Yu Go Ebul fɔ Sɔlv Prɔblɛm dɛn we Kin Ambɔg Famili

 1. Us prɔblɛm dɛn kin de na sɔm famili dɛn we nɔ izi fɔ no?

DƐN jɔs dɔn fɔ was wan ol motoka fayn ɛn rɔb sɔntin pan am fɔ mek i shayn. To pɔsin we de pas, i kin tan lɛk nyu wan. Bɔt di motoka in bɔdi kin dɔn rɔsti. Na so sɔm famili dɛn tan. Pan ɔl we i kin tan lɛk se ɔltin fayn ɛn ɔlman gladi, siriɔs prɔblɛm kin de na di famili. We na dɛn nɔmɔ de, bad bad tin dɛn kin apin we kin mek di famili nɔ gɛt pis. Sɔm pan di tin dɛn we kin mek prɔblɛm dɛn de na di famili na, fɔ drink ɛn chak ɛn fɔ de fɛt-fɛt, ɛn fɔ de du ɔda bad tin to pipul dɛn.

 2. (a) Wetin di Baybul tɔk bɔt fɔ drink rɔm? (b) Apat frɔm fɔ we pɔsin de drink te i chak, wetin igen rili bad?

² Di Baybul nɔ se i bad fɔ drink smɔl rɔm, bɔt i se i bad fɔ drink te yu chak. (Prɔvabs 23:​20, 21; Fɔs Lɛta Fɔ Kɔrint 6:​9, 10; Fɔs Lɛta To Timoti 5:​23; Taytɔs 2:​2, 3) Nɔto fɔ drink ɛn chak nɔmɔ bad. I rili bad bak fɔ mek am abit fɔ de drink ɔltɛm ɛn nɔ ebul fɔ kɔntrol di aw yu de drink. Bɔku big pipul dɛn gɛt dis abit. Bɔt i sɔri fɔ no se yɔŋ pipul dɛnsɛf gɛt dis kayn abit.

3, 4. Ɛksplen aw pɔsin we de drink ɔltɛm kin ambɔg in man ɔ wɛf, ɛn in pikin dɛn.

³ Fɔ lɔng tɛm di Baybul bin dɔn tɔk se if pɔsin nɔ yuz rɔm di rayt we, dat go mek pis nɔ de na in famili. (Ditarɔnɔmi 21:​18-21) Di bad bad tin dɛn we kin apin we pɔsin de drink rɔm ɔltɛm, kin afɛkt ɔlman na di famili. Di man ɔ wɛf we nɔ de drink kin de spɛn ɔl in tɛm fɔ fɛn we fɔ ɛp di wan we de drink fɔ lɛf fɔ drink ɔ fɔ bia wit di we aw i kin biev. I kin ayd di rɔm, trowe am, ayd in mɔni, tɔk to am bɔt di we aw i lɛk in famili, di we aw i lɛk layf, ɛn ivin di we aw i lɛk Gɔd; bɔt stil i de drink. As i de tray fɔ kɔntrol di aw in man ɔ wɛf de drink bɔt i nɔ ebul fɔ mek i lɛf, dat kin mek i fil bad bɔt insɛf ɛn fil lɛk se i nɔ go ebul ɛp am fɔ lɛf fɔ drink. I go bigin fɔ de fred, fɔ de vɛks, fɔ de fil bad bɔt insɛf, fɔ de wɔri, ɛn nɔ rɛspɛkt insɛf igen.

⁴ We mama ɔ papa de drink rɔm ɔltɛm dat kin afɛkt di pikin dɛn. Sɔm pikin dɛn mama ɔ papa kin bit dɛn bad bad wan. Dɛn kin ivin rep sɔm pikin dɛn. Dɛn kin ivin blem dɛnsɛf fɔ se na dɛn de mek dɛn mama ɔ papa de drink ɔltɛm. Sɔntɛnde, i kin at fɔ mek dɛn biliv ɔda pipul dɛn bikɔs di wan we de drink ɔltɛm na dɛn famili, kin gɛt difrɛn we aw i de biev. Bikɔs i nɔ kin izi fɔ mek di pikin dɛn tɔk bɔt wetin de apin na os, dɛn kin tray nɔ fɔ sho se dɛn de fil bad bɔt wetin de apin ɛn dat kin rili ambɔg dɛn. (Prɔvabs 17:​22) Te di pikin dɛn big, dɛn kin fil se dɛn nɔ ebul fɔ du ɛnitin fayn ɛn dɛn nɔ kin gɛt rɛspɛkt fɔ dɛnsɛf.

