‘Ɔl Udat De Du Wetin Jiova Want Go Gladi’

DAYANA, we na wan sista we dɔn pas 80 ia dɔn sɔfa bɔku tin dɛn biɛn tɛm ya. In man we bin gɛt wan sik we dɛn kɔl Alzima diziz ɛn we bin de na say we dɛn mek fɔ kia fɔ ol pipul dɛn bin day. In tu bɔypikin dɛn bak bin day, ɛn i bin de sɔfa wit kansa na in bɔbi. Bɔt we di brɔda ɛn sista dɛn kin si Dayana na di mitin dɛn ɔ fil savis, dɛn kin si se i gladi ɔltɛm.

I pas 43 ia we wan brɔda we nem Jɔn bin sav as travlin ovasia. Dis brɔda bin rili lɛk di wok we i bin de du, ɛn i nɔ ebul imajin se i go du ɛni ɔda tin. Bɔt i bin gɛt fɔ stɔp fɔ sav as travlin ovasia fɔ go kia fɔ wan in fambul we sik. We di brɔda ɛn sista dɛn we sabi Jɔn bin de mit am na asɛmbli ɛn kɔnvɛnshɔn dɛn, dɛn kin si se i nɔ chenj atɔl. I bin stil gɛt gladi-at.

Wetin yu tink se bin mek am pɔsibul fɔ mek Dayana ɛn Jɔn gɛt gladi-at? Aw pɔsin we de sɔfa go stil gɛt gladi-at? Yu tink se sɔmbɔdi go stil gladi if i nɔ de du di wok we i lɛk igen? Di Baybul gi wi di ansa. I se: “Lɛ ɔl udat de du wetin PAPA GƆD [“Jiova,” NW] want, gladi.” (Sam 64:​10) Wi go ɔndastand dis gud gud wan if wi no wetin de mek wi gɛt gladi-at sote go ɛn wetin go mek wi nɔ gɛt gladi-at.

Sɔm tin dɛn de we kin mek wi gɛt gladi-at. Fɔ ɛgzampul, tink bɔt man ɛn uman we rili lɛk dɛnsɛf ɛn dɛn mared. Ɔ tink bɔt sɔmbɔdi we bɔn pikin ɔ pɔsin we gɛt nyu wok insay Jiova in savis. Dɛn tin dɛn ya kin mek wi gladi bikɔs dɛn ɔl na gift frɔm Jiova. Na in mek mared, na in mek wi ebul bɔn pikin, ɛn na in gi wi wok fɔ du insay in ɔganayzeshɔn.—Jɛnɛsis 2:​18, 22; Sam 127:​3; Fɔs Lɛta To Timoti 3:​1.

Bɔt sɔm tin dɛn we kin mek wi gladi nɔ kin de sote go. I sɔri fɔ no se maredman ɔ mareduman nɔ kin fetful ɔ wan pan dɛn kin ivin day. (Izikɛl 24:​18; Ozie 3:​1) Pikin dɛn nɔ kin obe Gɔd ɛn ivin dɛn mama ɛn papa, ɛn sɔntɛnde dɛn kin ivin disfɛloship dɛn. Fɔ ɛgzampul, Samiɛl in bɔypikin dɛn nɔ bin gri fɔ sav Jiova. Ɛn Devid bin gɛt bɔku prɔblɛm dɛn insay in famili bikɔs i bin kɔmit sin wit Batshiba. (Fɔs Samiɛl 8:​1-3; Sɛkɛn Samiɛl 12:​11) We tin lɛk dis apin, i nɔ kin mek wi gɛt gladi-at bɔt i kin mek wi gɛt pwɛl at.

Semweso, sɔntɛnde wi nɔ kin kɔntinyu fɔ du di wok we wi kin du na Jiova in ɔganayzeshɔn bikɔs wi sik ɔ wi nid fɔ kia fɔ wi famili, ɔ bikɔs dɛn mek sɔm chenj na di ɔganayzeshɔn. Bɔku pan di wan dɛn we bin nid fɔ stɔp fɔ du dɛn wok na di ɔganayzeshɔn bin se dɛn rili mis di gladi-at we dɛn bin de gɛt.

