Yu De Si di Nid fɔ Go Bifo pan Gɔd Biznɛs?

1, 2. (a) Aw wetin de na Ayzaya 60:​22 dɔn apin insay dis las dez? (b) Us nid de naw na di pat pan Jiova in ɔganayzeshɔn we de na dis wɔl?

DI Baybul se: “Di las wan go bi ɛkstɛndɛd famili, ɛn di wan we smɔl pas ɔl go bi wan big big neshɔn.” (Ayzaya 60:​22) Dɛn wɔd dɛn de dɔn de apin naw insay dis las dez. Infakt, insay 2015 na bin 8,220,105 pipul dɛn we na Jiova in savant dɛn we de prich di gud nyus bɔt Gɔd in Kiŋdɔm na di wan ol wɔl. Gɔd bin tɔk bɔt di bɔku we in pipul dɛn go bɔku, we i se: “Mi na PAPA GƆD; we di tɛm rich, a go mekes du am.” So as tɛm de go, bɔku wok go de fɔ wi ɔl fɔ du. Wi de du ɔl wetin wi ebul naw fɔ prich ɛn tich pipul dɛn di gud nyus? Bɔku brɔda ɛn sista dɛn dɔn bi rɛgyula payɔnia ɔ ɔgzilari payɔnia. Sɔm dɛn dɔn muf go na ɔda ples dɛn fɔ ɛp fɔ prich de ɛn ɔda wan dɛn de wok tranga wan fɔ bil Kiŋdɔm Ɔl dɛn.

² Ɛni ia dɛn kin opin lɛk 2,000 nyu kɔngrigeshɔn dɛn so. Dɛn kɔngrigeshɔn dɛn ya nid ɛlda ɛn ministerial savant dɛn. Ɛni ia, bɔku bɔku ministerial savant dɛn nid fɔ bi ɛlda dɛn ɛn bɔku bɔku ɔda brɔda dɛn nid fɔ bi ministerial savant dɛn. Dis sho klia wan se wi “fɔ de du Gɔd in wok ɔltɛm,” ɛn dis nɔto jɔs fɔ brɔda dɛn nɔmɔ, ivin sista dɛnsɛf kin du dat.—Fɔs Lɛta Fɔ Kɔrint 15:​58.

3, 4. Wetin i min to yu fɔ go bifo pan Gɔd biznɛs?

³ Rid Fɔs Lɛta To Timoti 3:​1. Di apɔsul Pɔl bin tɛl di brɔda dɛn tɛnki fɔ we dɛn “want” fɔ bi ovasia. Fɔ mek sɔmbodi gɛt sɔm tin we i want we de fa frɔm am, i go nid fɔ tray ɛn sɔntɛnde fɔ strɛch in an so dat i go gɛt am. Naw lɛ wi imajin se wan brɔda want fɔ bi ministerial savant. I kam fɔ no se i nid fɔ tray mɔ fɔ gɛt sɔm Kristian kwaliti dɛn. Dɔn afta we i bi ministerial savant, i kɔntinyu fɔ wok tranga wan so dat i go fit fɔ bi ɛlda.

⁴ Sɔm brɔda ɛn sista dɛn de mek chenj dɛn na dɛn layf bikɔs dɛn want fɔ du mɔ fɔ Jiova. Fɔ ɛgzampul, dɛn kin want fɔ payɔnia, fɔ wok na Bɛtɛl, ɔ fɔ ɛp fɔ bil Kiŋdɔm Ɔl dɛn. Lɛ wi si aw di Baybul kin ɛp wi ɔl fɔ kɔntinyu fɔ go bifo pan Gɔd biznɛs.

