Go De Tɔk di Tru

1, 2. Wetin Setan bin yuz fɔ ambɔg mɔtalman?

SƆM pan di tin dɛn we pipul dɛn dɔn mek lɛk tɛlifon, bɔlb, motoka, ɛn friza, dɔn mek layf bɛtɛ. Ɔda tin dɛn we dɛn dɔn mek lɛk gɔn, land mayns, sigrɛt, ɛn atɔmik bɔm, dɔn put pipul dɛn layf pan denja. Bɔt sɔntin de we dɔn te pas ɔl dɛn tin ya ɛn i dɔn ambɔg mɔtalman pas dɛn ɔl. Wetin na da tin de? Na lay! Lay na fɔ tɔk sɔntin we wi no se nɔto tru fɔ ful, ɔ fɔ trik ɔda pɔsin. Udat na di fɔs pɔsin we bin lay? Na Setan! Jizɔs Krays bin kɔl am di pɔsin we “de mek pipul lay.” (Rid Jɔn 8:​44.) Ustɛm i lay di fɔs lay?

² Na trade trade na di gadin we bin de na Idɛn. Adam ɛn Iv bin de ɛnjɔy dɛn layf na di fayn fayn Paradays we Jiova bin mek fɔ dɛn. Gɔd bin dɔn tɛl dɛn se if dɛn it frɔm “di sɛns tik we de sho gud ɛn bad,” dɛn go day. Pan ɔl we Setan bin no dis, i bin yuz snek fɔ tɛl Iv se: “Una nɔ go day atɔl.” Dat na bin di fɔs lay. Setan bin tɔk bak se: “Gɔd insɛf no se di de we una go it am, una yay dɛn go opin ɛn una go tan lɛk Gɔd. Una go bigin disayd fɔ unasɛf wetin gud ɛn wetin bad.”—Jɛnɛsis 2:​15-17; 3:​1-5, NW.

 3. Wetin mek di lay we Setan bin lay bin rili bad? Wetin bin apin bikɔs i lay da lay de?

³ Di lay we Setan bin lay bin rili bad bikɔs i bin no se if Iv biliv am ɛn it di frut, i go day. Ɛn na jɔs dat bin apin. Iv nɔ bin obe Jiova ɛn leta Adam sɛf nɔ bin obe ɛn dat bin mek dɛn day. (Jɛnɛsis 3:​6; 5:​5) Wetin pas ɔl na dat Adam in sin “mek day kam pan mɔtalman.” Infakt, “ɔl dɛn pipul. . . , bin jɛs gɛt fɔ day, ivin dɛn wan we nɔ bin sin sɛf lɛkɛ aw Adam sin.” (Lɛta Fɔ Rom 5:​12, 14) Na dat mek wi nɔ pafɛkt ɛn wi nɔ de liv sote go lɛk aw Gɔd bin want. Bifo dat, wi jɔs de liv fɔ lɛk ‘sɛvinti ia bɔt if wi gɛt trɛnk, wi kin de fɔ eti ia’ ɛn wi de “sik bɔku ɛn gɛt ɔlkayn trɔbul.” (Sam 90:​10) Ɔl dis de apin bikɔs Setan bin lay!

 4. (a) Us kwɛstyɔn dɛn wi fɔ ebul fɔ ansa? (b) Lɛk aw Sam 15:​1, 2 tɔk, udat nɔmɔ go bi Jiova in padi?

⁴ Jizɔs bin tɔk bɔt Setan se: “I nɔ lɛk ɛnitin we na tru, bikɔs i nɔ de tɔk tru.” Setan nɔ chenj yet. I stil de “mek di ol wɔl ful” wit di lay we i de lay. (Rɛvɛleshɔn 12:​9) Bɔt wi nɔ want Setan fɔ ful wi. So wi nid fɔ no di ansa to tri kwɛstyɔn dɛn. Aw Setan de ful pipul dɛn tide? Wetin mek pipul dɛn kin lay? Ɛn aw wi go tɔk tru ɔltɛm so dat wi nɔ go lɔs wi fayn padi biznɛs wit Jiova, jɔs lɛk Adam ɛn Iv?—Rid Sam 15:​1, 2.

