LƐSIN 36

Bi Pɔsin We Ɔnɛs pan Ɔltin

Printɛd Ɛdishɔn

Ɔlman want padi dɛn we ɔnɛs. Jiova sɛf want in padi dɛn fɔ ɔnɛs. Bɔt i nɔ izi fɔ lɛ wi bi pipul dɛn we ɔnɛs na dis wɔl usay bɔku pipul dɛn nɔ ɔnɛs. Us bɛnifit dɛn wi go gɛt if wi bi pipul dɛn we ɔnɛs pan ɔltin?

1. Wetin na di men rizin we mek wi fɔ ɔnɛs?

We wi ɔnɛs wit ɔda pipul dɛn, wi de sho Jiova se wi lɛk am ɛn wi rɛspɛkt am. Tink bɔt dis: Jiova no ɔl wetin wi de tink ɛn du. (Ibruz 4:13) I de si we wi disayd fɔ bi pɔsin we ɔnɛs, ɛn dat de mek i gladi. In Wɔd se: “PAPA GƆD [“Jiova,” NWT] et udat de du bad bɔt i lɛk pɔsin we de waka tret na . . . in yay ɛn de mek am in padi.”—Prɔvabs 3:32.

2. Wetin na sɔm we dɛn we yu go ɔnɛs pan ɔltin?

Jiova want wi fɔ “tɔk tru” to wi kɔmpin dɛn. (Zɛkaraya 8:16, 17) Wetin dis min? Dis min se we wi de tɔk to wi fambul dɛn, wi wokmet dɛn, wi Kristian brɔda ɛn sista dɛn, ɔ gɔvmɛnt wokman dɛn, wi nɔ de lay ɔ gi infɔmeshɔn we nɔ kɔrɛkt. Pɔsin we ɔnɛs nɔ de tif frɔm ɔda pipul dɛn ɔ kruk dɛn. (Rid Prɔvabs 24:28 ɛn Ɛfishians 4:28.) Ɛn dɛn de pe ɔl di taks dɛn we dɛn fɔ pe. (Romans 13:5-7) We wi du ɔl dɛn tin dɛn ya, wi de sho se “wi ɔnɛs pan ɔltin.”—Ibruz 13:18.

3. Us bɛnifit dɛn wi de gɛt we wi ɔnɛs?

We wi mek am wi abit fɔ bi pɔsin we ɔnɛs, dat go mek ɔda pipul dɛn trɔst wi. Wi go mek ɔlman fil sef na di kɔngrigeshɔn jɔs lɛk famili we lɛk dɛnsɛf. Wi go gɛt klin kɔnshɛns. We wi ɔnɛs i de mek bak “Gɔd, we na wi seviɔ, in tichin fayn mɔ ɛn mɔ” ɛn dat go mek ɔda pipul dɛn want fɔ sav Jiova.—Taytɔs 2:10.

LAN MƆ

Lan aw we yu bi pɔsin we ɔnɛs de afɛkt yu ɛn Jiova, ɛn lan bak aw yu go bi pɔsin we ɔnɛs pan difrɛn tin dɛn na layf.

4. We yu ɔnɛs, dat de mek Jiova gladi

Rid Sam 44:21 ɛn Malakay 3:16, dɔn una tɔk bɔt dɛn kwɛstyɔn dɛn ya:

Wetin mek yu tink se i nɔ mek sɛns fɔ biliv se wi go ebul ayd di tru?
Aw yu tink se Jiova de fil we wi disayd fɔ tɔk di tru pan ɔl we i nɔ izi fɔ du dat?

Wan pikin de tɔk to in papa we nil dɔŋ fɔ wach am na in yay. Wan glas jus dɔn trɔwe nia di tebul. — We pikin dɛn tɔk tru, dɛn de mek dɛn mama ɛn papa gladi. We wi tɔk tru, wi de mek Jiova gladi

5. Du sɔntin we ɔnɛs ɔltɛm

Bɔku pipul dɛn biliv se i nɔ mek sɛns fɔ bi pɔsin we ɔnɛs ɔltɛm. Bɔt tink bɔt wetin mek wi fɔ bi pɔsin we ɔnɛs ɔltɛm. Ple di VIDIO.

VIDIO: Wetin Go Ɛp fɔ Mek Wi Gɛt Gladi-At?—Klin Kɔnshɛns (2:32)

Wan say na di vidio we gɛt di taytul ‘Wetin Go Ɛp fɔ Mek Wi Gɛt Gladi-At?—Klin Kɔnshɛns.’ Afta Bɛn tɛl in bɔs se i dɔn mek wan siriɔs mistek, dɛn ɔltu de shek-an.

Rid Ibruz 13:18, dɔn una tɔk bɔt aw wi go bi pɔsin we ɔnɛs . . .

wit wi famili.
na wokples ɔ na skul.
pan ɔda tin dɛn.

6. We wi ɔnɛs, dat de bɛnifit wi

I kin tan lɛk se we wi bi pɔsin we ɔnɛs, dat kin mek wi gɛt sɔm prɔblɛm dɛn. Bɔt leta, wi go kam fɔ si se we wi bi pɔsin we ɔnɛs, dat na di bɛst tin we wi go ɛva du. Rid Sam 34:12-16, dɔn una tɔk bɔt dis kwɛstyɔn: