Na Ɔl “Kristian dɛn” Na Tru Kristian?

Ɔmɔs Kristian dɛn de? Akɔdin to wan buk we nem Atlas of Global Christianity, dɛn tɔk se insay 2010 na lɛk 2.3 bilyɔn Kristian dɛn de ɔlsay na di wɔl. Bɔt di sem buk tɔk se dɛn Kristian dɛn de de insay pas 41,000 difrɛn Kristian rilijɔn dɛn; dɛn ɔl gɛt dɛn yon dɔktrin dɛn ɛn we aw dɛn fɔ liv. Wi kin si rizin we mek bɔku pipul dɛn kɔnfyus ɛn nɔ no wetin fɔ du we dɛn tink bɔt di bɔku bɔku difrɛn Kristian rilijɔn dɛn we de. Dɛn go de wɔnda, ‘Fɔ se na ɔl di wan dɛn we se dɛn na Kristian dɛn na tru Kristian dɛn?’

Lɛ wi yuz wan ɛgzampul fɔ tɔk bɔt dis. Bɔku tɛm, pɔsin we de travul go nid fɔ sho us kɔntri i kɔmɔt we i rich na bɔda. I go nid fɔ pruv bak se in na udat i tɔk se i bi bay we i sho in paspɔt ɔ in ID kad. Semweso, tru Kristian nɔ fɔ jɔs tɔk se i gɛt fet pan Krays. I nid fɔ du ɔda tin dɛn bak fɔ sho se in na tru Kristian. Wetin na dɛn tin dɛn de?

Di fɔstɛm we dɛn yuz di wɔd “Kristian” na afta di ia 44. Wan pan di man dɛn we rayt di Baybul we na Lyuk bin tɔk se: “Na Antiɔk fɔs Gɔd mek dɛn bigin fɔ kɔl di disaypul dɛn Kristian.” (Akt 11:​26) Notis se di wan dɛn we dɛn bin de kɔl Kristian dɛn na bin Krays in disaypul. So wetin de mek dɛn kɔl pɔsin Jizɔs Krays in disaypul? Di New International Dictionary of New Testament Theology ɛksplen se: “Fɔ fala Jizɔs as in disaypul min se pɔsin fɔ sakrifays in wan ol layf . . . ɛn i fɔ kɔntinyu fɔ du dat sote go.” So pɔsin we na tru Kristian fɔ fala ɔl wetin Jizɔs bin de tich, ɛn wetin i bin se wit ɔl in at.

Yu tink se i pɔsibul fɔ fɛn dɛn kayn pipul dɛn de pan di bɔku bɔku pipul dɛn we se dɛn na Kristian dɛn tide? Wetin Jizɔs insɛf bin tɔk bɔt wetin go sho udat dɛn na in tru tru disaypul dɛn? Duya, wi want lɛ yu lan bɔt aw di Baybul ansa dɛn kwɛstyɔn dɛn de. Insay di nɛks atikul dɛn, wi go lan bɔt fayv tin dɛn we Jizɔs bin tɔk we go ɛp yu fɔ no in tru tru disaypul dɛn. Wi go lan aw di fɔstɛm Kristian dɛn bin fit wetin Jizɔs bin tɔk we sho se dɛn na tru Kristian dɛn. Ɛn wi go tray fɔ si udat dɛn pan di bɔku bɔku pipul dɛn we de tɔk se dɛn na Kristian dɛn fit da patan de tide.

“Du Wetin A Tɛl Una fɔ Du”

“If una de du wetin a tɛl una fɔ du, una na mi tru tru disaypul dɛn, ɛn una go no di trut, ɛn di trut go fri una.”​—JƆN 8:​31, 32.

Wetin Dis Min?: Di tin dɛn we Jizɔs “tɛl” wi min in tichin dɛn we kɔmɔt frɔm Gɔd. Jizɔs bin se: “Di Papa we sɛn mi dɔn gi mi lɔ bɔt wetin fɔ tɔk ɛn wetin fɔ tich.” (Jɔn 12:​49) We Jizɔs bin de pre to Jiova Gɔd we na in Papa we de na ɛvin, i bin se: “Yu wɔd na trut.” I bin de kot frɔm Gɔd in Wɔd fast fast fɔ sɔpɔt di tin dɛn we i de tich. (Jɔn 17:​17; Matyu 4:​4, 7, 10) So tru Kristian dɛn de ‘du wetin Jizɔs tɛl dɛn’ bay we dɛn gri se Gɔd in Wɔd, di Baybul, na di “trut” ɛn na in na di men tin we de gayd di tin dɛn we dɛn biliv ɛn di tin dɛn we dɛn dɛn du.

