Wetin di Baybul Se bɔt fɔ Tek Kia ɔf Mama ɛn Papa dɛn We Dɔn Ol?

Pikin dɛn we dɔn big gɛt impɔtant wok fɔ kia fɔ dɛn mama ɛn papa we dɔn ol. Di Baybul se pikin dɛn we dɔn big “fɔ du wetin ɔl pikin . . . fɔ du fɔ dɛn mami ɛn dadi ɛn fɔ . . . gi dɛn ɔl wetin dɛn fɔ gɛt, bikɔs if dɛn du dat, Gɔd go satisfay wit dɛn.” (1 Timoti 5:​4, Krio Fɔs Oli Baybul) We pikin dɛn we dɔn big de kia fɔ dɛn mama ɛn papa we dɔn ol, dɛn de ɔnɔ dɛn mama ɛn papa jɔs lɛk aw di Baybul se dɛn fɔ du.—Ɛfishians 6:​2, 3.

Di Baybul nɔ tɔk bɔt patikyula tin dɛn we pikin dɛn fɔ du we dɛn de kia fɔ dɛn mama ɛn papa we dɔn ol. Bɔt i tɔk bɔt man ɛn uman dɛn we gɛt fet we bin dɔn du dat. I gi fayn advays bak to di wan dɛn we de fɔ kia fɔ dɛn mama ɛn papa we dɔn ol.

• Aw sɔm pipul dɛn bin kia fɔ dɛn mama ɛn papa we dɔn ol insay di tɛm we dɛn bin de rayt di Baybul?

• Us fayn advays di Baybul gi fɔ ɛp di wan dɛn we de kia fɔ dɛn mama ɛn papa we dɔn ol?

• Fɔ se di Baybul tɔk se mama ɛn papa we dɔn ol fɔ go na dɛn pikin dɛn os ɔ dɛn pikin dɛn fɔ kam de na dɛn os fɔ kia fɔ dɛn?

Dɛn bin de du dat difrɛn we dɛn akɔdin to aw tin bin de.

• Josɛf bin de liv fa frɔm in papa, Jekɔp, we bin dɔn ol. We Josɛf bin ebul fɔ kia fɔ Jekɔp, i bin arenj fɔ mek i kam de nia am. Josɛf bin gi in papa say fɔ de, i bin de fid am, ɛn protɛkt am.—Jɛnɛsis 45:​9-11; 47:​11, 12.

• Rut bin muf go na in mɔdɛnlɔ in kɔntri, ɛn i bin de wok tranga wan fɔ kia fɔ am.—Ruth 1:​16; 2:​2, 17, 18, 23.

• Jizɔs bin pik pɔsin fɔ kia fɔ in mama, Meri, jɔs bifo i day. I go bi se in mama in man bin dɔn day.—Jɔn 19:​26, 27.a

I nɔ kin izi fɔ di wan dɛn we de kia fɔ dɛn mama ɛn papa we dɔn ol. Sɔntɛnde, dɛn kin taya ɛn i kin afɛkt di we aw dɛn de fil, bɔt di Baybul gɛt prinsipul dɛn we go ɛp dɛn.

• Ɔnɔ yu mama ɛn papa.

  Wetin di Baybul se? “Una fɔ rɛspɛkt una papa ɛn una mama.”—Ɛksodɔs 20:​12.

  Aw fɔ du wetin dis prinsipul se? Sho se yu rɛspɛkt yu mama ɛn papa bay we yu de alaw dɛn fɔ du bɔku tin fɔ dɛnsɛf akɔdin to aw dɛn ebul. If i pɔsibul, lɛ dɛn disayd fɔ dɛnsɛf aw dɛn want mek dɛn kia fɔ dɛn. Dɔn sho dɛn rɛspɛkt bay we yu du wetin yu ebul fɔ ɛp dɛn.

• Tray fɔ go de ɔndastand ɛn go de fɔgiv.

