Jiova “De Mɛn di Wan dɛn We Dɛn At Pwɛl”

 1. Aw Jiova de fil bɔt in savant dɛn?

WETIN Jiova de si we i de luk in savant dɛn na di wɔl? I de no we wi gladi ɛn we wi at pwɛl. (Sam 37:18) We i de si se wi de du wi bɛst fɔ sav am pan ɔl we wi at pwɛl, dat de mek i gladi fɔ wi! I nɔ jɔs de gladi, bɔt i rɛdi fɔ ɛp wi ɛn kɔrej wi.

 2. Wetin Jiova de du fɔ di wan dɛn we dɛn at pwɛl? Aw wi go bɛnifit frɔm di we aw i bisin bɔt wi?

² Sam 147:3 se Jiova ‘de bandej di wund dɛn’ we di wan dɛn we dɛn at pwɛl gɛt. Dis skripchɔ de tɔk bɔt aw Jiova de tek tɛm ɛp di wan dɛn we dɛn at pwɛl. Wetin wi fɔ du fɔ bɛnifit frɔm Jiova in ɛp? Tink bɔt dis ɛgzampul. Dɔktɔ we sabi du in wok go ebul du bɔku tin fɔ ɛp pɔsin we wund fɔ mek i wɛl. Bɔt, fɔ mek di pɔsin we wund wɛl, i fɔ tek tɛm fala wetin di dɔktɔ tɛl am fɔ du. Insay dis atikul, wi go si wetin Jiova tɛl di wan dɛn we dɛn at pwɛl na in Wɔd di Baybul ɛn wi go tɔk bɔt aw wi go aplay in fayn advays dɛn.

JIOVA DE MEK WI NO SE WI RILI VALYU TO AM

 3. Wetin mek sɔm pipul dɛn kin fil se dɛn nɔ gɛt bɛtɛ valyu?

³ Wi de insay wɔl we bɛtɛ lɔv nɔ de, ɛn i sɔri fɔ no se dis dɔn mek bɔku pipul dɛn fil se dɛn nɔ gɛt bɛtɛ valyu. Wan sista we nem Ɛlɛna tɔk se: “A mɛn na famili we nɔ gɛt lɔv. Mi papa bin lɛk fɛt-fɛt ɛn ɛvride i bin de tɛl mi se a nɔ gɛt wan yus.” Sɔntɛm jɔs lɛk Ɛlɛn, dɛn dɔn trit yu bad, tɔk bad tin dɛn bɔt yu bɔku tɛm, ɔ mek yu fil se nɔbɔdi nɔ lɛk yu. If na so i bi, sɔntɛm i go at fɔ mek yu biliv se pɔsin de we rili lɛk yu.

 4. Akɔdin to Sam 34:​18, us prɔmis Jiova gi wi?

⁴ Ilɛksɛf ɔda pipul dɛn trit yu bad, gɛt kɔnfidɛns se Jiova lɛk ɛn valyu yu. I “de nia di wan dɛn we gɛt pwɛlat.” (Rid Sam 34:18.) If yu “at rili pwɛl,” mɛmba se Jiova bin si gud tin insay yu ɛn na dat mek i drɔ yu kam to am. (Jɔn 6:44) I rɛdi fɔ ɛp yu ɔltɛm bikɔs yu valyu to am.

 5. Wetin wi kin lan frɔm di we aw Jizɔs bin trit di wan dɛn we pipul dɛn nɔ bin valyu?

⁵ Wi kin lan bɔt aw Jiova de fil we wi tɔk bɔt Jizɔs in ɛgzampul. Di tɛm we Jizɔs bin de du in prichin wok na di wɔl, i bin de notis di wan dɛn we pipul dɛn nɔ bin valyu ɛn i bin de trit dɛn fayn. (Mat. 9:​9-12) We wan uman we bin gɛt wan bad bad sik tɔch Jizɔs in klos bikɔs i bin biliv se dat go mek i wɛl, Jizɔs kɔrej am ɛn prez am fɔ di fet we i gɛt. (Mak 5:​25-34) Bikɔs Jizɔs de falamakata Jiova pafɛkt wan, yu kin gɛt kɔnfidɛns se Jiova go trit yu di sem we aw Jizɔs bin trit dis uman. (Jɔn 14:9) So yu fɔ biliv se Jiova valyu yu ɛn i de si di fayn kwaliti dɛn we yu gɛt, lɛk di strɔng fet we yu gɛt pan am ɛn di lɛk we yu lɛk am.