 5. Aw Setan de ful pipul dɛn tide?

⁵ Wi kin protɛkt wisɛf fɔ lɛ Setan nɔ ful wi. Di apɔsul Pɔl bin tɔk se: “Wi no wetin i dɔn mekɔp fɔ du.” (Sɛkɛn Lɛta Fɔ Kɔrint 2:​11) Wi no se na Setan de kɔntrol ɔl wetin de apin na di wan ol wɔl, lɛk lay lay rilijɔn, kɔrɔpt gɔvmɛnt dɛn, ɛn biznɛsman dɛn we want ɔltin fɔ dɛnsɛf. (Jɔn In Fɔs Lɛta 5:​19) So wi nɔ sɔprayz fɔ no se na Setan ɛn in dɛbul dɛn de mek dɛn kayn pawaful pipul dɛn de “lay.” (Fɔs Lɛta To Timoti 4:​1, 2) Fɔ ɛgzampul, sɔm biznɛsman dɛn kin lay pan pipul dɛn we dɛn de advatayz tin dɛn we dɛn de sɛl we nɔ fayn ɔ ful dɛn ɛn tek dɛn mɔni.

6, 7. (a) Wetin mek i rili bad we di bigman dɛn pan Gɔd biznɛs de lay? (b) Us lay yu dɔn yɛri di bigman dɛn pan Gɔd biznɛs de tɔk?

⁶ I kin rili bad we di bigman dɛn pan Gɔd biznɛs de lay. Wetin mek? Na bikɔs if pɔsin biliv di lay lay tin dɛn we dɛn de tich ɛn du di tin dɛn we Gɔd nɔ lɛk, dat go mek di pɔsin lɔs di chans fɔ de sote go. (Ozie 4:​9) Jizɔs bin no se di bigman dɛn pan Gɔd biznɛs we bin de da tɛm de bin de ful di pipul dɛn. I bin tɛl dɛn klia wan se: “Bad tin go apin to una, dɛn Lɔ ticha ɛn Faresi dɛn. Una na ipokrit dɛn! bikɔs una de travul na si ɛn land fɔ mek wan pɔsin jɔyn di Ju rilijɔn, ɛn we i jɔyn una, una de mek i pɔsibul fɔ lɛ i go na Gɛɛna,” we min fɔ dɔnawe wit sɔntin kpatakpata. (Matyu 23:​15, NW) Jizɔs bin tɔk se lay lay bigman dɛn pan Gɔd biznɛs bin jɔs tan lɛk dɛn papa Setan, we “de kil.”—Jɔn 8:​44.

⁷ Tide bak, bɔku bigman dɛn pan Gɔd biznɛs de na di wɔl. Dɛn kin kɔl dɛn pastɔ, prist, ɔ ɔda taytul dɛn. Jɔs lɛk di Faresi dɛn, dɛn nɔ de tich pipul dɛn di tru tin dɛn we de na Gɔd in Wɔd bɔt dɛn “dɔn ɛkschenj di tru bɔt Gɔd fɔ lay lay tin.” (Lɛta fɔ Rom 1:​18, 25, NW) Sɔm pan di lay lay tɔk dɛn na we dɛn kin se “once saved, always saved,” mɔtalman gɛt sol we nɔ de day, we pɔsin day dɛn de bɔn am bak ɔda say, ɛn Gɔd gri wit dɛn omo dɛn ɛn we man ɛn man ɔ uman ɛn uman de mared.

 8. Us lay we di bigman dɛn pan pɔlitiks go tɛl pipul dɛn jisnɔ? Aw wi fɔ si dat?

⁸ Di bigman dɛn pan pɔlitiks dɛnsɛf dɔn ful bɔku pipul dɛn wit dɛn lay. Wan pan di lay we pas ɔl we dɛn go tɔk jisnɔ, na we dɛn go se dɛn dɔn mek “ɔltin rayt, natin nɔ de fɔ fred.” Bɔt “da tɛm de kwik, kwik wan so, nain trɔbul go fɔdɔm pan dɛn.” So wi nɔ fɔ biliv wetin dɛn bigman dɛn pan pɔlitiks go tɔk fɔ se tin de bɛtɛ. Di tru tin na dat wi nɔ go “sɔprayz wɛn di De kam, lɛkɛ aw pipul dɛn kin sɔprayz wɛn tifman tif dɛn.”—Fɔs Lɛta Fɔ Tɛsalonayka 5:​1-4.

