STƆDI ATIKUL 10
We Yu Lɛk Jiova ɛn Gladi fɔ Wetin Yu De Lan Dat Go Ɛp Yu fɔ Baptayz
“Wetin mek a nɔ fɔ baptayz?”—AKT 8:36, NWT.
SIŊ 37 A De Sav Jiova wit Ɔl Mi At
WETIN WI GO LAN?a
1-2. Akɔdin to Akt 8:27-31; 35-38 (NWT), wetin bin mek di Itopian man baptayz?
YU WANT fɔ baptayz ɛn bi Krays in disaypul? Bɔku pipul dɛn dɔn disayd fɔ baptayz bikɔs dɛn lɛk wetin dɛn de lan ɛn dɛn gladi fɔ am. Lɛ wi tɔk bɔt di ɛgzampul bɔt wan bigman we bin de wok fɔ di kwin na Itopia.
2 Di Itopian man bin du sɔntin kwik kwik wan fɔ du wetin i dɔn lan na di Skripchɔ dɛn. (Rid Akt 8:27-31; 35-38, NWT.) Wetin mek i bin du dat? I bin rili gladi fɔ Gɔd in Wɔd. As i bin de go na Jerusɛlɛm, i bin de rid sɔm vas dɛn na di buk we Ayzaya rayt. Ɛn we Filip bin tɔk wit am, di man bin rili sho se i gladi fɔ wetin Jizɔs dɔn du fɔ am. Bɔt wetin mek i bin go na Jerusɛlɛm? Na bikɔs i bin dɔn ɔlrɛdi lɛk Jiova. Aw wi no dis? I bin jɔs kɔmɔt wɔship Jiova na Jerusɛlɛm. Dis man sho klia wan se i dɔn chenj in rilijɔn ɛn i dɔn jɔyn di wangren neshɔn we de sav di tru Gɔd. Na bin dis sem lɛk we i lɛk Jiova mek i disayd bak fɔ du dis ɔda impɔtant tin, dat na fɔ baptayz ɛn bi Krays in disaypul.—Mat. 28:19.
3. Wetin kin mek pɔsin nɔ baptayz? (Luk di bɔks we gɛt di taytul “Wetin De na Yu At?”)
3 We yu lɛk Jiova, dat go mek yu baptayz. Bɔt lɔv kin mek bak yu nɔ baptayz. Wetin mek wi se so? Tink bɔt sɔm ɛgzampul dɛn. I go bi se yu rili lɛk yu fambul ɛn padi dɛn we nɔto Jiova Witnɛs, ɛn yu go de wɔri se if yu baptayz dɛn go et yu. (Mat. 10:37) Ɔ sɔntɛm yu go lɛk sɔm abit dɛn we yu no se Gɔd et ɛn i nɔ izi fɔ yu fɔ lɛf dɛn abit dɛn de. (Sam 97:10) Ɔ i go bi bak se yu mɛn na famili usay dɛn de sɛlibret ɔlide dɛn we gɛt sɔntin fɔ du wit lay lay rilijɔn. Sɔntɛm yu lɛk fɔ mɛmba di tin dɛn we una kin ɛnjɔy pan dɛn sɛlibreshɔn dɛn de. Fɔseka dat, yu go si am se i nɔ izi fɔ lɛf fɔ put an pan tin dɛn we Jiova nɔ lɛk. (1 Kɔr. 10:20, 21) Di kwɛstyɔn we yu go nid fɔ aks yusɛf na dis, “Wetin ɔ udat a lɛk mɔ?”
UDAT WI FƆ LƐK PAS ƆL?
4. Wetin na di men tin we go mek yu baptayz?
4 Sɔntɛm, yu go mɛmba bɔku fayn fayn tin dɛn we yu go lɛk ɛn gladi fɔ. Fɔ ɛgzampul, ivin bifo yu bigin fɔ stɔdi di Baybul wit Jiova Witnɛs dɛn, yu go dɔn ɔlrɛdi lɛk wetin de na di Baybul. Ɛn i go bi se yu go dɔn ɔlrɛdi lɛk Jizɔs. So we yu dɔn kam fɔ sabi udat na Jiova Witnɛs dɛn, sɔntɛm yu go lɛk fɔ de spɛn tɛm wit dɛn. Bɔt we yu lɛk dɛn fayn tin dɛn de nɔ min se dat go mek yu want fɔ gi yu layf to Jiova ɛn baptayz. Di men tin we go mek yu baptayz na we yu rili lɛk Jiova Gɔd. We yu lɛk Jiova pas ɔltin, yu nɔ go mek ɛnibɔdi ɔ ɛnitin stɔp yu fɔ sav am. Di lɛk we yu lɛk Jiova go mek yu baptayz ɛn i go ɛp yu bak fɔ kɔntinyu fɔ sav am fetful wan.
