trɛnk. Fɔ ɛgzampul, pan ɔl we Setan want fɔ pwɛl wi padi biznɛs wit Jiova, fet de ɛp wi fɔ “ebul fɔ ɔt ɔl di aro dɛn we gɛt faya we di wikɛd wan de sɛn.” (Ɛfi. 6:​16, NW) If wi gɛt fet, wi go ebul fɔ bia prɔblɛm dɛn we ivin big lɛk mawntin. Jizɔs bin tɛl in disaypul dɛn se: “If una gɛt fet we smɔl lɛk mɔstad sid, una go tɛl dis mawntin se, ‘Kɔmɔt na ya ɛn go yanda,’ ɛn i go kɔmɔt de.” (Mat. 17:​20, NW) Bikɔs wi no se fet kin mek wi padi biznɛs wit Jiova tayt mɔ ɛn mɔ, wi fɔ tink bɔt dɛn kwɛstyɔn dɛn ya: Wetin na fet? Aw wi at kin afɛkt wi fet? Aw wi go gɛt strɔng fet mɔ ɛn mɔ? Ɛn udat wi fɔ put fet pan?—Rom 4:​3.

Fet nɔ jɔs min fɔ biliv wetin di Baybul se, bikɔs ivin “dɛn dɛbul dɛnsɛf no [“biliv,” NW] se Gɔd de, na dat mek dɛn de fred am ɛn trimbul bifo am.” (Jems 2:​19) So wetin na fet?

Di Baybul se fet gɛt tu tin dɛn. Fɔs, “fet na we pɔsin gɛt kɔnfidɛns se wetin i op fɔ go mɔs apin.” (Ibru 11:​1a, NW) If yu gɛt fet, yu go biliv tranga wan se ɔl di tin dɛn we Jiova tɔk na tru ɛn dɛn go mɔs bi. Fɔ ɛgzampul, Jiova bin tɛl di Izrɛlayt dɛn se: “If una kin brok mi Kɔvinant wit santɛm ɛn mi Kɔvinant wit nɛt, so dat de ɛn nɛt nɔ go kam di tɛm we dɛn fɔ kam, we min se una kin brok mi Kɔvinant wit Devid.” (Jɛr. 33:​20, 21) Yu dɔn ɛva fred se san nɔ go kɔmɔt ɛn i nɔ go go dɔŋ, ɛn dat go mek wi nɔ gɛt santɛm ɛn nɛt igen? If yu nɔ dawt se lɔ dɛn de we de mek do klin ɛn nɛt kam ɛn we de mek di wɔl go rawnd di san, yu tink se yu fɔ dawt se di Wan we mek dɛn lɔ dɛn ya go du wetin i dɔn prɔmis? Nɔ, yu nɔ fɔ dawt!—Ayz. 55:​10, 11; Mat. 5:​18.

Sɛkɔn, fet “na di pruf we [pɔsin] gɛt fɔ sho se sɔntin rial pan ɔl we i nɔ si am yet.” Di Baybul se fet na we pɔsin gɛt “pruf,” ɔ biliv tranga wan se, di tin dɛn we i nɔ de si rial. (Ibru 11:​1b, NW) Aw wi go du dat? Fɔ ɛgzampul, lɛ wi se wan smɔl pikin aks yu dis kwɛstyɔn: ‘Aw yu no se briz de?’ Pan ɔl we yu nɔ wande si briz, yu go tɔk to di pikin bɔt tin dɛn we de sho klia wan se di briz de, tin dɛn lɛk di briz we de kɔmɔt na wi nos, wetin di briz kin du, ɛn bɔku ɔda tin dɛn. We di pikin biliv se dɛn tin dɛn ya na tru, i go ɔndastand wetin i min fɔ biliv pan sɔntin we i nɔ de si. Semweso, fet na di pruf we pɔsin gɛt fɔ sho se sɔntin rial pan ɔl we i nɔ si am yet.—Rom 1:​20.

