Sho se Yu Gladi fɔ di We Aw Jiova De Shep Wi lɛk Pɔsin We De Wok wit Kle
“PAPA GƆD, . . . wi na di kle, ɛn na yu na di man we de wok wit kle; wi ɔl na yu wok we yu du wit yu an.”—AYZAYA 64:8.
SIŊ DƐN: 89, 26
1. Wetin mek Jiova pas ɛni mɔtalman we de wok wit kle?
INSAY Novɛmba 2010 na Ingland, sɔmbɔdi bin se i go pe 70 milyɔn dɔla fɔ wan Chayniz flawa pɔt we dɛn mek wit kle. Wi kin sɔprayz fɔ no se pɔsin kin yuz kɔmɔn kɔmɔn tin lɛk kle we chip, fɔ mek sɔntin we rili fayn ɛn dia. Jiova na di Pɔsin we de shep wi, ɛn i pas ɛni mɔtalman we de wok wit kle. Di Baybul se Gɔd tek “dɔti na grɔn,” dat na kle ɛn mek wan man we pafɛkt. (Jɛnɛsis 2:7) Da man de we nem Adam, in “papa na Gɔd” ɛn Gɔd bin mek am di kayn we we i go ebul fɔ falamakata am.—Lyuk 3:38.
2, 3. Aw wi go falamakata di Izrɛlayt dɛn we bin ripɛnt?
2 We Adam nɔ bin obe di Wan we mek am, i nɔ bin bi Gɔd in pikin igen. Bɔt bɔku pan Adam in pikin dɛn dɔn pik Jiova fɔ bi dɛn Rula. (Di Ibru Pipul Dɛn 12:1) We dɛn put dɛnsɛf dɔŋ ɛn obe di Wan we mek dɛn, dɛn de sho se dɛn nɔ want lɛ Setan shep dɛn, bɔt dɛn want lɛ di Wan we mek dɛn bi dɛn Papa ɛn lɛ i shep dɛn lɛk pɔsin we de wok wit kle. (Jɔn 8:44) We dɛn nɔ kɔmɔt biɛn Gɔd, dis de mek wi mɛmba di Izrɛlayt dɛn we bin ripɛnt. Dɛn Izrɛlayt dɛn ya bin tɔk se: “PAPA GƆD, na yu na wi Papa; wi na di kle, ɛn na yu na di man we de wok wit kle; wi ɔl na yu wok we yu du wit yu an.”—Ayzaya 64:8.
3 Semweso, di wan dɛn we de wɔship Jiova tide de tray tranga wan fɔ put dɛnsɛf dɔŋ ɛn obe am. Dɛn tek am se na big big ɔnɔ fɔ lɛ dɛn kɔl Jiova dɛn Papa ɛn dɛn want am fɔ bi di Wan we go shep dɛn lɛk pɔsin we de wok wit kle. So i go fayn fɔ lɛ wi aks wisɛf dɛn kwɛstyɔn dɛn ya, ‘Wi rɛdi fɔ bi lɛk kle we nɔ at fɔ lɛ Gɔd shep ɛn mek lɛ wi bi fayn fayn tin? Wi de si wi brɔda ɛn sista dɛn lɛk kle we Gɔd stil de shep?’ Fɔ ɛp wi fɔ tink di rayt we, wi go tɔk bɔt aw Jiova dɔn pik di wan dɛn we i de shep, wetin mek i de shep dɛn, ɛn aw i de du dat.
