“Di Rayt Tɛm De” fɔ Wok ɛn fɔ Rɛst

 1. Aw bɔku pipul dɛn de si wok?

AW BƆKU pipul dɛn de si wok na di say we yu de? Insay bɔku kɔntri dɛn, pipul dɛn de wok tranga wan ɛn fɔ lɔng tɛm pas aw dɛn bin de wok trade. Pipul dɛn we de wok pasmak nɔ kin gɛt tɛm fɔ rɛst, spɛnd tɛm wit dɛn famili, ɔ kɔntinyu fɔ lan bɔt Gɔd. (Ɛkli. 2:​23) Wan ɔda prɔblɛm na dat, sɔm pipul dɛn nɔ lɛk fɔ wok at ɔl ɛn dɛn kin fɛn ɛkskyuz fɔ lɛ dɛn nɔ wok.—Prɔv. 26:​13, 14.

2-3. Us ɛgzampul Jiova ɛn Jizɔs sɛt we i kam pan wok?

² Bɔku pipul dɛn na di wɔl de wok pasmak ɔ dɛn nɔ de wok bɛtɛ. Bɔt lɛ wi tink bɔt di we aw Jiova ɛn Jizɔs de si wok. Wi nɔ gɛt wan dawt fɔ se Jiova lɛk fɔ wok. Jizɔs bin mek wi no dat klia wan we i tɔk se: “Mi Papa de wok ɔltɛm, ɛn misɛf fɔ wok.” (Jɔn 5:​17) Tink bɔt ɔl di wok we Gɔd bin du fɔ mek bɔku bɔku enjɛl dɛn, sta dɛn, ɛn planɛt dɛn. Wi de si bak bɔku fayn fayn tin dɛn we Gɔd mek na di wɔl. Wan pan di man dɛn we rayt di Sam buk bin tɔk se: “PAPA GƆD [“Jiova,” NWT], yu de du bɔku tin! Bikɔs yu gɛt sɛns yu mek ɔltin” ɛn “ɔl wetin de na [di] wɔl, na yu mek am.”—Sam 104:​24.

³ Jizɔs bin falamakata in Papa. I bin ɛp we Gɔd bin “de mek di ɛvin.” I bin de wit Jiova “as man we sabi wok.” (Prɔv. 8:​27-31, NWT) Dɔn leta, we Jizɔs bin de na di wɔl, i bin de du gud wok dɛn. Jizɔs bin tɔk se di wok we Jiova gi am tan lɛk fud fɔ am, ɛn ɔl wetin i bin de du sho se na Gɔd sɛn am.—Jɔn 4:​34; 5:​36; 14:​10, NWT.

 4. Wetin wi lan frɔm Jiova ɛn Jizɔs bɔt rɛst?

⁴ Yu tink se di ɛgzampul we Jiova ɛn Jizɔs sɛt fɔ wok tranga wan min se nid nɔ de fɔ lɛ wi rɛst? Nɔ, nɔto dat i min. Jiova nɔ de ɛva taya, so i nɔ nid fɔ rɛst. Di Baybul tɛl wi se afta we Jiova dɔn fɔ mek di ɛvin ɛn di wɔl, i “tap fɔ wok ɛn blo.” (Ɛks. 31:​17) So dat min se Jiova bin stɔp fɔ mek tin dɛn ɛn i bin tek tɛm fɔ ɛnjɔy ɔl di tin dɛn we i bin dɔn mek. Ɛn pan ɔl we Jizɔs bin de wok tranga wan we i bin de na dis wɔl, i bin stil fɛn tɛm fɔ rɛst ɛn ɛnjɔy fɔ it wit in padi dɛn.—Mat. 14:​13; Lyuk 7:​34.

