Sho se Yu Gladi fɔ Jiova in Gift dɛn we Wi Nɔ De Si

 1. Wetin Jizɔs bin tɔk bɔt di gift dɛn we de na ɛvin?

NƆTO ɔl gift dɛn wi de si. Infakt, di gift dɛn we valyu pas ɔl na tin dɛn we wi nɔ de si. We Jizɔs bin de tɔk to sɔm pipul dɛn ɔp wan mawntin, i bin tɔk bɔt gift dɛn we de na ɛvin we gɛt valyu pas ɔl di jɛntri dɛn we de na di wɔl. Dɔn i tɔk bak se: “Una at go de di say we una kip una jɛntri.” (Mat. 6:​19-21) We wi si se sɔntin rili gɛt valyu, wi de du ɔl wetin wi ebul fɔ gɛt am. Wi de kip wi “jɛntri na ɛvin” bay we wi gɛt gudnem ɔ gɛt tayt padi biznɛs wit Gɔd. Jizɔs bin se dɛn gift dɛn de na tin dɛn we pɔsin nɔ go ɛva ebul fɔ pwɛl ɔ tif.

 2. (a) Akɔdin to Sɛkɛn Lɛta Fɔ Kɔrint 4:​17, 18, wetin Pɔl bin ɛnkɔrej wi fɔ pe atɛnshɔn pan? (b) Wetin wi go tɔk bɔt na dis atikul?

² Di apɔsul Pɔl bin ɛnkɔrej wi fɔ “put [wi] at pan dɛn tin we wi nɔ de si.” (Rid Sɛkɛn Lɛta Fɔ Kɔrint 4:​17, 18.) Di tin dɛn we wi nɔ de si na gift dɛn we gɛt blɛsin dɛn we wi go ɛnjɔy insay di nyu wɔl. Insay dis atikul, wi go lan bɔt 4 gift dɛn we wi nɔ de si we go bɛnifit wi rayt naw. Dɛn gift dɛn ya na; padi biznɛs wit Gɔd, prea, Gɔd in oli spirit, ɛn di sɔpɔt we Jiova, Jizɔs, ɛn di enjɛl dɛn de sɔpɔt wi we wi de prich. Wi go tɔk bak bɔt aw wi kin sho se wi gladi fɔ dɛn gift dɛn ya we wi nɔ de si.

 3. Wetin na di gift we pas ɔl we wi nɔ de si? Aw dat pɔsibul?

³ Di gift we pas ɔl we wi nɔ de si na wi padi biznɛs wit Jiova Gɔd. (Prɔv. 3:​32) Aw i pɔsibul fɔ mek Gɔd we oli bi padi wit mɔtalman we nɔ pafɛkt? Gɔd ebul fɔ du dat bikɔs di day we Jizɔs day fɔ wi, dɔn mek i “padin mɔtalman sin.” (Jɔn 1:​29) Ivin bifo Jizɔs day, Jiova bin no se Jizɔs go fetful te i day so dat i go Sev mɔtalman. Na dat mek Gɔd bin ebul fɔ bi padi wit pipul dɛn we bin dɔn de bifo Krays day.—Rom 3:​25.

 4. Gi sɔm ɛgzampul dɛn bɔt sɔm man dɛn we bin de trade trade we na bin Gɔd in padi dɛn.

⁴ Lɛ wi tɔk bɔt sɔm man dɛn we bin de trade trade we na bin Gɔd in padi dɛn. Ebraam na bin man we bin rili gɛt strɔng fet. Afta lɛk 1,000 ia we Ebraam bin dɔn day, Jiova bin kɔl am “mi padi.” (Ayz. 41:​8) Dis min se ivin we pipul dɛn day, Jiova stil de si dɛn as in tayt padi dɛn. Jiova stil de mɛmba Ebraam. (Lyuk 20:​37, 38, NWT) Wan ɔda ɛgzampul na Job. Jiova bin prez Job bifo bɔku bɔku enjɛl dɛn we bin gɛda. I bin se Job na “gud man ɛn i de waka tret wit am. I [de] fred ɛn rɛspɛkt in PAPA GƆD ɛn nɔ miks pan bad.” (Job 1:​6-8) Aw Jiova bin fil bɔt Daniɛl we bin dɔn sav Gɔd fetful wan fɔ lɛk 80 ia na say we pipul dɛn nɔ de wɔship Jiova? Pan ɔl we Daniɛl bin dɔn ol, enjɛl dɛn bin mek i no tri tɛm se in na pɔsin we Gɔd “lɛk.” (Dan. 9:​23; 10:​11, 19) Wi shɔ se Jiova rili want fɔ gi layf bak to in padi dɛn we i lɛk we dɔn day.—Job 14:​15.

