Yu Rɛdi fɔ Bi Jizɔs in Disaypul ɛn Prich di Gud Nyuz?

 1. Wetin Jizɔs bin kɔl 4 fishaman dɛn fɔ du? Wetin di fishaman dɛn bin du?

PITA, Andru, Jems, ɛn Jɔn na bin fishaman dɛn bifo dɛn bi Jizɔs in disaypul dɛn. Tink bɔt aw dɛn go dɔn sɔprayz we Jizɔs bin tɛl dɛn se: “Una fala mi, ɛn a go sho una aw fɔ luk fɔ pipul dɛn jɔs lɛk aw una kin luk fɔ fish.”b Wetin dɛn bin du? Di Baybul se: “Wantɛm wantɛm, dɛn lɛf dɛn nɛt dɛn ɛn fala am.” (Mat. 4:​18-22) Dis tin we dɛn bin disayd fɔ du bin chenj dɛn layf. Dɛn nɔ go de kech fish igen, bifo dat dɛn go de “kech pipul dɛn layf layf wan.” (Lyuk 5:​10) Tide, Jizɔs de kɔl pipul dɛn we gɛt klin at ɛn we lɛk di tru fɔ du di sem tin. (Mat. 28:​19, 20) Yu dɔn gri fɔ bi Jizɔs in disaypul ɛn prich di gud nyuz?

 2. Wetin mek fɔ bi Jizɔs in disaypul ɛn fɔ prich di gud nyuz na sɔntin we wi fɔ tek siriɔs? Wetin go ɛp wi fɔ du dat?

² Sɔntɛm yu dɔn de stɔdi di Baybul fɔ sɔm tɛm ɛn yu dɔn mek chenj dɛn na yu layf. Bɔt naw yu nid fɔ disayd if yu go want fɔ bigin prich di gud nyuz. If yu de fred fɔ du dat, nɔ fil bad. I go mɔs bi se yu de fred bikɔs yu no se wetin yu want fɔ du rili impɔtant. Na tru se di Baybul se Pita ɛn in kɔmpin dɛn bin lɛf dɛn fishin nɛt “wantɛm wantɛm.” Bɔt Pita ɛn in brɔda nɔ bin jɔs rɔsh fɔ disayd. Siks mɔnt bifo dɛn disayd, dɛn bin dɔn sabi Jizɔs ɛn gri se na in na di Mɛsaya. (Jɔn 1:​35-42) Yusɛf dɔn ɔlrɛdi lan bɔku bɔt Jiova ɛn Jizɔs, ɛn yu want fɔ kɔntinyu fɔ go bifo pan Gɔd biznɛs. Bɔt bifo yu disayd fɔ bi pɔblisha, yu fɔ tek tɛm tink gud wan bɔt dat. Wetin bin ɛp Pita, Andru, ɛn ɔda wan dɛn fɔ disayd fɔ bi Jizɔs in disaypul?

 3. Us kwaliti dɛn go ɛp yu fɔ mek yu gri fɔ bi Jizɔs in disaypul ɛn prich di gud nyuz?

³ Jizɔs in fɔs disaypul dɛn bin no wetin mek dɛn want fɔ du di fishin wok, dɛn bin no aw fɔ du am, dɛn bin gɛt maynd, ɛn dɛn bin tren dɛnsɛf. Dɛn sem kwaliti dɛn ya bin ɛp dɛn fɔ mek dɛn bi gud disaypul dɛn ɛn prich di gud nyuz. Insay dis atikul, wi go tɔk bɔt aw yusɛf go gɛt dɛn kwaliti dɛn de so dat yu go prich di gud nyuz fayn wan.

 4. Wetin mek Pita bin de du fishin wok?

⁴ Pita bin de fishin fɔ sɔpɔt in famili, bɔt i nɔ bin jɔs de du dis wok fɔ fɛn mɔni. Pita bin lɛk fɔ fishin. (Jɔn 21:​3, 9-15) Pita bin lan bak fɔ lɛk di prichin wok, ɛn Jiova bin ɛp am fɔ du da wok de fayn fayn wan.—Akt 2:​14, 41.