Aw di Fɔstɛm Kristian dɛn Bin Du Dis?: Di apɔsul Pɔl insɛf bin rɛspɛkt Gɔd in Wɔd jɔs lɛk Jizɔs. I bin rayt se: “Na Gɔd dayrɛkt di wan dɛn we rayt ɔl di Skripchɔ dɛn.” (2 Timoti 3:​16) Di man dɛn we dɛn bin de pik fɔ tich dɛn kɔmpin Kristian dɛn fɔ bi man dɛn we de rili “fala Gɔd in wɔd we na tru.” (Taytɔs 1:​7, 9) Dɛn bin de ɛnkɔrej di fɔstɛm Kristian dɛn nɔ fɔ fala di “di sɛns na dis wɔl ɛn di lay lay we aw pipul dɛn de tink we gɛt sɔntin fɔ du wit mɔtalman tradishɔn ɛn dɛn pikin pikin tin dɛn na di wɔl, bɔt we nɔ gɛt ɛnitin fɔ du wit Krays.”​—Koloshians 2:​8.

Udat dɛn Fit Dis Patan Tide?: Insay di Catechism of the Catholic Church, dɛn bin rayt se: “Nɔto frɔm di Oli Skripchɔ nɔmɔ di [Katolik] Chɔch de pul ɔl di tin dɛn we dɛn dɔn kam fɔ no. So di Katolik dɛn fil se di sem we aw dɛn rɛspɛkt ɛn fala dɛn tradishɔn dɛn na di sem we dɛn fɔ fala di tin dɛn we de na di Oli Skripchɔ dɛn.” Wan atikul na Maclean magazin bin kot wan minista na Toronto, Kanada, we bin aks se: “Wetin mek wi fɔ alaw sɔntin we dɔn pas 2,000 ia we dɛn rayt am, fɔ gayd wi?” Wi gɛt fayn fayn aydia dɛn we wi nɔ de yuz bikɔs wi fil se wetin Jizɔs bin tɔk ɛn di Skripchɔ dɛn fɔ sɔpɔt am.”

Di New Catholic Encyclopedia bin tɔk bɔt Jiova Witnɛs dɛn se: “Na di Baybul nɔmɔ de gayd di tin dɛn we dɛn biliv ɛn di tin dɛn we dɛn de du.” Dis biɛn tɛm, wan man na Kanada bin kɔt wɔd na wan Jiova Witnɛs in mɔt as i bin de tɔk udat i bi. Di man bin pɔynt to di sista in Baybul ɛn se “a sabi udat yu bi bikɔs na una de yuz di Baybul.”

“Nɔ Tan Lɛk di Pipul dɛn na di Wɔl”

“Di wɔl dɔn et dɛn, bikɔs dɛn nɔ tan lɛk di pipul dɛn na di wɔl.”​—JƆN 17:​14.

Wetin Dis Min: Bikɔs Jizɔs nɔ bin tan lɛk di pipul dɛn na di wɔl, i nɔ bin de put an pan pɔlitiks ɛn di drɔ-drɔ we pipul dɛn bin de gɛt. I bin ɛksplen se: “If mi Kiŋdɔm bin de na dis wɔl, di wan dɛn we de fala mi fɔ dɔn fɛt mek dɛn nɔ gi mi to di Ju dɛn. Bɔt mi Kiŋdɔm nɔ de na ya.” (Jɔn 18:​36) I bin ɛnkɔrej di wan dɛn we de fala am nɔ fɔ tɔk ɛn biev di kayn we we de agens wetin Gɔd in Wɔd se.​—Matyu 20:​25-​27.