Wi dɔn si klia wan se dɛn kayn gladi-at dɛn de nɔ kin de te go. So yu tink se gladi-at de we go las pan ɔl we wi gɛt prɔblɛm dɛn? Da kayn gladi-at de bikɔs Samiɛl, Devid, ɛn ɔda wan dɛn nɔ bin lɔs di gladi-at we dɛn bin gɛt pan ɔl we dɛn bin de sɔfa.

GLADI-AT WE DE LAS

Jizɔs bin no wetin gladi-at rili min. Bifo i kam na dis wɔl, di Baybul tɛl wi se i bin ‘gladi fɔ de wit Jiova ɔltɛm.’ (Prɔvabs 8:​30) Bɔt we i bin kam na dis wɔl, sɔntɛnde, tin nɔ bin izi fɔ am. Bɔt Jizɔs bin de gladi fɔ du wetin in Papa want. (Jɔn 4:​34) Wetin wi go tɔk bɔt di tɛm we i bin de day? Wi rid se: “Fɔseka di gladi-at we i bin no se i go gɛt, dat bin mek i bia di tɛm we dɛn bin nel am na di stik.” (Di Ibru Pipul Dɛn 12:​2, NW) So wi kin lan bɔku tin frɔm di tu tin dɛn we Jizɔs bin tɔk bɔt tru tru gladi-at.

Wan de, Jizɔs in 70 disaypul dɛn bin kam bak to am afta dɛn dɔn fɔ prich. Dɛn bin gladi bikɔs dɛn bin du bɔku tin dɛn, dɛn bin ivin drɛb dɛbul dɛn. Bɔt Jizɔs bin tɛl dɛn se: “Una nɔ fɔ gladi bikɔs dɛn dɛbul du wetin una tɛl dɛn fɔ du, bɔt una fɔ gladi bikɔs una nem dɔn rayt na ɛvin.” (Lyuk 10:​1-9, 17, 20) So fɔ lɛ Jiova gladi fɔ pɔsin impɔtant pas ɛnitin ɛn dat de mek pɔsin gɛt gladi-at pas ɛni ɔda spɛshal wok we i gɛt.

Wan ɔda tɛm, we Jizɔs bin de tɔk to bɔku pipul dɛn, wan uman we na Ju bin kɔle pan di we aw Jizɔs bin de tich, so i bin tɔk se in mama go gladi fɔ bɔn bɔy pikin lɛk am. Bɔt Jizɔs bin ansa am se nɔto so i bi “bɔt mɔ blɛsin de fɔ di pipul dɛn we yɛri Gɔd in wɔd ɛn du wetin Gɔd tɛl dɛn.” (Lyuk 11:​27, 28) We wi pikin dɛn de du wɛl, dat kin mek wi gɛt gladi-at. Bɔt di gladi-at we wi go gɛt sote go na we wi obe Jiova ɛn gɛt tayt padi biznɛs wit am.

Wi kin gɛt gladi-at we wi no se Jiova gladi fɔ wi. Ɛn pan ɔl we wi nɔ kin gladi we wi gɛt prɔblɛm, dat nɔ de mek wi nɔ fil dis kayn we. Bɔt if wi kɔntinyu fɔ de fetful wan pan ɔl we wi gɛt prɔblɛm dɛn, wi de gɛt gladi-at mɔ ɛn mɔ. (Lɛta Fɔ Rom 5:​3-5) Dɔn Jiova de gi in spirit to di wan dɛn we abop pan am, ɛn gladi-at na wan pan di kwaliti dɛn we Gɔd in spirit de gi. (Lɛta Fɔ Galeshya 5:​22) Dat ɛp wi fɔ ɔndastand wetin Sam 64:​10 tɔk we i se: “Ɔl udat de du wetin PAPA GƆD [“Jiova,” NW] want, gladi.”

