We pipul dɛn go gɛt layf bak tumara bambay, pipul dɛn de wɛlkɔm dɛn padi ɛn fambul dɛn we dɔn gɛt layf bak na Paradays na dis wɔl

Wetin I Min fɔ Gɛt Layf Bak?

Di Baybul in ansa

Insay di Baybul, di wɔd we dɛn translet as “gɛt layf bak” kɔmɔt frɔm wan Grik wɔd we na a·naʹsta·sis, we min fɔ “grap” ɔ “tinap bak.” Gɔd de gi layf bak to pipul dɛn ɛn mek dɛn luk lɛk aw dɛn bin de bifo dɛn day.—1 Kɔrintians 15:12, 13.

Di Ibru Skripchɔ dɛn we pipul dɛn kin kɔl di Ol Tɛstamɛnt, insɛf tich se pipul dɛn go gɛt layf bak. Fɔ ɛgzampul, Gɔd bin yuz di prɔfɛt Ozie fɔ prɔmis wi se: “A go pul dɛn kɔmɔt na di Grev; A go sev dɛn kɔmɔt frɔm day.”—Osia 13:14, NWT; Job 14:13-15; Ayzaya 26:19; Daniɛl 12:2, 13.

Usay pipul dɛn go gɛt layf bak? Sɔm pipul dɛn go gɛt layf bak ɛn go na ɛvin fɔ rul as kiŋ dɛn wit Krays. (2 Kɔrintians 5:1; Rɛvɛleshɔn 5:9, 10) Di Baybul kɔl dɛn di wan dɛn we “fɔs gɛt layf bak” ɛn di wan dɛn we go “gɛt layf bak fɔs.” Dɛn wɔd dɛn ya sho se ɔda grup ɔf pipul dɛn go gɛt layf bak afta dɛn wan dɛn ya. (Rɛvɛleshɔn 20:6; Filipians 3:11) Di wan dɛn we go de na di sɛkɔn grup go gɛt layf bak na dis wɔl usay dɛn go de ɛnjɔy.—Sam 37:29.

Aw pipul dɛn go gɛt layf bak? Gɔd dɔn gi Jizɔs di pawa fɔ gi layf bak to di wan dɛn we dɔn day. (Jɔn 11:25) Jizɔs go gi layf bak to “ɔl di wan dɛn we de na di grev dɛn we Gɔd de mɛmba,” i go mek dɛn mɛmba tin dɛn ɛn mek dɛn bi di sem kayn pipul dɛn we dɛn bin bi. (Jɔn 5:28, 29) Di wan dɛn we go gɛt layf bak fɔ go na ɛvin go gɛt spirit bɔdi ɛn di wan dɛn we go gɛt layf bak fɔ de na di wɔl go gɛt mɔtalman bɔdi, ɛn dɛn nɔ go de sik.—Ayzaya 33:24; 35:5, 6; 1 Kɔrintians 15:42-44, 50.

Udat dɛn go gɛt layf bak? Di Baybul se: “A abop pan Gɔd, jɔs lɛk aw dɛn man ya sɛf abop se di wan dɛn we du wetin rayt ɛn di wan dɛn we nɔ du wetin rayt go gɛt layf bak.” (Akt 24:15) Sɔm pan di wan dɛn we de du wetin rayt na fetful pipul dɛn lɛk Noa, Sera, ɛn Ebraam. (Jɛnɛsis 6:9; Ibruz 11:11; Jems 2:21) Di wan dɛn we nɔ du wetin rayt na di wan dɛn we nɔ du wetin Gɔd se bɔt dɛn nɔ bin gɛt chans fɔ lan wetin Gɔd se ɛn du am.

Bɔt di wan dɛn we rili wikɛd ɛn nɔ gri fɔ chenj nɔ go gɛt layf bak. We da kayn pɔsin de day, i nɔ gɛt no op fɔ gɛt layf bak.—Matyu 23:33; Ibruz 10:26, 27.