Bikɔs fet na di pruf we de sho se sɔntin rial, na dat mek di fɔs tin we pɔsin nid fɔ du na fɔ “no wetin tru [kɔrɛt].” (1 Tim. 2:​4) Bɔt nɔto dat nɔmɔ. Di apɔsul Pɔl rayt se: “Na wit di at pɔsin de sho se i gɛt fet.” (Rom 10:​10, NW) Pɔsin nɔ fɔ jɔs biliv di tru tin dɛn nɔmɔ bɔt i fɔ valyu dɛn bak. Na da we de nɔmɔ go ɛp am fɔ sho se i gɛt fet, we min se i fɔ liv in layf di we aw Gɔd want. (Jems 2:​20) Sɔmbɔdi we nɔ rili valyu di tru tin dɛn we de na di Baybul nɔ go gri wit di pruf dɛn if i nɔ want fɔ chenj wetin i biliv ɔ wetin i want fɔ du. (2 Pit. 3:​3, 4; Jud 18) Na dat mek insay di tɛm we dɛn bin de rayt di Baybul, nɔto ɔlman we bin de si mirekul dɛn, bin de gɛt fet. (Nɔm. 14:​11; Jɔn 12:​37) Gɔd in oli spirit de ɛp di wan dɛn nɔmɔ we rili lɛk di tru tin dɛn fɔ gɛt fet.—Gal. 5:​22, NW; 2 Tɛs. 2:​10, 11, NW.

Kiŋ Devid na bin wan pan di pipul dɛn we bin gɛt strɔng fet. (Ibru 11:​32, 33) Bɔt nɔto ɔlman we bin de na Devid in famili bin gɛt da kayn strɔng fet de. Fɔ ɛgzampul, wande, Ɛliab we na Devid in big brɔda bin sho se i nɔ gɛt fet we i bin tɔk pan Devid fɔ we i vɛks bikɔs Golaya chalenj Jiova in ami. (1 Sam. 17:​26-28) Nɔbɔdi nɔ bɔn wit fet; ɔ gɛt fet frɔm in mama ɛn papa, so Devid bin gɛt fet bikɔs i bin gɛt tayt padi biznɛs wit Gɔd.

Insay Sam 27, Devid bin sho aw i gɛt strɔng fet. (Vas 1) Devid bin de tek tɛm tink gud gud wan bɔt wetin bin dɔn apin to am ɛn aw Jiova bin trit in ɛnimi dɛn. (Vas 2 ɛn 3) I bin rili valyu di arenjmɛnt we Jiova bin mek fɔ wɔship am. (Vas 4) Devid bin de wɔship Gɔd wit in kɔmpin Kristian dɛn na di tabanakul. (Vas 6) I bin de pre to Jiova ɔltɛm. (Vas 7 ɛn 8) Devid bin want bak fɔ lɛ Gɔd tich am. (Vas 11) Bikɔs fet bin rili impɔtant to Devid, na dat mek i bin aks se: “Usay a go de if a nɔ gɛt fet?”—Vas 13, NW.

Yu go gɛt fet jɔs lɛk Devid if yu falamakata am fɔ de tink gud gud wan ɛn tray fɔ gɛt di abit dɛn we Sam 27 tɔk bɔt. Fɔ gɛt fet, wi nid fɔ no di kɔrɛkt tin dɛn, so di mɔ we wi de stɔdi Gɔd in Wɔd ɛn wi buk ɛn magazin dɛn, na di mɔ i go izi fɔ wi fɔ gɛt dis kwaliti we Gɔd in spirit de ɛp wi fɔ gɛt. (Sam 1:​2, 3) Tek tɛm tink gud gud wan we yu de stɔdi. If wi de tink gud gud wan bɔt wetin wi de stɔdi, wi go valyu di tin dɛn we wi de lan frɔm Jiova mɔ ɛn mɔ. Bikɔs yu rili gladi fɔ wetin Jiova de du fɔ yu, dat go mek yu rili want fɔ sho se yu gɛt fet bay we yu de atɛnd di mitin dɛn fɔ wɔship am ɛn tɛl ɔda pipul dɛn bɔt di op we yu gɛt. (Ibru 10:​23-25) Dɔn bak, wi de sho se wi gɛt fet bay we wi de “pre ɔltɛm” ɛn nɔ givɔp. (Lyuk 18:​1-8) So na fɔ “de pre ɔltɛm” to Jiova, abop pan am se “i bisin” bɔt yu. (1 Tɛs. 5:​17; 1 Pit. 5:​7, NW) Fet de mek wi du wetin rayt, ɛn we wi du di rayt tin, wi de gɛt strɔng fet mɔ ɛn mɔ.—Jems 2:​22.

Di ivintɛm bifo Jizɔs day, i bin tɛl in disaypul dɛn se: “Una biliv pan Gɔd, ɛn una biliv pan misɛf.” (Jɔn 14:​1) So wi nɔ nid fɔ sho se wi gɛt fet pan Jiova nɔmɔ bɔt wi nid bak fɔ sho se wi gɛt fet pan Jizɔs. Aw yu go sho se yu gɛt fet pan Jizɔs? Lɛ wi tɔk bɔt tri we dɛn.