 5. Wetin nɔ kin izi fɔ bɔku pan Gɔd in savant dɛn?

⁵ Di Baybul de ɛnkɔrej Gɔd in savant dɛn fɔ gladi fɔ wok. In savant dɛn fɔ de wok tranga wan ɛn dɛn nɔ fɔ lezi. (Prɔv. 15:​19) Sɔntɛm yu de wok fɔ kia fɔ yu famili. Ɛn ɔl di wan dɛn we na Krays in disaypul dɛn gɛt di wok fɔ prich di gud nyuz. Bɔt yu nid bak fɔ rɛst gud gud wan. Yu tink se i nɔ kin izi sɔntɛnde fɔ mek shɔ se yu gɛt bɔku tɛm fɔ wok, fɔ prich, ɛn fɔ rɛst? Aw wi go no ɔmɔs tɛm wi fɔ spɛnd fɔ wok ɛn fɔ rɛst?

 6. Aw Mak 6:​30-34 sho se Jizɔs bin de tink di rayt we bɔt wok ɛn rɛst?

⁶ I rili impɔtant fɔ lɛ wi tink di rayt we bɔt wok. Jiova bin tɛl Kiŋ Sɔlɔmɔn fɔ rayt se: “Ɛnitin we pɔsin wan du, di rayt tɛm de.” I bin tɔk bɔt fɔ plant, fɔ bil, fɔ kray, fɔ laf, fɔ dans, ɛn ɔda tin dɛn. (Ɛkli. 3:​1-8) Wi dɔn si klia wan se di tu impɔtant tin dɛn na layf na wok ɛn rɛst. Jizɔs bin de tink di rayt we bɔt wok ɛn rɛst. Wan de, afta we di apɔsul dɛn kɔmɔt prich, dɛn bin so bizi dat “dɛn nɔ bin gɛt chans sɛf fɔ it.” Jizɔs bin tɛl dɛn se: “Una lɛ wi go blo na ples we pipul nɔ de.” (Rid Mak 6:​30-34.) Pan ɔl we in ɛn in disaypul dɛn nɔ bin de ebul fɔ rɛst ɔltɛm lɛk aw dɛn bin want, Jizɔs bin no se dɛn ɔl nid fɔ rɛst.

 7. We wi lan bɔt di lɔ we Gɔd bin gi bɔt di Sabat, wetin dat go ɛp wi fɔ du?

⁷ Sɔntɛnde, wi ɔl nid fɔ rɛst ɔ chenj di tin dɛn we wi de du ɛvride. Wi si dat frɔm wan arenjmɛnt we Gɔd bin mek fɔ in pipul dɛn trade trade. Na bin di arenjmɛnt fɔ kip di Sabat ɛni wik. Pan ɔl we wi nɔ de ɔnda di Lɔ we Gɔd bin gi Mozis, wi kin stil bɛnifit bay we wi lan frɔm wetin di Baybul tɔk bɔt di Sabat. Wetin wi lan go ɛp wi fɔ si if wi de tink di rayt we bɔt wok ɛn rɛst.

 8. Frɔm wetin de na Ɛksodɔs 31:​12-15 (NWT), di Sabat na bin de fɔ wetin?

⁸ Di Baybul tɛl wi se afta siks dez we Gɔd bin dɔn de mek tin dɛn, i bin stɔp fɔs fɔ mek tin dɛn na di wɔl. (Jɛn. 2:​2) Bɔt Jiova lɛk fɔ wok, ɛn i stil de “wok” ɔda we dɛn. (Jɔn 5:​17) Jiova bin wok fɔ siks dez ɛn i bin rɛst di de we mek sɛvin, dɔn i bin tɛl di Izrɛlayt dɛn bak fɔ rɛst di de we mek sɛvin ɛni wik. Gɔd bin tɔk se di Sabat na bin sayn bitwin in ɛn Izrɛl. Na bin de fɔ “rili rɛst . . . , na sɔntin we oli to Jiova.” (Rid Ɛksodɔs 31:​12-15, NWT.) Dɛn nɔ bin de alaw ɛnibɔdi fɔ wok, ivin pikin dɛn, slev dɛn, ɔ animal dɛn we bin de wok na fam. (Ɛks. 20:​10) Di Sabat bin de mek di pipul dɛn pe atɛnshɔn mɔ pan dɛn wɔship to Jiova.

