Wetin Na Gɔd in Kiŋdɔm?

Di mɛsej we impɔtant pas ɔl na di Baybul na Gɔd in Kiŋdɔm. Jiova go yuz da Kiŋdɔm de fɔ du wetin i bin want fɔ du fɔ mɔtalman. Wetin na di Kiŋdɔm? Aw wi no se i dɔn bigin rul? Wetin i dɔn ɔlrɛdi du? Ɛn wetin i go du tumara bambay? Dis lɛsin ɛn di nɛks tu lɛsin dɛn go ansa dɛn kwɛstyɔn dɛn de.

1. Wetin na Gɔd in Kiŋdɔm? Udat na in Kiŋ?

Di Kiŋdɔm na gɔvmɛnt we Jiova Gɔd mek. In Kiŋ na Jizɔs, ɛn i de rul frɔm ɛvin. (Matyu 4:​17; Jɔn 18:​36) Di Baybul tɔk bɔt Jizɔs se: “I go rul as Kiŋ . . . sote go.” (Lyuk 1:​32, 33) As Kiŋ fɔ Gɔd in Kiŋdɔm, Jizɔs go rul ɔlman we de na di wɔl.

2. Udat dɛn go rul wit Jizɔs?

Nɔto Jizɔs in wangren de rul. Pipul dɛn frɔm “ɔl di trayb dɛn, pipul dɛn, neshɔn dɛn,” ɛn we de “tɔk difrɛn difrɛn langwej . . . go rul as kiŋ dɛn oba di wɔl.” (Rɛvɛleshɔn 5:​9, 10) Ɔmɔs pipul dɛn go rul wit Jizɔs? Frɔm di tɛm we Jizɔs kam na di wɔl, bɔku bɔku pipul dɛn dɔn bi in disaypul. Bɔt na dɛn ɔl go rul wit am? Nɔ! Na jɔs 144,000 pan dɛn go go na ɛvin fɔ rul wit am. (Rid Rɛvɛleshɔn 14:​1-4.) Ɔl di ɔda wan dɛn na di wɔl go bi sitizin dɛn na di Kiŋdɔm.​—Sam 37:​29.

3. Aw Gɔd in Kiŋdɔm bɛtɛ pas mɔtalman gɔvmɛnt dɛn?

Pan ɔl we mɔtalman rula dɛn de tray fɔ du gud tin dɛn, dɛn nɔ gɛt di pawa fɔ du ɔltin we dɛn want. As tɛm de go dɛn kin chenj dɛn, ɛn di wan dɛn we de kam afta dɛn nɔ kin bisin bɔt pipul dɛn, ɛn dɛn nɔ kin want fɔ ɛp dɛn. Bɔt Jizɔs we na di Rula fɔ Gɔd in Kiŋdɔm, go rul sote go. Gɔd dɔn “mek wan kiŋdɔm we dɛn nɔ go ɛva pwɛl.” (Daniɛl 2:​44, NWT) Jizɔs go rul oba di wan ol wɔl, ɛn i nɔ go trit wan pɔsin bɛtɛ pas ɔda pɔsin. I gɛt lɔv, i gud, ɛn i de du tin tret, ɛn i go tich pipul dɛn fɔ trit dɛnsɛf di sem we, dat na fɔ trit dɛn wit lɔv, jɔstis, ɛn du gud.​—Rid Ayzaya 11:​9.

4. Wan pawaful gɔvmɛnt go rul di wan ol wɔl

Jizɔs Krays gɛt mɔ pawa fɔ rul pas ɛni ɔda rula we bin dɔn ɛva de. Rid Matyu 28:​18, dɔn una tɔk bɔt dis kwɛstyɔn:

• Aw Jizɔs in pawa bɛtɛ pas ɛni mɔtalman rula?

Mɔtalman gɔvmɛnt kin chenj ɔltɛm, ɛn na smɔl pat na di wɔl nɔmɔ ɛni wan pan dɛn kin rul. Wetin wi go se bɔt Gɔd in Kiŋdɔm? Rid Daniɛl 7:​14, dɔn una tɔk bɔt dɛn kwɛstyɔn dɛn ya:

• Wetin mek i fayn we Gɔd in Kiŋdɔm “nɔ go ɛva pwɛl”?