 6. Wetin go ɛp pɔsin fɔ lɛf fɔ fil se i nɔ gɛt bɛtɛ valyu?

⁶ Wetin yu go du if yu kɔntinyu fɔ fil se yu nɔ gɛt bɛtɛ valyu? Rid Baybul vas dɛn we de sho se Jiova valyu yu ɛn tink gud gud wan bɔt dɛn.b (Sam 94:19) If yu nɔ ebul rich wan patikyula gol ɔ yu at pwɛl bikɔs yu nɔ ebul fɔ du wetin ɔda pipul dɛn de du, nɔ fil bad bɔt dat. Jiova nɔ de ɛkspɛkt yu fɔ du pas wetin yu ebul fɔ du. (Sam 103:​13, 14) If pɔsin bin dɔn du bad tin to yu trade, nɔ blem yusɛf fɔ wetin di pɔsin bin du. Mɛmba se Jiova go jɔj di wan dɛn we de trit ɔda pipul dɛn bad, bɔt i de ɛp di wan dɛn we dɛn de trit bad. (1 Pit. 3:12) Sandra we in mama ɛn papa bin de trit bad we i bin smɔl tɔk se, “A kin beg Jiova ɔltɛm fɔ mek i ɛp mi fɔ si di fayn kwaliti dɛn we i de si insay mi.”

 7. Aw wi go yuz di tin dɛn we bin dɔn apin to wi fɔ ɛp ɔda pipul dɛn we wi de sav Jiova?

⁷ Nɔ ɛva dawt se Jiova kin yuz yu fɔ ɛp ɔda pipul dɛn. I dɔn gi yu di ɔnɔ fɔ bi in kɔmpin wokman fɔ du di prichin wok. (1 Kɔr. 3:9) Di tin dɛn we dɔn apin to yu go mek i izi fɔ ɔndastand aw ɔda pipul dɛn de fil. Yu go ebul du bɔku tin dɛn fɔ ɛp dɛn. Ɛlɛn we wi bin dɔn tɔk bɔt bin gɛt di ɛp we i nid frɔm Jiova ɛn in brɔda ɛn sista dɛn, ɛn naw i ebul fɔ ɛp ɔda pipul dɛn. I tɔk se: “Fɔs, a bin de fil se a nɔ gɛt valyu, bɔt Jiova dɔn mek a si se a gɛt valyu ɛn i de yuz mi fɔ ɛp ɔda pipul dɛn.” Ɛlɛn gladi fɔ sav as rɛgyula payɔnia naw.

JIOVA WANT WI FƆ GRI SE I DƆN FƆGIV WI

 8. Us garanti Ayzaya 1:18 gi wi?

⁸ Sɔm pan Jiova in savant dɛn stil de fil bad bikɔs ɔf di tin dɛn we dɛn bin dɔn du bifo dɛn baptayz ɛn ivin afta dɛn baptayz. Bɔt i go fayn fɔ mek wi mɛmba se Jiova mek in pikin day fɔ wi bikɔs i rili lɛk wi. Wan dawt nɔ de se i want mek wi gri fɔ tek in gift. Jiova mek wi no se afta wi dɔn “tɔk di kes we de bitwin wi”c ɛn in, i nɔ go pɔnish wi igen fɔ wi sin dɛn. (Rid Ayzaya 1:18.) Bikɔs Jiova nɔ de mɛmba wi sin dɛn igen, dat de sho se i rili lɛk wi! Dɔn bak, i nɔ de ɛva fɔgɛt di gud tin dɛn we wi bin dɔn du.—Sam 103:​9, 12; Ibru. 6:10.

 9. Bifo wi pe atɛnshɔn pan wetin bin dɔn apin trade, wetin mek wi fɔ tray tranga wan fɔ pe atɛnshɔn to wetin de apin naw ɛn wetin go apin tumara bambay?

