Di Baybul De Tich Wi bɔt di Pɔsin We Mek Dɛn Rayt Am

 1. Wetin mek yu gladi fɔ di Baybul?

WI RILI gladi we Jiova Gɔd dɔn gi wi di Baybul! Insay di Baybul, i dɔn gi wi fayn advays we de ɛp wi fɔ no wetin fɔ du we wi gɛt prɔblɛm dɛn. I dɔn gi wi bak fayn op fɔ tumara bambay. Di tin we impɔtant mɔ, Jiova dɔn yuz di Baybul fɔ sho wi bɔku tin bɔt di kayn pɔsin we i bi. We wi tink bɔt in fayn kwaliti dɛn, dat kin rili tɔch wi at, ɛn i de muv wi fɔ kam nia Gɔd ɛn bi in tayt padi.—Sam 25:​14.

 2. Us difrɛn we dɛn Jiova dɔn sho insɛf to mɔtalman?

² Jiova want pipul dɛn fɔ sabi am. Trade, i bin yuz drim, vishɔn, ɛn ivin enjɛl dɛn fɔ sho insɛf to pipul dɛn. (Nɔm. 12:​6; Akt 10:​3, 4) Wi nɔ bin fɔ ebul stɔdi dɛn drim dɛn ya, vishɔn, ɛn mɛsej dɛn frɔm enjɛl dɛn, if dɛn nɔ bin rayt am na buk. Jiova gɛt gud rizin we mek i mek man dɛn “rayt . . . na buk” wetin i want wi fɔ no. (Jɛr. 30:​2) Bikɔs “ɔl wetin di tru Gɔd de du pafɛkt,” wi shɔ se dis kayn we aw i de tɔk to wi rili fayn, ɛn i de bɛnifit wi.—Sam 18:​30, NWT.

 3. Aw Jiova mek shɔ se wi stil ebul fɔ gɛt di Baybul tide? (Ayzaya 40:​8)

³ Rid Ayzaya 40:​8. Gɔd in Wɔd dɔn gi gud advays to fetful man ɛn uman dɛn fɔ lɔng lɔng tɛm. Aw dis pɔsibul? Dis na gud kwɛstyɔn. Bikɔs dɛn bin rayt ɔl di Skripchɔ dɛn pan skrol ɔ matirial dɛn we de pwɛl, wi nɔ ebul fɔ gɛt nɔn pan di orijinal dɔkyumɛnt dɛn tide. Bɔt Jiova bin mek shɔ se pipul dɛn kɔpi di oli Baybul. Pan ɔl we di wan dɛn we kɔpi di Baybul nɔ pafɛkt, dɛn bin rili tek dɛn tɛm. Fɔ ɛgzampul, wan masta sabi bukman bin rayt bɔt di Ibru Skripchɔ dɛn se: “No ɔda buk nɔ de we dɛn kip we stil gɛt kɔrɛkt tin dɛn lɛk di Baybul.” So pan ɔl we i dɔn te we dɛn rayt di Baybul, ɛn di skrol ɔ matirial we dɛn rayt am pan bin pwɛl, ɛn di pipul dɛn we kɔpi am nɔ pafɛkt, wi shɔ se di wɔd dɛn we wi de rid na di Baybul tide kɔmɔt frɔm di Wan we mek dɛn rayt am, Jiova.

 4. Wetin wi go tɔk bɔt insay dis atikul?

⁴ Na Jiova de gi “ɔl gud gift ɛn ɔl pafɛkt prɛzɛnt.” (Jems 1:​17) Di Baybul na wan pan di bɛst gift dɛn we Jiova dɔn gi wi. We pɔsin gi wi gift, i de sho se di pɔsin no wi ɛn i no wetin wi nid. Na di sem tin wit di Wan we gi wi di Baybul. We wi tek tɛm stɔdi dis gift, wi de lan bɔku tin bɔt Jiova. Wi go lan bɔt aw i rili no wi ɛn wetin wi nid. Insay dis atikul, wi go tɔk bɔt aw di Baybul de sho tri pan Jiova in kwaliti dɛn, we na in sɛns, jɔstis, ɛn lɔv. Bɔt fɔs lɛ wi tɔk bɔt di we dɛn we di Baybul de sho Gɔd in sɛns.