 5. Akɔdin to Lyuk 5:​8-11, wetin mek Pita bin de fred? Wetin go ɛp wi if wi de fil da kayn we de?

⁵ Di men rizin we mek wi de prich na bikɔs wi lɛk Jiova. Na dis kin ɛp wi fɔ tɛl ɔda pipul dɛn bɔt am pan ɔl we wi kin fil se wi nɔ sabi du di wok. We Jizɔs bin kɔl Pita fɔ bi in disaypul, i bin tɛl am se: “Lɛf fɔ fred.” (Rid Lyuk 5:​8-11.) Pita nɔ bin de fred bikɔs ɔf wetin go apin to am if i bi disaypul. Bɔt i bin de fred se i nɔ fit fɔ wok wit Jizɔs mɔ we i dɔn si di mirekul we Jizɔs bin pafɔm bay we i mek dɛn kech bɔku fish. Lɛk Pita, i go bi se yusɛf de fred we yu dɔn kam fɔ no wetin-ɛn-wetin yu nid fɔ du fɔ bi Krays in disaypul. If na so i bi, du wetin go mek yu lɛk Jiova, Jizɔs, ɛn yu neba dɛn mɔ ɛn mɔ. We yu du dat, yu go rɛdi fɔ bi Jizɔs in disaypul ɛn prich to pipul dɛn.—Mat. 22:​37, 39; Jɔn 14:​15.

 6. Us ɔda rizin dɛn mek wi de prich?

⁶ Lɛ wi tɔk bɔt sɔm ɔda rizin dɛn we mek wi de prich. Wi want fɔ obe Jizɔs in kɔmand we se: “Una go ɛn mek pipul dɛn bi mi disaypul.” (Mat. 28:​19, 20) Wi de prich bak bikɔs dɛn “de trit [pipul] dɛn bad ɛn dɛn nɔ . . . bisin bɔt dɛn,” ɛn dɛn pipul dɛn ya rili nid fɔ lan di tru bɔt di Kiŋdɔm. (Mat. 9:​36) Jiova want fɔ mek ɔlkayn pipul dɛn no di kɔrɛkt tin bɔt di tru so dat dɛn go sev.—1 Tim. 2:​4.

 7. Aw Romans 10:​13-15 sho se di prichin wok na tin we impɔtant?

⁷ Wi go gladi fɔ prich we wi tink bɔt aw dis wok de ɛp fɔ sev pipul dɛn layf. Fishaman dɛn kin sɛl ɔ it di fish dɛn we dɛn de kech. Bɔt wi de fɛn pipul dɛn fɔ sev dɛn layf.—Rid Romans 10:​13-15; 1 Tim. 4:​16.

8-9. Wetin fishaman dɛn fɔ no? Wetin mek?

⁸ Insay Jizɔs in tɛm, di Izrɛlayt fishaman dɛn bin nid fɔ no uskayn fish dɛn fɔ kech. (Lɛv. 11:​9-12) Dɛn bin nid fɔ no bak usay fɔ fɛn di fish. Bɔku tɛm, fish dɛn kin de na say we dɛn lɛk na di wata ɛn usay bɔku it de. So i impɔtant fɔ mek di fishaman dɛn pik di rayt tɛm we dɛn de go fishin. Wan mishɔnari we bin de na wan ayland bin lan se patikyula tɛm de we fayn fɔ kech fish. We wan brɔda bin tɛl am fɔ mek dɛn go fishin, di mishɔnari bin se: “A go kam mit yu nayn oklɔk tumara mɔnin.” Bɔt di brɔda bin tɛl am se: “Yu nɔ ɔndastand. Wi fɔ go we di fish rɛdi, nɔto we wi rɛdi.”