⁹ If yu de fil bad bɔt wetin yu bin dɔn du trade, tray tranga wan fɔ pe atɛnshɔn to wetin de apin naw ɛn wetin gɛt fɔ apin tumara bambay. Lɛ wi tɔk bɔt apɔsul Pɔl in ɛgzampul. I bin fil bad bikɔs i bin mek di Kristian dɛn sɔfa bad bad wan, bɔt i bin no se Jiova dɔn fɔgiv am. (1 Tim. 1:​12-15) Fɔ se i bin kɔntinyu fɔ tink bɔt di bad tin dɛn we i bin dɔn du trade? Wan dawt nɔ de se i nɔ bin du dat, jɔs lɛk aw i nɔ kɔntinyu fɔ tink bɔt di tin dɛn we i bin ebul du we in na bin Faresi we ɔlman rɛspɛkt. (Fil. 3:​4-8, 13-15) Bifo dat, Pɔl bin de du di prichin wok wit zil ɛn i bin de pe atɛnshɔn to wetin go apin tumara bambay. Jɔs lɛk Pɔl, yu nɔ ebul chenj wetin bin dɔn apin. Bɔt yu go ebul ɔnɔ Jiova bay di tin dɛn we yu de du naw ɛn pe atɛnshɔn to di wɔndaful tin dɛn we go apin tumara bambay we Jiova dɔn prɔmis yu.

10. If di tin dɛn we wi bin dɔn du mek ɔda pipul dɛn fil bad, wetin wi fɔ du?

¹⁰ Sɔntɛm yu at pwɛl bikɔs ɔf di tin dɛn we yu bin dɔn du we mek ɔda pipul dɛn fil bad. Wetin yu fɔ du? Du ɔl wetin yu ebul fɔ mek dɛn lɛf fɔ fil bad bɔt wetin yu du. Dɔn bak, na fɔ tɛl dɛn sɔri ɛn du tin dɛn we de sho se yu rili sɔri fɔ wetin yu du. (2 Kɔr. 7:11) Pre to Jiova fɔ mek i ɛp di wan dɛn we di tin dɛn we yu du afɛkt. I go ɛp yu ɛn di wan dɛn we yu dɔn du bad to fɔ bia ɛn gɛt pis bak.

11. Wetin wi kin lan frɔm prɔfɛt Jona in ɛgzampul? (Luk bak di pikchɔ na di pej.)

¹¹ Lan frɔm di mistek dɛn we yu bin dɔn mek ɛn alaw Jiova fɔ yuz yu di we aw i want. Tink bɔt prɔfɛt Jona in ɛgzampul. Bifo Jona go na Ninivɛ usay Jiova bin tɛl am fɔ go, i bin rɔnawe go ɔdasay. Jiova bin pɔnish am fɔ dat ɛn i bin lan frɔm in mistek. (Jona 1:​1-4, 15-17; 2:​7-10) Jiova nɔ bin stɔp fɔ yuz Jona as prɔfɛt. Gɔd bin gi am ɔda chans fɔ go na Ninivɛ, ɛn dis tɛm Jona nɔ bin westɛm fɔ obe. Pan ɔl we Jona fil bad bɔt di mistek we i bin mek, i nɔ bin alaw dat fɔ mek i nɔ du wetin Jiova bin tɛl am fɔ du.—Jona 3:​1-3.

JIOVA DE YUZ IN OLI SPIRIT FƆ KƆREJ WI

12. Aw Jiova de gi wi pis we bad tin apin to wi ɔ we pɔsin we wi lɛk day? (Filipians 4:​6, 7)

¹² Jiova kin yuz in oli spirit fɔ kɔrej wi we bad tin apin to wi ɔ we pɔsin we wi lɛk day. Lɛ wi tɔk bɔt Rɔn ɛn Karɔl dɛn ɛkspiriɛns. I sɔri fɔ no se dɛn bɔypikin bin kil insɛf. Dɛn tɔk se: “Wi dɔn gɛt prɔblɛm dɛn we nɔ bin rili izi, bɔt dis wan wɔs pas dɛn ɔl. Bɔku nɛt dɛn we wi nɔ ebul fɔ slip, wi bin de pre to Jiova ɛn i bin mek wi ebul fɔ gɛt di pis we Filipians 4:​6, 7 tɔk bɔt.” (Rid.) If yu at rili pwɛl bikɔs bad tin dɔn apin to yu, na fɔ pre to Jiova ɔltɛm ɛn tek tɛm tɛl am aw yu de fil. (Sam 86:3; 88:1) Nɔ taya fɔ beg Jiova fɔ in oli spirit. I go ɛp yu ɔltɛm.—Lyuk 11:​9-13.

