Di Wan dɛn we De Sav di “Gɔd We Gladi Ɔltɛm” Go Gladi

 1. Wetin mek Jiova Witnɛs dɛn na pipul dɛn we gladi? (Luk di pikchɔ nia dis atikul in taytul.)

JIOVA WITNƐS DƐN na pipul dɛn we gladi. Ɛnitɛm we dɛn de togɛda, ilɛk na mitin, na asɛmbli, ɔ na gɛt-to-gɛda, na so dɛn go de tɔk ɛn laf to dɛn kɔmpin dɛn. Wetin mek dɛn rili gladi? Di men rizin na bikɔs dɛn dɔn lan bɔt Jiova, we na “di Gɔd we gladi ɔltɛm.” Dɛn de sav am ɛn falamakata am. (Fɔs Lɛta to Timoti 1:​11, NW; Sam 16:​11) Gladi-at kɔmɔt frɔm Jiova, so i want wi fɔ gladi, ɛn i de gi wi bɔku tin dɛn fɔ lɛ wi gladi.—Ditarɔnɔmi 12:​7; Ɛkliziastis 3:​12, 13.

2, 3. (a) Wetin i min fɔ gɛt gladi-at? (b) Wetin mek i nɔ kin izi fɔ gɛt gladi-at?

² We yu, yu gladi? Fɔ lɛ pɔsin gladi min se di pɔsin de fil gud, ɛn i satisfay wit in layf. Di Baybul mek wi no se na di wan dɛn we Jiova blɛs go gɛt tru tru gladi-at. Bɔt na di wɔl tide, wetin mek i nɔ izi fɔ gɛt gladi-at?

³ I nɔ kin izi fɔ gɛt gladi-at if yu gɛt tin dɛn we de rili mɔna yu, lɛk if pɔsin we yu lɛk day ɔ we dɛn disfɛloship am, we yu ɛn yu man ɔ wɛf dayvɔs, ɔ we yu lɔs yu wok. I nɔ kin izi bak fɔ gɛt gladi-at we pis nɔ de na os bikɔs ɔltɛm di pipul dɛn we de na di os kin fɛt dɛnsɛf, we wi wokmet ɔ klasmet dɛn de provok wi, ɔ we pipul dɛn de mek wi sɔfa ɔ dɛn put wi na jel bikɔs wi de sav Jiova. Ɔ i go bi se wi gɛt wɛlbɔdi prɔblɛm, wi gɛt sik we at fɔ mɛn, ɔ wi gɛt siriɔs pwɛl at. Bɔt mɛmba se Jizɔs Krays, we na di “wangren pawaful Rula we gladi,” lɛk fɔ ɛnkɔrej pipul dɛn ɛn mek dɛn gladi. (Fɔs Lɛta To Timoti 6:​15; Matyu 11:​28-30) Di tɛm we Jizɔs bin de tɔk to pipul dɛn ɔp wan mawnten, i bin tɔk bɔt sɔm kwaliti dɛn we go ɛp wi fɔ gɛt gladi-at we wi gɛt bɔku prɔblɛm dɛn bikɔs wi de na Setan in wɔl.

4, 5. Wetin wi go du fɔ kɔntinyu fɔ gɛt gladi-at?

⁴ Di fɔs tin we Jizɔs bin tɔk bɔt, bin rili impɔtant. I bin tɔk se: “Di wan dɛn we no se dɛn nid fɔ lan bɔt Gɔd gɛt gladi-at bikɔs na dɛn gɛt di Kiŋdɔm we de na ɛvin.” (Matyu 5:​3, NW) If wi na pipul dɛn we no se wi fɔ lan bɔt Gɔd, wi fɔ no se wi nid fɔ sabi Gɔd ɛn gri se wi nid am fɔ ɛp wi ɛn dayrɛkt wi. Aw wi go du dat? Na bay we wi de stɔdi di Baybul, obe Gɔd, ɛn we wi mek in wɔship bi di tin we impɔtant na wi layf. Wi go gɛt gladi-at we wi du dɛn tin dɛn ya. I go mek wi gɛt strɔng fet fɔ se i nɔ go te igen, di tin dɛn we Gɔd dɔn prɔmis wi go apin. Ɛn dɛn fayn fayn op dɛn ya we de na di Baybul go ɛnkɔrej wi.—Taytɔs 2:​13.