⁹ Semweso, Jizɔs in disaypul dɛn bin de go na say dɛn we pipul dɛn de ɛn di tɛm we dɛn go de de. Fɔ ɛgzampul, Jizɔs in disaypul dɛn bin de prich na di tɛmpul, na di sinagɔg, na makit, ɛn frɔm os-to-os. (Akt 5:​42; 17:​17; 18:​4) Wisɛf nid fɔ no di tɛm dɛn we pipul dɛn kin de na os ɔ usay wi go ebul fɔ prich to dɛn. Wi fɔ rɛdi fɔ ajɔst wetin wi plan fɔ du fɔ mek wi go prich na ples we pipul dɛn go de ɛn di tɛm we dɛn go de de.—1 Kɔr. 9:​19-23.

10. Wetin Jiova in ɔganayzeshɔn dɔn gi wi?

¹⁰ Fishaman dɛn nid fɔ gɛt di rayt tin dɛn fɔ wok, ɛn dɛn fɔ no aw fɔ yuz dɛn. Wisɛf nid fɔ gɛt di rayt tin dɛn fɔ du di prichin wok, ɛn wi nid fɔ no aw fɔ yuz dɛn. Jizɔs bin tɛl in disaypul dɛn aw dɛn fɔ prich di gud nyuz. I bin tɛl dɛn wetin dɛn fɔ go wit, usay dɛn fɔ prich, ɛn wetin dɛn fɔ tɔk. (Mat. 10:​5-7; Lyuk 10:​1-11) Tide, Jiova in ɔganayzeshɔn dɔn gi wi di Tichin Tulbɔks we gɛt di tin dɛn we dɔn de ɛp wi fɔ du di prichin wok fayn.c Ɛn dɛn de sho wi aw fɔ yuz di tin dɛn we de insay de. Di trenin we dɛn de gi wi de mek wi gɛt kɔnfidɛns we wi de prich ɛn ɛp wi fɔ bi gud ticha dɛn.—2 Tim. 2:​15.

11. Wetin mek Jizɔs in disaypul dɛn fɔ gɛt maynd?

¹¹ Fishaman dɛn nid fɔ gɛt maynd bikɔs sɔntɛnde, di wɛda kin chenj di tɛm we dɛn nɔ ɛkspɛkt, di si kin rɔf, ɛn bɔku tɛm dɛn kin wok na nɛt. Jizɔs in disaypul dɛnsɛf nid fɔ gɛt maynd. We wi stat fɔ prich ɛn tɛl pipul dɛn se wi na Jiova Witnɛs, sɔntɛm wi fambul dɛn go tray fɔ stɔp wi, wi padi dɛn go provok wi, ɛn sɔm pipul dɛn nɔ go lisin to wi. Bɔt wi nɔ fɔ sɔprayz if dɛn kayn tin dɛn ya apin. Jizɔs bin se i de sɛn in disaypul dɛn fɔ go prich to pipul dɛn we de agens dɛn.—Mat. 10:​16.

12. Akɔdin to Jɔshwa 1:​7-9, wetin go ɛp wi fɔ gɛt maynd?

¹² Wetin go ɛp yu fɔ gɛt maynd? Fɔs, yu fɔ biliv se Jizɔs de kɔntinyu fɔ dayrɛkt di prichin wok frɔm ɛvin. (Jɔn 16:​33; Rɛv. 14:​14-16) Sɛkɔn, kɔntinyu fɔ gɛt fet pan di prɔmis we Jiova mek fɔ se i go kia fɔ yu. (Mat. 6:​32-34) Di mɔ we yu de gɛt fet, na di mɔ yu de gɛt maynd. Pita ɛn in kɔmpin dɛn bin sho se dɛn gɛt strɔng fet bay we dɛn bin lɛf dɛn fishaman wok fɔ fala Jizɔs. Yusɛf bin sho se yu gɛt strɔng fet we yu tɛl yu padi ɛn fambul dɛn se yu dɔn bigin stɔdi di Baybul wit Jiova Witnɛs dɛn, ɛn yu dɔn bigin atɛnd mitin. I go bi se yu dɔn mek bɔku chenj dɛn na yu layf so dat yu go du wetin rayt na Jiova in yay. Yu bin nid fɔ gɛt maynd ɛn fet fɔ du dat. As yu de kɔntinyu fɔ gɛt maynd, yu go gɛt kɔnfidɛns se ‘Jiova go de wit yu ɛnisay we yu de go.’—Rid Jɔshwa 1:​7-9.

