LƐSIN 29

Wetin De Apin to Wi We Wi Day?

Printɛd Ɛdishɔn

Yu fambul ɔ padi we yu rili lɛk dɔn ɛva day? Dɛn tɛm dɛn de we tin nɔ kin izi, yu go de wɔnda: ‘Wetin de apin to wi we wi day? Ɛni op de fɔ se wi go ɛva si wi fambul ɔ padi dɛn we dɔn day?’ Insay dis lɛsin ɛn di lɛsin afta dis wan, yu go lan di fayn ansa dɛn we di Baybul gi we go kɔrej yu.

1. Wetin de apin to wi we wi day?

Jizɔs bin kɔmpia day to dip slip. Pɔsin we de pan dip slip nɔ de no wetin de apin arawnd am. Aw day fiba slip? Afta we pɔsin day, i nɔ de fil pen igen. I nɔ de fil se na in wangren de, ilɛksɛf i bin rili lɛk in padi ɛn fambul dɛn. Di Baybul tɔk se: “Dayman nɔ de no natin.”—Rid Ɛkliziastis 9:5.

2. Aw wi de bɛnifit we wi no di tru bɔt day?

Bɔku pipul dɛn de fred day ɛn dɛn de ivin fred dayman! Bɔt wetin di Baybul tɔk bɔt day go kɔrej yu. Jizɔs bin se: “Di trut go fri una.” (Jɔn 8:32) Sɔm rilijɔn dɛn de tich se sɔntin de insay pɔsin we de kɔntinyu fɔ liv afta we di pɔsin dɔn day. Bɔt dat nɔto wetin di Baybul de tich. So nɔbɔdi nɔ go sɔfa afta we i dɔn day. Dɔn bak di wan dɛn we dɔn day nɔ go du bad tin to wi bikɔs dɛn nɔ no natin. So no nid nɔ de fɔ wɔship dayman dɛn ɔ du sɔntin fɔ lɛ dɛn nɔ vɛks pan wi, ɛn nid nɔ de fɔ pre fɔ dɛn.

Sɔm pipul dɛn kin tɔk se dɛn ebul fɔ tɔk to di wan dɛn we dɔn day bɔt dat nɔ pɔsibul. Jɔs lɛk aw wi dɔn lan, di wan dɛn we dɔn day nɔ “de no natin.” Di wan dɛn we tink se dɛn de tɔk to dɛn fambul dɛn we dɔn day, de tɔk to dimɔn dɛn we de mek lɛk se dɛn na dɛn fambul dɛn we dɔn day. So we wi no di tru bɔt day, dat de protɛkt wi frɔm di dimɔn dɛn. Jiova de wɔn wi nɔ fɔ tray fɔ tɔk to di wan dɛn we dɔn day bikɔs i no se di dimɔn dɛn go du wi bad if wi tray fɔ gɛt ɛnitin fɔ du wit dɛn.—Rid Ditarɔnɔmi 18:10-12.

LAN MƆ

Lan mɔ bɔt wetin di Baybul tich bɔt di wan dɛn we dɔn day, ɛn gɛt mɔ fet pan di Gɔd we lɛk wi we nɔ de pɔnish di wan dɛn we dɔn day.

Wan man ɛn in tu pikin dɛn sidɔm na wan bɛnch di tɛm we dɛn de bɛr in wɛf we na in pikin dɛn mama. Dɛn padi dɛn ɛn fambul dɛn gɛda rawnd dɛn fɔ kɔrej dɛn ɛn sɔpɔt dɛn.

3. Lan di tru tin we de apin to di wan dɛn we dɔn day

Ɔlsay na di wɔl, pipul dɛn gɛt difrɛn tin dɛn we dɛn biliv bɔt wetin de apin to wi we wi day. Bɔt nɔto ɔl di tin dɛn we dɛn biliv na tru.

Wetin na di kɔmɔn tin we pipul dɛn biliv bɔt day na di eria we yu de?

Fɔ lan wetin di Baybul de tich, ple di VIDIO.