⁵ If wi want fɔ gɛt gladi-at na layf ilɛk wetin apin to wi, wi fɔ kɔntinyu fɔ gɛt tayt padi biznɛs wit Jiova. Di apɔsul Pɔl bin rayt se: “Una fɔ gladi ɔltɛm bikɔs una gɛt wanwɔd wit di Masta. A de tɛl una igen se una fɔ gladi!” (Lɛta Fɔ Filipay 4:​4) Fɔ mek wi gɛt tayt padi biznɛs wit Jiova, wi nid fɔ gɛt di sɛns we i de gi. Gɔd in Wɔd se: “Di pɔsin we de tray fɔ gɛt sɛns go gladi, ɛn di wan we de tray fɔ no mɔ tin dɛn. Sɛns tan lɛk tik we de gi layf to di wan dɛn we gɛt am, ɛn di wan dɛn we gɛt am go gladi.”—Prɔvabs 3:​13, 18, NW.

 6. Wetin bak wi fɔ du fɔ kɔntinyu fɔ gɛt gladi-at?

⁶ Bɔt fɔ lɛ wi kɔntinyu fɔ gɛt gladi-at, i rili impɔtant fɔ lɛ wi kɔntinyu fɔ du wetin wi de lan na di Baybul. Jizɔs bin mek wi no se dis impɔtant bay we bin tɔk se: “Naw we una dɔn no dɛn tin ya, una go gladi if una du dɛn.” (Jɔn 13:​17, NW; rid Jems 1:​25.) Dis rili impɔtant if wi want fɔ no bɔt Gɔd ɛn kɔntinyu fɔ gɛt gladi-at. Bɔt aw wi go gɛt gladi-at we bɔku tin dɛn de we de mek pɔsin nɔ gladi? Lɛ wi si wetin Jizɔs bin tɔk nɛks we i bin de tɔk to pipul dɛn ɔp wan mawnten.

 7. Aw di wan dɛn we gɛt pwɛl at go gladi?

⁷ “Di wan dɛn we dɛn at pwɛl gɛt gladi-at bikɔs dɛn go kɔrej dɛn.” (Matyu 5:​4, NW) Wi go de wɔnda, ‘Aw pɔsin go gladi we i at pwɛl?’ Jizɔs nɔ bin de tɔk bɔt ɔlman we gɛt pwɛl at. Bɔku wikɛd pipul dɛn gɛt pwɛl at ɔ dɛn nɔ gladi bikɔs dɛn gɛt prɔblɛm dɛn we de mɔna dɛn insay dis las dez we tin “traŋa.” (Sɛkɛn Lɛta To Timoti 3:​1) Bɔt dɛn jɔs de tink bɔt dɛnsɛf ɛn dɛn nɔ de tink bɔt Jiova, so dɛn nɔ gɛt tayt padi biznɛs wit am, ɛn dat de mek dɛn nɔ gladi. Jizɔs bin de tɔk bɔt di wan dɛn we no se dɛn fɔ lan bɔt Gɔd. Dɛn at pwɛl bikɔs dɛn de si se bɔku pipul dɛn dɔn kɔmɔt biɛn Gɔd ɔ dɛn nɔ de liv dɛn layf di we aw Gɔd want. Dɛn no bak se dɛn na pipul dɛn we de sin, ɛn dɛn de si di bad bad tin dɛn we de apin na dis wɔl. Jiova de si di wan dɛn we dɛn at rili pwɛl dis kayn we, i de ɛnkɔrej dɛn wit in Wɔd, i de mek dɛn gɛt gladi-at, ɛn i go gi dɛn layf we go de sote go.—Rid Izikɛl 5:​11; 9:​4.

 8. We wi ɔmbul, aw dat go mek wi gɛt gladi-at?

⁸ “Di wan dɛn we ɔmbul gɛt gladi-at bikɔs dɛn go gɛt di wɔl.” (Matyu 5:​5, NW) We yu ɔmbul, aw dat go ɛp yu fɔ gɛt gladi-at? Bɔku pipul dɛn ɔntrenin ɛn dɛn gɛt wamat, ɛn dat de mek bɔku prɔblɛm de. Bɔt we dɛn lan di trut, dɛn kin chenj ɛn bi “nyu pipul.” Naw dɛn ‘gɛt sɔri-at fɔ dɛn kɔmpin dɛn, dɛn de du gud to dɛn kɔmpin dɛn, dɛn nɔ de tink se dɛn bɛtɛ pas ɔda pipul dɛn, dɛn nɔ de dil wit ɔda pipul dɛn tranga wan, ɛn dɛn de bia wit pipul dɛn.’ (Lɛta Fɔ Kɔlɔse 3:​9-12) Dis dɔn mek dɛn gɛt pis, dɛn gɛt gud padi biznɛs wit ɔda pipul dɛn, ɛn dɛn gladi. Dɔn bak, Gɔd in Wɔd dɔn prɔmis se “dɛn go gɛt di land.”—Sam 37:​8-10, 29.