9, 10. (a) Wetin mek pipul dɛn kin lay? Wetin kin apin we pipul dɛn de lay? (b) Wetin wi fɔ mɛmba bɔt Jiova?

⁹ Tide, nɔto pawaful pipul dɛn nɔmɔ kin lay. Di atikul we nem “Why We Lie,” we Y. Bhattacharjee bin rayt, tɔk se “pipul dɛn kin si lay as abit we rili de insay mɔtalman.” Dis min se pipul dɛn kin tink se fɔ lay na nɔmal tin ɛn dɛn bɔn wi wit da abit de. Bɔku tɛm pipul dɛn kin lay fɔ protɛkt dɛnsɛf, sɔntɛm dɛn want fɔ ayd di mistek we dɛn dɔn mek ɔ di bad tin we dɛn dɔn du. Dɛn kin lay bak fɔ gɛt mɔni ɔ sɔntin we de bɛnifit dɛn. Di atikul tɔk bak se sɔm pipul dɛn nɔ si am se i bad fɔ lay to “strenja dɛn, to dɛn wokmet dɛn, dɛn padi dɛn, ɛn to pipul dɛn we dɛn lɛk.”

¹⁰ Wetin kin apin we pipul dɛn kin lay dis kayn we? Pipul dɛn nɔ de biliv dɛn kɔmpin dɛn igen, ɛn dɛn padi biznɛs kin skata. Fɔ ɛgzampul, imajin aw maredman in at go pwɛl we i kam fɔ no se in wɛf dɔn du mami ɛn dadi biznɛs wit ɔda pɔsin ɛn i lay to am fɔ ayd wetin i du. Ɔ imajin aw i rili bad we man de trit in wɛf ɛn in pikin dɛn bad na os bɔt we dɛn de wit ɔda pipul dɛn, i kin mek lɛk se i lɛk dɛn ɛn i bisin bɔt dɛn. Dɛn kayn pipul dɛn de kin ful mɔtalman, bɔt wi fɔ mɛmba se dɛn nɔ go ebul fɔ ful Jiova. Di Baybul se “natin nɔ de we ayd we Gɔd nɔ de si; Gɔd de si ɔltin.”—Di Ibru Pipul Dɛn 4:​13.

11. Wetin wi lan frɔm Ananayas ɛn Safayra? (Luk di pikchɔ nia dis atikul in taytul.)

¹¹ Di Baybul tɔk bɔt wan Kristian man ɛn in wɛf we bin alaw Setan fɔ ful dɛn fɔ lay to Gɔd. Ananayas ɛn Safayra bin tray fɔ ful di apɔsul dɛn. Dɛn sɛl sɔm pan dɛn prɔpati dɛn ɛn gi af pat pan di mɔni to di apɔsul dɛn. Ananayas ɛn Safayra bin want fɔ mek ɔda pipul dɛn na di kɔngrigeshɔn kɔle dɛn, so dɛn tɛl di apɔsul dɛn se na ɔl di mɔni dɛn dɔn gi. Bɔt Jiova bin no se na lay dɛn de lay, ɛn i pɔnish dɛn.—Di Apɔsul Dɛn Wok [Akt] 5:​1-10.

12. Wetin go apin to dɛn wan dɛn we de lay ɛn nɔ gri fɔ chenj? Wetin mek?

¹² Aw Jiova de fil we pipul dɛn de lay? Jɔs lɛk Setan, dɛn go put ɔl di wan dɛn we de lay ɛn we nɔ gri fɔ chenj na di “wata we faya de kech.” Dis min se dɛn go dɔnawe wit dɛn kpatakpata. (Rɛvɛleshɔn 20:​10; 21:​8; Sam 5:​6) Wetin mek? Na bikɔs Jiova de si dɛn layman dɛn de di sem we aw i de si ɔl dɛn wan dɛn we “de du dɛn dɔti tin.”—Rɛvɛleshɔn 22:​15.