 5. Wetin wi fɔ du fɔ ɛnjɔy tayt padi biznɛs wit Jiova?

⁵ Tide, bɔku bɔku pipul dɛn we nɔ pafɛkt de ɛnjɔy tayt padi biznɛs wit Jiova. Wi no dis bikɔs bɔku man dɛn, uman dɛn, ɛn pikin dɛn ɔlsay na di wɔl de du tin dɛn we de sho se dɛn na Gɔd in padi dɛn. Jiova “lɛk pɔsin we de waka tret . . . ɛn de mek am padi.” (Prɔv. 3:​32) Bikɔs ɔf di fet we dɛn gɛt pan di day we Jizɔs day, dis dɔn mek am pɔsibul fɔ mek dɛn gɛt padi biznɛs wit Jiova. Na dat mek Jiova de alaw wi fɔ gi wi layf to am. We wi du dɛn impɔtant tin dɛn ya, wi de jɔyn bɔku bɔku pipul dɛn we dɔn gi dɛn layf ɛn baptayz as Kristian dɛn, ɛn we de ɛnjɔy fɔ bi tayt “padi” wit di Pɔsin we pas ɔlman na di wan ol wɔl!

 6. Aw wi kin sho se wi gladi fɔ bi Gɔd in padi?

⁶ Aw wi kin sho se wi valyu wi padi biznɛs wit Gɔd? I pas ɔndrɛd ia we Ebraam ɛn Job bin kɔntinyu fɔ fetful to Gɔd, wisɛf fɔ falamakata dɛn ɛn kɔntinyu fɔ fetful ilɛk ɔmɔs ia wi dɔn de sav Jiova na dis wɔl. Jɔs lɛk Daniɛl, wi fɔ valyu wi padi biznɛs wit Gɔd pas wi layf. (Dan. 6:​7, 10, 16, 22) Jiova go ɛp wi fɔ bia ɛni prɔblɛm we de mit wi so dat wi go kɔntinyu fɔ bi in padi dɛn ɔltɛm.—Fil. 4:​13, NWT.

 7. (a) Akɔdin to Prɔvabs 15:​8, aw Jiova de fil we wi de pre to am? (b) Aw Jiova de ansa wi prea dɛn?

⁷ Wan ɔda gift we wi nɔ de si na prea. Tayt padi dɛn kin lɛk fɔ tɔk to dɛnsɛf bɔt wetin dɛn de tink ɛn aw dɛn de fil. Na di sem tin wit wi padi biznɛs wit Jiova. Jiova de yuz in Wɔd fɔ tɔk to wi, ɛn insay de i de sho wi wetin i de tink ɛn aw i de fil. Wi de tɔk to Jiova bay we wi de pre to am, dɔn wi kin tɛl am wi bɛlɛ-wɔd ɛn aw wi de fil. Jiova kin gladi fɔ lisin to wi prea dɛn. (Rid Prɔvabs 15:​8.) Jiova lɛk wi as in padi dɛn, so i nɔ jɔs de lisin to wi prea dɛn bɔt i de ansa dɛn. Sɔntɛnde, i kin ansa wi kwik wan. Sɔm ɔda tɛm dɛn wi kin nid fɔ kɔntinyu fɔ pre fɔ sɔntin. Bɔt stil, wi fɔ biliv se di ansa go kam di rayt tɛm ɛn di bɛst we. Fɔ tru, sɔntɛnde di we aw Gɔd de ansa wi prea go difrɛn frɔm wetin wi ɛkspɛkt. Fɔ ɛgzampul, Jiova nɔ kin pul di prɔblɛm bifo dat i kin gi wi di sɛns ɛn trɛnk “fɔ bia am.”—1 Kɔr. 10:​13, NWT

