Yu Go Ebul Tich Pipul dɛn fɔ Bi Disaypul?

 1. Wetin Jiova dɔn du fɔ yu?

AW YU bi wan pan Jiova Witnɛs dɛn? Sɔntɛm yu yɛri “di gud nyuz” frɔm yu mama ɛn papa, yu wokmet ɔ skulmet, ɔ we Jiova Witnɛs dɛn bin go prich frɔm os to os. (Mak 13:​10) Dɔn, pɔsin bin spɛn bɔku tɛm ɛn ɛnaji fɔ stɔdi di Baybul wit yu. We una bin de stɔdi, yu kam fɔ lɛk Jiova ɛn yu lan se i lɛk yu. Jiova briŋ yu na di trut, ɛn naw, bikɔs yu na Jizɔs Krays in disaypul, yu gɛt di op fɔ de sote go. (Jɔn 6:​44) Wan dawt nɔ de se yu gladi we Jiova yuz pɔsin fɔ tich yu di tru, ɛn we I tek yu as wan pan In savant dɛn.

 2. Wetin wi go tɔk bɔt insay dis atikul?

² Naw we wi no di tru, wi gɛt di big big ɔnɔ fɔ ɛp ɔda pipul dɛn fɔ kam jɔyn wi na di rod we go mek wi gɛt layf. Sɔntɛm, i izi fɔ mek wi prich to pipul dɛn, bɔt i nɔ kin izi fɔ mek wi aks pɔsin fɔ stɔdi di Baybul wit wi ɛn fɔ kɔndɔkt Baybul stɔdi wit pɔsin. Na so yu de fil? If na so i bi, sɔntɛm sɔm tin dɛn we dis atikul go tɔk bɔt go ɛp yu. Wi go tɔk bɔt wetin mek wi want fɔ ɛp fɔ mek disaypul dɛn. Wi go tɔk bak bɔt aw wi go ebul sɔlv di prɔblɛm dɛn we mek i nɔ izi fɔ lɛ wi kɔndɔkt Baybul stɔdi. Fɔs, wi go tɔk bɔt wetin mek wi fɔ prich to pipul dɛn ɛn tich dɛn di gud nyuz.

 3. Wetin mek wi de prich?

³ We Jizɔs bin de na di wɔl, i bin tɛl in disaypul dɛn fɔ du tu tin dɛn. Fɔs, i tɛl dɛn fɔ prich di gud nyuz bɔt di Kiŋdɔm, ɛn i sho dɛn aw fɔ du am. (Mat. 10:​7; Lyuk 8:​1) Fɔ ɛgzampul, Jizɔs bin tɛl in disaypul dɛn wetin dɛn go du we pipul dɛn lisin to di Kiŋdɔm mɛsej ɛn wetin dɛn go du we pipul dɛn nɔ lisin to dɛn. (Lyuk 9:​2-5) I bin tɔk bak se in disaypul dɛn go prich to bɔku bɔku pipul dɛn ɛn na bɔku bɔku ples dɛn bay we i bin se dɛn go prich na “ɔl di neshɔn dɛn.” (Mat. 24:​14; Akt 1:​8) Ilɛk pipul dɛn lisin to di mɛsej ɔ dɛn nɔ lisin, Jizɔs bin tɛl in disaypul dɛn fɔ prich bɔt Gɔd in Kiŋdɔm ɛn wetin di Kiŋdɔm go du.

 4. Akɔdin to Matyu 28:​18-20, wetin bak wi fɔ du apat frɔm we wi de prich bɔt di Kiŋdɔm?

⁴ Wetin na di sɛkɔn wok we Jizɔs bin tɛl in disaypul dɛn fɔ du? I bin tɛl in disaypul dɛn fɔ tich pipul dɛn fɔ du ɔl di tin dɛn we i tɛl dɛn. Sɔntɛm sɔm pipul dɛn go se na di fɔstɛm Kristian dɛn nɔmɔ Jizɔs bin tɛl fɔ prich ɛn tich, bɔt na so i bi? Nɔ-o, Jizɔs bin tɔk se dis wok we impɔtant go ivin kɔntinyu to wi tɛm, “te di tɛm want fɔ dɔn.” (Rid Matyu 28:​18-20.) I go bi se di tɛm we Jizɔs bin apia to pas 500 pan in disaypul dɛn, na da tɛm de i bin tɛl dɛn fɔ du dis wok. (1 Kɔr. 15:​6) Ɛn insay di vishɔn we Jizɔs bin gi Jɔn, i bin tɔk klia wan se i want mek ɔl in disaypul dɛn ɛp ɔda pipul dɛn fɔ lan bɔt Jiova.—Rɛv. 22:​17.