5. Us kwɛstyɔn dɛn wi go tɔk bɔt?
5 Jizɔs bin se wi fɔ lɛk Jiova wit ɔl wi at, wit ɔl wi layf, wit ɔl wi maynd, ɛn wit ɔl wi trɛnk. (Mak 12:30, NWT) Aw yu go lan fɔ lɛk ɛn rɛspɛkt Jiova wit ɔl yu at? We wi tink bɔt di we aw Jiova lɛk wi, dat de ɛp wi fɔ lɛk am bak. (1 Jɔn 4:19) Us ɔda we dɛn yu go fil ɛn us ɔda tin dɛn yu go du we yu dɔn lɛk Jiova wit ɔl yu at?b
6. Akɔdin to Lɛta Fɔ Rom 1:20, wetin na wan pan di we dɛn we yu go lan bɔt Jiova?
6 Lan bɔt Jiova frɔm di tin dɛn we i mek. (Rid Lɛta Fɔ Rom 1:20; Rɛv. 4:11) Tink gud wan bɔt di kayn sɛns we i yuz fɔ mek plant ɛn animal dɛn. Lan smɔl bɔt di wɔndaful we aw i mek wi bɔdi. (Sam 139:14) Tink bak bɔt di pawa we Jiova put na di san. Ɛn wi san na jɔs wan pan di bɔku bɔku sta dɛn.c (Ayz. 40:26) We yu du dat, yu go rɛspɛkt Jiova mɔ ɛn mɔ. Bɔt we yu no se Jiova gɛt sɛns ɛn i pawaful na jɔs smɔl pan di tin dɛn we go mek yu gɛt tayt padi biznɛs wit am. Fɔ mek yu go rili lɛk Jiova, yu nid fɔ no mɔ bɔt am.
7. Fɔ mek yu go lɛk Jiova mɔ ɛn mɔ, wetin yu nid fɔ biliv?
7 Yu nid fɔ biliv tranga wan se Jiova bisin bɔt yu. Yu de fil se i nɔ izi fɔ biliv se di Wan we mek ɛvin ɛn di wɔl no se yu de ɛn i bisin bɔt yu? If na so i bi, mɛmba se Jiova de “kloz [nia] wi ɔl.” (Akt 17:26-28) I de “luk ɔlman [in] at,” ɛn lɛk wetin Devid bin tɛl Sɔlɔmɔn i de prɔmis yu se “if yu luk fɔ am, yu go ebul fɛn am.” (1 Kro. 28:9) Infakt, di rizin we mek yu de stɔdi di Baybul naw na bikɔs Jiova se, “a dɔn drɔ yu to mi.” (Jɛr. 31:3, NWT) Di mɔ we yu de ɔndastand ɔl wetin Jiova dɔn du fɔ yu, na di mɔ yu go lɛk am.
8. Aw yu go sho se yu gladi fɔ di lɛk we Jiova lɛk yu?
8 Wan we we yu go sho se yu gladi fɔ di lɛk we Jiova lɛk yu, na we yu de pre to am. Yu go lɛk Jiova mɔ ɛn mɔ we yu de tɛl am bɔt di tin dɛn we de mɔna yu ɛn tɛl am tɛnki fɔ ɔl wetin i dɔn du fɔ yu. Ɛn di padi biznɛs we de bitwin yu ɛn Jiova go tayt mɔ ɛn mɔ as yu de si aw i de ansa yu prea dɛn. (Sam 116:1) Dat go mek yu biliv se i ɔndastand yu. Bɔt fɔ mek yu go kam nia Jiova yu nid fɔ ɔndastand di we aw i de tink. Ɛn yu nid fɔ no wetin i want yu fɔ du. Di wangren we we yu go ɔndastand dɛn tin dɛn de, na bay we yu de stɔdi in Wɔd, di Baybul.
Di bɛst we we wi go kam nia Gɔd ɛn no wetin i want frɔm wi, na bay we wi de stɔdi di Baybul (Luk na paregraf 9)d
9. Aw yu go sho se yu valyu di Baybul?
9 Lan fɔ gladi fɔ Gɔd in Wɔd, di Baybul. Na Gɔd in Wɔd nɔmɔ gɛt di tru tin dɛn bɔt Jiova ɛn wetin i want fɔ yu. Yu go sho se yu valyu di Baybul bay we yu de rid am ɛnide, bay we yu de pripia fɔ yusɛf bifo yu Baybul ticha kam, ɛn bay we yu de aplay wetin yu de lan. (Sam 119:97, 99; Jɔn 17:17) Yu gɛt pasɔnal Baybul ridin shɛdul? Yu de fala di shɛdul bay we yu mek shɔ se yu de rid di Baybul ɛnide?