13. Wetin wi no bɔt Jiova? Wetin dat fɔ mek wi du?

¹³ Wi no se Jiova nɔto “mɔtalman we de lay,” ɛn i “nɔ de lay.” (Di Nɔmba Dɛm 23:​19; Di Ibru Pipul Dɛn 6:​18) Jiova et “pɔsin we lɛk fɔ lay.” (Prɔvabs 6:​16, 17) If wi want fɔ du wetin go mek i gladi, wi fɔ de tɔk tru. So wi “nɔ fɔ lay” to ɔda pipul dɛn.—Lɛta Fɔ Kɔlɔse 3:​9.

14. (a) Wetin na wan we we tru Kristian dɛn difrɛn frɔm di wan dɛn we de na lay lay rilijɔn? (b) Ɛksplen di advays [prinsipul] we de na Lyuk 6:​45.

¹⁴ Wetin na wan we we tru Kristian dɛn difrɛn frɔm di wan dɛn we de na lay lay rilijɔn? Wi de “tɔk tru.” (Rid Zɛkaraya 8:​16, 17.) Pɔl bin tɔk se: “Bay aw wi de du ɔltin, wi de sho se na Gɔd wok wi de du. . . wi de tɛl pipul di tru wɔd.” (Sɛkɛn Lɛta Fɔ Kɔrint 6:​4, 7) Ɛn Jizɔs bin tɔk se “wetin de na pɔsin in at, we i de mɛmba ɔltɛm, nain de kɔmɔt nain mɔt.” (Lyuk 6:​45) Dat min se pɔsin we rili ɔnɛs de tɔk tru. I go tɔk tru to strenja dɛn, in wokmet dɛn, in padi dɛn, ɛn di wan dɛn we i lɛk. Lɛ wi tɔk bɔt sɔm ɛgzampul dɛn bɔt aw wi go sho se wi de tray fɔ bi pɔsin we ɔnɛs pan ɔltin.

15. (a) Wetin mek i bad fɔ liv dɔbul layf? (b) Wetin go ɛp yɔŋ wan dɛn nɔ fɔ du wetin dɛn kɔmpin dɛn want dɛn fɔ du? (Luk di futnot.)

¹⁵ If yu na yɔŋ pɔsin, i go bi se yu go want yu kɔmpin dɛn fɔ gladi fɔ yu. Bɔt dis dɔn mek sɔm yɔŋ pipul dɛn de liv dɔbul layf. We dɛn de wit dɛn famili ɛn di kɔngrigeshɔn, dɛn kin mek lɛk se dɛn de liv klin layf bɔt dɛn kin rili difrɛn we dɛn de yuz Intanɛt sayt dɛn we de mek ɔda pipul dɛn no bɔt pɔsin ɔ we dɛn de wit pipul dɛn we nɔ de sav Jiova. Dɛn kin yuz bad langwej, wɛr klos dɛn we nɔ fayn, lisin to myuzik dɛn we nɔ gɛt fayn wɔd dɛn, drink te dɛn chak, tek drɔgs, ayd we dɛn de kip bɔyfrɛn ɔ galfrɛn ɔ dɛn kin du ɔda bad tin dɛn. Dɛn kin lay to dɛn mama ɛn papa dɛn, dɛn brɔda ɛn sista dɛn, ɛn to Jiova. (Sam 26:​4, 5) Bɔt Jiova kin no we wi de mek lɛk se wi de ɔnɔ am bɔt wi de du di tin dɛn we i et. (Mak 7:​6) I go rili fayn fɔ lɛ wi du wetin wan parebul tɔk we se: “Nɔ jɛlɔs nɔn bad mɔtalman, liv yu layf fɔ de ɔna ɛn rɛspɛkt PAPA GƆD [“Jiova,” NW].”—Prɔvabs 23:​17.a (Luk di futnot.)