 5. Akɔdin to 1 Kɔrintians 3:​6-9, us ɛgzampul we Pɔl yuz fɔ sho aw di prichin ɛn tichin wok kɔnɛkt?

⁵ Di apɔsul Pɔl bin kɔmpia di wok fɔ mek disaypul to we pɔsin de plant gadin, i sho se wi nɔ fɔ jɔs plant sid dɛn bɔt wi fɔ du mɔ. I bin mɛmba di Kristian dɛn na Kɔrint se: “A plant, Apɔlɔs wata . . . Una na Gɔd in fam we i de wok pan.” (Rid 1 Kɔrintians 3:​6-9.) Wi na wokman dɛn na “Gɔd in fam.” So wi de plant di sid we wi de prich, ɛn wi de wata dɛn we wi de tich. (Jɔn 4:​35) Bɔt wi no se na Gɔd de mek di sid gro, dat min se na in de briŋ pipul dɛn kam to am.

 6. We wi de tich pipul dɛn, wetin wi fɔ du fɔ ɛp dɛn?

⁶ Wi de luk fɔ “di wan dɛn we rili sho se dɛn want fɔ gɛt layf we go de sote go.” (Akt 13:​48) Fɔ ɛp dɛn pipul dɛn de fɔ bi disaypul, wi fɔ ɛp dɛn fɔ (1) ɔndastand, (2) biliv, ɛn (3) du ɔl di tin dɛn we dɛn de lan na di Baybul. (Jɔn 17:​3; Kol. 2:​6, 7; 1 Tɛs. 2:​13) Ɔlman na di kɔngrigeshɔn kin ɛp Baybul studɛnt dɛn bay we dɛn de sɛt fayn ɛgzampul fɔ nyu wan dɛn, dat na we dɛn sho dɛn lɔv ɛn wɛlkɔm dɛn we dɛn atɛnd mitin. (Jɔn 13:​35) Di wan we de kɔndɔkt di Baybul stɔdi gɛt fɔ spɛn bɔku tɛm ɛn ɛnaji fɔ ɛp di studɛnt fɔ chenj “tin dɛn we rili rili strɔng,” dat na di tin dɛn we i biliv ɔ we i de du. (2 Kɔr. 10:​4, 5) Sɔntɛm, i go tek lɔng tɛm fɔ ɛp pɔsin fɔ mek dɛn chenj dɛn de na in layf we go mek i kwalifay fɔ baptayz. Bɔt di tin dɛn we wi go du nɔ go go fɔ natin.

 7. Wetin mek wi de prich to ɔda pipul dɛn ɛn tich dɛn bɔt di gud nyuz?

⁷ Wetin mek wi de prich to pipul dɛn ɛn tich dɛn fɔ bi disaypul? Fɔs, na bikɔs wi lɛk Jiova. We yu de du yu bɛst fɔ obe di kɔmand fɔ prich ɛn mek disaypul dɛn, yu de pruv se yu lɛk Gɔd. (1 Jɔn 5:​3) Tink bɔt dis: Yu de prich to pipul dɛn bikɔs yu lɛk Jiova. I bin izi fɔ obe dis kɔmand? Sɔntɛm i nɔ bin izi. We yu bin go prich frɔm os to os fɔ di fɔs tɛm, yu bin de fred? Wan dawt nɔ de se yu bin de fred! Bɔt yu no se na dis wok Jizɔs want yu fɔ du, ɛn yu du wetin i tɛl yu. I go mɔs bi se as tɛm de go, i dɔn izi fɔ mek yu du di prichin wok. Bɔt aw yu de fil fɔ kɔndɔkt Baybul stɔdi? Yu kin fred we yu de tink bɔt dat? Sɔntɛm. Bɔt if yu pre to Jiova ɛn aks am fɔ mek i ɛp yu fɔ gɛt maynd fɔ tɛl pɔsin se yu go want fɔ stɔdi di Baybul wit am, I go ɛp yu we yu want fɔ du dat.