JIOVA DE PIK DI WAN DƐN WE I DE TICH
4. Aw Jiova de pik di wan dɛn we i de drɔ to insɛf? Gi ɛgzampul dɛn.
4 Jiova nɔ de si pipul dɛn di we aw wi de si dɛn. I de wach insay pɔsin in at ɛn i de si udat wi rili bi. (Rid Fɔs Samiɛl 16:7b.) Jiova bin du dis we i mek di Kristian kɔngrigeshɔn. I drɔ bɔku pipul dɛn to in ɛn in Pikin ɛn plɛnti pan dɛn na pipul dɛn we sɔm pipul dɛn go fil se nɔ gɛt wan valyu. (Jɔn 6:44) Wan pan dɛn pipul ya na bin wan Faresi we nem Sɔl, i “bin de tɔk bad” bɔt Krays, i “bin de fɛt in pipul dɛn” ɛn “kɔs am.” (Fɔs Lɛta To Timoti 1:13) Jiova bin luk insay Sɔl in at ɛn i nɔ bin fil se Sɔl na kle we nɔ gɛt wan valyu. (Prɔvabs 17:3) Bifo dat, Jiova bin “pik” Sɔl fɔ prich to “pipul we nɔto Ju ɛn dɛn kiŋ ɛn dɛn pipul na Izrɛl.” (Di Apɔsul Dɛn Wok [Akt] 9:15) Jiova bin pik ɔda pipul dɛn bak we i go shep lɛk “flawa pɔt,” we min se i go yuz dɛn fɔ du fayn fayn tin dɛn. Sɔm pan dɛn na bin pipul dɛn we bin de drɔnk, du mami ɛn dadi biznɛs di we aw Gɔd nɔ want, ɛn tifman dɛn. (Lɛta Fɔ Rom 9:21; Fɔs Lɛta Fɔ Kɔrint 6:9-11) As dɛn bin de stɔdi di Skripchɔ dɛn, dɛn bin de gɛt mɔ fet pan Jiova ɛn alaw am fɔ shep dɛn.
Wi nɔ fɔ jɔj pipul dɛn we de na di say usay wi de prich ɔ insay di kɔngrigeshɔn
5, 6. We wi biliv Jiova we de shep wi lɛk pɔsin we de wok wit kle, aw dat go afɛkt di we we wi de si (a) di pipul dɛn we de na di say we wi de prich? (b) wi brɔda ɛn sista dɛn?
5 Wi biliv se Jiova ebul fɔ pik ɛn drɔ di rayt pipul dɛn. Na dat mek wi nɔ fɔ jɔj di pipul dɛn we de na di say we wi de prich ɔ di wan dɛn we de na di kɔngrigeshɔn. Tek fɔ ɛgzampul, di we aw wan man we nem Maykɛl bin de biev we Jiova Witnɛs dɛn bin de go to am. I se: “A kin jɔs kɔmɔt bifo dɛn ɛn mek lɛk se dɛn nɔ ivin de. A bin rili de biev rud we to dɛn! Leta, we a bin de wan ɔda say, a bin mit wit wan famili we a bin de kɔle bikɔs dɛn bin de biev fayn. Dɔn wan de, a kam no se dɛn na Jiova Witnɛs dɛn! A bin shɔk. Di we aw dɛn bin de biev mek a bigin tink bɔt wetin mek a nɔ lɛk Jiova Witnɛs dɛn. A kam si se a nɔ bin lɛk dɛn bikɔs a nɔ bin no natin bɔt dɛn, na jɔs dɛn se nɔmɔ a bin de lisin, a nɔ bin no di tru bɔt dɛn.” Maykɛl bin want fɔ lan mɔ, ɛn i bin gri fɔ stɔdi di Baybul. Leta i bin baptayz ɛn i bigin yuz ɔl in tɛm fɔ sav Jiova.
6 We wi kam fɔ no se Jiova na di wan we de shep wi lɛk pɔsin we de wok wit kle, di we aw wi de si wi brɔda ɛn sista dɛn go chenj. Wi go si ɛni wan pan dɛn lɛk kle we Gɔd stil de shep. Na da kayn we de Jiova de si dɛn. I de si uskayn pɔsin dɛn rili bi insay dɛn at, ɛn i no se na fɔ shɔt tɛm nɔmɔ dɛn nɔ pafɛkt. I no bak uskayn pɔsin ɛniwan pan dɛn go bi. (Sam 130:3) Wisɛf kin falamakata Jiova if wi de si wi brɔda dɛn lɛk aw Jiova de si dɛn. Wi kin ivin wok wit Jiova we de shep wi lɛk pɔsin we de wok wit kle fɔ ɛp wi brɔda ɛn sista dɛn fɔ go bifo. (Fɔs Lɛta Fɔ Tɛsalonayka 5:14, 15) Di ɛlda dɛn na di kɔngrigeshɔn fɔ sɛt fayn ɛgzampul we i kam pan dɛn kayn tin ya.—Lɛta Fɔ Ɛfisɔs 4:8, 11-13.
WETIN MEK JIOVA DE SHEP WI?