Dis skripchɔ ɛksplen bak wetin mek Dayana ɛn Jɔn bin kɔntinyu fɔ gɛt gladi-at pan ɔl we dɛn bin gɛt prɔblɛm dɛn. Dayana bin tɔk se: “A abop pan Jiova fɔ protɛkt mi, jɔs lɛk aw pikin kin abop pan in mama ɛn papa.” I bin kɔntinyu fɔ tɔk se: “A tink se i dɔn blɛs mi fɔ kɔntinyu fɔ smayl ɔltɛm we a de prich.” Wetin bin ɛp Jɔn fɔ kɔntinyu fɔ prich ɛn gɛt gladi-at ivin afta i stɔp fɔ du di travlin wok? I bin tɔk se: “Frɔm 1998 we a bin gɛt di wok fɔ tich na di Ministerial Training School, a dɔn du mɔ pasɔnal stɔdi pas aw a bin dɔn de du.” I bin ɛksplen se di ajɔst we in ɛn in wɛf bin gɛt fɔ ajɔst, bin izi bikɔs dɛn bin rɛdi ɔltɛm fɔ du ɛnikayn wok we Jiova tɛl dɛn fɔ du. I tɔk bak se: “Wi nɔ ɛva rigrɛt fɔ ɔl wetin wi du.”

Bɔku pipul dɛn dɔn si se wetin de na Sam 64:​10 na tru. Fɔ ɛgzampul, i pas 30 ia we wan brɔda ɛn in wɛf bin sav na Bɛtɛl insay Amɛrika. Dɔn leta, dɛn sɛn dɛn as spɛshal payɔnia dɛn. Dɛn bin tɔk se: “Na nɔmal tin fɔ lɛ pɔsin fil bad we i lɔs sɔntin we i lɛk, bɔt yu nɔ go fil bad sote go.” Jɔs afta we dɛn go na di say we dɛn sɛn dɛn, dɛn bin stat fɔ prich wit di brɔda ɛn sista dɛn na di kɔngrigeshɔn. Dɛn bin tɔk bak se: “Wi bin pre bɔt sɔm patikyula tin dɛn. Dɔn we wi si aw Jiova ansa wi prea dɛn, dat bin ɛnkɔrej wi ɛn gi wi gladi-at. Jɔs afta wi rich na di say we dɛn sɛn wi, ɔda brɔda ɛn sista dɛn bin stat fɔ payɔnia, ɛn Jiova bin blɛs wi wit tu Baybul stɔdi dɛn we bin de du wɛl.”

Na tru se i nɔ izi fɔ gɛt gladi-at ɔltɛm. Sɔntɛnde, wi at kin pwɛl. Bɔt Jiova de ɛnkɔrej wi wit di wɔd dɛn we de na Sam 64:​10. Pan ɔl we wi at kin pwɛl, wi biliv se if wi kɔntinyu fɔ de fetful wan ilɛk wetin apin to wi, Jiova go mek wi “gladi.” Wi de wet bak fɔ di tɛm we wetin Jiova bin prɔmis bɔt nyu ɛvin ɛn nyu wɔl go kam tru. Dɔn, ɔlman go pafɛkt ɛn dɛn go “mek gladi gladi sote go” fɔ ɔl wetin Jiova go du.—Ayzaya 65:​17, 18.

Imajin wetin dis go min. Wi go gɛt pafɛkt wɛlbɔdi ɛn wi go grap ɛvride wit bɔku ɛnaji. Ilɛk wetin bin dɔn apin to wi we mek wi at pwɛl, wi nɔ go fil di pen igen. Jiova prɔmis wi se “nɔbɔdi nɔ go mɛmba di fɔstɛm tin dɛm ɔ ivin kam na dɛn maynd.” Wi go wɛlkɔm bak di wan dɛn we wi lɛk we bin dɔn day, ɛn wi go fil jɔs lɛk aw di 12 ia ol galpikin in mama ɛn papa bin fil di tɛm we Jizɔs bin gi am layf bak. Di Baybul se: “Dɛn bin gladi pasmak.” (Mak 5:​42, NW) As tɛm de go, ɔlman we go de na dis wɔl go de du wetin rayt ɛn Jiova go mek dɛn “gladi” sote go.