 9. (a) Wetin Jizɔs bin min we i se di wan dɛn we ɔmbul “go gɛt di wɔl”? (b) Wetin mek “di wan dɛn we rili want fɔ lɛ wetin rayt apin,” go gɛt gladi-at?

⁹ Wetin Jizɔs bin min we i tɔk se di wan dɛn we ɔmbul “go gɛt di wɔl”? Di anɔyntɛd dɛn go gɛt di wɔl we dɛn rul di wɔl as kiŋ ɛn prist dɛn. (Rɛvɛleshɔn 20:​6) Bɔku bɔku ɔda pipul dɛn we nɔ gɛt di op fɔ go na ɛvin go gɛt di wɔl we dɛn go de de sote go. Dɛn go pafɛkt ɛn dɛn go gɛt pis ɛn gladi-at. Na dɛn pipul dɛn de Jizɔs bin tɔk bɔt se: “Di wan dɛn we rili want fɔ lɛ wetin rayt apin gɛt gladi-at.” (Matyu 5:​6, NW) Di we aw wi want fɔ du tin tret go apin bikɔs Jiova go dɔn pul ɔl di wikɛd wan dɛn. (Pita In Sɛkɛn Lɛta 3:​13) Insay di nyu wɔl, di pipul dɛn we de du wetin rayt go gladi ɛn dɛn nɔ go ɛva gɛt pwɛl at igen fɔ we pipul dɛn de du bad tin.—Sam 37:​17.

10. Wetin i min fɔ gɛt sɔri-at?

¹⁰ “Di wan dɛn we de sɔri fɔ ɔda pipul dɛn gɛt gladi-at bikɔs dɛn go sɔri fɔ dɛn.” (Matyu 5:​7, NW) Pɔsin we gɛt sɔri-at na pɔsin we de trit ɔda pipul dɛn fayn ɛn i de fil sɔri fɔ di wan dɛn we de sɔfa. Bɔt sɔri-at nɔ min fɔ fil fɔ pipul dɛn. Di Baybul tich wi se sɔri-at gɛt fɔ du wit fɔ du sɔntin fɔ ɛp ɔda pipul dɛn.

11. Wetin di stori bɔt di Samɛritan de tich wi?

¹¹ Rid Lyuk 10:​30-37. Jizɔs in stori bɔt di Samɛritan mek wi no klia wan wetin i min fɔ gɛt sɔri-at. Di Samɛritan bin gɛt sɔri-at fɔ di man we de sɔfa ɛn dat bin mek i ɛp di man. Afta we Jizɔs pul da stori de, i bin tɔk se: “Yusɛf go ɛn du lɛkɛ am.” So wi kin aks wisɛf dɛn kwɛstyɔn ya: ‘A de du di sem tin? A de du wetin da Samɛritan bin du? We ɔda pipul dɛn de sɔfa,a ebul du sɔntin fɔ ɛp dɛn? Fɔ ɛgzampul, insay di kɔngrigeshɔn, a kin ɛp di ol wan dɛn, di wan dɛn we dɛn man dɛn dɔn day, ɔ pikin dɛn we dɛn mama ɛn papa nɔ de sav Jiova? A kin tɔk fayn to pipul dɛn we dɛn at pwɛl fɔ ɛnkɔrej dɛn?’—Fɔs Lɛta Fɔ Tɛsalonayka 5:​14; Jems 1:​27.

12. Wetin mek wi go gɛt gladi-at we wi gɛt sɔri-at fɔ ɔda pipul dɛn?

¹² Wetin mek wi de gladi we wi gɛt sɔri-at? We wi gɛt sɔri-at fɔ ɔda pipul dɛn, i de sho se wi de du wetin Jizɔs bin tɔk we i se pɔsin we de gi de gɛt gladi-at. Wan ɔda tin na dat wi de mek Jiova gladi. (Di Apɔsul Dɛn Wok [Akts] 20:​35; rid Di Ibru Pipul Dɛn 13:​16.) Kiŋ Devid bin tɔk bɔt pɔsin we gɛt sɔri-at se: “PAPA GƆD go gi am lɔŋ layf ɛn wɛlbɔdi; ɔlman . . . go si se i gɛt blɛsin.” (Sam 41:​1, 2) If wi sho sɔri-at to ɔda pipul dɛn, Jiova bak go sɔri fɔ wi ɛn wi go gɛt gladi-at sote go.—Jems 2:​13.

