Sɔpɔt di Kɔngrigeshɔn We Yu De

Ɔlsay na di wɔl, bɔku pipul dɛn gladi fɔ wɔship Jiova na bɔku kɔngrigeshɔn dɛn. Dɛn gladi fɔ di tin dɛn we dɛn de lan ɛn di advays we dɛn de gɛt, ɛn dɛn kin gladi bak fɔ sɔpɔt di kɔngrigeshɔn difrɛn we dɛn. Na da we de yu de fil bɔt yu kɔngrigeshɔn?

1. Wetin na sɔm we dɛn we yu go yuz yu tɛm ɛn trɛnk fɔ sɔpɔt di kɔngrigeshɔn?

Wi ɔl kin ebul fɔ ɛp na di kɔngrigeshɔn. Fɔ ɛgzampul, pipul dɛn de na yu kɔngrigeshɔn we dɔn ol ɔ we sik ɛn nɔ ebul du ɔltin fɔ dɛnsɛf? Yu go ebul fɔ ɛp dɛn fɔ go mitin? Ɔ yu go ebul fɔ ɛp dɛn fɔ du ɔda tin dɛn lɛk fɔ go bay bay fɔ dɛn ɔ du os wok fɔ dɛn? (Rid Jems 1:​27.) Wi kin gri bak fɔ ɛp fɔ klin ɛn kia fɔ wi Kiŋdɔm Ɔl. Nɔbɔdi nɔ go fos wi fɔ du dɛn tin dɛn de. Na di lɛk we wi lɛk Gɔd ɛn wi brɔda ɛn sista dɛn na in go mek wi “rɛdi” fɔ du dat.​—Sam 110:​3, NWT.

Di wan dɛn we dɔn baptayz as Jiova Witnɛs kin sɔpɔt di kɔngrigeshɔn ɔda we dɛn. Brɔda dɛn we fit wetin di Baybul se kin ɛp na di kɔngrigeshɔn we dɛn bi ministerial savant, ɛn leta we dɛn bi ɛlda. Brɔda ɛn sista dɛn kin sɔpɔt di prichin wok bay we dɛn bi payɔnia. Ɔda Jiova Witnɛs dɛn kin ɛp fɔ bil say dɛn fɔ wɔship ɔ bay we dɛn go na difrɛn say dɛn usay kɔngrigeshɔn nid ɛp.

2. Aw wi go yuz wi mɔni ɛn prɔpati dɛn fɔ sɔpɔt di kɔngrigeshɔn?

Wi kin “ɔnɔ Jiova wit di valyu tin dɛn we [wi] gɛt.” (Prɔvabs 3:​9, NWT) Wi kin gladi fɔ yuz wi mɔni ɛn ɔda tin dɛn fɔ sɔpɔt di kɔngrigeshɔn we wi de ɛn di prichin wok we wi de du ɔlsay na di wɔl. (Rid 2 Kɔrintians 9:​7) Dɛn kin yuz wi kɔntribyushɔn fɔ sɔpɔt dizasta rilif. Bɔku pipul dɛn kin disayd fɔ “put sɔntin na kɔna” as kɔntribyushɔn. (Rid 1 Kɔrintians 16:​2.) Wi kin gi kɔntribyushɔn bay we wi put mɔni na di kɔntribyushɔn bɔks dɛn we de na di say we wi kin ol mitin, ɔ wi kin du am ɔnlayn na donate.jw.org. Jiova de gi wi chans fɔ sho se wi lɛk am bay di we aw wi de disayd fɔ yuz di tin dɛn we wi gɛt.

LAN MƆ

3. Wi kin yuz di tin dɛn we wi gɛt

Jiova ɛn Jizɔs lɛk di wan dɛn we de gladi fɔ gi. Fɔ ɛgzampul, Jizɔs bin tɔk fayn bɔt wan uman we in man dɔn day ɛn we nɔ bin gɛt bɛtɛ mɔni, bɔt stil i bin gi sɔntin to Jiova. Rid Lyuk 21:​1-4, dɔn una tɔk bɔt dɛn kwɛstyɔn dɛn ya:

• Wi nid fɔ gi bɔku bɔku mɔni as kɔntribyushɔn fɔ mek Jiova gladi?

• Aw yu tink se Jiova ɛn Jizɔs de fil we wi gi kɔntribyushɔn wit ɔl wi at?

Fɔ lan mɔ bɔt aw dɛn kin yuz wi kɔntribyushɔn dɛn, ple di VIDIO. Dɔn una tɔk bɔt di kwɛstyɔn we de dɔŋ.

VIDIO: ‘Gift fɔ Jiova’ (4:​47)

• Aw dɛn de yuz wi kɔntribyushɔn dɛn fɔ bɛnifit di kɔngrigeshɔn dɛn we de ɔlsay na di wɔl?