 5. Aw yɔŋ pipul dɛn kin yuz dɛn trɛnk fɔ sav Jiova?

⁵ Yɔŋ pipul dɛn kin du mɔ fɔ sav Jiova bikɔs dɛn gɛt trɛnk ɛn dɛn gɛt wɛlbɔdi. (Rid Prɔvabs 20:​29.) Sɔm yɔŋ brɔda ɛn sista dɛn na Bɛtɛl kin ɛp fɔ print ɛn mek buk ɛn Baybul dɛn. Bɔku yɔŋ brɔda ɛn sista dɛn de bil Kiŋdɔm Ɔl dɛn ɔ ɛp fɔ mek di say dɛn we dɔn pwɛl. Sɔm dɛn kin ɛp fɔ wok na say dɛn usay bad bad tin lɛk atkwek ɔ ebi ebi ren dɔn pwɛl. Ɛn bɔku payɔnia dɛn we yɔŋ kin lan fɔ tɔk ɔda langwej dɛn ɔ travul go na ɔda ples dɛn fɔ prich di gud nyus.

6-8. (a) Aw wan yɔŋ man bin chenj di we aw i bin de tink bɔt in wɔship to Gɔd? Wetin bin apin? (b) Aw yu go “si fɔ yusɛf se PAPA GƆD na gud PAPA GƆD?

⁶ Wi lɛk Jiova ɛn wi want fɔ gi am wi bɛst. Pan ɔl dat, wi kin fil di sem we aw wan brɔda we nem Erɔn bin de fil. I bin want fɔ ɛnjɔy fɔ sav Jiova, bɔt i nɔ bin gladi. Pan ɔl we Erɔn bin dɔn de atɛnd mitin ɛn go fil savis frɔm we i smɔl, i bin tɔk se, “A nɔ bin de ɛnjɔy di mitin ɛn di fil savis.” So wetin i bin du?

⁷ Erɔn bin tray tranga wan fɔ de rid di Baybul ɔltɛm, fɔ pripia fɔ di mitin dɛn ɛn gi kɔmɛnt na mitin. I bin stat fɔ de pre ɔltɛm. Ɔl dɛn tin ya bin de ɛp am fɔ go bifo pan Gɔd biznɛs. I bin kam fɔ no Jiova mɔ ɛn mɔ ɛn i bin kam fɔ lɛk am pas aw i bin lɛk am trade. Dis bin mek Erɔn rili gladi. I bin de payɔnia, i bin de ɛp pipul dɛn na say dɛn usay bad bad tin dɛn lɛk atkwek ɔ ebi ebi ren dɔn pwɛl, ɛn i bin go prich na ɔda kɔntri. Tide, in na ɛlda ɛn i de wok na Bɛtɛl. Aw Erɔn fil bɔt insɛf? Erɔn tɔk se: “A dɔn kam fɔ si se Jiova na gud Gɔd. Bikɔs Jiova dɔn blɛs mi, a fil se a fɔ du sɔntin fɔ am ɛn dis de mek a du mɔ fɔ wɔship am ɛn naw a dɔn gɛt bɔku blɛsin dɛn.”

⁸ Wan pan di man dɛn we rayt di Sam buk bin se: “Kam si fɔ yusɛf se PAPA GƆD na gud PAPA GƆD.” I tɔk bak se: “Ɔl udat de luk ɔp to PAPA GƆD go gɛt ɔl wetin dɛn nid.” (Rid Sam 34:​8-10.) We wi gi Jiova wi bɛst wi kin rili gɛt gladi at bikɔs wi no se wi de du tin we de mek i gladi. Ɛn insɛf go du wetin i bin dɔn tɔk fɔ se i go kia fɔ wi.

9, 10. Wetin mek i impɔtant fɔ mek yu go de “peshɛnt wet”?

⁹ Wi kin rili want fɔ du mɔ we wi de wɔship Jiova. Bɔt lɛ wi se wi dɔn wet fɔ lɔng tɛm fɔ mek dɛn go mek wi ministerial savant ɔ ɛlda na wi kɔngrigeshɔn ɔ fɔ mek wetin de apin to wi chenj, wetin wi fɔ du? Wi nid fɔ peshɛnt. (Mayka 7:​7, NW) Ɛn pan ɔl we Jiova go alaw di tin we de apin to wi fɔ kɔntinyu, wi shɔ se i go sɔpɔt wi ɔltɛm. Wi kin lan frɔm Ebraam in ɛgzampul. Jiova bin prɔmis am se i go gɛt bɔy pikin, bɔt i bin gɛt fɔ wet fɔ lɔng tɛm bifo dɛn bɔn Ayzak. Da tɛm de, Ebraam bin peshɛnt ɛn in bin kɔntinyu fɔ gɛt fet pan Jiova.—Jɛnɛsis 15:​3, 4; 21:​5; Di Ibru Pipul Dɛn 6:​12-15.

¹⁰ Bɔt i nɔ kin izi fɔ wet. (Prɔvabs 13:​12) Bɔt if wi de tink bɔt wetin de apin to wi ɛn fil bad bɔt dat, wi nɔ go gɛt kɔrej. Bifo dat, wi fɔ de yuz wi tɛm fɔ gɛt di fayn fayn kwaliti dɛn we wi go nid fɔ du sɔm wok dɛn na di kɔngrigeshɔn.

11. Us fayn kwaliti dɛn wi fɔ tray tranga wan fɔ gɛt? Wetin mek dɛn impɔtant?

¹¹ Gɛt fayn abit ɛn kwaliti dɛn we yu nid. We yu de rid di Baybul ɛn tink gud wan bɔt wetin yu de rid, i go ɛp yu fɔ gɛt sɛns fɔ tink gud wan ɛn no aw fɔ disayd fɔ du tin. Infakt, brɔda dɛn nid dɛn kwaliti dɛn ya ɛn gud abit dɛn fɔ mek dɛn go ebul kia fɔ di kɔngrigeshɔn. (Prɔvabs 1:​1-4; Taytɔs 1:​7-9) We wi de stɔdi di Baybul, wi kin kam fɔ no aw Jiova de si bɔku tin dɛn. Dɔn ɛnide, wi go de yuz wetin wi dɔn lan fɔ disayd fɔ du tin dɛn we go mek Jiova gladi. Fɔ ɛgzampul, wi go no aw fɔ trit ɔda pipul dɛn, aw fɔ yuz mɔni, aw fɔ pik di we aw wi de ɛnjɔy wisɛf, ɛn aw fɔ drɛs.

12. Aw di wan dɛn na di kɔngrigeshɔn go sho se dɛn na pipul dɛn we ɔda pɔsin fɔ biliv?

¹² Tray tranga wan fɔ du ɛni wok we dɛn gi yu. We Gɔd in pipul dɛn bin de bil di tɛmpul bak, Nɛimaya bin nid man dɛn we go du difrɛn wok dɛn. I bin pik di wan dɛn we nɔ gɛt wan badnem. I bin no se dɛn man ya lɛk Gɔd ɛn dɛn go wok tranga wan fɔ du ɛni kayn wok we dɛn go gi dɛn. (Nɛimaya 7:​2; 13:​12, 13) Semweso tide, di wan dɛn we fetful ɛn we de wok tranga wan nɔ fɔ gɛt wan badnem ɛn dɛn go gi dɛn mɔ wok fɔ du. (Fɔs Lɛta Fɔ Kɔrint 4:​2) So ilɛk wi na brɔda ɔ sista, wi fɔ du wi bɛst ɔltɛm fɔ du ɛni wok we dɛn gi wi.—Rid Fɔs Lɛta To Timoti 5:​25.

13. Aw yu go fala Josɛf in ɛgzampul we ɔda pipul dɛn nɔ trit yu fayn?

¹³ Abop pan Jiova. Wetin yu go du if ɔda pipul dɛn nɔ trit yu fayn? Yu kin ebul fɔ ɛksplen to dɛn aw yu de fil. Bɔt if yu de kɔntinyu fɔ tɔk fɔ yusɛf ɛn pin se pawpa na yu gɛt rayt, yu de mek di prɔblɛm wɔs. Wi kin lan bɔku tin frɔm Josɛf in ɛgzampul. In brɔda dɛn bin trit am bad. Pipul dɛn bin lay pan am, ɛn dɛn bin put am na prizin fɔ sɔntin we i nɔ du. Bɔt Josɛf bin abop pan Jiova. I bin de tink bɔt wetin Jiova bin dɔn prɔmis, ɛn i bin kɔntinyu fɔ de fetful wan. (Sam 105:​19) Insay dɛn tɛm dɛn de we tin nɔ bin izi fɔ Josɛf, i bin tray fɔ gɛt gud kwaliti dɛn we bin ɛp am leta fɔ du di impɔtant wok we dɛn bin gi am. (Jɛnɛsis 41:​37-44; 45:​4-8) If ɔda pipul dɛn dɔn trit yu bad, pre to Jiova fɔ lɛ i gi yu sɛns. I go ɛp yu fɔ kɔntinyu fɔ sɛt mɔt ɛn trit dɛn fayn we yu de tɔk to dɛn.—Rid Pita In Fɔs Lɛta 5:​10.