Aw di Fɔstɛm Kristian dɛn Bin Du Dis? Wan man we de rayt bɔt rilijɔn we na Jonɛtan Daymɔnd, bin tɔk se “fɔstɛm Kristian dɛn nɔ bin de gri fɔ fɛt wɔ, ilɛk wetin dɛn du dɛn; ilɛksɛf dɛn tɔk bad bɔt dɛn ɔ put dɛn na prizin ɔ ivin kil dɛn.” Dɛn nɔ bin gri fɔ put an pan wetin pipul dɛn de du pan ɔl we dɛn no se dɛn go mek dɛn sɔfa fɔ dat. Dɔn bak, di we aw dɛn bin de liv dɛn layf bin mek dɛn difrɛn. Dɛn bin tɛl Kristian dɛn se: “Dɛn sɔprayz bikɔs una nɔ de kɔntinyu fɔ fala dɛn pan di sem dɔti layf we dɛn de pan, so dɛn de tɔk bad bɔt una.” (1 Pita 4:​4) Wan man we de rayt istri we nem Wil Durat bin tɔk bɔt Kristian se “di pegan pipul dɛn we bin lɛk fɔ ɛnjɔy dɛnsɛf bin de tɔmɛnt bikɔs di Kristian dɛn bin de liv klin ɛn fayn layf.”

Udat dɛn Fit Dis Patan Tide? We di New Catholic Encyclopedia de tɔk bɔt aw Kristian dɛn nɔ fɔ tan lɛk di pipul dɛn na di wɔl, i tɔk se: “I bad if sɔmbɔdi tɔk se i nɔ de ol wɛpɔn.” Wan atikul na wan nyuz pepa we dɛn kɔl Reformierte Presse tɔk se wan ripɔt we African Rights, we na wan human rights organization, bin gi bɔt di jɛnosayd na Ruwanda insay 1994 bin se ɔl chɔch dɛn bin tek pat pan da wɔ de, “na Jiova Witnɛs dɛn nɔmɔ nɔ bin jɔyn pan da wɔ.”

We wan sɛkɔndri skul ticha bin de tɔk bɔt di bɔku bɔku kil we di Nazi dɛn bin de kil pipul dɛn insay Wɔl Wɔ Tu, in bin se “no grup ɔ ɔganayzeshɔn we na ɔdinari sitizin dɛn nɔ bin tɔk agens di bɔku lay, wikɛdnɛs, ɛn di bad bad tin dɛn we dɛn bin de du.” Bɔt afta we i tɔk wit di United States Holocaust Memorial Museum, i rayt se: “Na naw a gɛt mi ansa.” I kam fɔ no se Jiova Witnɛs dɛn bin tinap tranga wan fɔ wetin dɛn biliv pan ɔl we dɛn bin de trit dɛn bad bad wan.

Wetin wi go se bɔt di we aw dɛn de liv dɛn layf? Di U.S. Catholic magazin tɔk se “bɔku pan di yɔŋ Katolik dɛn tide, nɔ de gri wit wetin di chɔch de tich bɔt tin dɛn lɛk tap-to-mi ɛn fɔ du mami ɛn dadi biznɛs bifo pɔsin mared.” Di magazin kot wetin wan chɔch dikin tɔk we i se: “A dɔn si bɔku pipul dɛn, fɔ ɛgzampul, we yu kɔnt 100 pan dɛn, 50 kin dɔn ɔlrɛdi de togɛda bifo dɛn kam fɔ mared.” The New Encyclopædia Britannica bin tɔk se Jiova Witnɛs dɛn kin tɔk se “pawpa ɔlman fɔ liv klin layf pan ɔl wetin dɛn de du.”

“Una Fɔ Lɛk Una Kɔmpin Dɛn”

“A de gi una wan nyu lɔ, ɛn di lɔ na dat una fɔ lɛk una kɔmpin dɛn; una fɔ lɛk una kɔmpin dɛn jɔs lɛk aw a lɛk una. If una lɛk una kɔmpin dɛn, ɔlman go no se una na mi disaypul dɛn.”​—JƆN 13:​34, 35.

Wetin Dis Min?: Krays bin tɛl in disaypul dɛn fɔ lɛk dɛn kɔmpin dɛn di we aw i lɛk dɛn. Aw Jizɔs bin lɛk dɛn? I bin lɛk ɔlman pan ɔl we pipul dɛn we bin de da tɛm de nɔ bin de trit uman dɛn fayn, ɛn dɛn nɔ bin lɛk pipul dɛn we kɔmɔt ɔdasay. (Jɔn 4:​7-​10) Lɔv bin mek Jizɔs yuz in tɛm ɛn trɛnk fɔ ɛp ɔda pipul dɛn, ɛn i bin de ivin put wetin ɔda pipul dɛn want bifo wetin in want. (Mak 6:​30-​34) Dɔn bak, Jizɔs bin sho lɔv wan fayn we we pas ɔl di ɔda we dɛn we i dɔn sho lɔv. I bin se: “Mi na di gud shɛpad ɛn di gud shɛpad de gi in layf fɔ di ship dɛn.”​—Jɔn 10:​11.