10. Wetin na wan pan di tin dɛn we mek di Baybul spɛshal?
10 Wan pan di fayn tin dɛn bɔt di Baybul na dat i gɛt ripɔt dɛn bɔt tin dɛn we pipul dɛn bin si we Jizɔs du. Na in na di wangren buk we gɛt kɔrɛkt tin dɛn bɔt wetin Jizɔs dɔn du fɔ yu. We yu lan bɔt wetin Jizɔs bin tɔk ɛn du sɔntɛm dat go mek yu want fɔ gɛt tayt padi biznɛs wit am.
11. Wetin go ɛp yu fɔ lan fɔ lɛk Jiova?
11 Lan fɔ lɛk Jizɔs, ɛn yu go lɛk Jiova mɔ. Wetin mek? Na bikɔs Jizɔs de falamakata in Papa in kwaliti dɛn gud gud wan. (Jɔn 14:9) So di mɔ we yu lan bɔt Jizɔs, na di mɔ yu go ɔndastand Jiova ɛn valyu am. Tink bɔt di sɔri-at we Jizɔs bin sho to di wan dɛn we pipul dɛn bin tink se nɔ impɔtant bikɔs dɛn po, dɛn sik, ɔ dɛn nɔ gɛt pɔsin fɔ ɛp dɛn. Tink bak bɔt di fayn fayn advays dɛn we i de gi yu bɔt aw fɔ liv yu layf ɛn aw dat go ɛp yu if yu lisin to am.—Mat. 5:1-11; 7:24-27.
12. As yu de lan bɔt Jizɔs, wetin yu go want fɔ du?
12 Sɔntɛm yu go kam fɔ lɛk Jizɔs mɔ ɛn mɔ as yu de tink gud wan bɔt di sakrifays we i mek so dat Gɔd go fɔgiv wi sin dɛn. (Mat. 20:28) We yu ɔndastand se Jizɔs bin gri fɔ day fɔ yu, dat go mek yu want fɔ ripɛnt ɛn beg Jiova fɔ fɔgiv yu. (Akt 3:19, 20; 1 Jɔn 1:9) Ɛn as yu kam fɔ lɛk Jiova ɛn Jizɔs, na di mɔ yu go want fɔ de wit pipul dɛn we lɛk dɛn.
13. Wetin Jiova dɔn gi yu?
13 Lan fɔ lɛk Jiova in famili. Sɔntɛm, yu fambul ɛn padi dɛn we nɔto Jiova Witnɛs nɔ go ɔndastand wetin mek yu want fɔ gi yu layf to Jiova. I go bi se, dɛn go ivin de agens yu. Jiova go ɛp yu bay we i mek di brɔda ɛn sista dɛn na di kɔngrigeshɔn bi yu famili. If yu de nia dɛn, dɛn go lɛk ɛn sɔpɔt yu. (Mak 10:29, 30; Ibru 10:24, 25) As tɛm de go, yu fambul dɛn go jɔyn yu fɔ sav Jiova ɛn obe in lɔ dɛn.—1 Pit. 2:12.
14. Akɔdin to wetin de na Jɔn In Fɔs Lɛta 5:3, wetin yu dɔn kam fɔ no bɔt Jiova in lɔ dɛn?
14 Lan fɔ valyu ɛn fala wetin Jiova in lɔ dɛn se. Bifo yu kam fɔ no Jiova, sɔntɛm yu go dɔn gɛt yu yon we aw yu de du tin, bɔt naw yu dɔn si se Jiova in lɔ dɛn na di bɛst. (Sam 1:1-3; rid Jɔn In Fɔs Lɛta 5:3.) Tink bɔt di Baybul in advays dɛn bɔt maredman, mareduman, mama, papa, ɛn pikin dɛn. (Ɛfi. 5:22–6:4, NWT) Yu de si yu famili de go bifo as yu de fala dɛn advays dɛn de? Yu dɔn si se yu de gɛt gud abit dɛn we yu de obe Jiova in advays dɛn fɔ tek tɛm mek padi? Yu dɔn gladi pas aw yu bin de? (Prɔv. 13:20; 1 Kɔr. 15:33) Sɔntɛm yu ansa to dɛn kwɛstyɔn dɛn de na yɛs.
15. Wetin yu go du if yu nid ɛp fɔ fala di advays dɛn we de na di Baybul?
15 Sɔntɛnde, yu go si am se i nɔ izi fɔ no aw fɔ fala di advays dɛn we yu de lan na di Baybul. Na dat mek Jiova de yuz in ɔganayzeshɔn fɔ gi yu tin dɛn we de tɔk bɔt di Baybul we go ɛp yu fɔ no wetin rayt frɔm wetin rɔng. (Ibru 5:13, 14) We yu rid ɛn stɔdi dɛn tin dɛn de, yu go si se dɛn fayn ɛn de tɔk bɔt sɔm patikyula tin dɛn we go mek sɔntɛm yu kam na Jiova in ɔganayzeshɔn.