13. We yu de pre ɛn tink gud wan, aw dat go ɛp yu fɔ gɛt maynd?

¹³ Wetin bak go ɛp yu fɔ gɛt maynd? Pre to Jiova fɔ lɛ i ɛp yu fɔ gɛt maynd. (Akt 4:​29, 31) Jiova go ansa yu prea dɛn ɛn i nɔ go ɛva lɛf yu. I rɛdi fɔ sɔpɔt yu ɔltɛm. Dɔn bak, tink gud wan bɔt aw Jiova bin sev ɔda pipul dɛn trade. Tink bak bɔt aw i bin ɛp yu we yu bin gɛt prɔblɛm dɛn ɛn gi yu trɛnk fɔ mek chenj dɛn na yu layf. Wi shɔ se di Wan we bin ɛp in pipul dɛn fɔ waka midul di Rɛd Si go ɛp yu fɔ bi Krays in disaypul. (Ɛks. 14:​13) Kɔntinyu fɔ gɛt fet lɛk wan pan di man dɛn we rayt di sam buk we bin se: “Wans PAPA GƆD [“Jiova,” NWT] de wit mi, a nɔ gɛt natin fɔ fred. Wetin mɔtalman gɛt fɔ du mi?”—Sam 118:​6.

14. Wetin yu lan frɔm Masaɛ ɛn Tomoyo dɛn ɛkspiriɛns?

¹⁴ Wan ɔda tin we go ɛp yu fɔ gɛt maynd, na we yu lan bɔt aw Jiova bin ɛp pipul dɛn we de shem fɔ gɛt maynd. Tink bɔt wan sista we nem Masaɛ. I bin de shem ɛn i fil se i nɔ go ɛva ebul fɔ prich na pɔblik. We i bin de tink se i gɛt fɔ tɔk to strenja dɛn, i bin tan lɛk ay ay wɔl we i nɔ go ɛva ebul fɔ klem. So i bin tray tranga wan fɔ lɛk Gɔd ɛn in neba dɛn mɔ ɛn mɔ. I bin tink gud wan bɔt aw bɛtɛ tɛm nɔ lɛf igen, ɛn i bin pre fɔ lɛ Jiova ɛp am fɔ mek i go lɛk fɔ prich. I bin lɛf fɔ fred ɛn i dɔn ivin bi rɛgyula payɔnia. Jiova go ɛp nyu pɔblisha dɛn bak fɔ gɛt maynd. Lɛ wi tɔk bɔt wan ɔda sista we nem Tomoyo. We i stat fɔ prich frɔm os-to-os, di fɔs pɔsin we i mit bin ala pan am se: “A nɔ want natin fɔ du wit Jiova Witnɛs dɛn!” ɛn i bang in domɔt. Tomoyo nɔ bin fred, i bin tɛl in fil savis patna se: “Yu yɛri wetin di uman tɔk? A nɔ ivin tɔk natin bɔt i no se mi na Jiova Witnɛs. A gladi fɔ dat!” Tomoyo na rɛgyula payɔnia naw.

15. Wetin fishaman dɛn de tren dɛnsɛf fɔ du? Wetin mek i impɔtant fɔ mek Kristian dɛn du di sem tin?

¹⁵ Fishaman dɛn we sabi du dɛn wok fayn fayn wan de tren dɛnsɛf fɔ du tin dɛn we dɛn nid fɔ du. Fɔ ɛgzampul, dɛn dɔn tren dɛnsɛf fɔ wek ali mɔnin, fɔ kɔntinyu fɔ wok ilɛksɛf di wɛda bad, ɛn fɔ dɔn dɛn wok. Wisɛf nid fɔ tren wisɛf fɔ mek wi bia ɛn dɔn wi wok.—Mat. 10:​22.