Aw di Fɔstɛm Kristian dɛn Bin Du Dis?: Insay di apɔsul dɛn tɛm, Kristian dɛn bin de kɔl dɛnsɛf “brɔda” ɔ “sista.” (Faylimɔn 1, 2) Dɛn bin de wɛlkɔm pipul dɛn frɔm ɔl di neshɔn fɔ kam insay di Kristian kɔngrigeshɔn bikɔs dɛn bin biliv se “no difrɛns nɔ de bitwin Ju ɛn Grik. Na di sem Masta de oba dɛn ɔl.” (Romans 10:​11, 12) Afta Pɛntikɔst insay di ia 33, di disaypul dɛn na Jerusɛlɛm “bin de sɛl wetin dɛn gɛt ɛn dɛn prɔpati dɛn ɛn sheb di mɔni to ɔlman, akɔdin to wetin pɔsin nid.” Wetin mek dɛn bin de du dis? Dɛn bin de du dis so dat di wan dɛn we jɔs baptayz go kɔntinyu fɔ de na Jerusɛlɛm ɛn “pe atɛnshɔn to wetin di apɔsul dɛn bin de tich.” (Akt 2:​41-​45) Wetin bin mek dɛn du dɛn tin dɛn ya? I nɔ rich 200 ia afta di apɔsul dɛn day, Tatulian bin kot wetin ɔda pipul dɛn bin se bɔt Kristian dɛn. I bin se: “Dɛn lɛk dɛn kɔmpin dɛn . . . ɛn dɛn rɛdi fɔ ivin day fɔ dɛn kɔmpin.”

Udat dɛn Fit Dis Patan Tide? Insay di buk we nem The History of the Decline and Fall of the Roman Empire (1837), dɛn bin rayt se fɔ lɔng tɛm naw di wan dɛn we se dɛn na Kristian “dɔn du bad to dɛn kɔmpin Kristian dɛn pas di we aw di wan dɛn we nɔto Kristian dɔn du bad to dɛn.” Dis biɛn tɛm, we dɛn bin du wan sɔve na Amɛrika, dɛn bin kam fɔ no se bɔku tɛm, Kristian dɛn we de na wan rilijɔn nɔ kin gri fɔ ɛp dɛn kɔmpin Kristian we dɛn de na di sem rilijɔn bɔt we de na ɔda kɔntri. Dɛn nɔ kin want fɔ ɛp dɛn ɔ dɛn ebul fɔ ɛp dɛn we dɛn nid ɛp.

Insay 2004, afta we 4 ɔriken dɛn dɔn apin na Florida insay tu mɔnt, di chiaman fɔ Florida’s Emergency Operations Committee bin chɛk fɔ si se pipul dɛn de yuz di tin dɛn we dɛn dɔn sɔplay di rayt we. I bin tɔk se no ɔda grup nɔ de we ɔganayz lɛk Jiova Witnɛs dɛn, ɛn i se i go gi dɛn tin dɛn we dɛn nid. Insay 1997, sɔm Jiova Witnɛs dɛn bin kam wit mɛrɛsin, it, ɛn klos fɔ dɛn Kristian brɔda ɛn sista dɛn we bin nid ɛp na Democratic Republic of Congo. Sɔm ɔda Jiova Witnɛs dɛn we de na Yurop bin dɔn donet ɔda tin dɛn we bin rich lɛk wan milyɔn dɔla.

“A Dɔn Mek Dɛn No Yu Nem”

“A dɔn mek di wan dɛn we yu gi mi na di wɔl no yu nem. . . . A dɔn mek dɛn no yu nem, ɛn a go kɔntinyu fɔ mek dɛn no am.”​—JƆN 17:​6, 26.

Wetin Dis Min? Jizɔs bin mek pipul dɛn no Gɔd in nem bay we i bin de yuz am we i de prich. Bɔku tɛm we Jizɔs bin de rid frɔm di Skripchɔ dɛn, i bin de kɔl Gɔd in nem. (Lyuk 4:​16-​21) I bin tich in disaypul dɛn fɔ pre se: “Papa, lɛ ɔlman tek yu nem as sɔntin we oli.”​—Lyuk 11:​2.

