Uskayn Lɔv De Mek Wi Gɛt Tru Tru Gladi At?

 1. Wetin mek di tɛm we wi de naw difrɛn frɔm ɔl ɔda tɛm?

WI DE na tɛm we rili difrɛn frɔm ɔl ɔda tɛm insay mɔtalman istri. Jiova de gɛda bɔku bɔku pipul dɛn we “kɔmɔt na ɔl dɛn trayb ɛn ɔl dɛn neshɔn na [di] wɔl, dɛn bin de tɔk ɔl dɛn difrɛn difrɛn laŋwej na [di] wɔl,” jɔs lɛk aw di Baybul bin dɔn tɔk. Dɛn na “wan big big neshɔn” we pas et milyɔn pipul dɛn we gladi ɛn “de ɛn nɛt, dɛn tinap bifo di ay chia we Gɔd sidɔm pan, ɛn dɛn de nain os de sav am.” (Rɛvɛleshɔn 7:​9, 15; Ayzaya 60:​22) I nɔ ɛva bi yet fɔ mek bɔku bɔku pipul dɛn kam fɔ lɛk Gɔd ɛn dɛn kɔmpin mɔtalman.

 2. Uskayn lɔv wi de si pan pipul dɛn we nɔto Gɔd in padi dɛn? (Luk di pikchɔ nia dis atikul in taytul.)

² Bɔt pan ɔl dat, di Baybul tɔk bak se insay wi yon tɛm, di wan dɛn we nɔto Gɔd in padi dɛn nɔ go lɛk dɛn kɔmpin dɛn fɔ di rayt rizin. Dis kayn lɔv jɔs bisin bɔt insɛf nɔmɔ. Di apɔsul Pɔl bin rayt se insay di las dez, “mɔtalman go lɛk insɛf, dɛn go lɛk mɔni,” ɛn “dɛn go lɛk ɛnjɔymɛnt ɛn dɛn nɔ go lɛk Gɔd.” (Sɛkɔn Lɛta to Timoti 3:​1-4, NW) Dis kayn lɔv difrɛn frɔm di wan we wi de gɛt frɔm Gɔd. Pɔsin we jɔs bisin bɔt insɛf nɔmɔ nɔ de gladi, pan ɔl we i go tink se dat go mek i gladi. Bifo dat, i de mek ɔlman jɔs bisin bɔt insɛf ɛn i de mek layf nɔ izi fɔ ɔlman.

 3. Wetin wi go tɔk bɔt insay dis atikul? Wetin mek?

³ Di apɔsul Pɔl bin no se pipul dɛn we jɔs bisin bɔt dɛnsɛf nɔmɔ go bɔku ɛn dat go ambɔg Kristian dɛn. So i wɔn Kristian dɛn se dɛn nɔ fɔ “miks” pan dɛn tin dɛn de ɔ dɛn fɔ avɔyd dɛn pipul dɛn we jɔs bisin bɔt dɛnsɛf nɔmɔ. (Sɛkɛn Lɛta To Timoti 3:​5) Bɔt wi nɔ go ebul fɔ avɔyd dɛn kayn pipul dɛn ya kpatakpata. So, wetin wi fɔ du fɔ protɛkt wisɛf frɔm dɛn kayn pipul dɛn de? Aw wi go du wetin go mek Jiova, di Gɔd we lɛk wi, gladi? Lɛ wi si di difrɛns bitwin di kayn lɔv we Gɔd want wi fɔ gɛt ɛn di kayn lɔv we Sɛkɔn Lɛta to Timoti 3:​2-4 (NW) tɔk bɔt. Dɔn wi go si aw wi go sho di kayn lɔv we go mek wi rili gɛt kolat ɛn gladi at.

 4. Wetin mek i nɔ bad if pɔsin lɛk insɛf?

⁴ Pɔl bin rayt se: “Mɔtalman go lɛk insɛf.” Fɔ se dis min se i bad fɔ lɛ pɔsin lɛk insɛf? Nɔ, i impɔtant ɛn na nɔmal tin. Na da we de Jiova mek wi. Jizɔs bin se: “Una fɔ lɛk una kɔmpin mɔtalman lɛkɛ aw una lɛk unasɛf.” (Mak 12:​31) Infakt, wi nɔ go lɛk ɔda pipul dɛn if wi nɔ lɛk wisɛf. Di Baybul tɛl wi bak se: “Maredman dɛn fɔ lɛk dɛn wɛf dɛn lɛk aw dɛn lɛk dɛn yon bɔdi. Maredman we lɛk in wɛf lɛk insɛf, bikɔs nɔbɔdi nɔ ɛva et in bɔdi, bɔt i de fid insɛf ɛn ol in bɔdi fayn.” (Lɛta fɔ Ɛfisɔs 5:​28, 29, NW) Dis de sho klia wan se wi fɔ lɛk wisɛf.

 5. Wetin yu go tɔk bɔt pipul dɛn we lɛk dɛnsɛf pasmak?

⁵ Di kayn lɔv we Sɛkɔn Lɛta to Timoti 3:​2 (NW) tɔk bɔt nɔto fayn wan. Na lɔv we wi jɔs de bisin bɔt wisɛf nɔmɔ. If pɔsin lɛk insɛf pasmak, i go pe atɛnshɔn mɔ pan insɛf pas aw i fɔ bi. (Rid Lɛta Fɔ Rom 12:​3.) I bisin mɔ bɔt insɛf pas aw i bisin bɔt ɔda pipul dɛn. We bad tin apin, bifo i blem insɛf, na ɔda pipul dɛn i de blem. Wan buk we de tɔk bɔt di Baybul kɔmpia da kayn pɔsin de to wan animal we fiba pɔkyupayn we dɛn kɔl ɛjɔg. Dis animal kin fol fol insɛf lɛk bɔl, we kin mek i nɔ fil kol bɔt na di shap shap tin dɛn we de na in bak nɔmɔ yu go si. Dɛn kayn pipul dɛn de nɔ kin rili gladi.

 6. Us bɛnifit wi de gɛt we wi lɛk Gɔd?

⁶ Sɔm masta sabi bukman dɛn biliv se Pɔl bin tɔk fɔs bɔt pɔsin we lɛk insɛf nɔmɔ bikɔs na dat de mek di pɔsin gɛt di bad abit dɛn we i tɔk bɔt nɛks. Bɔt di kayn lɔv we Gɔd want wi fɔ gɛt na wan we go mek wi gɛt gud kwaliti dɛn. I gɛt sɔntin fɔ du wit gladi at, pis, peshɛnt, fɔ du gud, fet, nɔ fɔ vɛks kwik, ɛn fɔ kɔntrol wisɛf. (Lɛta Fɔ Galeshya 5:​22, 23) Wan pan di man dɛn we rayt di Sam buk bin rayt se: “Di pipul . . . dɛn go gladi mɔ we na yu na PAPA GƆD [“Jiova,” NW], di PAPA GƆD we dɛn de wɔship.” (Sam 144:​15) Jiova na Gɔd we gladi, ɛn in pipul dɛn bak gladi. Dɔn bak, Jiova in pipul dɛn gladi bikɔs dɛn de gi to ɔda pipul dɛn, ɛn dis mek dɛn difrɛn frɔm dɛn pipul dɛn we jɔs bisin bɔt dɛnsɛf nɔmɔ ɛn we jɔs de tink bɔt wetin dɛn go gɛt.—Di Apɔsul Dɛn Wok [Akt] 20:​35.

 7. Us kwɛstyɔn dɛn go ɛp wi fɔ no if wi rili lɛk Gɔd?

⁷ Aw wi go no if di lɛk we wi lɛk wisɛf dɔn bigin fɔ pas di we aw wi lɛk Gɔd? Tink bɔt dis advays: “Una nɔ fɔ jɛs de du dɛn tin we una want fɔ du nɔmɔ, una nɔ fɔ du ɛnitin bikɔs una want mek dɛn prez una; una nɔ fɔ prawd, una fɔ fil se ɔda pipul bɛtɛ pas una. Una nɔ fɔ jɛs de mɛmba unasɛf nɔmɔ, una fɔ de mɛmba ɔda pipul.” (Lɛta Fɔ Filipay 2:​3, 4) Wi kin aks wisɛf dɛn kwɛstyɔn dɛn ya: ‘A de lisin to dis advays? A de tray fɔ du wetin Gɔd want mi fɔ du? A de luk fɔ we dɛn fɔ ɛp ɔda pipul dɛn na mi kɔngrigeshɔn ɛn we a de prich?’ I nɔ kin izi ɔltɛm fɔ gi wi tɛm ɛn wi trɛnk. I go min se wi gɛt fɔ wok tranga wan ɛn wi gɛt fɔ sakrifays sɔm pan di tin dɛn we wi kin ɛnjɔy fɔ du. Bɔt we wi no se wi de du wetin Gɔd want, dat kin mek wi gladi pas ɛni ɔda tin!