Ustɛm pipul dɛn go gɛt layf bak? Di Baybul bin dɔn tɔk se pipul dɛn go gɛt layf bak fɔ go na ɛvin di tɛm we Krays go de wit wi, ɛn dat bin dɔn bigin insay di ia 1914. (1 Kɔrintians 15:21-23) Pipul dɛn go gɛt layf bak fɔ de na dis wɔl insay di Wan Tawzin Ia we Jizɔs Krays go de rul, ɛn da tɛm de, di wɔl go dɔn bi Paradays.—Lyuk 23:43; Rɛvɛleshɔn 20:6, 12, 13.

Wetin mek i mek sɛns fɔ biliv se pipul dɛn go gɛt layf bak? Di Baybul gɛt nayn stori dɛn bɔt pipul dɛn we bin dɔn day we gɛt layf bak, ɛn pipul dɛn bin si dɛn we dɛn gɛt layf bak. (Fɔs Kiŋ 17:17-24; Sɛkɛn Kiŋ 4:32-37; 13:20, 21; Lyuk 7:11-17; 8:40-56; Jɔn 11:38-44; Akt 9:36-42; Akt 20:7-12; 1 Kɔrintians 15:3-6) We Jizɔs bin gi layf bak to Lazarɔs, i bin rili wɔndaful bikɔs Lazarɔs bin dɔn day fɔ 4 dez, ɛn Jizɔs bin pafɔm dis mirekul bifo bɔku pipul dɛn. (Jɔn 11:39, 42) Ivin di wan dɛn we nɔ lɛk Jizɔs nɔ bin dinay se dis nɔ apin, so bikɔs ɔf dat, dɛn bin plan fɔ kil Jizɔs ɛn Lazarɔs.—Jɔn 11:47, 53; 12:9-11.

Tri tɛm dɛn we pipul dɛn bin gɛt layf bak we di Baybul tɔk bɔt: wan wido in pikin, wan Kristian uman, ɛn Jizɔs in padi Lazarɔs

Di Baybul sho se Gɔd gɛt pawa, ɛn i want fɔ gi layf bak to di wan dɛn we dɔn day. I de mɛmba ɔltin bɔt di wan dɛn we i want fɔ gi layf bak. (Job 37:23; Matyu 10:30; Lyuk 20:37, 38) Gɔd ebul fɔ gi layf bak to di wan dɛn we dɔn day, ɛn i want fɔ du am! Di Baybul se Gɔd “rili want fɔ si di tin dɛn we i dɔn mek.”—Job 14:15, NWT.

Sɔm lay lay tin dɛn we pipul dɛn kin tɔk bɔt di tichin fɔ se di wan dɛn we dɔn day go gɛt layf bak

Lay: Pɔsin de gɛt layf bak bay we in bɔdi ɛn sol de jɔyn togɛda.

Tru: Di Baybul tich se mɔtalman na sol, nɔto pat pan pɔsin we nɔ de day. (Jɛnɛsis 2:7; Izikɛl 18:4) So we pɔsin gɛt layf bak nɔto in sol ɛn bɔdi de jɔyn togɛda, bɔt Gɔd de mek di pɔsin bak as mɔtalman we gɛt layf.

Lay: As sɔm pipul dɛn gɛt layf so, dɛn go dɔnawe wit dɛn bak.

Tru: Di Baybul se “di wan dɛn we bin de du wikɛd tin dɛn go gɛt layf bak fɔ mek dɛn jɔj dɛn.” (Jɔn 5:29) Bɔt dɛn nɔ go yuz di tin dɛn we dɛn du bifo dɛn day fɔ jɔj dɛn, bifo dat na di tin dɛn we dɛn du afta dɛn gɛt layf bak na in dɛn go yuz fɔ jɔj dɛn. Jizɔs bin se: “Di wan dɛn we dɔn day go yɛri Gɔd in Pikin in vɔys, ɛn di wan dɛn we dɔn pe atɛnshɔn go liv.” (Jɔn 5:25) Di wan dɛn we go “pe atɛnshɔn,” ɔ obe di tin dɛn we dɛn go lan afta dɛn gɛt layf bak, dɛn go rayt dɛn nem na “di skrol we de sho se pɔsin go gɛt layf.”—Rɛvɛleshɔn 20:12, 13.

Lay: We pɔsin gɛt layf bak, i de gɛt di ɛgzakt bɔdi we i bin gɛt bifo i day.

Tru: Afta we pɔsin day, in bɔdi de rɔtin.—Ɛkliziastis 3:19, 20.