 8. Aw wi kin sho se wi gladi fɔ di gift we wi gɛt fɔ pre?

⁸ Aw wi go sho se wi gladi fɔ dis fayn gift we na prea? Wan we na bay we wi de fala Jiova in advays fɔ de “pre ɔltɛm.” (1 Tɛs. 5:​17) Jiova nɔ de fos wi fɔ pre. Bifo dat, i rɛspɛkt di fridɔm we wi gɛt ɛn i de ɛnkɔrej wi “fɔ de pre ɔltɛm.” (Rom 12:​12) So wi kin sho se wi gladi bay we wi de pre fast fast ɛvride. Wi nɔ fɔ fɔgɛt fɔ tɛl Jiova tɛnki ɛn fɔ prez am we wi de pre.—Sam 145:​2, 3.

 9. Aw wan brɔda de fil bɔt prea? Aw yu de fil bɔt prea?

⁹ Di mɔ we wi dɔn te fɔ sav Jiova ɛn si aw i de ansa wi prea dɛn, na di mɔ wi fɔ de gladi fɔ pre to am. Fɔ ɛgzampul, Kris na wan brɔda we dɔn de na ful taym savis fɔ lɛk 47 ia. I bin se: “A kin rili gladi fɔ wek ali mɔnin fɔ pre to Jiova. I kin rili fayn fɔ tɔk to Jiova we di san de kɔmɔt na mɔnin ɛn ɔltin kin fayn fɔ luk. Dis kin mek a tɛl am tɛnki fɔ ɔl in gift dɛn ɛn ivin di chans we wi gɛt fɔ pre. Dɔn afta we a dɔn pre na nɛt, a kin slip fayn bikɔs a gɛt klin kɔnshɛns.”

10. Wetin mek wi fɔ valyu Gɔd in oli spirit?

¹⁰ Gɔd in oli spirit na ɔda gift we wi nɔ de si we wi fɔ valyu. Jizɔs bin ɛnkɔrej wi fɔ kɔntinyu fɔ pre fɔ di oli spirit. (Lyuk 11:​9, 13) Jiova de yuz in spirit fɔ gi wi “di pawa we pas” wetin wi ebul fɔ du fɔ wisɛf. (2 Kɔr. 4:​7, NWT; Akt 1:​8) Gɔd in spirit de ɛp wi fɔ bia ɛni prɔblɛm we wi go gɛt.

11. Aw di oli spirit de ɛp wi?

¹¹ Di oli spirit go ɛp wi fɔ du wi wok dɛn we wi fɔ du fɔ Gɔd. Gɔd in spirit go ɛp wi fɔ du mɔ pan di tin dɛn we wi sabi ɛn ebul fɔ du. Ɔl di gud tin dɛn we de apin we wi de wok fɔ Gɔd wi nɔ go ebul du am bay wisɛf if Gɔd in spirit nɔ ɛp wi.

12. Akɔdin to Sam 139:​23, 24, wetin wi fɔ pre mek Jiova in spirit ɛp wi fɔ du?

¹² Wan ɔda we fɔ sho se wi valyu Gɔd in oli spirit, na bay we wi de pre fɔ mek i ɛp wi fɔ no if wi gɛt ɛni bad tin we wi de tink bɔt ɔ tin dɛn we wi want we de na wi at. (Rid Sam 139:​23, 24.) If wi pre to Jiova bɔt dat, i go yuz in spirit fɔ ɛp wi fɔ no bɔt di bad tin dɛn we wi de tink bɔt ɔ we wi go want fɔ du. Ɛn we wi notis se di tin dɛn we wi de tink bɔt ɔ di tin dɛn we wi want na bad tin dɛn, wi fɔ pre fɔ lɛ Gɔd in spirit gi wi di trɛnk fɔ lɛf fɔ tink ɔ du dɛn bad tin dɛn de. We wi du dat, wi go sho se wi dɔn mekɔp wi maynd fɔ avɔyd fɔ du ɛnitin we go mek Jiova stɔp fɔ yuz in spirit fɔ ɛp wi.—Ɛfi. 4:​30.