 5. Aw yu go ɛp pɔsin we de drink ɔltɛm? Wetin mek dat nɔ kin izi?

⁵ Pan ɔl we bɔku pipul dɛn se mɛrɛsin nɔ de fɔ pipul dɛn we de drink ɔltɛm, bɔku pan dɛn gri se di wan dɛn we de drink ɔltɛm kin ebul sɔlv dis prɔblɛm bay we dɛn nɔ drink atɔl. (Luk Matyu 5:​29.) I izi fɔ tɔk se yu go ebul fɔ ɛp pɔsin we de drink rɔm ɔltɛm bɔt i kin at fɔ du bikɔs di wan we gɛt di prɔblɛm kin dinay ɔltɛm. Bɔt we di ɔda wan dɛn we de na di famili tray fɔ du sɔntin we go sho se dɛn nɔ de ɛnkɔrej di pɔsin we de drink ɔltɛm, dat kin mek i no se i gɛt prɔblɛm. Wan man we no mɔ bɔt aw fɔ ɛp pɔsin we de drink pasmak ɛn in famili, bin tɔk se: “A tink se di bɛst tin we di famili go du, na fɔ kɔntinyu fɔ du tin dɛn we dɛn bin dɔn yus fɔ du ɛn dɛn fɔ du am di kayn we we go bɛnifit dɛn. Dat go mek di wan we de drink si se i difrɛn frɔm ɔlman na di famili.”

 6. Usay na di bɛst say fɔ gɛt advays fɔ famili dɛn we gɛt pɔsin we de drink ɔltɛm?

⁶ If pɔsin de na yu famili we de drink ɔltɛm, di Baybul in advays go ɛp yu fɔ stil gladi. (Ayzaya 48:​17; Sɛkɛn Lɛta To Timoti 3:​16, 17) Lɛ wi tɔk bɔt sɔm advays dɛn we dɔn ɛp sɔm famili dɛn fɔ bia wit pɔsin we de drink ɔltɛm.

 7. If pɔsin de na di famili we de drink ɔltɛm, udat fɔ tek di blem?

⁷ Lɛf fɔ blem yusɛf ɔltɛm. Di Baybul se: “Ɔlman gɛt fɔ ansa to Gɔd fɔ wetin i du.” (Lɛta Fɔ Galeshya 6:​5; Lɛta Fɔ Rom 14:​12) Di pɔsin we de drink ɔltɛm go tray fɔ blem ɔda wan dɛn na di famili. Fɔ ɛgzampul, i go se: “If yu bin de trit mi fayn, a nɔ bin fɔ de drink.” If ɔda pipul dɛn gri wit am, dɛn go de ɛnkɔrej am fɔ kɔntinyu fɔ drink. Ilɛksɛf di tin dɛn we de apin to wi ɔ ɔda pipul dɛn de mek wi sɔfa, wi ɔl ɛn ivin di wan dɛn we de drink ɔltɛm, fɔ tek di blem fɔ wetin wi de du.—Luk Lɛta Fɔ Filipay 2:​12.

 8. Wetin-ɛn-wetin yu go du fɔ mek pɔsin we de drink ɔltɛm sɔfa fɔ wetin i du?

⁸ Nɔ fil se na yu fɔ de ɛp di pɔsin we de drink ɛnitɛm we i gɛt prɔblɛm. Wan parebul na di Baybul we de tɔk bɔt pɔsin we de vɛks kin de bak fɔ pɔsin we de drink ɔltɛm. Di parebul se: “If yu ɛp am, i go du am bak.” (Prɔvabs 19:​19) Alaw di pɔsin we de drink ɔltɛm fɔ sɔfa fɔ wetin i de du ɔ kɔl in bɔsman ɛnitɛm we i drink.

9, 10. Wetin mek famili dɛn we gɛt pɔsin we de drink ɔltɛm fɔ gri fɔ mek dɛn ɛp dɛn? Udat rili dɛn fɔ tɔn to fɔ ɛp?