 8. Akɔdin to Mak 6:​34, wetin na di ɔda rizin we mek wi de tich ɔda pipul dɛn?

⁸ Sɛkɔn, bikɔs wi lɛk pipul dɛn na dat mek wi de tich dɛn di trut. Fɔ ɛgzampul, Jizɔs ɛn in disaypul dɛn bin dɔn rili taya bikɔs dɛn bin dɔn prich fɔ lɔng tɛm. Dɛn bin nid ples usay dɛn go rɛst, bɔt bɔku pipul dɛn bin fɛn dɛn. Jizɔs bin sɔri fɔ di pipul dɛn ɛn i bigin fɔ tich dɛn “bɔku tin” dɛn. (Rid Mak 6:​34.) I bin wok tranga wan pan ɔl we i bin taya. Wetin mek? Na bikɔs Jizɔs bin no aw di pipul dɛn bin de fil. I bin want fɔ ɛp dɛn bikɔs i si se dɛn bin de sɔfa ɛn dɛn nid fɔ gɛt op. Pipul dɛn tide sɛf kin gɛt bɔku prɔblɛm dɛn ɛn dɛn nid fɔ gɛt op, pan ɔl we i go fiba lɛk se dɛn gladi ɛn dɛn satisfay wit dɛn layf. Dɛn fiba lɛk ship we dɔn lɔs ɛn we nɔ gɛt shɛpad fɔ gayd dɛn. Apɔsul Pɔl bin se pipul dɛn lɛk dis nɔ sabi Gɔd ɛn dɛn nɔ gɛt wan op. (Ɛfi. 2:​12) Dɛn de na “di rod we . . . go mek pɔsin ɛnd-ɔp fɔ day”! (Mat. 7:​13) We wi tink bɔt aw pipul dɛn na wi tɛritri nid fɔ lan bɔt Gɔd, lɔv ɛn sɔri-at kin mek wi want fɔ ɛp dɛn. Ɛn di bɛst tin we wi go du fɔ ɛp dɛn na fɔ stɔdi di Baybul wit dɛn.

 9. Akɔdin to Filipians 2:​13, aw Jiova go ɛp yu?

⁹ Sɔntɛm yu de fred fɔ stɔdi di Baybul wit pipul dɛn bikɔs yu no se yu gɛt fɔ spɛn bɔku tɛm fɔ pripia ɛn fɔ kɔndɔkt di stɔdi. If na so yu de fil, na fɔ tɛl Jiova. Aks am fɔ mek i ɛp yu fɔ mek yu go want fɔ fɛn pɔsin we yu go stɔdi di Baybul wit. (Rid Filipians 2:​13.) Apɔsul Jɔn bin tɛl wi se Gɔd go ansa prea dɛn we gri wit wetin I want. (1 Jɔn 5:​14, 15) So biliv tranga wan se Jiova go ɛp yu fɔ mek yu go want fɔ tich pipul dɛn.

10-11. Wetin kin mek wi fred fɔ kɔndɔkt Baybul stɔdi?

¹⁰ Wi no se i rili impɔtant fɔ tich, bɔt i nɔ kin izi fɔ wi fɔ du ɔl wetin wi want fɔ du fɔ mek disaypul dɛn. Lɛ wi tɔk bɔt sɔm pan di prɔblɛm dɛn ɛn aw wi go sɔlv dɛn.

¹¹ Sɔntɛm wi nɔ ebul fɔ du ɔl wetin wi want fɔ du. Fɔ ɛgzampul, sɔm pɔblisha dɛn dɔn ol ɔ dɛn gɛt wɛlbɔdi prɔblɛm. Yu na wan pan dɛn pɔblisha dɛn ya? If na so i bi, lɛ wi tɔk bɔt wan pan di lɛsin dɛn we wi dɔn lan frɔm di COVID-19 pandɛmik. Wi dɔn lan se wi kin ebul kɔndɔkt Baybul stɔdi dɛn bay we wi de yuz wi fon ɔ ɔda ilɛktronik tin dɛn! So yu go ebul fɔ stat ɛn kɔndɔkt Baybul stɔdi na yu os, ɛn i go bi se na dat go izi fɔ yu. Ɛn ɔda gud tin de bak. Sɔm pipul dɛn go want fɔ stɔdi di Baybul, bɔt dɛn nɔ kin de na os di tɛm we wi brɔda dɛn kin go prich. Bɔt sɔntɛnde, dɛn kin de na os ali mɔnin ɔ let na nɛt. Yu go ebul stɔdi di Baybul wit pipul dɛn, dɛn tɛm dɛn de? Na nɛt Jizɔs bin tich Nikodimɔs bikɔs na da tɛm de Nikodimɔs bin want.—Jɔn 3:​1, 2.