 8. Wetin sɔm Kristian dɛn dɔn du bikɔs dɛn lɛk Gɔd?

⁸ Sɔm Kristian dɛn dɔn lɛf di wok we dɛn bin de du we fɔ dɔn mek dɛn gɛt bɔku bɔku mɔni bikɔs dɛn lɛk Gɔd ɛn dɛn want fɔ du mɔ fɔ sav am. Ɛrika we na dɔktɔ, bin disayd nɔ fɔ yuz ɔl in tɛm pan in dɔktɔ wok, bifo dat i bin disayd fɔ payɔnia. Dis sista ɛn in man bin ebul fɔ sav na bɔku kɔntri dɛn. Ɛrika bin tɔk se: “Di bɔku ɛkspiriɛns dɛn we wi dɔn gɛt we wi de ɛp pipul dɛn we de tɔk ɔda langwej, ɛn di padi dɛn we wi dɔn gɛt, dɔn rili mek wi gladi.” Ɛrika stil de wok as dɔktɔ, bɔt i de yuz bɔku pan in tɛm ɛn in trɛnk fɔ tich pipul dɛn bɔt Jiova ɛn fɔ ɛp in brɔda ɛn sista dɛn. Ɛrika tɔk se dis dɔn mek i “rili gladi ɛn satisfay.”

 9. Wetin mek di wan dɛn we lɛk mɔni nɔ kin gladi?

⁹ Pɔl bin rayt se pipul dɛn go “lɛk mɔni.” Trade, wan payɔnia na Ayriland bin tɔk to wan man bɔt Gɔd. Di man bin opin in wɔlɛt, pul sɔm pepa mɔni ɛn tɔk se: “Dis na mi gɔd!” Na dis sem we bɔku pipul dɛn de fil, pan ɔl we dɛn nɔ go tɔk am. Dɛn lɛk mɔni ɛn di tin dɛn we mɔni kin mek dɛn gɛt. Bɔt di Baybul wɔn wi se: “Pɔsin we lɛk mɔni nɔ de ɛva satisfay wit mɔni; ɛn udat lɛk jɛntri nɔ de satisfay wit in prɔfit.” (Ɛkliziastis 5:​10) Bɔku pipul dɛn we lɛk mɔni nɔ de ɛva fil se dɛn gɛt bɔku mɔni. Dɛn want mɔ mɔni ɔl di tɛm ɛn dɛn de yuz ɔl dɛn layf fɔ tray fɔ gɛt mɔ mɔni. Dis dɔn mek “bɔku waala dɔn pwɛl dɛn at.”—Fɔs Lɛta To Timoti 6:​9, 10.

10. Wetin di Baybul tɔk bɔt jɛntri ɛn po?

¹⁰ Na tru se wi ɔl nid mɔni. Mɔni kin ɛp wi sɔntɛnde. (Ɛkliziastis 7:​12) Bɔt yu tink se wi go gladi if wi gɛt mɔni fɔ jɔs di tin dɛn we wi nid? Yɛs! (Rid Ɛkliziastis 5:​12.) Agɔ we na Jakɛ in bɔypikin bin rayt se: “Nɔ mek a po da bad bad po ɔ jɛntri bad bad wan; gi mi wetin jɛs du nɔmɔ fɔ mi.” I izi fɔ ɔndastand wetin mek dis man nɔ want fɔ po bad bad wan. I bin tɔk se i nɔ want mek natin tɛmt am fɔ tif, bikɔs tif go briŋ badnem to Gɔd. Bɔt wetin mek i nɔ want fɔ jɛntri? I bin rayt se: “If a jɛntri tumɔs a go fɔgɛt bɔt yu ɛn bigin aks udat na PAPA GƆD [“Jiova,” NW]?” (Prɔvabs 30:​8, 9) I go mɔs bi se yu sabi pipul dɛn we abop pan mɔni ɛn nɔ abop pan Gɔd.

11. Wetin Jizɔs bin tɔk bɔt mɔni?

¹¹ Pɔsin we lɛk mɔni nɔ go ebul du wetin Gɔd want. Jizɔs bin tɔk se: “Nɔbɔdi nɔ go bi slev to tu masta di sem tɛm. If i bi so, i go lɛk wan masta, i nɔ go lɛk di ɔda wan. I go wok gud fɔ wan masta, bɔt i nɔ go wok gud fɔ di ɔda wan. Una nɔ go de du Gɔd wok ɛn bi slev to mɔni, di sem tɛm.” I bin tɔk bak se: “Una nɔ fɔ kip plɛnti dia tin fɔ unasɛf na dis wɔl, bikɔs una fɔ no se wɔrɔm go pwɛl dɛn, dɛn go rɔsti ɛn tifman go brok una os go insay ɛn tif dɛn. Bɔt una fɔ kip una jɛntri na ɛvin, we wɔrɔm ɛn rɔsti nɔ go pwɛl dɛn, ɛn tifman nɔ go go insay go tif dɛn.”—Matyu 6:​19, 20, 24.

12. We wi liv simpul layf, aw dat kin ɛp wi fɔ sav Gɔd? Gi wan ɛgzampul.

¹² Bɔku pan Jiova in savant dɛn de tray fɔ liv simpul layf. Dɛn dɔn si se we dɛn de du dat, dɛn de gɛt mɔ tɛm fɔ sav Jiova ɛn dɛn gɛt gladi at. Jak we de na Amɛrika bin sɛl in big os ɛn in biznɛs fɔ mek i jɔyn in wɛf fɔ payɔnia. I bin tɔk se: “I nɔ bin izi fɔ mek wi lɛf wi fayn os ɛn prɔpati we nɔ bin de na di siti.” Bɔt fɔ sɔm tɛm, Jak kin kam na os wit pwɛl at bikɔs i bin de gɛt prɔblɛm dɛn na in wok ples. I tɔk se: “Mi wɛf we na rɛgyula payɔnia bin gladi ɔltɛm. Mi wɛf kin tɔk se, ‘A gɛt di bɛst bɔs we yu kin ɛva tink bɔt!’ Naw we misɛf de payɔnia, wi ɔl tu de wok fɔ di sem Pɔsin, we na Jiova.”

13. Wetin go ɛp wi fɔ tink gud wan bɔt di we aw wi de si mɔni?

¹³ We wi de tink bɔt di we aw wi de si mɔni, wi nid fɔ ɔnɛs ɛn aks wisɛf dɛn kwɛstyɔn dɛn ya: ‘Di we aw a de liv mi layf de sho se a rili biliv wetin di Baybul tɔk bɔt mɔni? Fɔ gɛt mɔ mɔni na di tin we impɔtant pas ɔl na mi layf? A bisin mɔ bɔt prɔpati pas mi padi biznɛs wit Jiova ɛn ɔda pipul dɛn? A rili biliv se Jiova go gi mi di tin dɛn we a nid?’ Wi shɔ se Jiova nɔ go ɛva kɔmɔt biɛn di wan dɛn we abop pan am!—Matyu 6:​33.

14. Wetin na di rayt we we wi fɔ tink bɔt ɛnjɔymɛnt?

¹⁴ Di Baybul tɔk bak se insay di las dez, pipul dɛn go “lɛk ɛnjɔymɛnt.” Jɔs lɛk aw wi no se i nɔ bad fɔ tink di rayt we bɔt wisɛf ɛn mɔni, na so bak wi no se i nɔ bad fɔ ɛnjɔy wi layf di rayt we. Sɔm pipul dɛn biliv se dɛn nɔ fɔ ɛnjɔy atɔl, bɔt nɔto dat Jiova want fɔ wi. Di Baybul ɛnkɔrej Gɔd in fetful savant se: “Ɛnjɔy yu it, ɛn drink yu wayn wit gladi” at.—Ɛkliziastis 9:​7.

15. Wetin i min fɔ bi pɔsin we “lɛk ɛnjɔymɛnt”?

¹⁵ Sɛkɔn Lɛta to Timoti 3:​4 (NW) tɔk bɔt dɛn wan dɛn we lɛk ɛnjɔymɛnt ɛn nɔ gɛt natin fɔ du wit Gɔd na dɛn layf. Notis se di vas nɔ se pipul dɛn go lɛk ɛnjɔymɛnt pas Gɔd. Dat go min se dɛn lɛk Gɔd smɔl. Bɔt di vas se “dɛn nɔ go” lɛk Gɔd. Wan masta sabi bukman bin rayt bɔt dis vas se, “I nɔ min se dɛn lɛk Gɔd smɔl. Bɔt i min se dɛn nɔ lɛk Gɔd atɔl.” Dis na siriɔs wɔnin to dɛn wan dɛn we lɛk ɛnjɔymɛnt. Di Baybul se dɛn wan dɛn we lɛk ɛnjɔymɛnt na pipul dɛn we de alaw ɛnjɔymɛnt fɔ kɔntrol dɛn.—Lyuk 8:​14.