14, 15. (a) Wetin mek wi fɔ pe atɛnshɔn to di we aw wi de prich? (b) Aw yu go ajɔst if yu si se nid de fɔ chenj di we aw yu de prich? (Luk di pikchɔ nia dis atikul in taytul ɛn di bɔks we gɛt di taytul “Yu Rɛdi fɔ Tray Difrɛn We dɛn fɔ Prich?”)

¹⁴ Pɔl bin tɛl Timoti fɔ kɔntinyu fɔ du mɔ pan di we aw i de ɛksplen di Skripchɔ dɛn. Pɔl bin se: “Yu fɔ bikyaful wetin yu de du ɛn wetin yu de lan pipul.” (Fɔs Lɛta To Timoti 4:​13, 16) Timoti bin dɔn de prich fɔ lɔng tɛm. So wetin mek i bin nid fɔ du mɔ? Timoti bin no se pipul dɛn kin chenj ɛn di tin dɛn we kin apin to dɛn sɛf kin chenj. I bin want mek pipul dɛn kɔntinyu fɔ lisin to am, so i bin nid fɔ kɔntinyu fɔ du mɔ ɛn fɔ chenj di we aw i bin de tich dɛn. We wisɛf de prich tide, wi nid fɔ du di sem tin.

¹⁵ Na sɔm say dɛn, wi nɔ kin mit bɔku pipul dɛn na os we wi de prich frɔm os to os. Na ɔda say dɛn wi kin mit pipul dɛn na os, bɔt wi nɔ kin ebul fɔ tɔk to dɛn, bikɔs wi nɔ kin ebul fɔ go insay dɛn kɔmpawn. If na dat de apin usay yu de prich, yu nɔ tink se i go fayn fɔ mek yu fɛn ɔda we fɔ prich to pipul dɛn?

16. Aw pɔsin go ebul fɔ du pɔblik prichin fayn fayn wan?

¹⁶ Bɔku brɔda ɛn sista dɛn kin ɛnjɔy fɔ du pɔblik prichin. Fɔ ɛgzampul, dɛn kin go na tren steshɔn, bɔs steshɔn, makit, ɛn pak dɛn fɔ fɛn pipul dɛn fɔ prich to. Dɛn kin bigin fɔ tɔk bɔt sɔntin we dɛn jɔs tɔk bɔt na nyus. Ɔ dɛn go tɔk fayn tin bɔt di pɔsin in pikin ɔ aks di pɔsin kwɛstyɔn bɔt in wok. If di pɔsin lɛk wetin dɛn de tɔk, di pɔblisha kin tɔk bɔt sɔntin we de na di Baybul ɛn aks di pɔsin wetin i tink. Bɔku tɛm, sɔm pipul dɛn kin want fɔ no mɔ bɔt di Baybul.

17, 18. (a) Aw yu go gɛt maynd fɔ du pɔblik prichin? (b) Wetin mek yu tink se di we aw Devid bin de prez Jiova go ɛp yu we yu de prich?