12. Wetin de gi wi kɔnfidɛns se wi go bi gud ticha?

¹² Sɔntɛm wi kin tink se wi nɔ go ebul fɔ kɔndɔkt Baybul stɔdi. Sɔntɛm wi kin fil se wi nid fɔ lan mɔ ɔ bi gud gud ticha bifo wi bigin stɔdi wit pɔsin. If na so yu de fil, lɛ wi tɔk bɔt tri tin dɛn we go mek yu gɛt kɔnfidɛns se yu go ebul stɔdi wit pɔsin. Fɔs, Jiova de si se yu kwalifay fɔ tich ɔda pipul dɛn. (2 Kɔr. 3:​5) Sɛkɔn, Jizɔs, we de “oba ɔltin na ɛvin ɛn na dis wɔl,” dɔn tɛl yu fɔ tich. (Mat. 28:​18) Ɛn tɔd, yu kin abop pan ɔda pipul dɛn fɔ ɛp yu. Na wetin Jizɔs in Papa bin de tich am, na in insɛf bin de tɔk ɛn tich, so yusɛf go ebul fɔ du dat. (Jɔn 8:​28; 12:​49) Pantap dat, yu kin aks yu fil savis grup ovasia, ɛkspiriɛns payɔnia, ɔ pɔblisha fɔ ɛp yu fɔ stat ɛn kɔndɔkt Baybul stɔdi. Wan we we wi go gɛt kɔnfidɛns fɔ bi gud ticha na bay we wi jɔyn wan pan dɛn pɔblisha dɛn ya we dɛn de kɔndɔkt Baybul stɔdi.

13. Wetin mek wi fɔ rɛdi fɔ yuz difrɛn we dɛn fɔ tich?

¹³ Sɔntɛm wi kin si am se i nɔ izi fɔ yuz nyu we dɛn ɛn nyu tin dɛn fɔ tich. Di we aw wi de kɔndɔkt Baybul stɔdi dɛn naw dɔn chenj. Di we aw wi de pripia ɛn kɔndɔkt stɔdi wit wi men buk we gɛt di taytul, Ɛnjɔy Layf Sote Go!, difrɛn frɔm di we aw wi bin de du am trade. Wi kin rid smɔl paregraf dɛn ɛn tɔk mɔ wit di studɛnt. We wi de tich, wi de yuz mɔ vidio dɛn ɛn ilɛktronik tin dɛn, lɛk JW Laybri. If yu nɔ sabi aw fɔ yuz dɛn tin dɛn ya, na fɔ tɔk to pɔsin we go ɛp yu fɔ mek yu lan aw fɔ yuz dɛn. Mɔtalman kin lɛk fɔ du tin dɛn we i dɔn yus fɔ du. I nɔ kin izi fɔ mek wi chenj to nyu we dɛn fɔ du tin. Bɔt wit Jiova in ɛp ɛn ɛp frɔm ɔda pipul dɛn, yu go si se i izi fɔ chenj ɛn ivin ɛnjɔy fɔ stɔdi wit pipul dɛn. Wan payɔnia bin tɔk se, dis kayn we fɔ stɔdi “rili fayn fɔ di studɛnt ɛn di ticha.”