Fɔs, yu fɔ si di day we Jizɔs day fɔ wi as gift we Gɔd dɔn gi yu. Di apɔsul Pɔl bin tɔk se: “Na we a biliv pan Gɔd in Pikin mek a gɛt di layf we a gɛt naw. Gɔd in Pikin so lɛk mi dat i sakrifays in layf fɔseka mi.” (Gal. 2:​20) We yu sho se yu gɛt fet pan Jizɔs, yu go biliv tranga wan se di day we Jizɔs day fɔ wi go ɛp yu, yu go biliv se dat na di men tin we mek Gɔd de fɔgiv yu sin, yu go gɛt di op fɔ gɛt layf we go de sote go, ɛn yu go biliv se dat na di klia pruf we de sho se Gɔd lɛk yu. (Rom 8:​32, 38, 39; Ɛfi. 1:​7, NW) If yu rili biliv se di day we Jizɔs day fɔ wi go ɛp yu, yu at nɔ go de pwɛl ɛn fil bad bɔt yusɛf.—2 Tɛs. 2:​16, 17.

Sɛkɔn, kam nia Jiova bay we yu de pre to am, ɛn di day we Jizɔs day fɔ wi dɔn mek dat pɔsibul. Bikɔs Jizɔs day fɔ wi, wi kin “fil fri” fɔ pre to Jiova “so dat i go sɔri fɔ wi ɛn gi wi in spɛshal gudnɛs fɔ ɛp wi di rayt tɛm.” (Ibru 4:​15, 16; 10:​19-22, NW) Prea de ɛp wi fɔ mekɔp wi maynd ɛn tinap tranga wan agens tin dɛn we go mek wi sin.—Lyuk 22:​40.

Tɔd, obe Jizɔs. Di apɔsul Jɔn bin rayt se: “Di wan we sho se i gɛt fet pan di Pikin go gɛt layf we go de sote go; di wan we nɔ de obe di Pikin nɔ go gɛt layf, ɛn Gɔd go vɛks pan am ɔltɛm.” (Jɔn 3:​36, NW) Notis se Jɔn bin tɔk se pɔsin we nɔ gɛt fet na pɔsin we nɔ de obe. So yu go sho se yu gɛt fet pan Jizɔs if yu obe am. Yu go obe Jizɔs bay we yu de fala “Krays in lɔ,” dat na ɔl wetin i dɔn tich wi ɛn tɛl wi fɔ du. (Gal. 6:​2, NW) Yu go obe Jizɔs bak bay we yu de lisin to “di slev we fetful ɛn gɛt sɛns” we na dɛn i de yuz fɔ dayrɛkt wi. (Mat. 24:​45, NW) We yu de obe Jizɔs, yu go gɛt di trɛnk fɔ bia prɔblɛm dɛn we tan lɛk ebi ebi briz.—Lyuk 6:​47, 48.

Wande, wan man bin kray to Jizɔs se: “A gɛt fet! Ɛp mi mek a gɛt mɔ fet!” (Mak 9:​24, NW) I bin gɛt sɔm fet, bɔt dis man bin ɔmbul ɛn i bin no se i nid fɔ gɛt mɔ fet. Jɔs lɛk dis man, sɔntin go apin to wi ɔl we go mek wi nid mɔ fet. Ɛn wi ɔl go ebul fɔ du sɔntin we go mek wi gɛt fet mɔ ɛn mɔ naw. As wi dɔn lan, wi go ebul fɔ gɛt fet mɔ ɛn mɔ we wi de stɔdi Gɔd in Wɔd ɛn tink gud gud wan bɔt wetin wi dɔn rid, dat go ɛp wi fɔ valyu di tin dɛn we Jiova de gi wi. Dɔn bak, wi go gɛt strɔng fet mɔ ɛn mɔ we wi ɛn wi kɔmpin Kristian dɛn de wɔship Jiova togɛda, tɛl ɔda pipul dɛn bɔt di op we wi gɛt, ɛn bay we wi de pre ɔltɛm. Dɔn, we wi de tray fɔ gɛt strɔng fet mɔ ɛn mɔ, wi go gɛt di blɛsin we pas ɔl. Gɔd in Wɔd tɛl wi se: “Bɔt una we a rili lɛk, una tray fɔ gɛt mɔ fet we oli . . . so dat una go kɔntinyu fɔ du wetin go mek Gɔd lɛk una.”—Jud in Lɛta 20, 21, NW.