7. Wetin mek yu gladi fɔ di trenin we Jiova de gi yu?
7 Sɔm pipul dɛn kin tɔk se: ‘A nɔ ɛva valyu di trenin we a bin de gɛt frɔm mi mama ɛn papa pas te a gɛt mi yon pikin dɛn.’ As wi de big, wi kin kam fɔ valyu di trenin we wi de gɛt bikɔs wi si se na we dat we dɛn de sho se dɛn lɛk wi. (Rid Di Ibru Pipul Dɛn 12:5, 6, 11.) Jiova lɛk wi lɛk in yon pikin dɛn, so na dat mek i de tek tɛm tren wi, ɔ shep wi. I want lɛ wi gɛt sɛns ɛn gladi at ɛn lɛ wi lɛk am lɛk wi Papa. (Prɔvabs 23:15) I nɔ lɛk fɔ si we wi de sɔfa atɔl, ɛn i nɔ want lɛ wi day, we wi nɔ ripɛnt.—Lɛta Fɔ Ɛfisɔs 2:2, 3.
Jiova lɛk wi lɛk in pikin dɛn, ɛn na dat mek i de tek tɛm fɔ tren wi ɛn shep wi
8, 9. Wetin Jiova de tich wi tide? Aw di tin dɛn we i de tich wi go kɔntinyu tumara bambay?
8 Sɔntɛm bifo wi kam fɔ no Jiova, wi bin gɛt bɔku bad abit dɛn. Bɔt Jiova shep wi ɛn ɛp wi fɔ chenj, ɛn dis dɔn mek, tide wi gɛt fayn fayn abit dɛn. (Ayzaya 11:6-8; Lɛta Fɔ Kɔlɔse 3:9, 10) I tan lɛk se wi de na Paradays bikɔs wi de ɛnjɔy di pis we Jiova de gi wi. Dis na di spɛshal tin we Jiova de du tide we de ɛp fɔ shep wi. Dis pis we Jiova de gi wi de mek wi fil sef ɛn nɔ fred pan ɔl we wi de na dis wikɛd wɔl. Pipul dɛn we mɛn na famili we dɛn nɔ bin sho dɛn lɔv, de ɛnjɔy di pis we Jiova de gi bikɔs dɛn de wit dɛn brɔda ɛn sista dɛn we rili de sho se dɛn lɛk dɛn. (Jɔn 13:35) Ɛn wi bak dɔn lan fɔ sho se wi rili lɛk ɔda pipul dɛn. Bɔt di tin we impɔtant pas ɔl, na dat wi dɔn kam fɔ no Jiova ɛn naw wi de fil di we aw i lɛk wi lɛk papa.—Jems 4:8.
9 Insay di nyu wɔl, wi go rili bɛnifit frɔm di pis we Gɔd de gi wi, we jɔs tan lɛk Paradays. Wi go ɛnjɔy layf na di tru tru Paradays usay Gɔd in Kiŋdɔm go rul. Da tɛm de, Jiova go kɔntinyu fɔ shep wi ɛn tich wi di kayn we we wi nɔ go ivin imajin tide. (Ayzaya 11:9) Jiova go mek bak wi maynd ɛn bɔdi pafɛkt. Dis go mek am izi fɔ lɛ wi ɔndastand ɛn rili du di tin dɛn we i de tɛl wi. So lɛ wi kɔntinyu fɔ alaw Jiova fɔ shep wi, ɛn lɛ wi sho se wi gladi fɔ di we we i de sho se i lɛk wi.—Prɔvabs 3:11, 12.
AW JIOVA DE SHEP WI?
10. Aw Jizɔs bin sho se i peshɛnt ɛn i sabi aw fɔ shep pipul dɛn jɔs lɛk Jiova?
10 Jɔs lɛk we pɔsin we sabi wok wit kle gud gud wan kin no di kayn kle we i de mol, na so Jiova rili sabi wi gud gud wan. I no wi bad abit dɛn, i no di tin dɛn we wi nɔ ebul du, ɛn di we aw wi dɔn go bifo, ɛn i de tink bɔt ɔl dɛn tin ya we i de shep wi. (Rid Sam 103:10-14.) Wi kin no aw Jiova de si wi we wi luk wetin Jizɔs bin de du we in apɔsul dɛn nɔ bin de du wetin rayt. Sɔm tɛm dɛn de, in apɔsul dɛn bin de agyu bɔt udat impɔtant pas dɛn ɔl. If yu bin de de, aw yu bin fɔ dɔn si di apɔsul dɛn? Sɔntɛm yu go dɔn fil se dɛn tan lɛk kle we nɔ izi fɔ shep. Bɔt Jizɔs bin no se dɛn kin ebul fɔ shep dɛn if dɛn lisin to di fayn we we i de peshɛnt fɔ gi dɛn advays ɛn falamakata di kayn we we i put insɛf dɔŋ. (Mak 9:33-37; 10:37, 41-45; Lyuk 22:24-27) Afta we Jizɔs bin gɛt layf bak, di apɔsul dɛn bin gɛt Gɔd in oli spirit, ɛn da tɛm de dɛn nɔ bin de tink igen bɔt udat impɔtant pas dɛn ɔl. Bɔt dɛn bin de tink naw bɔt di wok we Jizɔs gi dɛn.—Di Apɔsul Dɛn Wok [Akt] 5:42.