Aw di Fɔstɛm Kristian dɛn Bin Du Dis? Di apɔsul Pita bin tɛl di bigman dɛn na Jerusɛlɛm se Gɔd dɔn tek “pipul dɛn we go gɛt in nem” frɔm di neshɔn dɛn. (Akt 15:​14) Di apɔsul dɛn ɛn ɔda pipul dɛn we bin de prich bin se “ɛnibɔdi we de kɔl Jiova in nem go sev.” (Akt 2:​21; Romans 10:​13) Dɔn bak dɛn bin de yuz Gɔd in nem we dɛn bin de rayt. The Tosefta, we na Ju lɔ dɛn we dɛn put togɛda arawnd di ia 300 tɔk bɔt di tɛm we di wan dɛn we bin de mek di Kristian dɛn sɔfa, bɔn di Kristian dɛn raytin dɛn. I se: “Dɛn bin de bɔn di Evangelist dɛn buk dɛn ɛn di minim dɛn [we na bin di Ju Kristian dɛn] buk dɛn. Bɔt dɛn alaw dɛn fɔ bɔn usay dɛn de , . . . dɛn ɛn di say dɛn usay Gɔd in nem dɛn de.”

Udat dɛn Fit Dis Patan Tide? Di Revised Standard Version Baybul we di National Council of the Churches of Christ na Amɛrika bin mek lɛ dɛn rayt bin tɔk na di say we se Tin fɔ No Bifo Yu Bigin Rid, se: “Bifo di Kristian dɛn tɛm, di Ju rilijɔn bin stɔp fɔ yuz ɛni nem fɔ di wangren Gɔd lɛk se nid de fɔ mek i difrɛn frɔm ɔda gɔd dɛn, ɛn i nɔ fayn fɔ mek di Kristian Chɔch biliv dis.” So dɛn chenj Gɔd in nem to di taytul “LORD.” Dis biɛn tɛm, di Vatikan bin tɛl di bishɔp dɛn se: “Dɛn nɔ fɔ kɔl di 4 lɛta dɛn we tinap fɔ Gɔd in nem, dat na YHWHa insay dɛn siŋ dɛn ɛn prea dɛn.”

Udat dɛn tide de yuz Gɔd in nem ɛn mek pipul dɛn no bɔt am? We Sage bin ol 15 ia na Krigistan, i bin wach wan fim we sho Gɔd in nem as Jiova. Bɔt fɔ lɛk 10 ia, i nɔ bin yɛri da nem de igen. Leta, afta Sage muv go Amɛrika, tu Jiova Witnɛs dɛn go fɛn am na in os ɛn sho am Gɔd in nem na di Baybul. Sage bin rili gladi fɔ fɛn pipul dɛn we de yuz di nem Jiova. Di Webster’s Third New International Dictionary difayn “Jiova Gɔd” as di Gɔd we pas ɔl ɔda gɔd we Jiova Witnɛs dɛn sabi ɛn de wɔship.”

[Futnot]

“Dɛn Go Prich Dis Gud Nyuz bɔt di Kiŋdɔm”

“Dɛn go prich dis gud nyuz bɔt di Kiŋdɔm na di wan ol wɔl so dat ɔl di neshɔn dɛn go gɛt chans fɔ yɛri, dɔn di ɛnd go kam.”​—MATYU 24:​14.

Wetin Dis Min? Lyuk we na wan pan di man dɛn we bin rayt di Gɔspɛl bin rayt bɔt Jizɔs se i bin de “go na difrɛn siti dɛn ɛn vilej dɛn fɔ prich di gud nyuz bɔt Gɔd in Kiŋdɔm.” (Lyuk 8:⁠1) Jizɔs insɛf bin tɔk se: “A fɔ prich di gud nyuz bɔt Gɔd in Kiŋdɔm na ɔda siti dɛn bak, bikɔs na dat mek Gɔd sɛn mi.” (Lyuk 4:​43) I bin tɛl in disaypul dɛn fɔ prich di gud nyuz na tɔŋ ɛn vilej dɛn ɛn leta i bin tɛl dɛn se: “una go tɔk bɔt mi . . . na di say we fa pas ɔl na di wɔl.”​—Akt 1:​8; Lyuk 10:​1.