⁹ Gri mek ɔda pipul dɛn ɛp yu. Prɔvabs 17:​17 se: “Padi dɛn de sho lɔv ɔltɛm,” ɛn i tɔk bak se brɔda dɛn de “ɛp dɛn kɔmpin pan prɔblɛm.” We pɔsin de na di famili we de drink ɔltɛm, dat kin mek prɔblɛm de na di famili. Yu nid pɔsin fɔ ɛp yu. Nɔ fred fɔ abop pan tru tru “padi dɛn” fɔ ɛp yu. (Prɔvabs 18:​24) Tɔk wit ɔda pipul dɛn we ɔndastand di prɔblɛm we yu gɛt ɔ we dɔn gɛt di sem kayn prɔblɛm ɛn we go ebul advays yu bɔt wetin fɔ du ɛn wetin nɔ fɔ du. Bɔt na fɔ tek tɛm. Tɔk to pipul dɛn we yu rili biliv se go kip yu “sikrit.”—Prɔvabs 11:​13.

¹⁰ Abop pan di ɛlda dɛn fɔ ɛp yu. Di ɛlda dɛn na di kɔngrigeshɔn go rili ɛp yu. Dɛn brɔda dɛn ya rili sabi Gɔd in Wɔd ɛn dɛn gɛt ɛkspiriɛns bɔt aw fɔ fala di advays dɛn we de insay de. Dɛn “go bi lɛk ples fɔ ayd wɛn . . . ɛbi briz de blo, lɛk watasay dɛn we de rɔn na dray ples, lɛk di shed we rɔk de mek usay di land dɔn taya.” (Ayzaya 32:​2) Nɔto di kɔngrigeshɔn nɔmɔ di ɛlda dɛn de protɛkt frɔm bad tin dɛn bɔt dɛn de ɛnkɔrej, ɛp, ɛn sho se dɛn bisin bɔt pɔsin we i gɛt prɔblɛm. Gri fɔ mek dɛn ɛp yu.

11, 12. Udat rili go ɛp famili dɛn we gɛt pɔsin we de drink ɔltɛm? Aw i de du dat?

¹¹ Apat frɔm dat, pre to Jiova fɔ mek i ɛp yu. Di Baybul ɛnkɔrej wi se: “PAPA GƆD de nia ɔl udat fil se i dɔn dɔn fɔ am ɛn de ɛp udat fil se bɛtɛ nɔ de fɔ am igen.” (Sam 34:​18) If yu fil se ɔltin dɔn dɔn fɔ yu ɔ bɛtɛ nɔ de fɔ yu igen bikɔs i nɔ izi fɔ liv wit pɔsin we de drink ɔltɛm, mɛmba se “PAPA GƆD de nia.” I ɔndastand ɔl di prɔblɛm dɛn we yu de gɛt na yu famili.—Pita In Fɔs Lɛta 5:​6, 7.

¹² We yu biliv wetin Jiova in Wɔd se, dat go ɛp yu fɔ bia wit tin dɛn we de mek yu wɔri. (Sam 130:​3, 4; Matyu 6:​25-34; Jɔn In Fɔs Lɛta 3:​19, 20) We yu stɔdi Gɔd in Wɔd ɛn fala di advays dɛn we de insay de, dat go mek Gɔd in oli spirit ɛp yu ɛn mek yu gɛt “pawa” we go mek yu bia wit ɛni prɔblɛm we yu go gɛt.—Sɛkɛn Lɛta Fɔ Kɔrint 4:​7.a

13. Us ɔda prɔblɛm kin ambɔg bɔku famili dɛn?

¹³ Fɔ drink ɔltɛm kin briŋ prɔblɛm we kin ambɔg bɔku famili dɛn; lɛk fɔ fɛt-fɛt ɛn du ɔda bad bad tin dɛn.

14. Ustɛm bad bad tin bigin apin na famili? Wetin de apin na famili dɛn tide?

¹⁴ Frɔm di tɛm we Ken kil in brɔda Ebɛl, na in wi dɔn de yɛri bɔt ɔlkayn bad bad tin dɛn we de apin na famili. (Jɛnɛsis 4:​8) Wi dɔn de yɛri bɔt maredman dɛn we de bit dɛn wɛf dɛn bad bad wan, wɛf dɛn we de chalenj dɛn man dɛn, mama ɔ papa dɛn we de bit dɛn pikin dɛn bad bad wan, ɛn pikin dɛn we nɔ de rɛspɛkt ɔ kia fɔ dɛn mama ɛn papa dɛn we dɔn ol.