11. Aw Devid bin sho se i tan lɛk kle we nɔ at fɔ shep? Aw wi go falamakata am?
11 Tide, Jiova de yuz di Baybul, in oli spirit, ɛn di kɔngrigeshɔn fɔ shep wi. Aw di Baybul kin shep wi? Wi nid fɔ rid am, tink gud wan bɔt wetin wi dɔn rid, ɛn aks Jiova fɔ ɛp wi fɔ du di tin dɛn we wi dɔn lan. Kiŋ Devid bin rayt se: “We a lidɔm na nɛt fɔ slip, a kin de mɛmba; ɛn tink bɔt ɔl wetin yu dɔn du fɔ mi, di ol nɛt.” (Sam 63:6) I bin rayt bak se: “A go prez PAPA GƆD bikɔs nain de tɛl mi wetin fɔ du; ivin na nɛt, a de tink bɔt wetin i de tɛl mi fɔ du.” (Sam 16:7) Dis dɔn sho se Devid bin de tink gud wan bɔt di advays dɛn we Jiova bin de gi am, ɛn i bin de alaw dɛn advays ya fɔ shep di we we i de tink ɛn fil, pan ɔl we i nɔ bin izi fɔ am fɔ tek di advays. (Sɛkɛn Samiɛl 12:1-13) Devid bin sɛt fayn ɛgzampul fɔ wi we i put insɛf dɔŋ ɛn obe. So i go fayn fɔ lɛ yu aks yusɛf dɛn kwɛstyɔn dɛn ya: ‘We a de rid di Baybul, a de tink gud wan bɔt wetin a de rid ɛn a de alaw Gɔd in advays fɔ afɛkt di we aw a de tink ɛn fil? A go ebul fɔ du am mɔ ɛn mɔ?’—Sam 1:2, 3.
12, 13. Aw Jiova de yuz di oli spirit ɛn di kɔngrigeshɔn fɔ shep wi?
12 Bɔku we dɛn de we di oli spirit kin shep wi. Fɔ ɛgzampul, i kin ɛp wi fɔ lan fɔ falamakata Jizɔs in fayn kwaliti dɛn, ɛn fɔ mek wi sho di kwaliti dɛn we di spirit de gi. (Lɛta Fɔ Galeshya 5:22, 23) Wan pan di kwaliti dɛn we di spirit de gi na lɔv. Wi lɛk Gɔd ɛn wi want fɔ obe am ɛn wi want fɔ lɛ i shep wi bikɔs wi no se in lɔ dɛn go bɛnifit wi. Apat frɔm dat, di oli spirit kin ɛp wi fɔ lɛ wi nɔ alaw dis wikɛd wɔl fɔ shep wi. (Lɛta Fɔ Ɛfisɔs 2:2) We di apɔsul Pɔl bin yɔŋ, i bin alaw di edman dɛn pan Gɔd biznɛs we bin prawd, fɔ shep am. Bɔt di oli spirit bin ɛp am fɔ chenj. Leta i bin rayt se: “Di pawa fɔ kɔntrol ɔltin de na Gɔd in an, i nɔ de na wi an.” (Sɛkɛn Lɛta Fɔ Kɔrint 4:7) Wisɛf nid fɔ aks Jiova fɔ di oli spirit bikɔs wi no se i go ansa wi we wi pre to am wit ɔl wi at.—Sam 10:17.
Jiova de yuz di ɛlda dɛn fɔ shep wi, but wi fɔ du wetin dɛn de advays wi fɔ du (Luk na paregraf 12 ɛn 13)
13 Jiova de yuz di kɔngrigeshɔn ɛn di ɛlda dɛn bak fɔ shep wi ɔl. Fɔ ɛgzampul, if di ɛlda dɛn si se wi gɛt wan abit we nɔ fayn, dɛn kin tray fɔ ɛp wi. Bɔt nɔto wetin dɛn sabi dɛn de yuz fɔ advays wi. (Lɛta Fɔ Galeshya 6:1) Bifo dat, dɛn de put dɛnsɛf dɔŋ ɛn pre to Jiova fɔ mek i ɛp dɛn fɔ ɔndastand ɛn gi dɛn sɛns. Dɔn dɛn de yuz di Baybul ɛn wi buk ɛn magazin dɛn fɔ fɛn mɔ tin dɛn we dɛn go yuz fɔ ɛp wi. If di ɛlda dɛn kam to yu ɛn gi yu fayn advays , sɔntɛm na bɔt di we aw yu de drɛs, mɛmba se dis de sho se Gɔd lɛk yu. If yu fala di advays we dɛn de gi yu, yu go tan lɛk kle we izi fɔ lɛ Jiova shep ɛn yu go bɛnifit.