13. Aw oli spirit go ɛp wi fɔ kɔntinyu fɔ wɔship Jiova fetful wan? (Ɛfishians 3:16)

¹³ Yu dɔn gɛt prɔblɛm we nɔ bin rili izi ɛn we mek yu fil se yu nɔ gɛt trɛnk fɔ du ɛnitin? Oli spirit go gi yu di trɛnk we yu nid fɔ kɔntinyu fɔ wɔship Jiova fetful wan. (Rid Ɛfishians 3:16.) Lɛ wi tɔk bɔt wan sista we nem Flɔra in ɛkspiriɛns. In ɛn in man bin de sav as mishɔnari dɛn we in man go du mami ɛn dadi biznɛs wit ɔda uman, ɛn dat bin mek dɛn dayvɔs. I tɔk se: “Mi at bin rili pwɛl bikɔs ɔf wetin i bin du ɛn na wetin i bin du nɔmɔ a bin de tink bɔt. A bin pre to Jiova fɔ in oli spirit so dat a go ebul fɔ bia. Jiova bin kɔrej mi ɛn pan ɔl we fɔs i bin tan lɛk se a nɔ go ebul fɔ bia, i bin ɛp mi fɔ gɛt trɛnk ɛn a bin ebul fɔ bia.” Flɔra si se Gɔd bin ɛp am fɔ gɛt mɔ kɔnfidɛns ɛn i go ɛp am fɔ bia ɔl in prɔblɛm dɛn. I kɔntinyu fɔ tɔk se: “Di wɔd dɛn na Sam 119:32 de tɔk bɔt aw Jiova dɔn ɛp mi. Di vas se: ‘A rili want fɔ fala yu kɔmandmɛnt dɛn, bikɔs yu de ɛp mi fɔ ɔndastand dɛn.’”

14. Aw wi go alaw Gɔd in spirit fɔ wok insay wi?

¹⁴ Afta yu dɔn aks Jiova fɔ in oli spirit, wetin yu fɔ du? Du tin dɛn we go mek yu gɛt Gɔd in spirit mɔ ɛn mɔ. Sɔm pan dɛn tin dɛn ya na fɔ de atɛnd di mitin dɛn ɛn prich to ɔda pipul dɛn. Rid di Baybul ɛvride fɔ ɛp yu fɔ tink gud gud wan bɔt aw Jiova de tink. (Fil. 4:​8, 9) As yu de rid, tray fɔ notis pipul dɛn we di Baybul tɔk bɔt we bin gɛt prɔblɛm dɛn ɛn tink gud gud wan bɔt aw Jiova bin ɛp dɛn fɔ bia. Sandra we wi bin dɔn tɔk bɔt bin sɔfa bikɔs i bin gɛt bɔku prɔblɛm dɛn we nɔ bin izi. I tɔk se: “Di stori bɔt Josɛf kin rili tɔch mi at. I nɔ bin alaw di prɔblɛm dɛn we bin mit am ɛn di trit we dɛn nɔ bin trit am fia wan fɔ ambɔg in padi biznɛs wit Jiova.”—Jɛn. 39:​21-23.

JIOVA DE YUZ WI KƆMPIN KRISTIAN DƐN FƆ KƆREJ WI

15. Na udat dɛn go kɔrej wi? Aw dɛn go ɛp wi? (Luk bak di pikchɔ.)

¹⁵ We wi de sɔfa, wi kɔmpin Kristian dɛn go ebul fɔ “rili kɔrej mi.” (Kol. 4:11) Jiova de yuz wi brɔda ɛn sista dɛn fɔ sho se i rili lɛk wi. Dɛn kin kɔrej wi bay we dɛn de spɛn tɛm wit wi ɛn lisin we wi de tɔk bɔt aw wi de fil, ɔ sɔntɛm dɛn go yuz wan Baybul vas fɔ ɛnkɔrej wi ɔ pre wit wi.d (Rom. 15:4) Sɔntɛnde, wan brɔda ɔ sista go mɛmba wi bɔt aw Jiova de tink ɛn dat go ɛp wi fɔ kɔntinyu fɔ bia. Wi kɔmpin Kristian dɛn kin du ɔda tin dɛn bak fɔ sɔpɔt wi, lɛk fɔ gi wi tin fɔ it di tɛm we wi at pwɛl.