16, 17. Us ɛgzampul Jizɔs sɛt fɔ wi we i kam pan ɛnjɔymɛnt?

¹⁶ Jizɔs bin sho wi wetin i min fɔ tink di rayt we bɔt ɛnjɔymɛnt. Insɛf bin go “mared” pati ɛn wan man bin “mek dɛn kuk big it nain os” fɔ am. (Jɔn 2:​1-10; Lyuk 5:​29) Bɛtɛ wayn nɔ bin de na di mared pati, so Jizɔs bin du wan mirekul ɛn tɔn wata to wayn. Wan ɔda tɛm, we pipul dɛn bin de fɛn fɔlt pan Jizɔs we i bin de it ɛn drink, i bin mek am klia se dɛn pipul dɛn de nɔ de tink di rayt we.—Lyuk 7:​33-36.

¹⁷ Bɔt Jizɔs nɔ bin tek ɛnjɔymɛnt as di tin we impɔtant pas ɔl na in layf. Jizɔs bin put Jiova fɔs na in layf, ɛn i bin de du ɔl wetin i ebul fɔ ɛp ɔda pipul dɛn. I bin rɛdi fɔ sɔfa te i day pan tik fɔ sev mɔtalman. Jizɔs bin tɛl di wan dɛn we rɛdi fɔ fala am se: “Una gɛt blɛsin wɛn pipul kɔs una, wɛn dɛn mek una sɔfa ɛn tɔk bad tin bɔt una we nɔto tru, fɔ mi sek. Una fɔ gladi bad, bikɔs Gɔd kip gud tin fɔ una na ɛvin. Na so pipul bin mek dɛn prɔfɛt we bin de bifo una, sɔfa.”—Matyu 5:​11, 12.

18. Us kwɛstyɔn dɛn go ɛp wi fɔ tink bɔt di kayn we aw wi lɛk ɛnjɔymɛnt?

¹⁸ Wetin go ɛp wi fɔ tink bɔt di kayn we aw wi lɛk ɛnjɔymɛnt? Wi kin aks wisɛf dɛn kwɛstyɔn dɛn ya: ‘A lɛk ɛnjɔymɛnt pas mi prichin wok ɛn di mitin dɛn? A rɛdi fɔ sakrifays sɔm pan di tin dɛn we a lɛk fɔ du bikɔs a want fɔ sav Gɔd? We a want fɔ ɛnjɔy misɛf, a kin tink bɔt aw Jiova go si di kayn ɛnjɔymɛnt we a dɔn pik?’ Bikɔs wi lɛk Gɔd ɛn wi want fɔ mek i gladi, wi nɔ go jɔs avɔyd tin dɛn we wi no se bad bɔt ivin dɛn tin dɛn we wi tink se i nɔ lɛk.—Rid Matyu 22:​37, 38.

19. Udat dɛn nɔ go rili gladi?

¹⁹ Setan in wɔl dɔn mek mɔtalman de sɔfa fɔ lɛk 6,000 ia so. Naw insay dis las dez we wi de, di wɔl fulɔp wit pipul dɛn we de pe ɔl dɛn atɛnshɔn pan dɛnsɛf, mɔni, ɛn ɛnjɔymɛnt. Dɛn de tink bɔt wetin dɛn go gɛt ɛn dɛn de put wetin dɛn want bifo ɛni ɔda tin na dɛn layf. Bɔt dɛn kayn pipul dɛn de nɔ go rili gladi! Bifo dat di Baybul se: “Di pɔsin we Jekɔb in Gɔd de ɛp, gladi, we de abop pan Jiova we na in Gɔd.”—Sam 146:​5, NW.

20. Aw di we aw yu lɛk Gɔd dɔn mek yu gladi?

²⁰ Jiova in savant dɛn rili lɛk am ɛn ɛvri ia, bɔku ɔda pipul dɛn de kam fɔ lan bɔt Jiova ɛn lɛk am. Dis de sho se Gɔd in Kiŋdɔm de rul, ɛn i nɔ go te igen i go briŋ kam in blɛsin we wi nɔ go ebul imajin! We wi du wetin Jiova want wi fɔ du, wi de mek i gladi, ɛn dis de mek wi rili gladi. Di wan dɛn we lɛk Jiova go gladi sote go! Insay di nɛks atikul, wi go tɔk bɔt sɔm bad abit dɛn we pɔsin we jɔs bisin bɔt insɛf kin gɛt. Dɔn wi go si aw dɛn abit dɛn ya difrɛn frɔm di gud abit dɛn we Jiova in savant dɛn gɛt.