 5. Wetin na wan we we di Baybul de sho Gɔd in sɛns?

⁵ Jiova no se wi nid in fayn advays. Ɛn in sɛns de insay in gift, we na di Baybul. Di advays we de na di Baybul de ɛp pipul dɛn. Di Baybul de chenj layf. We Mozis bin rayt di fɔs buk dɛn na di Baybul, i bin tɛl Gɔd in pipul dɛn we na di Izrɛlayt dɛn se: “Nɔto fɔ natin in bin de tich dɛn ɔl wetin i dɔn tich dɛn, bɔt na fɔ dɛn yon vɛri layf.” (Dit. 32:​47) Di wan dɛn we bin du wetin di Baybul de tich go gɛt gladi-at. (Sam 1:​2, 3) Pan ɔl we i dɔn tek lɔng tɛm we dɛn rayt Gɔd in Wɔd, i stil gɛt di pawa fɔ chenj pipul dɛn layf. Fɔ ɛgzampul, na jw.org, insay di siriz we gɛt di taytul “The Bible Changes Lives,” yu go fɛn pas 50 ɛgzampul dɛn we de sho aw di Baybul “de wok insay [di wan dɛn] we biliv” am tide—1 Tɛs. 2:​13.

 6. Wetin mek wi nɔ go kɔmpia di Baybul to ɛni ɔda buk?

⁶ Yu nɔ go kɔmpia no ɔda buk to Gɔd in Wɔd. Wetin mek wi se so? Na bikɔs di Wan we gɛt da buk de, na Jiova Gɔd, we na di ɔlmayti, we go de sote go, ɛn we gɛt sɛns pas ɔlman. Dɛn go kɔntinyu fɔ rid bɔku ɔda buk dɛn afta di wan we rayt dɛn day. Bɔt bɔku tɛm di advays dɛn we de na dɛn buk dɛn de nɔ kin gɛt yus as tɛm de go. Bɔt di fayn prinsipul dɛn we de na di Baybul de ɛp ɔltɛm; dɛn dɔn bɛnifit pipul dɛn we dɔn liv difrɛn tɛm dɛn. We wi rid da oli buk de ɛn tink gud wan bɔt wetin wi lan, di Wan we gɛt di Baybul go yuz in pawaful oli spirit fɔ ɛp wi fɔ si aw wi go aplay di Baybul in advays na wi layf. (Sam 119:​27; Mal. 3:​16; Ibru. 4:​12) Fɔ tru, di Wan we de alayv we gɛt di Baybul rili want fɔ ɛp yu. Dis na fayn rizin fɔ mek yu rid di Baybul!

 7. Aw di Baybul bin de ɛp Gɔd in pipul dɛn trade fɔ gɛt wanwɔd?

⁷ Wan ɔda tin we de sho se na Gɔd in sɛns de insay di Baybul na we i de mek Gɔd in pipul dɛn gɛt wanwɔd. We di Izrɛlayt dɛn rich na di Prɔmis Land, dɛn bin sɛtul na difrɛn eria dɛn. Sɔm na bin fishaman dɛn, ɔda wan dɛn bin de mɛn animal dɛn, ɛn stil ɔda wan dɛn na bin fama dɛn. I go izi fɔ mek Izrɛlayt dɛn we de na wan eria fɔgɛt bɔt in kɔmpin Izrɛlayt dɛn we de na ɔda eria na di kɔntri. Bɔt Jiova bin arenj fɔ mek di Izrɛlayt dɛn go de mit togɛda pan difrɛn program dɛn fɔ yɛri we dɛn de rid in Wɔd we dɛn dɔn rayt ɛn ɛksplen am. (Dit. 31:​10-13; Nɛi. 8:​2, 8, 18) Imajin aw wan fetful Izrɛlayt go dɔn fil we i kam na Jerusɛlɛm ɛn si bɔku pan in kɔmpin dɛn we dɛn ɔl de wɔship Jiova frɔm difrɛn pat dɛn na di kɔntri! Bay dis we, Jiova bin de ɛp in pipul dɛn fɔ kɔntinyu fɔ gɛt wanwɔd. Leta, we dɛn bin mek di Kristian kɔngrigeshɔn, i bin gɛt man ɛn uman dɛn we bin de tɔk difrɛn langwej dɛn, we kɔmɔt na difrɛn say dɛn, ɛn we kɔmɔt na say dɛn we gɛt mɔni ɛn say dɛn we nɔ gɛt mɔni. Bɔt bikɔs dɛn lɛk wetin dɛn de lan na di Baybul, dat bin mek dɛn gɛt wanwɔd fɔ wɔship di wangren tru Gɔd. Di wan dɛn we bin bi Kristian bin ebul fɔ ɔndastand Gɔd in Wɔd bikɔs dɛn kɔmpin dɛn bin de ɛp dɛn ɛn dɛn bin de mit togɛda.—Akt 2:​42; 8:​30, 31.