• Wetin mek i fayn we i go rul oba di wan ol wɔl?

5. Mɔtalman gɔvmɛnt fɔ kɔmɔt

Wetin mek mɔtalman gɔvmɛnt dɛn fɔ kɔmɔt ɛn Gɔd in Kiŋdɔm fɔ bigin rul? Ple di VIDIO, dɔn una tɔk bɔt di kwɛstyɔn we de dɔŋ.

VIDIO: Wetin Na Gɔd in Kiŋdɔm?​—Shɔt Pat (1:​41)

• Wetin dɔn apin we mɔtalman dɛn dɔn de rul?

Rid Ɛkliziastis 8:​9, dɔn una tɔk bɔt dɛn kwɛstyɔn dɛn ya:

• Yu tink se Gɔd in Kiŋdɔm fɔ tek mɔtalman gɔvmɛnt in ples? Wetin mek?

6. Gɔd in Kiŋdɔm gɛt rula dɛn we ɔndastand wi

Bikɔs wi Kiŋ, Jizɔs, bin dɔn liv as mɔtalman, i de “ɔndastand di say dɛn we wi wik.” (Ibruz 4:​15) Na Jiova pik di 144,000 man ɛn uman dɛn we go rul wit Jizɔs, ɛn i pik dɛn frɔm “ɔl di trayb dɛn, pipul dɛn, neshɔn dɛn, ɛn dɛn bin de tɔk difrɛn difrɛn langwej.”​—Rɛvɛleshɔn 5:​9.

• Yu gladi fɔ no se Jizɔs ɛn ɔl di wan dɛn we go rul wit am no wetin i min fɔ liv as mɔtalman? Wetin mek?

7. Gɔd in Kiŋdɔm gɛt lɔ dɛn we bɛtɛ pas ɛni mɔtalman gɔvmɛnt

Gɔvmɛnt dɛn de mek lɔ dɛn we fɔ bɛnifit ɛn protɛkt dɛn sitizin dɛn. Gɔd in Kiŋdɔm bak gɛt lɔ dɛn we in sitizin dɛn fɔ obe. Rid 1 Kɔrintians 6:​9-​11, dɔn una tɔk bɔt dɛn kwɛstyɔn dɛn ya:

• Aw yu tink se di wɔl go tan lɛk we ɔlman de liv in layf di we aw Gɔd want?a

• Yu tink se i mek sɛns we Jiova de ɛkspɛkt sitizin dɛn na in Kiŋdɔm fɔ rɛspɛkt dɛn lɔ dɛn ya? Wetin mek?

• Wetin sho se pipul dɛn we nɔ de obe dɛn lɔ dɛn ya kin chenj?​—Rid vas 11.

WETIN YU DƆN LAN?

Gɔd in Kiŋdɔm na rial gɔvmɛnt we de na ɛvin ɛn we go rul oba di wan ol wɔl.

Rivyu

• Udat dɛn go rul na Gɔd in Kiŋdɔm?

• Aw Gɔd in Kiŋdɔm bɛtɛ pas ɛni mɔtalman gɔvmɛnt?

• Wetin na sɔm tin dɛn we Jiova ɛkspɛkt di sitizin dɛn na in Kiŋdɔm fɔ du?

DU MƆ RISACH

Lan bɔt wetin Jizɔs bin tich bɔt usay di Kiŋdɔm go de.

“Gɔd in Kiŋdɔm De na Yu At?” (Atikul na di wɛbsayt)

Wetin mek Jiova Witnɛs dɛn disayd fɔ sɔpɔt Gɔd in Kiŋdɔm pas fɔ sɔpɔt mɔtalman gɔvmɛnt?

Dɛn Nɔ Kɔmɔt Biɛn Gɔd in Kiŋdɔm (1:​43)

Lan bɔt wetin di Baybul se bɔt di 144,000 pipul dɛn we Jiova dɔn pik fɔ go rul wit Jizɔs.

“Udat dɛn De Go na Ɛvin?” (Atikul na di wɛbsayt)

Wetin ɛp wan uman we de na prizin fɔ biliv tranga wan se na Gɔd nɔmɔ go mek jɔstis de na di wɔl?

“Aw A Fɛn di Ansa to Injɔstis” (Awek!, Novɛmba 2011)