13. Aw wi kin sho se wi rili gladi fɔ di oli spirit?

¹³ Wi kin sho se wi rili gladi fɔ di oli spirit bay we wi de tink bɔt wetin i de du insay wi yon tɛm. Bifo Jizɔs bin go na ɛvin, i bin tɛl in disaypul dɛn se: “Wɛn Gɔd in spirit kam pan una, i go gi una pawa fɔ mek una tɔk bɔt mi . . . ɔlɔbɔt na [di] wɔl.” (Akt 1:​8) Na dat de apin tide. Di oli spirit dɔn ɛp fɔ mek 8.5 milyɔn pipul dɛn de wɔship Jiova ɔlsay na di wɔl bikɔs Gɔd in spirit de ɛp wi fɔ gɛt fayn kwaliti dɛn lɛk; lɔv, gladi-at, pis, peshɛnt, i de mek wi du gud, gɛt gudat, mek wi gɛt fet, tek tɛm du tin, ɛn ebul kɔntrol wisɛf. (Gal. 5:​22, 23, NWT) Di oli spirit na fayn gift fɔ tru!

14. We wi de prich, udat dɛn de sɔpɔt wi we nɔ de si?

¹⁴ Wan ɔda fayn gift we wi nɔ de si na fɔ “wok wit” Jiova, Jizɔs, ɛn di enjɛl dɛn. (2 Kɔr. 6:​1) Wi de wok wit dɛn ɛnitɛm we wi de prich. We Pɔl bin de tɔk bɔt insɛf ɛn di wan dɛn we de ɛp fɔ du dis wok, i bin se: “Wi na Gɔd in kɔmpin wokman dɛn.” (1 Kɔr. 3:​9, NWT) We wi de du di prichin wok, wisɛf na Jizɔs in kɔmpin wokman dɛn. Afta Jizɔs bin gi in disaypul dɛn di wok fɔ mek “pipul dɛn bi [in] lanin bɔy dɛn,” i bin tɛl dɛn se: “A de wit una.” (Mat. 28:​19, 20) Wetin wi go se bɔt di enjɛl dɛn? Wi rili gladi we di enjɛl dɛn de dayrɛkt wi fɔ tɛl “pipul di Gud Nyuz we go de sote go.”—Rɛv. 14:​6.

15. Gi wan ɛgzampul frɔm di Baybul fɔ sho aw Jiova de ɛp wi pan di prichin wok.

¹⁵ Wetin di sɔpɔt we wi de gɛt frɔm ɛvin de ɛp wi fɔ du? As wi de prich di mɛsej bɔt di Kiŋdɔm, sɔm pipul dɛn kin lisin ɛn go bifo pan Gɔd biznɛs. (Mat. 13:​18, 23) Udat de mek di trut gro na pipul dɛn at? Jizɔs bin ɛksplen se nɔbɔdi nɔ go bi in disaypul pas in “Papa . . . briŋ di pɔsin kam.” (Jɔn 6:​44) Di Baybul gi wan ɛgzampul bɔt dis. Wan tɛm Pɔl bin de tɔk to sɔm uman dɛn nia wan siti we dɛn kɔl Filipay. Notis wetin di Baybul bin tɔk bɔt wan pan di uman dɛn we nem Lidia. I se: “Jiova ɛp am fɔ pe atɛnshɔn to di tin dɛn we Pɔl bin de tɔk.” (Akt 16:​13-15, NWT) Jɔs lɛk Lidia, Jiova dɔn bring bɔku bɔku pipul dɛn fɔ kam to am.

16. Udat wi fɔ gi di prez fɔ ɛni gud tin we apin we wi de du di prichin wok?

¹⁶ Udat rili fɔ gɛt di ɔnɔ fɔ di gud tin dɛn we de apin we wi de du di prichin wok? Pɔl bin ansa da kwɛstyɔn de we i bin rayt dɛn wɔd dɛn ya to di kɔngrigeshɔn we bin de na Kɔrint. I bin se: “Na mi plant di sid na una at; na Apɔlɔs wata am; bɔt na Gɔd mek i gro. Di wan we de plant sid ɛn di wan we de wata am nɔ mata; na Gɔd we de mek i gro, impɔtant pas ɔl.” (1 Kɔr. 3:​6, 7) Lɛk Pɔl, wi fɔ gi di prez to Jiova ɔltɛm fɔ ɛni gud tin we apin we wi de du di prichin wok.