16. Wetin wi nid fɔ du fɔ lɛ pipul dɛn ɛp wi?

¹⁶ Sɔntɛnde, wi go nid fɔ aks ɔda pipul dɛn fɔ ɛp wi. Wi brɔda ɛn sista dɛn lɛk wi ɛn dɛn want fɔ ɛp wi. (Prɔv. 17:17) Bɔt sɔntɛm dɛn nɔ no aw wi de fil ɔ wetin wi nid. (Prɔv. 14:10) If yu at pwɛl, na fɔ tɔk to yu padi dɛn we machɔ bɔt aw yu de fil. Mek dɛn no wetin dɛn go du fɔ ɛp yu. Yu kin disayd fɔ tɔk wit wan ɔ tu ɛlda dɛn we yu kin fil fri fɔ tɔk to. Sɔm sista dɛn dɔn si se we dɛn de tɔk wit ɔda machɔ sista, dat kin kɔrej dɛn.

17. Wetin na sɔm tin dɛn we kin mek i nɔ izi fɔ lɛ wi aks ɔda pipul dɛn fɔ ɛnkɔrej wi? Wetin wi go du bɔt dɛn tin dɛn de?

¹⁷ Avɔyd fɔ de yu wangren. Bikɔs yu at pwɛl, sɔntɛm yu nɔ go fil fɔ spɛn tɛm wit ɔda pipul dɛn. Sɔntɛnde, yu brɔda ɛn sista dɛn nɔ go rili ɔndastand yu ɔ sɔntɛm dɛn go tɔk tin we go mek yu fil bad. (Jems 3:2) Nɔ alaw dɛn tin dɛn de fɔ mek yu nɔ gri fɔ lɛ yu brɔda ɛn sista dɛn ɛnkɔrej yu. Wan ɛlda we nem Gavin we gɛt siriɔs pwɛlat tɔk se: “Bɔku tɛm, di las tin we a kin want fɔ du na fɔ tɔk wit mi padi dɛn ɛn spɛn tɛm wit dɛn.” Bɔt Gavin nɔ kin alaw di we aw i de fil fɔ mek i nɔ spɛn tɛm wit ɔda pipul dɛn ɛn bɔku tɛm i kin fil fayn we i du dat. Wan sista we nem Emi tɔk se: “Bikɔs ɔf di tin dɛn we dɔn apin to mi, dis de mek i nɔ izi fɔ lɛ a trɔst pipul dɛn. Bɔt a de lan fɔ trɔst ɛn lɛk mi brɔda ɛn sista dɛn lɛk aw Jiova de du. A no se dis de mek Jiova gladi ɛn i de mek misɛf gladi.”

DI TIN DƐN WE JIOVA DƆN PRƆMIS FƆ DU TUMARA BAMBAY DE KƆREJ WI

18. Wetin wi de op se go apin tumara bambay? Wetin wi fɔ du naw?

¹⁸ I nɔ go te igen, Jiova go pul ɔl di tin dɛn we de mek wi at pwɛl ɛn ɛni pen we wi de fil. (Rɛv. 21:​3, 4) Da tɛm de, di tin dɛn we bin dɔn apin we bin mek wi at pwɛl “nɔ go lɛf na [wi] at.” (Ayz. 65:17) Jɔs lɛk aw wi dɔn lan, Jiova ‘de bandej wi wund dɛn’ ivin rayt naw. So gri fɔ yuz di tin dɛn we Jiova dɔn gi fɔ kɔrej yu ɛn mek yu fil fayn. Nɔ ɛva dawt se “i bisin bɔt [yu].”—1 Pit. 5:7.