15. Aw fɛt-fɛt ɔ ɔda bad tin dɛn, kin afɛkt ɔlman na di famili?

¹⁵ Fɛt-fɛt ɛn ɔda bad tin we pipul dɛn kin du na famili, nɔ kin jɔs wund pɔsin in bɔdi bɔt i kin afɛkt di we aw i kin de fil. Wan mared uman we dɛn dɔn bit te dɛn dɔn damej bin tɔk se: “Ɔltɛm yu go de shem ɛn fil bad bɔt yusɛf. Bɔku tɛm na mɔnin yu nɔ go want fɔ grap na bed, yu go jɔs wish se na drim yu bin de drim.” Pikin dɛn we mɛn na famili dɛn we dɛn de fɛt-fɛt ɔ du ɔda bad tin, kin bigin fɔ fɛt we dɛn big ɛn we dɛn gɛt dɛn yon famili.

16, 17. Wetin i min fɔ tɛl ɔda pɔsin bad wɔd? Aw dis kin ambɔg di ɔda wan dɛn na di famili?

¹⁶ Bad bad tin we de apin na famili nɔ jɔs min fɔ fɛt-fɛt. Bɔku tɛm i min fɔ tɛl ɔda pɔsin bad wɔd ɔ tin we go mek i fil bad. Prɔvabs 12:​18 se: “Wɔd we pɔsin nɔ tink bɔt bifo i pul am na mɔt, kin kɔt shap lɛk sɔd.” Wɔd dɛn we kin “kɔt shap lɛk sɔd” na lɛk fɔ kɔl pɔsin bad nem, ala pan am, fɔ de fɛn fɔlt pan pɔsin ɔltɛm, fɔ de kɔs am, ɛn fɔ de trɛtin fɔ bit am. Pɔsin nɔ kin notis di kayn bad tin we kin apin to di wan dɛn we dɛn kin tɛl bad wɔd.

¹⁷ Di tin we bad pas ɔl na di kayn we aw di pikin kin de fil; i kin fil bad, we ɔltɛm dɛn de fɛn fɔlt pan am, fɔ de tɛl am se, i nɔ sabi du natin, i nɔ gɛt sɛns, ɔ in nɔto bɛtɛ pɔsin. Dɛn bad bad wɔd dɛn ya kin mek di pikin nɔ fil gud bɔt insɛf. Na tru se ɔl pikin nid trenin. Bɔt di Baybul tɔk se: “Una dɛn mama ɛn papa, una nɔ mek una pikin dɛn at pwɛl.”—Lɛta Fɔ Kɔlɔse 3:​21

18. Wetin kin mek pɔsin du bad tin? Us advays di Baybul gi we go ɛp pɔsin fɔ stɔp fɔ tink da kayn we de?

¹⁸ If pɔsin want fɔ du bad tin ɛn i kɔntinyu fɔ tink bɔt am, dat kin mek i du bad. (Jems 1:​14, 15) Pɔsin we de du bad go lɛf bay we i chenj di we aw i de tink. (Lɛta Fɔ Rom 12:​2) Yu tink se i pɔsibul? Yɛs i pɔsibul. Gɔd in Wɔd gɛt pawa fɔ chenj pipul dɛn. I ebul fɔ chenj “dɛn agyu we pipul de agyu bɔt Gɔd.” (Sɛkɛn Lɛta Fɔ Kɔrint 10:​4; Di Ibru Pipul Dɛn 4:​12) We pipul dɛn sabi di Baybul gud gud wan, dat kin ɛp dɛn fɔ chenj ɛn gɛt nyu abit dɛn we Gɔd lɛk.—Lɛta Fɔ Ɛfisɔs 4:​22-24; Lɛta Fɔ Kɔlɔse 3:​8-10.

19. Aw Kristian fɔ trit in man ɔ wɛf?

¹⁹ Aw yu fɔ trit yu man ɔ wɛf? Gɔd in Wɔd se: “Man fɔ lɛk in wɛf lɛkɛ aw i lɛk in yon bɔdi. Di man we lɛk in wɛf, lɛk insɛf.” (Lɛta Fɔ Ɛfisɔs 5:​28) Di Baybul tɔk bak se maredman fɔ no se in “wɛf nɔ gɛt trɛnk lɛkɛ man.” (Pita In Fɔs Lɛta 3:​7) Di Baybul se wɛf “dɛn fɔ lɛk dɛn man” ɛn dɛn “fɔ rɛspɛkt” dɛn man dɛn. (Taytɔs 2:​4; Lɛta Fɔ Ɛfisɔs 5:​33) No maredman nɔ de we go se i de fred Gɔd ɛn i lɛk in wɛf, if i de bit am ɔ tɛl am wɔd we go mek i fil bad bɔt insɛf. Ɛn no wɛf nɔ de we go se i lɛk ɛn rɛspɛkt in man, if i de ala pan am, tɛl am bad wɔd, ɔ de tɔk pan am ɔltɛm.

20. Udat mama ɛn papa dɛn gɛt fɔ ansa to fɔ dɛn pikin dɛn? Wetin mek mama ɛn papa dɛn nɔ fɔ fos dɛn pikin dɛn fɔ du tin we dɛn nɔ ebul?

²⁰ Trit yu pikin di rayt we. Pikin dɛn nid lɔv ɛn atɛnshɔn frɔm dɛn mama ɔ papa. Gɔd in Wɔd se pikin dɛn na “blɛsin we PAPA GƆD de gi.” (Sam 127:​3) Na mama ɛn papa dɛn gɛt di wok fɔ kia fɔ dis blɛsin. Di Baybul tɔk bɔt “pikin biznɛs,” dɔn i tɔk bak se, pikin dɛn gɛt “wan kaynaba abit fɔ de mek traŋayes.” (Fɔs Lɛta Fɔ Kɔrint 13:​11; Prɔvabs 22:​15) Mama ɛn papa dɛn nɔ fɔ sɔprayz if dɛn pikin dɛn de mek trangayes. Pikin dɛn nɔ tan lɛk big pɔsin. Mama ɛn papa dɛn fɔ wach ɔmɔs ia di pikin ol, di we aw di famili de, ɛn di tin dɛn we di pikin ebul fɔ du bifo dɛn disayd us wok dɛn go gi di pikin.—Luk Jɛnɛsis 33:​12-14.

21. Aw di Baybul se wi fɔ trit mama ɛn papa dɛn we dɔn ol?

²¹ Aw fɔ trit mama ɛn papa dɛn we dɔn ol. Lɛvitikɔs 19:​32 se: “Rɛspɛkt ol pipul” dɛn. Gɔd in Lɔ de ɛnkɔrej wi fɔ rɛspɛkt ɛn kia fɔ ol pipul dɛn. Dis nɔ kin izi fɔ du, if mama ɔ papa we dɔn ol gɛt-na-an ɔ i sik ɛn nɔ ebul fɔ waka ɔ slo fɔ tink. Stil pikin dɛn fɔ mɛmba se na “pikin ɔ grampikin fɔ du wetin ɔl pikin ɛn grampikin fɔ du fɔ dɛn mami ɛn dadi ɛn fɔ dɛn grani ɛn grandadi dɛn fɔ gi dɛn ɔl wetin dɛn fɔ gɛt.” (Fɔs Lɛta To Timoti 5:​4) Dis min se dɛn fɔ rɛspɛkt ɛn trit dɛn fayn, dɛn kin ivin ɛp dɛn wit mɔni biznɛs. We wi trit mama ɛn papa dɛn we dɔn ol bad, dat de sho se wi nɔ de du wetin di Baybul se.

22. Us kwaliti yu fɔ gɛt we go ɛp yu nɔ fɔ fɛt-fɛt ɔ du ɔda bad tin dɛn? Aw yu go ebul gɛt da kwaliti de?

²² Tray fɔ kɔntrol yusɛf. Prɔvabs 29:​11 se: “Fulman kwik fɔ sho in tɛmpa gbangbaode, bɔt udat gɛt sɛns de peshɛnt ɛn kɔntrol insɛf.” Aw yu go ebul fɔ kɔntrol yusɛf? Bifo yu alaw bad tin fɔ kɔntinyu fɔ de na yu maynd, tray kwik kwik wan fɔ sɔlv prɔblɛm dɛn we una go gɛt. (Lɛta Fɔ Ɛfisɔs 4:​26, 27) If sɔntin apin we go mek yu nɔ ebul fɔ kɔntrol yusɛf, na fɔ kɔmɔt de. Pre fɔ mek Gɔd ɛp yu fɔ ebul kɔntrol yusɛf. (Lɛta Fɔ Galeshya 5:​22, 23) Fɔ go waka smɔl ɔ fɔ du ɔda tin dɛn go ɛp yu fɔ kɔntrol di we aw yu de fil we sɔntin apin. (Prɔvabs 17:​14, 27) Tray tranga wan nɔ fɔ gɛt “shɔtat.”—Prɔvabs 14:​29.