Aw di Fɔstɛm Kristian dɛn Bin Du Dis? Jizɔs in disaypul dɛn nɔ bin westɛm fɔ du wetin i bin tɛl dɛn. “Dɛn kɔntinyu fɔ tich ɛn tɔk bɔt di gud nyuz bɔt Krays Jizɔs ɛvride na di tɛmpul ɛn frɔm os to os.” (Akt 5:​42) Nɔto jɔs sɔm spɛshal pipul dɛn nɔmɔ bin de prich bɔt ɔlman na di kɔngrigeshɔn bin de prich. Wan man we stɔdi istri we nem Neander bin rayt se: “Celsus we na di fɔs pɔsin fɔ rayt agens Kristian dɛn bin si am fɔni fɔ se na pipul dɛn we de wok wit wul, pipul dɛn we de mek sus, pipul dɛn we de wok wit lɛda, pipul dɛn we nɔ go skul ɛn kɔmɔn pipul dɛn na dɛn bin de prich di gɔspɛl wit zil.” We Jean Bernardi bin de rayt in buk we nem, The Early Centuries of the Church, i bin rayt se: “[Kristian dɛn] fɔ go ɛn prich to ɔlman ɔlsay. Dɛn fɔ prich na strit, na siti dɛn, na pɔblik ples dɛn, ɛn na os dɛn. Dɛn fɔ prich ilɛksɛf dɛn wɛlkɔm dɛn ɔ dɛn nɔ wɛlkɔm dɛn . . . ɛn dɛn fɔ prich na di say we fa pas ɔl na di wɔl.”

Udat dɛn Fit Dis Patan Tide? Devid Watsin we na Anglican prist bin rayt se: “Bikɔs di chɔch nɔ tek di wok fɔ prich ɛn tich as sɔntin we siriɔs, dat na wan rizin we mek bɔku pipul dɛn nɔ gɛt intrɛst fɔ sav Gɔd tide. We José Luis Pérez Guadalupe bin de rayt na in buk we nem Why Are the Catholics Leaving?, i bin rayt bɔt di tin dɛn we di Evangelicals, Adventists, ɛn ɔda rilijɔn dɛn de du. I bin se: “Dɛn nɔ de prich frɔm os to os.” Bɔt we i bin de tɔk bɔt Jiova Witnɛs dɛn, i bin se: “Dɛn ɔganayz fɔ prich frɔm os to os.”

Jonɛtan Tuli bin rayt wan fayn tin we kɔrɛkt insay di Cato Supreme Court Review, 2001-​2002. I bin rayt se: “As yu tɔk bɔt Jiova Witnɛs dɛn so, wantɛm wantɛm bɔku pipul dɛn go tink bɔt pipul dɛn we de prich frɔm os to os ɛn dɛn kin kam di tɛm we yu nɔ want dɛn fɔ kam. Jiova Witnɛs dɛn nɔ jɔs de prich frɔm os to os fɔ mek ɔda pipul dɛn no bɔt wetin dɛn biliv bɔt di prichin wok na sɔntin we impɔtant pan wetin dɛn biliv.

[Box]

Yu Dɔn Notis Ɛni Kristian Grup We De Du Ɔl dɛn Tin Ya we Wi Dɔn Tɔk Bɔt?

Frɔm di Skripchɔ dɛn we wi dɔn tɔk bɔt na dɛn atikul dɛn ya, udat dɛn yu tink se de du tin lɛk tru Kristian dɛn tide? Pan ɔl we bɔku bɔku pipul dɛn de tɔk se dɛn na Kristian dɛn, mɛmba wetin Jizɔs bin tɛl in disaypul dɛn fɔ se: “Nɔto ɔlman we de kɔl mi, ‘Masta, Masta,’ go go insay di Kiŋdɔm we de na ɛvin, bɔt na di wan dɛn nɔmɔ we de du wetin mi Papa we de na ɛvin want go go de.” (Matyu 7:​21) We wi sabi di wan dɛn we de du wetin di Papa want ɔ di wan dɛn we na tru Kristian dɛn ɛn wi spɛn tɛm wit dɛn, dat go mek wi ɛnjɔy blɛsin dɛn we go de sote go ɔnda Gɔd in Kiŋdɔm. Duya aks di Jiova Witnɛs we gi yu dis magazin fɔ tɛl yu mɔ bɔt Gɔd in Kiŋdɔm ɛn di blɛsin dɛn we di Kiŋdɔm go mek wi ɛnjɔy.​—Lyuk 4:​43.