¹⁷ Sɔntɛm i nɔ kin izi fɔ mek yu bigin fɔ tɔk to pipul dɛn na strit we yu nɔ sabi. Na so wan brɔda we nem Ɛdi we na payɔnia na Nyu Yɔk Siti bin fil. Bɔt i bin fɛn sɔntin we bin ɛp am fɔ mek i rili gɛt maynd. I bin se: “We mi ɛn mi wɛf kin de du famili wɔship wi kin stɔdi mɔ fɔ fɛn ansa dɛn to tin dɛn we pipul dɛn kin tɔk bikɔs dɛn nɔ want fɔ lisin ɛn fɔ ansa pipul dɛn we dɛn tɔk wetin dɛn tink bɔt sɔntin. Wi bin aks ɔda pɔblisha dɛn bak fɔ ɛp wi.” Naw Ɛdi kin rili gladi fɔ go du pɔblik prichin.

¹⁸ We wi de ɛnjɔy di prichin wok mɔ ɛn du mɔ fɔ sabi tɔk to pipul dɛn bɔt di gud nyus, pipul dɛn kin si di we aw wi de go bifo pan Gɔd biznɛs. (Rid Fɔs Lɛta To Timoti 4:​15.) Ɛn wi kin ivin ɛp pɔsin fɔ kam wɔship Jiova. Devid bin se: “A go prez PAPA GƆD ɔltɛm; a nɔ go taya fɔ tɔk aw i gud. Wit ɔl mi at, a go blɔf fɔ wetin PAPA GƆD de du.”—Sam 34:​1, 2.

19. Wetin mek pɔsin we de biɛn Jiova ɔltɛm kin gɛt gladi at pan ɔl we i nɔ izi?

¹⁹ Devid bin se: “PAPA GƆD, ɔl wetin yu mek go prez yu; dɛn wan we de fala yu go de prez yu. Dɛn go tɔk bɔt aw yu de rul as Kiŋ ɛn di pawa we yu gɛt, dat go mek ɔlman no bɔt di wɔndaful tin dɛn we yu de du ɛn aw pawaful yu yon kiŋ bi.” (Sam 145:​10-12) Di wan dɛn we lɛk Jiova ɛn we de biɛn am ɔltɛm kin rili want fɔ tɛl ɔda pipul dɛn bɔt am. Wetin yu go du if yu sik ɔ yu dɔn ol ɛn dat mek yu nɔ ebul fɔ spɛn bɔku tɛm fɔ prich os to os igen? Mɛmba ɔltɛm se yu de prez Jiova ɛnitɛm we yu tɔk bɔt am to pipul dɛn we de arawnd yu lɛk di nɔs ɔ dɔktɔ dɛn. If yu de na prizin bikɔs yu tinap tranga wan fɔ wetin yu biliv, yu go stil ebul fɔ tɛl ɔda pipul dɛn bɔt Jiova, ɛn dat go mek i gladi. (Prɔvabs 27:​11) Jiova kin gladi bak ilɛksɛf na yu wan de sav am insay yu famili. (Pita In Fɔs Lɛta 3:​1-4) Ilɛk tin nɔ izi fɔ yu, yu go stil ebul fɔ prez Jiova, kɔntinyu fɔ kam nia am, ɛn go bifo pan Gɔd biznɛs.

20, 21. If yu gɛt bɔku bɔku wok na di ɔganayzeshɔn, aw dat go mek yu ɛp ɔda pipul dɛn?

²⁰ Jiova go blɛs yu if yu kɔntinyu fɔ kam nia am ɛn du yu bɛst fɔ sav am. Sɔntɛm we yu ajɔst wetin yu de du ɔ di we aw yu de liv yu layf, yu go gɛt bɔku chans fɔ ɛp pipul dɛn fɔ lan bɔt Gɔd in fayn fayn prɔmis dɛn. Dɔn bak yu go ebul fɔ ɛp yu brɔda dɛn mɔ ɛn mɔ. Tink bɔt aw yu brɔda ɛn sista dɛn go lɛk yu mɔ ɛn mɔ we dɛn de si di we aw yu de wok tranga wan na di kɔngrigeshɔn!

²¹ I nɔ mata if i dɔn te we yu de sav Jiova, wi ɔl go kɔntinyu fɔ kam nia am ɛn fɔ go bifo pan Gɔd biznɛs. Insay di nɛks atikul, wi go tɔk bɔt aw wi go ɛp ɔda pipul dɛn fɔ mek dɛnsɛf go bifo pan Gɔd biznɛs.