16. Wetin go ɛp wi fɔ du di tin dɛn we nɔ izi fɔ du?

¹⁶ Bɔku tɛm, wi kin lɛk fɔ du sɔntin di izi we. Bɔt sɔntɛnde, di tin dɛn we rili impɔtant na tin dɛn we nɔ izi fɔ du. Na dat mek wi go nid fɔ lan fɔ kɔntrol wisɛf. So wi go nid pɔsin fɔ ɛp wi fɔ du di tin dɛn we nɔ izi fɔ du. Jiova de yuz in oli spirit fɔ ɛp wi.—Gal. 5:​22, 23.

17. Akɔdin to 1 Kɔrintians 9:​25-27, wetin Pɔl se i bin nid fɔ du fɔ tren insɛf?

¹⁷ Apɔsul Pɔl bin de tren insɛf. Bɔt i bin tɔk se i de “sɔfa” in bɔdi fɔ du wetin rayt. (Rid 1 Kɔrintians 9:​25-27.) I bin ɛnkɔrej ɔda pipul dɛn fɔ du tin “di rayt we, ɛn . . . arenj [ɔltin] fayn fayn wan.” (1 Kɔr. 14:​40) Wi fɔ tren wisɛf fɔ mek wi kɔntinyu fɔ wɔship Jiova, bay we wi de prich ɛn tich.—Akt 2:​46.

18. Wetin go mek Jiova si se wi de du wɛl we wi de prich di gud nyuz?

¹⁸ Fishaman kin no se i dɔn du wɛl if i kech bɔku fish. Bɔt di prichin wok difrɛn. Nɔto ɔmɔs pipul dɛn wi ɛp fɔ kam na Gɔd in ɔganayzeshɔn de sho se wi dɔn du wɛl. (Lyuk 8:​11-15) If wi kɔntinyu fɔ bia we wi de prich di gud nyuz ɛn tich ɔda pipul dɛn, Jiova go si se wi de du wɛl. Wetin mek? Na bikɔs wi de kɔntinyu fɔ du wetin in ɛn in Pikin want wi fɔ du.—Mak 13:​10; Akt 5:​28, 29.

19-20. Us spɛshal rizin wi gɛt fɔ du di prichin wok naw?

¹⁹ Insay sɔm kɔntri dɛn, patikyula sizin dɛn de we dɛn kin alaw fishaman dɛn fɔ go fishin. Di fishaman dɛn kin fil se di tɛm mɔ we dɛn fɔ fishin na we di sizin want fɔ dɔn. As disaypul dɛn we de prich di gud nyuz, wi gɛt mɔ rizin fɔ prich naw bikɔs tɛm nɔ de fa igen fɔ mek dis wɔl dɔn. Na smɔl tɛm dɔn lɛf fɔ prich di gud nyuz we go sev pipul dɛn layf. So nɔ westɛm ɔ fil se yu nid fɔ wet te ɔltin fayn fɔ yu bifo yu tek pat pan dis impɔtant wok.—Ɛkli. 11:​4.

²⁰ Kɔntinyu fɔ tink bɔt wetin mek yu want fɔ prich, lan mɔ bɔt di Baybul, lan aw fɔ gɛt maynd, ɛn tren yusɛf. I dɔn pas et milyɔn pipul dɛn we de prich di gud nyuz, so na fɔ jɔyn dɛn fɔ mek yusɛf gɛt di gladi-at we Jiova de gi. (Nɛi. 8:​10) Mekɔp yu maynd fɔ du yu bɛst pan di prichin wok ɛn kɔntinyu fɔ du am te Jiova se di wok dɔn dɔn. Insay di nɛks atikul, wi go tɔk bɔt tri tin dɛn we wi go du fɔ kɔntinyu fɔ prich bɔt di Kiŋdɔm.