23. Wetin kin apin if pɔsin de vɛks pasmak, ɔ ivin bit in wɛf ɔ in man ɔ in pikin dɛn?

²³ Di Baybul sho tin dɛn we Gɔd nɔ lɛk, tin dɛn lɛk we “mɔtalman nɔ lɛk dɛn kɔmpin, ɛn dɛn de fɛt dɛn kɔmpin; . . . dɛn de vɛks pan dɛn kɔmpin” ɛn i tɔk bak se “dɛn pipul we de pan dis kayn layf nɔ go de ɔnda Gɔd in rul.” (Lɛta Fɔ Galeshya 5:​19-21) So dɛn kin disfɛloship ɛnibɔdi we se in na Kristian we de vɛks ɔltɛm, ɔ ivin bit in wɛf ɔ in man ɔ in pikin dɛn. (Luk Jɔn In Sɛkɛn Lɛta 9, 10.) Dis de mek di kɔngrigeshɔn nɔ gɛt pipul dɛn we lɛk fɔ fɛt ɛn fɔ tɔk bad wɔd.—Fɔs Lɛta Fɔ Kɔrint 5:​6, 7; Lɛta Fɔ Galeshya 5:​9.

24. (a) Wetin pɔsin go disayd fɔ du if in man ɔ wɛf de trit am bad? (b) Aw padi dɛn ɛn ɛlda dɛn go ɛp pɔsin we in man ɔ wɛf de trit bad? Wetin dɛn nɔ fɔ du?

²⁴ Wetin go apin to Kristian dɛn we dɛn man ɔ wɛf dɔn bit dɛn bad bad wan bɔt stil di man ɔ wɛf we de bit dɛn nɔ sho se i want fɔ chenj? Sɔm kin gɛt rizin we kin mek dɛn disayd fɔ de wit di man ɔ wɛf we de bit dɛn. Sɔm ɔda wan dɛn kin disayd fɔ lɛf di man ɔ uman bikɔs dɛn fil se dɛn wɛlbɔdi biznɛs, di we aw dɛn de tink, dɛn padi biznɛs wit Gɔd, ɔ ivin dɛn layf go de pan denja. Na di pɔsin go ansa to Jiova if i disayd fɔ de wit man ɔ wɛf we de fɛt-fɛt ɛn du bad bad tin dɛn. (Fɔs Lɛta Fɔ Kɔrint 7:​10, 11) Pipul dɛn we bisin bɔt yu, lɛk padi dɛn, fambul dɛn, ɔ ɛlda dɛn na di kɔngrigeshɔn kin ɛp ɛn advays yu, bɔt dɛn nɔ fɔ fos yu fɔ du ɛni patikyula tin. Na yusɛf fɔ disayd wetin fɔ du.—Lɛta Fɔ Rom 14:​4; Lɛta Fɔ Galeshya 6:​5.

25. Aw Jiova bin want famili dɛn fɔ de?

²⁵ We Jiova bin mek mared fɔ Adam ɛn Iv, i nɔ bin mek dɛn fɔ gɛt prɔblɛm dɛn we go pwɛl famili dɛn lɛk fɔ de drink ɔltɛm ɔ fɔ de fɛt-fɛt ɔ du ɔda bad bad tin dɛn. (Lɛta Fɔ Ɛfisɔs 3:​14, 15) Famili bin fɔ dɔn bi say usay lɔv ɛn pis de ɛn ɔlman we de de fɔ de tink di rayt we, fil fayn, ɛn fɔ wɔship Gɔd. Bɔt frɔm di tɛm we mɔtalman bigin sin, na in prɔblɛm dɛn bigin apin na famili.—Luk Ɛkliziastis 8:​9.

26. Us blɛsin we di wan dɛn we de du wetin Jiova want go ɛnjɔy tumara bambay?

²⁶ Wi gladi bikɔs Jiova nɔ stil fɔgɛt bɔt aw i bin want famili dɛn fɔ de. Jiova dɔn prɔmis fɔ mek di wɔl bi Paradays usay pipul “dɛn go tap sef sef wan ɛn natin nɔ go mek dɛn fred.” (Izikɛl 34:​28) Da tɛm de tin dɛn lɛk fɔ drink ɔltɛm, fɛt-fɛt ɛn ɔda bad bad tin dɛn na famili nɔ go de igen. Pipul dɛn go smayl, nɔto fɔ jɔs ayd di fred we dɛn de fred ɔ di pen we dɛn de fil bɔt na bikɔs dɛn rili de “ɛnjɔy pis.”—Sam 37:​11.