14. Pan ɔl we Jiova ebul fɔ kɔntrol wi lɛk kle, aw i de sho se i rɛspɛkt di fridɔm we wi gɛt fɔ disayd fɔ wisɛf?
14 If wi ɔndastand aw Jiova de shep wi, dat go ɛp wi fɔ gɛt tayt padi biznɛs wit wi brɔda ɛn sista dɛn. Pantap dat, wi go ebul fɔ tink di rayt we bɔt di pipul dɛn we de na di say usay wi de prich ɛn ivin di wan dɛn we wi de stɔdi di Baybul wit. Insay di tɛm we dɛn bin de rayt di Baybul, man we de wok wit kle kin pul pul ston ɛn ɔda tin dɛn pan di kle ɛn klin di kle fɔs bifo i bigin fɔ wok wit am. Jiova we na di Wan we sabi wok wit kle pas ɔlman, de ɛp di wan dɛn we want fɔ lɛ i shep dɛn. I nɔ de fos dɛn fɔ chenj, bɔt i de sho dɛn aw fɔ liv dɛn layf di rayt we. Dɔn dɛn kin disayd fɔ dɛnsɛf if dɛn want fɔ chenj.
15, 16. Aw wi Baybul stɔdi dɛn go sho se dɛn want mek Jiova shep dɛn? Gi wan ɛgzampul.
15 Lɛ wi tɔk bɔt wetin bin apin to wan sista na Ɔstrelia we nem Tɛsi. I bin rili izi fɔ am fɔ lan wetin de na di Baybul. Bɔt i nɔ bin de go bifo ɛn i nɔ bin de go di mitin dɛn. Di sista we bin de stɔdi am bin dɔn pre to Jiova, ɛn i bin disayd se i go lɛf fɔ stɔdi am. Dɔn sɔntin bin apin we mek i sɔprayz. We dɛn bin de stɔdi, Tɛsi bin tɛl in ticha wetin mek i nɔ bin de go bifo. I bin tɔk se i de fil lɛk se in na ipokrit bikɔs i bin lɛk fɔ ple gambul. Bɔt naw i dɔn disayd fɔ lɛf fɔ ple gambul.
16 I nɔ tu te, Tɛsi bin bigin fɔ go di mitin dɛn, ɛn i bin stat fɔ liv in layf lɛk Kristian pan ɔl we in padi dɛn bin de provok am. As tɛm de go, Tɛsi bin baptayz ɛn i bi rɛgyula payɔnia pan ɔl we i bin gɛt smɔl smɔl pikin dɛn. Dis dɔn sho klia wan se we wi Baybul stɔdi dɛn bigin chenj ɛn liv dɛn layf di we aw Gɔd want, dat kin mek Gɔd kam nia dɛn ɛn i kin shep dɛn lɛk sɔntin we dɛn mek wit kle we fayn ɛn dia.
17. (a) Aw yu fil we Jiova de shep yu? (b) Us ɔda we dɛn we Jiova de shep wi we wi go tɔk bɔt?
17 Insay wi yon tɛm, sɔm pipul dɛn we de wok wit kle kin stil tek tɛm mol di kle wit dɛn an fɔ mek fayn fayn tin dɛn. Semweso, Jiova de tek tɛm fɔ shep wi wit di advays dɛn we i kin gi wi, ɛn i de tek tɛm wach wi fɔ si wetin wi go du. (Rid Sam 32:8.) Yu de si aw Jiova bisin bɔt yu? Yu de si aw Jiova de tek tɛm fɔ shep yu? If na so i bi, us kwaliti dɛn yu tink se go ɛp yu fɔ tan lɛk kle we izi fɔ lɛ Jiova shep? Us bad abit dɛn yu fɔ avɔyd so dat yu nɔ go tan lɛk kle we at fɔ shep? Ɛn aw mama ɛn papa dɛn go wok wit Jiova fɔ shep dɛn pikin dɛn? Di nɛks atikul go ansa dɛn kwɛstyɔn dɛn ya.