4. Wi kin gri fɔ ɛp

Insay di tɛm we dɛn bin de rayt di Baybul, di wan dɛn we bin de wɔship Jiova bin gɛt zil fɔ wok ɛn kia fɔ di ples dɛn we dɛn bin de mit fɔ wɔship. Bɔt nɔto mɔni nɔmɔ dɛn bin de gi. Rid Sɛkɛn Kronikul 34:​9-​11, dɔn una tɔk bɔt dis kwɛstyɔn:

• Aw ɔl di Izrɛlayt dɛn bin de ɛp fɔ kia fɔ Jiova in os, ɔ di say we dɛn bin de mit fɔ wɔship?

Fɔ si aw Jiova Witnɛs dɛn de fala da fɔstɛm ɛgzampul de, ple di VIDIO. Dɔn una tɔk bɔt di kwɛstyɔn dɛn we de dɔŋ.

VIDIO: Wetin Wi Go Du fɔ Klin ɛn Kia fɔ di Say dɛn we Wi De Wɔship (3:​31)

• Wetin mek i impɔtant fɔ mek wi kɔntinyu fɔ klin wi Kiŋdɔm Ɔl ɛn kia fɔ am?

• Wetin na sɔm we dɛn we yu go ɛp fɔ du dat?

5. Brɔda dɛn kin wok tranga wan fɔ kwalifay fɔ du mɔ wok dɛn na di kɔngrigeshɔn

Di Skripchɔ dɛn ɛnkɔrej Kristian man dɛn fɔ du ɔl wetin dɛn ebul fɔ sɔpɔt di kɔngrigeshɔn. Fɔ si wan ɛgzampul, ple di VIDIO. Dɔn una ansa di kwɛstyɔn we de dɔŋ.

VIDIO: Brɔda Dɛn​—Tray fɔ Du Mɔ fɔ Jiova (5:​19)

• Insay di vidio, aw Rayan bin du mɔ fɔ sɔpɔt di kɔngrigeshɔn?

Di Baybul ɛksplen wetin de mek brɔda kwalifay fɔ bi ministerial savant ɛn ɛlda. Rid 1 Timoti 3:​1-​13, dɔn una tɔk bɔt dɛn kwɛstyɔn dɛn ya:

• If brɔda want fɔ bi ministerial savant ɔ ɛlda, wetin i fɔ du?

• Wetin in famili fɔ du?​—Rid vas 4 ɛn 11.

• We brɔda tray fɔ du ɔl di tin dɛn we di Baybul se go mek i kwalifay fɔ bi ɛlda ɔ ministerial savant, aw ɔlman na di kɔngrigeshɔn de bɛnifit?

WETIN YU DƆN LAN?

Jiova de rili gladi fɔ si se wi de yuz wi tɛm, trɛnk, ɛn di tin dɛn we wi gɛt fɔ sɔpɔt di kɔngrigeshɔn.

Rivyu

• Aw wi go yuz wi tɛm ɛn trɛnk fɔ sɔpɔt di kɔngrigeshɔn?

• Aw wi go yuz di tin dɛn we wi gɛt fɔ sɔpɔt di kɔngrigeshɔn?

• Us we dɛn yu go lɛk fɔ sɔpɔt di kɔngrigeshɔn?

DU MƆ RISACH

Lan wetin mek Gɔd nɔ want in savant dɛn fɔ pe tayt igen.

“Wetin di Baybul Se bɔt fɔ Pe Tayt?” (Atikul na di wɛbsayt)

Di Baybul sho sɔm wok dɛn we man dɛn gɛt rayt fɔ du. Bɔt wetin go apin if uman we baptayz go nid fɔ du dɛn wok dɛn ya?

“Aw Wi Fɔ Ɔndastand di Wok we di Wan dɛn we de Oba di Kɔngrigeshɔn De Du?” (Di Wachtawa, Fɛbwari 2021)

Lan bɔt sɔm brɔda dɛn we mek bɔku sakrifays dɛn fɔ mek dɛn kɛr buk ɛn magazin dɛn to dɛn kɔmpin Jiova Witnɛs dɛn.

Dɛn De Sheb Sheb Buk dɛn we De Tɔk bɔt di Baybul Insay Kongo (4:​25)

Lan bɔt aw wi de gɛt mɔni fɔ du wi wok ɛn aw dat difrɛn frɔm di we aw ɔda ɔganayzeshɔn dɛn de gɛt mɔni.

“Usay Jiova Witnɛs dɛn Kin Pul Mɔni fɔ Du Dɛn Wok?” (Atikul na di wɛbsayt)