17. Aw wi kin sho se wi rili gladi fɔ “wok wit” Gɔd, Krays, ɛn di enjɛl dɛn?

¹⁷ Aw wi kin sho se wi gladi fɔ di ɔnɔ we wi gɛt fɔ “wok wit” Gɔd, Krays, ɛn di enjɛl dɛn? Wi kin du dat bay we wi de du ɔl wetin wi ebul fɔ tɛl ɔda pipul dɛn di gud nyuz. Bɔku we dɛn de fɔ du dis, lɛk fɔ prich “na pɔblik ɛn frɔm os to os.” (Akt 20:​20, NWT) Bɔku pipul dɛn de ɛnjɔy bak fɔ prich ɔda say dɛn apat frɔm os to os. We dɛn kin mit pɔsin we dɛn nɔ wande sabi, dɛn kin grit am fayn ɛn bigin fɔ tɔk to am. If di pɔsin gri fɔ tɔk to dɛn, dɛn kin tek tɛm tɔk bɔt di gud nyuz bɔt Gɔd in Kiŋdɔm.

18-19. (a) Aw wi go ɛp pipul dɛn fɔ lan di tru? (b) Gi wan ɛgzampul we de sho aw Jiova bin ɛp wan Baybul studɛnt.

¹⁸ As “Gɔd in kɔmpin wokman dɛn,” wi nɔ fɔ jɔs plant di sid dɛn bɔt wi fɔ wata dɛn bak. We pɔsin sho se i rili want fɔ no mɔ, wi fɔ du ɔl wetin wi ebul fɔ go bak to di pɔsin ɔ wi kin arenj fɔ mek ɔda pɔsin go fɛn am fɔ mek dɛn go stat Baybul stɔdi. As di stɔdi de go bifo, wi de gladi we wi de si aw Jiova de ɛp di Baybul studɛnt fɔ chenj di we aw i de tink ɛn di we aw i de fil.

¹⁹ Lɛ wi tɔk bɔt Rafalalani we na bin mɛrɛsinman na Sawt Afrika. I bin rili lɛk wetin i bin de lan frɔm in Baybul stɔdi. Bɔt i nɔ bin izi fɔ am fɔ gri wit wetin di Baybul tɔk fɔ se i nɔ fayn fɔ tɔk to di wan dɛn we dɔn day. (Dit. 18:​10-12) Smɔl smɔl, i bin alaw Gɔd fɔ shep di we aw i de tink. So i bin lɛf di mɛrɛsinman wok, pan ɔl we dis min se i go lɔs in wok. Rafalalani, we dɔn ol 60 ia naw, bin se: “A tɛl Jiova Witnɛs dɛn tɛnki fɔ we dɛn ɛp mi difrɛn we dɛn, lɛk we dɛn ɛp mi fɔ fɛn wok. Wetin impɔtant pas ɔl na dat, a tɛl Jiova tɛnki fɔ we i ɛp mi fɔ chɛnj mi layf. Naw, a dɔn baptayz as Jiova Witnɛs ɛn a de du di prichin wok.”

20. Wetin yu dɔn mekɔp yu maynd fɔ du?

²⁰ Insay dis atikul, wi dɔn tɔk 4 gift dɛn we wi nɔ de si. Di wan we pas ɔl na di ɔnɔ we wi gɛt fɔ gɛt tayt padi biznɛs wit Jiova. Dat de ɛp wi fɔ bɛnifit frɔm di gift dɛn we wi nɔ de si; bay we wi de pre to am, di ɛp we in oli spirit de ɛp wi, ɛn bay we wi de wok wit Jiova, Jizɔs, ɛn di enjɛl dɛn. Lɛ wi mekɔp wi maynd fɔ kɔntinyu fɔ sho se wi gladi fɔ dɛn gift dɛn ya we wi nɔ de si. Ɛn mek wi nɔ ɛva lɛf fɔ tɛl Jiova tɛnki fɔ we i bi wi bɛst Padi.