 8. Aw di Baybul de mek Gɔd in pipul dɛn gɛt wanwɔd tide?

⁸ Wi Gɔd we gɛt sɛns de kɔntinyu fɔ mek in pipul dɛn gɛt wanwɔd tru di Baybul. Na in de mek wi ɔl de gɛt spirichwal it we wi rili de ɛnjɔy. Wi kin mit togɛda ɔltɛm na wi mitin dɛn, asɛmbli dɛn, ɛn kɔnvɛnshɔn dɛn fɔ yɛri we dɛn de rid, ɛksplen, ɛn tɔk bɔt di Skripchɔ dɛn. So di Baybul na impɔtant tul we Jiova de yuz fɔ ɛp in pipul dɛn fɔ “gɛt wanwɔd we dɛn de sav am.”—Zɛf. 3:​9.

 9. Us impɔtant kwaliti wi fɔ gɛt fɔ mek wi ɔndastand di Baybul? (Lyuk 10:​21)

⁹ Lɛ wi tɔk bɔt ɔda pruf we de sho Jiova in sɛns. I mek dɛn rayt sɔm pat dɛn na di Baybul di kayn we we na pipul dɛn nɔmɔ we ɔmbul go ebul ɔndastand am. (Rid Lyuk 10:​21.) Pipul dɛn ɔlsay na di wɔl de rid di Baybul. Wan masta sabi bukman bin tɔk se, di Baybul “nɔto buk we jɔs de ɔlsay na di wɔl pas ɔda buk dɛn, bɔt na buk we pɔsin de tek tɛm rid pas ɔl ɔda buk dɛn.” Bɔt na pipul dɛn nɔmɔ we ɔmbul go rili ɔndastand ɛn aplay wetin i se.—2 Kɔr. 3:​15, 16.

10. Us ɔda we di Baybul de sho Gɔd in sɛns?

¹⁰ Wi lan bak bɔt Jiova in sɛns na di Baybul wan ɔda we. Jiova nɔ jɔs de yuz di Skripchɔ dɛn fɔ tich wi as grup, bɔt i de yuz am bak fɔ tɛl wi wetin fɔ du ɛn fɔ kɔrej wi wan bay wan. Wi ɔl go ebul fɔ si aw Jiova lɛk wi we wi rid in Wɔd. (Ayz. 30:​21) We yu gɛt prɔblɛm, ɔmɔs tɛm yu dɔn tɔn to di Skripchɔ dɛn ɛn rid vas we tan lɛk se dɛn jɔs rayt am fɔ yu? Bɔt, Gɔd mek dɛn rayt di Baybul so dat bɔku bɔku pipul dɛn go ɔndastand am. Aw di Baybul ebul fɔ gɛt infɔmeshɔn we fit wetin yu rili nid? Di wangren rizin we mek dis pɔsibul na bikɔs di Wan we gɛt di Baybul gɛt sɛns pas ɔlman.—2 Tim. 3:​16, 17.