VIDIO: Wetin Kin Apin to Pɔsin We Dɔn Day?—Shɔt Pat (1:19)

Pikchɔ Dɛn: Pat dɛn frɔm di vidio we gɛt di taytul ‘Wetin Kin Apin to Pɔsin We Dɔn Day?’ Shɔt Pat. 1. Wan dedebɔdi ledɔm na wan ɔspitul bed. 2. Wan man de slip bitwin tu pipul dɛn as dɛn de travul na tren.

Rid Ɛkliziastis 3:20, dɔn una tɔk bɔt dɛn kwɛstyɔn dɛn ya:

Akɔdin to dis vas, wetin kin apin to pɔsin we i day?
Fɔ se ɛni pat de pan pɔsin we nɔ de day?

Di Baybul tɛl wi bɔt Jizɔs in tayt padi we nem Lazarɔs we bin day. As yu de rid Jɔn 11:11-14, notis wetin Jizɔs bin tɔk bɔt wetin apin to Lazarɔs. Dɔn una tɔk bɔt dɛn kwɛstyɔn dɛn ya:

Wetin Jizɔs bin kɔmpia day to?
Wetin dat tɛl wi bɔt wetin de apin to pɔsin we i day?
Yu tink se wetin di Baybul tɔk bɔt day mek sɛns?

4. Di tru bɔt day de bɛnifit wi

We wi no di tru bɔt day, dat de mek wi nɔ de fred dayman. Rid Ɛkliziastis 9:10, dɔn una tɔk bɔt dis kwɛstyɔn:

Yu tink se dayman ebul du wi bad?

Di tru tin dɛn we di Baybul tich bɔt day, de ɛp wi fɔ lɛ wi nɔ biliv se wi fɔ wɔship di wan dɛn we dɔn day ɔ du sɔntin fɔ lɛ dɛn nɔ vɛks pan wi. Rid Ayzaya 8:19 ɛn Rɛvɛleshɔn 4:11, dɔn una tɔk bɔt dis kwɛstyɔn:

Aw yu tink se Jiova de fil bɔt pɔsin we de wɔship dayman ɔ we de tray fɔ lɛ dayman ɛp am?

Pikchɔ Dɛn: Kɔstɔm dɛn we gɛt fɔ du wit fɔ ɔnɔ di dɛn wan dɛn we bin dɔn day. 1. Wan man nil dɔŋ bifo wan grev de pre ɛn de put it na di grev. 2. Tri man dɛn we drɛs lɛk dɛbul de dans. 3. Sɔm pipul dɛn wɛr skɔl na dɛn fes lɛk maks ɛn dɛn ol big skɛlitin dɛn na dɛn an. — Di tru bɔt day de fri wi frɔm kɔstɔm dɛn we nɔ de mek Jiova gladi

5. Di tru tin bɔt day de kɔrej wi

Dɛn dɔn tich bɔku pipul dɛn se we dɛn day, dɛn go sɔfa bikɔs ɔf di bad tin dɛn we dɛn bin dɔn du. Bɔt wi gladi fɔ no se nɔbɔdi nɔ go sɔfa afta we i dɔn day ivin pɔsin sɛf we bin dɔn du bad bad tin dɛn. Rid Romans 6:7, dɔn una tɔk bɔt dis kwɛstyɔn:

Di Baybul tɔk se we pɔsin day, Gɔd nɔ go pɔnish am fɔ in sin dɛn. So yu tink se pɔsin we dɔn day go sɔfa bikɔs ɔf in sin dɛn we i bin dɔn kɔmit?

Di mɔ wi de sabi Jiova, na di mɔ wi go kam fɔ si se i nɔ go ɛva alaw di wan dɛn we dɔn day fɔ sɔfa. Rid Ditarɔnɔmi 32:4 ɛn 1 Jɔn 4:8, dɔn una tɔk bɔt dɛn kwɛstyɔn dɛn ya:

Yu tink se di Gɔd we gɛt di kwaliti dɛn we dɛn vas dɛn ya tɔk bɔt go ɛva gri fɔ pɔnish di wan dɛn we dɔn day?
Yu tink se di tru tin dɛn we yu dɔn lan bɔt day de kɔrej yu? Wetin mek?

SƆM PIPUL DƐN KIN SE: “A de fred wetin go apin to mi we a day.”