  Wetin di Baybul se? “Udat gɛt sɛns nɔ de vɛks kwik, ɛn wɛn yu nɔ tek natin mek natin, yu gɛt gud rɛspɛkt.”—Prɔvabs 19:​11.

  Aw fɔ du wetin dis prinsipul se? If yu mama ɔ papa we dɔn ol tɔk sɔntin we nɔ fayn ɔ we sho se i nɔ gladi fɔ wetin yu de du fɔ kia fɔ am, aks yusɛf dis kwɛstyɔn, ‘Aw a go fil if a nɔ ebul du ɔltin fɔ misɛf ɛn a de fil lɛk aw i de fil?’ We yu tray fɔ ɔndastand ɛn fɔgiv, yu go mek tin nɔ wɔs pas aw i de.

• Tɔk to ɔda pipul dɛn.

  Wetin di Baybul se? “If yu nɔ gɛt bɔku advays yu plan go fel yu, bɔt if yu gɛt bɔku advays, bɛtɛ go fala yu.”—Prɔvabs 15:​22.

  Aw fɔ du wetin dis prinsipul se? Tray fɔ no aw fɔ dil wit di wɛlbɔdi prɔblɛm we yu mama ɛn papa gɛt. Faynd awt wetin-ɛn-wetin de na di eria usay una de we go ɛp yu fɔ kia fɔ dɛn. Tɔk to ɔda pipul dɛn we bin dɔn kia fɔ dɛn mama ɛn papa we dɔn ol. If yu gɛt brɔda ɛn sista dɛn, tink bɔt aw una go gɛt famili mitin fɔ tɔk bɔt wetin una mama ɛn papa nid, aw una go kia fɔ dɛn, ɛn aw una go sheb di wok.

  

• Put yusɛf dɔŋ.

  Wetin di Baybul se? Udat “put insɛf dɔŋ gɛt sɛns.”—Prɔvabs 11:​2.

  Aw fɔ du wetin dis prinsipul se? No se nɔto ɔltin yu ebul fɔ du. Fɔ ɛgzampul, nɔto ɔltɛm pɔsin go gɛt tɛm ɛn trɛnk fɔ du sɔntin. Dis kin mek yu nɔ ebul fɔ du ɔltin we yu want fɔ du fɔ yu mama ɛn papa. If yu si se i nɔ rili izi fɔ yu fɔ kia fɔ yu mama ɛn papa we dɔn ol, i go fayn fɔ mek yu aks ɔda pipul dɛn na di famili ɔ pɔsin we sabi kia fɔ ol pipul dɛn fɔ ɛp yu.

• Kia fɔ yusɛf.

  Wetin di Baybul se? “No man nɔ ɛva et in yon bɔdi, bɔt i de fid am ɛn ol am fayn.”—Ɛfishians 5:​29.

  Aw fɔ du wetin dis prinsipul se? Pan ɔl we yu gɛt di wok fɔ kia fɔ yu mama ɛn papa, yu fɔ kia fɔ yusɛf bak ɛn di wan dɛn we de na yu famili if yu na pɔsin we mared. Yu nid fɔ it gud. Yu nid fɔ de rɛst ɛn slip fayn. (Ɛkliziastis 4:​6) Ɛn we i pɔsibul, yu nid fɔ blo. We yu du dɛn tin dɛn ya, yu go ebul kia fɔ yu mama ɛn papa fayn wan.

Di Baybul nɔ tɔk bɔt aw pikin dɛn we dɔn big fɔ kia fɔ dɛn mama ɛn papa na os. Na sɔm famili dɛn, if i pɔsibul, na di pikin dɛn sɛf kin kia fɔ dɛn mama ɛn papa we dɔn ol. Bɔt sɔntɛnde, dipɛnd ɔn wetin de apin, dɛn kin tink se i bɛtɛ fɔ tek pɔsin we go kia fɔ dɛn mama ɛn papa we dɔn ol. Di famili kin kam togɛda fɔ disayd wetin go fayn fɔ ɔlman.—Galeshians 6:​4, 5.