11. Aw Gɔd bin sho se i nɔ de tek wan pɔsin bɛtɛ pas di ɔda wan we dɛn bin de rayt di Baybul?

¹¹ Jɔstis na wan ɔda kwaliti we Jiova gɛt. (Dit. 32:​4) Bɔku tɛm, pɔsin we de du tin fia wan kin bi bak pɔsin we nɔ de tek wan pɔsin bɛtɛ pas di ɔda wan, ɛn Jiova nɔ de tek wan pɔsin bɛtɛ pas di ɔda wan. (Akt 10:​34, 35; Rom. 2:​11) Wi de si se i nɔ de tek wan pɔsin bɛtɛ pas di ɔda wan bay we i mek dɛn rayt di Baybul insay langwej we bɔku pipul dɛn bin de tɔk da tɛm de. Dɛn bin rayt bɔku pan di fɔs 39 buk dɛn na di Baybul insay Ibru, we na langwej we bin izi fɔ Gɔd in pipul dɛn fɔ ɔndastand. Bɔt insay di fɔstɛm Kristian dɛn tɛm, na di Grik langwej dɛn bin de tɔk na bɔku say dɛn, so dɛn bin rayt di las 27 buk dɛn na di Baybul insay Grik langwej. Jiova nɔ bin disayd se na insay wan langwej nɔmɔ in Wɔd fɔ de. Tide na lɛk et bilyɔn pipul dɛn de ɔlsay na di wɔl we de tɔk difrɛn langwej dɛn. Aw dɛn bɔku pipul dɛn ya go ebul fɔ lan bɔt Jiova?

12. Wetin na wan we we Daniɛl 12:​4 (NWT) dɔn kam tru insay di las dez?

¹² Jiova bin yuz prɔfɛt Daniɛl fɔ prɔmis se insay di tɛm we di wɔl want fɔ dɔn, “di tru” we de na di Baybul “go bɔku.” Dat min se, bɔku pipul dɛn go ɔndastand am. (Rid Daniɛl 12:​4, NWT.) Wan tin we dɔn ɛp bɔku pipul dɛn fɔ ɔndastand di Baybul na bikɔs dɛn dɔn translet, print, ɛn sheb di Baybul ɛn buk dɛn we de tɔk bɔt di Baybul. Di Baybul na buk we dɛn dɔn translet ɛn sheb pas ɛni ɔda buk na di wɔl. Sɔntɛnde, Baybul transleshɔn dɛn we dɛn kin mek fɔ sɛl kin rili dia. Jiova in pipul dɛn dɔn translet di wan ol Baybul ɔ pat pan am insay pas 240 langwej dɛn, ɛn ɛnibɔdi kin ebul fɔ gɛt am fɔ fri. Dis dɔn mek pipul dɛn na ɔl di neshɔn dɛn ebul fɔ lan bɔt di “gud nyuz bɔt di Kiŋdɔm” bifo di ɛnd kam. (Mat. 24:​14) Wi Gɔd we de du tin fia wan want fɔ gi bɔku pipul dɛn di chans fɔ no am bay we dɛn de rid in Wɔd. I de du dat bikɔs i rili lɛk wi ɔl.

13. Wetin mek wi go se di Baybul de sho se Jiova lɛk wi? (Jɔn 21:​25)

¹³ Di Baybul ɛp wi fɔ ɔndastand se Jiova in kwaliti we pas ɔl in ɔda kwaliti dɛn na lɔv. (1 Jɔn 4:​8) Tink bɔt wetin Jiova mek dɛn rayt bɔt na di Baybul ɛn wetin i mek dɛn nɔ rayt. I mek dɛn rayt jɔs wetin wi nid we go ɛp wi fɔ bi in padi, fɔ gɛt gladi-at naw, ɛn fɔ gɛt layf we go de sote go. Bɔt bikɔs Jiova lɛk wi, i nɔ mek dɛn rayt ɛkstra infɔmeshɔn we wi nɔ nid fɔ mek wi go sav am.—Rid Jɔn 21:​25.