16. Aw Jiova dɔn ɔganayz in pipul dɛn?
16 Lan fɔ lɛk ɛn sɔpɔt Jiova in ɔganayzeshɔn. Jiova dɔn ɔganayz in pipul dɛn to difrɛn kɔngrigeshɔn dɛn; in Pikin, Jizɔs, na in de oba dɛn ɔl. (Ɛfi. 1:22; 5:23, NWT) Tide, Jizɔs dɔn pik wan smɔl grup we na anɔyntɛd man dɛn fɔ de bifo fɔ ɔganayz di wok lɛk aw i want dɛn fɔ du am. Jizɔs bin kɔl dis grup “di slev we fetful ɛn gɛt sɛns” ɛn di wok we dɛn gɛt fɔ mek yu go nia Jiova ɛn protɛkt yu padi biznɛs wit am, na tin we rili impɔtant to dɛn (Mat. 24:45-47, NWT) Wan pan di we dɛn we di slev we fetful de ɛp fɔ kia fɔ yu, na bay we i de mek shɔ se i de pik ɛlda dɛn we fit fɔ gayd ɛn protɛkt yu. (Ayz. 32:1, 2; Ibru 13:17; 1 Pit. 5:2, 3) Di ɛlda dɛn de rɛdi fɔ sakrifays dɛnsɛf fɔ yu, fɔ ɛnkɔrej yu, ɛn fɔ ɛp yu fɔ go nia Jiova mɔ ɛn mɔ. Bɔt wan pan di impɔtant tin dɛn we dɛn go du fɔ yu, na fɔ ɛp yu fɔ tich ɔda pipul dɛn bɔt Jiova.—Ɛfi. 4:11-13, NWT.
17. Akɔdin to Romans 10:10, 13, 14 (NWT), wetin mek wi de tɔk to ɔda pipul dɛn bɔt Jiova?
17 Ɛp ɔda pipul dɛn fɔ lan fɔ lɛk Jiova. Jizɔs bin tɛl in disaypul dɛn fɔ tich ɔda pipul dɛn bɔt Jiova. (Mat. 28:19, 20) If wi nɔ tek tɛm, wi go obe da lɔ de bɔt wi jɔs de du am fɔ du sek. Bɔt as yu de lɛk Jiova mɔ ɛn mɔ, yu go fil di sem we aw di apɔsul Pita ɛn Jɔn bin fil we dɛn se: “Wi nɔ go ebul sɛt mɔt ɛn nɔ tɔk bɔt wetin wi dɔn si ɛn yɛri.” (Akt 4:20) Wi go rili gladi if wi ɛp sɔmbɔdi fɔ kam fɔ lɛk Jiova. Imajin di kayn gladi-at we Filip bin gɛt we i bin ɛp di Itopian man fɔ lan di tru tin dɛn we de na di Skripchɔ dɛn ɛn baptayz! We yu falamakata Filip ɛn obe Jizɔs in kɔmand fɔ prich, yu de sho se yu want fɔ bi wan pan Jiova Witnɛs dɛn. (Rid Romans 10:10, 13, 14, NWT.) We yu mekɔp yu maynd fɔ du dat, sɔntɛm yusɛf go aks di sem kwɛstyɔn we da Itopian man bin aks we i se: “Wetin mek a nɔ fɔ baptayz?”—Akt 8:36, NWT.
18. Wetin wi go tɔk bɔt insay di nɛks atikul?
18 Yu go du di tin we impɔtant pas ɔl na yu layf we yu disayd fɔ baptayz. Bikɔs baptizim na sɔntin we siriɔs, yu nid fɔ tink gud gud wan bɔt wetin-ɛn-wetin i min fɔ du dat. Wetin yu nid fɔ no bɔt baptizim? Wetin yu nid fɔ du bifo ɛn afta yu baptayz? Wi go ansa dɛn kwɛstyɔn dɛn de insay di nɛks atikul.
SIŊ 2 Jiova Na Yu Nem
a Sɔm pan di wan dɛn we lɛk Jiova nɔ shɔ if dɛn rɛdi fɔ baptayz ɛn bi Jiova Witnɛs. If na dis we yu de fil, dis atikul go ɛp yu fɔ tink bak bɔt sɔm tin dɛn we yu go du we go mek yu baptayz.
b Ɔlman difrɛn so i nɔ min se dɛn go fala dɛn advays dɛn ya na dis atikul di sem we aw wi de kam tɔk bɔt am.
c Fɔ mɔ ɛgzampul dɛn, na fɔ luk di brosho dɛn we gɛt di taytul Was Life Created? ɛn The Origin of Life—Five Questions Worth Asking.
d SMƆL TIN BƆT DI PIKCHƆ: Wan sista de gi wan trakt to wan yɔŋuman we i mit we i go bay-bay.