16. Aw yu go ansa di kwɛstyɔn dɛn na di fɔm fɔ dɛn wan dɛn we de yuz ɔl dɛn tɛm fɔ sav Jiova?

¹⁶ If yu want fɔ bi rɛgyula payɔnia ɔ fɔ yuz ɔl yu tɛm fɔ sav Jiova, lɛk fɔ wok na Bɛtɛl, yu gɛt fɔ fil fɔm. I rili impɔtant fɔ lɛ yu gi tru tru ansa dɛn bɔt yu wɛlbɔdi, di kayn tin dɛn we yu de pik fɔ ɛnjɔy yusɛf, ɛn di we aw yu de liv yu layf. (Di Ibru Pipul Dɛn 13:​18) Bɔt wetin yu go du if yu dɔn du sɔntin we Jiova et ɔ sɔntin de we de ambɔg yu kɔnshɛns ɛn yu nɔ bin dɔn tɛl di ɛlda dɛn yet? Tɔk to dɛn fɔ ɛp yu so dat yu go sav Jiova wit klin kɔnshɛns.—Lɛta Fɔ Rom 9:​1; Lɛta Fɔ Galeshya 6:​1.

17. Wetin wi fɔ du we pipul dɛn we de mek wi sɔfa aks wi kwɛstyɔn bɔt wi brɔda dɛn?

¹⁷ Wetin yu go du if dɛn dɔn stɔp wi wok na di say we yu de dɔn di wan dɛn we de na pawa ol yu ɛn aks yu kwɛstyɔn dɛn bɔt yu brɔda dɛn? Yu fɔ tɛl dɛn ɔl wetin yu no? Wetin Jizɔs bin du we wan Roman gɔvnɔ bin aks am kwɛstyɔn? Jizɔs bin fala di advays na di Baybul we se “tɛm de fɔ sɛt mɔt, ɛn tɛm de fɔ tɔk,” ɛn sɔntɛnde i nɔ bin de tɔk natin! (Ɛkliziastis 3:​1, 7; Matyu 27:​11-14) If da kayn tin de apin to wi, wi nid fɔ sho se wi gɛt sɛns ɛn tek tɛm fɔ lɛ wi nɔ put wi brɔda dɛn pan denja.—Prɔvabs 10:​19; 11:​12.

18. Wetin wi fɔ du if di ɛlda dɛn aks wi kwɛstyɔn dɛn bɔt wi brɔda dɛn?

¹⁸ Wetin yu go du if sɔmbɔdi na di kɔngrigeshɔn dɔn sin siriɔs wan ɛn yu no bɔt am? Di ɛlda dɛn gɛt di wok fɔ kip di kɔngrigeshɔn klin, so dɛn go aks yu fɔ tɛl dɛn wetin yu no. Wetin yu go du mɔ if di pɔsin na yu tayt padi ɔ fambul? Di Baybul tɔk se: “Udat de tɔk tru de pan fia ple.” (Prɔvabs 12:​17; 21:​28) So yu fɔ tɛl di ɛlda dɛn di tru ɛn nɔ ayd natin. Di ɛlda dɛn gɛt di rayt fɔ no ɔl wetin apin so dat dɛn go fɛn di bɛst we fɔ ɛp di pɔsin fɔ kam bak to Jiova ɛn bi in tayt padi.—Jems 5:​14, 15, NW.

19. Wetin wi go tɔk bɔt insay di nɛks atikul?

¹⁹ Devid bin pre to Jiova se: “Yu lɛk pɔsin we nɔ de mek ipokrit.” Devid bin no se di tin we impɔtant pas ɔl na udat wi bi insay. Tru Kristian dɛn “fɔ de tɔk tru to dɛnsɛf” ɔltɛm. Wan ɔda we fɔ sho se wi difrɛn frɔm di wan dɛn we de na lay lay rilijɔn na fɔ tich di tru we de na di Baybul. Insay di nɛks atikul, wi go tɔk bɔt aw wi kin du dat we wi de prich.