14. Wetin wi fɔ mɛmba we wi de wok na tɛritri we pipul dɛn nɔ de lisin to wi, ɛn aw 1 Kɔrintians 3:​6, 7 de ɛnkɔrej wi?

¹⁴ Sɔntɛm wi de na tɛritri usay i nɔ izi fɔ stat Baybul stɔdi dɛn. Sɔm pipul dɛn nɔ kin want fɔ lisin to wi mɛsej ɔ dɛn kin ivin de agens wi. Wetin go ɛp wi fɔ kɔntinyu fɔ biliv se dɛn kayn pipul dɛn de go lisin to wi mɛsej? Mɛmba se pipul dɛn layf kin chenj kwik kwik wan insay dis wikɛd wɔl, ɛn di wan dɛn we nɔ bin de lisin to wi mɛsej kin kam fɔ no se dɛn nid fɔ lan bɔt Gɔd. (Mat. 5:​3) Sɔm pan di wan dɛn we nɔ bin de tek wi pɔblikeshɔn dɛn trade dɔn gri fɔ stɔdi di Baybul wit wi. Wi no bak se Jiova na di Masta we gɛt di tin dɛn fɔ avɛst. (Mat. 9:​38) I want mek wi kɔntinyu fɔ plant ɛn wata, bɔt na in na di Wan we de mek wetin wi plant gro. (1 Kɔr. 3:​6, 7) Ɛn i de rili ɛnkɔrej wi we wi mɛmba se pan ɔl we wi nɔ ebul fɔ kɔndɔkt Baybul stɔdi naw, Jiova de blɛs wi bikɔs wi de tray tranga wan fɔ ɛp pipul dɛn, nɔto bikɔs wi gi bɔku pipul dɛn wi pɔblikeshɔn dɛn ɔ wi stɔdi di Baybul wit dɛn!b

15. Aw Jiova de fil we pɔsin gri fɔ stɔdi di Baybul ɛn du wetin i de lan?

¹⁵ Jiova kin gladi we pɔsin de lisin to di tru tin we de na di Baybul ɛn we i de tɛl ɔda pipul dɛn bɔt wetin i dɔn lan. (Prɔv. 23:​15, 16) I go mɔs bi se Jiova de gladi pasmak we i de si in pipul dɛn de prich ɛn tich wit zil tide! Fɔ ɛgzampul, pan ɔl we pandɛmik afɛkt di wan ol wɔl insay di 2020 savis ia, wi bin kɔndɔkt 7,705,765 Baybul stɔdi dɛn, we bin ɛp 241,994 pipul dɛn fɔ gi dɛn layf to Jiova ɛn baptayz. Ɛn dɛn nyu disaypul dɛn ya go kɔndɔkt Baybul stɔdi dɛn ɛn mek mɔ disaypul dɛn. (Lyuk 6:​40) Wi nɔ gɛt wan dawt fɔ se wi de mek Jiova gladi we wi de tich ɔda pipul dɛn fɔ bi disaypul.

16. Wetin na wan fayn gol we wi go sɛt?

¹⁶ Fɔ mek disaypul na wok we nɔ kin izi fɔ du, bɔt Jiova go ɛp wi fɔ mek wi jɔyn fɔ du di wok fɔ tich nyu wan dɛn fɔ lɛk wi Papa we de na ɛvin. Wi go ebul sɛt gol fɔ stat ɛn kɔndɔkt Baybul stɔdi ilɛksɛf na wit wan pɔsin? Wi go sɔprayz fɔ si wetin go apin if wi aks ɔlman we wi de mit if dɛn go lɛk fɔ stɔdi di Baybul wit wi. Wi shɔ se Jiova go blɛs ɔl wetin wi de du.

17. Aw wi go fil we wi ebul fɔ kɔndɔkt Baybul stɔdi?

¹⁷ Na big big ɔnɔ wi gɛt fɔ prich ɛn fɔ tich di trut to ɔda pipul dɛn! Dis wok de mek wi gɛt tru tru gladi-at. Apɔsul Pɔl bin ɛp bɔku pipul dɛn na Tɛsalonayka fɔ bi disaypul dɛn. I bin tɔk aw i bin fil we i se: “Udat na wi op, wi gladi-at, wi krawn we go mek wi gladi bifo wi Masta Jizɔs di tɛm we i go de wit wi? Na una, nɔto so? Fɔ tru, una na wi glori ɛn gladi-at.” (1 Tɛs. 2:​19, 20; Akt 17:​1-4) Bɔku pipul dɛn tide dɔn fil da sem we de. Wan sista we nem Stɛfni wit in man, we dɔn ɛp bɔku pipul dɛn fɔ baptayz bin se, “No ɔda tin nɔ de mek wi gladi mɔ pas fɔ stɔdi di Baybul wit pipul dɛn te dɛn disayd fɔ gi dɛn layf to Jiova.”