13, 14. Wetin mek i impɔtant fɔ gɛt klin at?

¹³ Jizɔs bin tɔk se: “Di wan dɛn we dɛn at klin gɛt gladi-at bikɔs dɛn go si Gɔd.” (Matyu 5:​8, NW) Fɔ lɛ wi gɛt klin at, wi nid fɔ mek shɔ se di tin dɛn we wi kin tink bɔt ɛn we wi kin want fɔ du klin. Dis rili impɔtant if wi want Jiova fɔ gladi fɔ di we aw wi de wɔship am.—Rid Sɛkɛn Lɛta Fɔ Kɔrint 4:​2; Fɔs Lɛta To Timoti 1:​5.

¹⁴ Di wan dɛn we dɛn at klin gɛt gud padi biznɛs wit Jiova we tɔk se: “Di wan dɛn we was dɛn klos go gladi.” (Rɛvɛleshɔn 22:​14, NW) Wetin i min fɔ “was dɛn klos”? Fɔ anɔyntɛd Kristian dɛn, i min se Jiova de si se dɛn klin, i go gi dɛn layf we go de sote go na ɛvin ɛn dɛn go gɛt gladi-at sote go. Bɔt fɔ di bɔku bɔku pipul dɛn we gɛt di op fɔ de na di wɔl, i min se Jiova dɔn alaw dɛn fɔ bi in padi dɛn bikɔs i de si dɛn as pipul dɛn we de du wetin rayt. Di Baybul tɔk se “dɛn dɔn tek di Ship in blɔd was dɛn klos, mek dɛn wayt.”—Rɛvɛleshɔn 7:​9, 13, 14.

15, 16. Aw di wan dɛn we gɛt klin at go “si Gɔd”?

¹⁵ Jiova tɔk se: “Ɛnibɔdi we si mi fes go day.” (Ɛksodɔs 33:​20) So aw di wan dɛn we dɛn at klin go “si Gɔd”? Di Grik wɔd we dɛn yuz fɔ translet “si” kin min fɔ imajin, fɔ ɔndastand, ɔ fɔ no. So fɔ “si Gɔd” min fɔ ɔndastand di kayn Pɔsin we i bi ɛn fɔ lɛk in kwaliti dɛn. (Lɛta Fɔ Ɛfisɔs 1:​18) Jizɔs bin de rili falamakata Gɔd in kwaliti dɛn, so i bin ebul fɔ tɔk se: “Ɛnibɔdi we dɔn si mi, dɔn si mi Papa.”—Jɔn 14:​7-9.

¹⁶ Dɔn bak, wi kin “si Gɔd” we wi si aw i de ɛp wi na wi layf. (Job 42:​5) Wi kin “si” Jiova bak bay we wi pe atɛnshɔn pan di wɔndaful tin dɛn we i dɔn prɔmis fɔ du fɔ di wan dɛn we de kɔntinyu fɔ gɛt klin at ɛn fɔ sav am sote go. Ɛn di anɔyntɛd dɛn go si Jiova fɔ tru tru we dɛn gɛt layf bak fɔ go na ɛvin.—Jɔn In Fɔs Lɛta 3:​2.

17. Wetin mek di wan dɛn we de mek pis gɛt gladi-at?

¹⁷ Afta dat, Jizɔs bin tɔk se: “Di wan dɛn we de mek pis gɛt gladi-at.” (Matyu 5:​9) We wi fɔs tray fɔ mek pis wit ɔda pipul dɛn, wi kin gladi. Di disaypul Jems bin rayt se: “Dɛn pipul we mek pis, tan lɛkɛ fama we de plant sid.” (Jems 3:​18) So if yu tink se i nɔ izi fɔ yu fɔ gɛt pis wit sɔmbɔdi we de na di kɔngrigeshɔn ɔ na yu famili, beg Jiova fɔ ɛp yu fɔ bi pɔsin we de mek pis. Ɛn Jiova go gi yu in oli spirit we go ɛp yu fɔ gɛt kwaliti dɛn we Kristian fɔ gɛt, ɛn yu go gladi. Jizɔs bin sho wi wetin mek i impɔtant fɔ mek wi fɔs mek pis wit ɔda pipul dɛn bay we i se: “If yu de mek yu sakrifays na Gɔd in Os, ɛn yu mɛmba se yu brɔda vɛks pan yu, yu fɔ lɛf yu sakrifays na Gɔd in Os, ɛn go to yu brɔda wantɛm, mek una go tɔk di plaba fayn fayn. Wɛn yu dɔn du dat, kam bak na Gɔd in Os ɛn mek yu sakrifays.” —Matyu 5:​23, 24.