14. Us ɔda we di Baybul sho se Gɔd lɛk wi?

¹⁴ Jiova de sho bak se i lɛk wi bay we i de tɔk to wi di kayn we we de sho se i ɔnɔ wi. Insay di Baybul, i nɔ gi wi bɔku bɔku lɔ dɛn fɔ tɛl wi wetin nɔmɔ fɔ du ɔ wetin nɔ fɔ du na wi layf. Bifo dat, i de yuz rial layf stori dɛn, prɔfɛsi dɛn, ɛn advays dɛn we go ɛp wi fɔ disayd fɔ du di rayt tin dɛn. Bay dɛn we dɛn ya, Gɔd in Wɔd de muv wi fɔ lɛk ɛn obe am wit ɔl wi at.

15. (a) Aw di Baybul sho se Jiova rili bisin bɔt di wan dɛn we de rid in Wɔd? (b) Na di pikchɔ, udat dɛn di Baybul tɔk bɔt we di smɔl titi, di yɔŋ brɔda, ɛn di ol sista de tink bɔt? (Jɛn. 39:​1, 10-12; 2 Kiŋ 5:​1-3; Lyuk 2:​25-38)

¹⁵ Di Baybul sho se Jiova rili lɛk wi. Aw? In Wɔd ful-ɔp wit akawnt dɛn we de sho aw mɔtalman de fil. Wi go ebul fɔ ɔndastand aw pipul dɛn we di Baybul tɔk bɔt bin de fil bikɔs dɛn “gɛt filin lɛk wi.” (Jems 5:​17) Wetin impɔtant mɔ na dat we wi tek tɛm lan aw i bin de trit pipul dɛn lɛk wi, wi ebul fɔ ɔndastand klia wan se “Jiova rili lɛk wi ɛn i gɛt sɔri-at.”—Jems 5:​11.

16. Wetin wi lan bɔt Jiova we wi rid na di Baybul bɔt pipul dɛn we bin mek mistek? (Ayzaya 55:​7)

¹⁶ Di Baybul de sho se Jiova lɛk wi wan ɔda we bak. Di Baybul de ɛp wi fɔ no se wi Gɔd nɔ go tɔn in bak pan wi we wi mek mistek dɛn. Di Izrɛlayt dɛn bin de sin agens Jiova bɔku tɛm; bɔt, we dɛn ripɛnt wit ɔl dɛn at, Gɔd bin de fɔgiv dɛn. (Rid Ayzaya 55:​7.) Di fɔstɛm Kristian dɛn bin no se Jiova rili lɛk dɛn. Gɔd bin yuz apɔsul Pɔl fɔ ɛnkɔrej in kɔmpin Kristian dɛn fɔ “fɔgiv . . . ɛn kɔrej” wan man we bin kɔmit siriɔs sin bɔt we bin ripɛnt. (2 Kɔr. 2:​6, 7; 1 Kɔr. 5:​1-5) I impɔtant fɔ no se Jiova nɔ de tɔn in bak pan in savant dɛn bikɔs dɛn mek mistek! Bifo dat, i bin de ɛnkɔrej dɛn, kɔrɛkt dɛn, ɛn ɛp dɛn bak fɔ bi in padi dɛn. I prɔmis fɔ du di sem tin tide fɔ ɔl di sina dɛn we ripɛnt.—Jems 4:​8-10.

17. Wetin mek di Baybul na gift we impɔtant?

¹⁷ Jiova dɔn gi wi wan fayn gift. Wetin mek in Wɔd rili impɔtant? As wi dɔn lan, di Baybul de sho wi Gɔd in sɛns, in jɔstis, ɛn in lɔv. Dis buk de sho se Jiova want wi fɔ no am. I want wi fɔ bi in padi dɛn.

18. Aw wi go sho se wi gladi fɔ Jiova in “gud gift” we na di Baybul?

¹⁸ Wi nɔ want fɔ fɔgɛt se Gɔd in Wɔd na “gud gift.” (Jems 1:​17) So lɛ wi kɔntinyu fɔ sho se wi gladi fɔ am. Wi go du dat bay we wi de rid di oli wɔd dɛn we de de ɛn tink bɔt dɛn. We wi du dat, wi shɔ se di Wan we gɛt di Baybul go blɛs wi ɛfɔt ɛn wi “go no PAPA GƆD.”—Prɔv. 2:​5.