18, 19. Wetin mek Kristian dɛn kin gladi pan ɔl we pipul dɛn kin mek dɛn sɔfa?

¹⁸ “Una we pipul dɛn nɔ de trit fayn ɛn una we dɛn de mek sɔfa ɛn lay pan bad bad wan fɔ mi sek gɛt gladi-at.” Wetin Jizɔs bin min? I tɔk bak se: “Una gladi pasmak bikɔs una gɛt bɔku blɛsin na ɛvin. Na so dɛn bin de mek di prɔfɛt dɛn we bin de bifo una sɔfa.” (Matyu 5:​11, 12, NW) We dɛn bin bit di apɔsul dɛn ɛn tɛl dɛn fɔ stɔp fɔ prich, “di apɔsul dɛn bin gladi bad wɛn dɛn de kɔmɔt na di Ju gran kot.” Nɔto bikɔs dɛn bin bit dɛn mek dɛn gladi. Bɔt dɛn gladi “bikɔs dɛn bin no se Gɔd pik dɛn fɔ sɔfa fɔseka Jizɔs.”—Di Apɔsul Dɛn Wok [Akt] 5:​41.

¹⁹ Tide, Jiova in pipul dɛnsɛf de gladi we dɛn de bia pan ɔl we pipul dɛn de mek dɛn sɔfa fɔseka Jizɔs in nem. (Rid Jems 1:​2-4.) Jɔs lɛk di apɔsul dɛn, wi nɔ kin gladi we pipul dɛn de mek wi sɔfa. Bɔt if wi kɔntinyu fɔ fetful to Jiova, i go gi wi di kɔrej we wi nid fɔ bia. Tink bɔt wetin bin apin to Ɛnrik Dɔnik ɛn in brɔda. Insay Ɔgɔst 1944, dɛn bin sɛn dɛn go na wan kamp usay di Nazi gɔvmɛnt bin de kɛr dɛn prizina dɛn go. Di pipul dɛn we bin de mek dɛn sɔfa bin tɔk se: “Wi nɔ ebul fɔ mek dɛn du ɛnitin. Di day we dɛn de day fɔ wetin dɛn biliv de mek dɛn gladi.” Ɛnrik bin ɛksplen se: “Pan ɔl we a nɔ bin want fɔ day fɔ wetin a biliv, fɔ sɔfa wit kɔrej ɛn ɔnɔ bikɔs a de biɛn Jiova de mek a gladi.” I bin kɔntinyu fɔ tɔk se: “We a bin de pre ɔltɛm, dat bin mek a kam nia Jiova, ɛn Jiova bin mek a no se a kin abop pan am fɔ ɛp mi.”

20. Wetin mek wi gladi fɔ sav “di Gɔd we gladi ɔltɛm”?

²⁰ We Jiova we na “di Gɔd we gladi ɔltɛm,” gladi fɔ wi, wi kin gladi ilɛksɛf pipul dɛn de mek wi sɔfa, wi fambul dɛn nɔ want wi fɔ sav Jiova, wi sik, ɔ wi dɔn ol. (Fɔs Lɛta to Timoti 1:​11, NW) Wi go gladi bikɔs wi Gɔd “we nɔ de lay” dɔn prɔmis fɔ du fayn fayn tin dɛn fɔ wi. (Taytɔs 1:​2) We Jiova du wetin i bin dɔn prɔmis, wi nɔ go ivin mɛmba di prɔblɛm dɛn we de mit wi naw. Infakt, wi nɔ go ivin imajin aw wɔndaful layf go tan lɛk na Paradays ɛn aw wi go gladi! Fɔ tru, wi “go gɛt wetin PAPA GƆD prɔmis [wi] ɛn ɛnjɔy pis.”—Sam 37:​11.