 9. Us rɔŋ we we sɔm pipul dɛn bin de tink bɔt di Sabat insay Jizɔs in tɛm?

⁹ Di Sabat de bin gud fɔ Gɔd in pipul dɛn, bɔt insay Jizɔs in tɛm, bɔku pan di bigman dɛn pan Gɔd biznɛs bin de mek strikt lɔ dɛn bɔt aw fɔ obe di lɔ we Gɔd bin gi bɔt di Sabat. Dɛn bin tɔk se i bad fɔ lɛ pɔsin pik sɔm wit fɔ it ɔ ivin mɛn pɔsin we sik di de fɔ di Sabat. (Mak 2:​23-27; 3:​2-5) Bɔt nɔto dat Gɔd bin want, ɛn Jizɔs bin mek di wan dɛn we de lisin to am no dat klia wan.

10. Wetin wi lan frɔm Matyu 12:​9-12 (NWT) bɔt di we aw Jizɔs bin de si di Sabat?

¹⁰ Jizɔs ɛn di Ju pipul dɛn we bin de fala am bin de kip di Sabat bikɔs dɛn bin de ɔnda di Lɔ we Gɔd bin gi Mozis.b Bɔt di tin dɛn we Jizɔs bin tɔk ɛn du bin sho se i nɔ bad fɔ du gud ɛn ɛp ɔda pipul dɛn di de fɔ di Sabat. I bin tɔk klia wan se: “Pɔsin gɛt rayt fɔ du fayn tin di Sabat de.” (Rid Matyu 12:​9-12, NWT.) Jizɔs nɔ bin tink se i bad fɔ du gud ɛn fɔ ɛp ɔda pipul dɛn di Sabat de. Di tin dɛn we Jizɔs du sho se i bin ɔndastand wan impɔtant rizin we mek Gɔd bin tɛl in pipul dɛn fɔ rɛst di Sabat de. Bikɔs Gɔd in pipul dɛn bin de rɛst di de we mek sɛvin frɔm di wok we dɛn bin de du ɛnide, dat bin mek dɛn pe atɛnshɔn pan dɛn wɔship. Jizɔs bin mɛn na famili we bin de yuz di Sabat de fɔ wɔship Gɔd. Wi no dis frɔm wetin wi rid bɔt Jizɔs di tɛm we i bin de na in ɔm-tɔŋ na Nazarɛt fɔ se: “Wɛn di de fɔ pre ɛn blo, kam, i go na di Ju mitin os lɛkɛ aw i bin dɔn yus fɔ du. I tinap fɔ rid Gɔd in Buk to di pipul dɛn.”—Lyuk 4:​15-19.

11. Udat bin sɛt gud ɛgzampul fɔ Jizɔs we i kam pan wok?

¹¹ Josɛf bin tich Jizɔs aw fɔ bi kapɛnta ɛn i bin tich am bak bɔt aw Gɔd de si wok. (Mat. 13:​55, 56) Ɛn Jizɔs go mɔs dɔn si aw Josɛf bin de wok tranga wan ɛnide fɔ sɔpɔt in big famili. Jizɔs bin tɛl in disaypul dɛn se: “Wokman fɔ gɛt pe fɔ in wok.” (Lyuk 10:​7) Fɔ tru, Jizɔs bin no aw fɔ wok tranga wan.

12. Us skripchɔ dɛn sho wetin di Baybul tɔk bɔt fɔ wok tranga wan?

¹² Di apɔsul Pɔl bin no aw fɔ wok tranga wan. In men wok na bin fɔ prich bɔt Jizɔs ɛn di mɛsej we Jizɔs bin de tich. Bɔt Pɔl bin de wok bak fɔ sɔpɔt insɛf. Di Kristian dɛn na Tɛsalonayka bin no se Pɔl bin de “wok traŋa wan,” ɛn i bin de wok “de ɛn nɛt” so dat dɛn nɔ go “pul mɔni fɔ ɛp” am. (2 Tɛs. 3:​8; Akt 20:​34, 35) I go mɔs bi se Pɔl bin de tɔk bɔt di wok we i bin de du fɔ mek tɛnt dɛn. We i bin de na Kɔrint, i bin de wit Prisila ɛn Akwila ɛn “dɛn ɔl bin de wok wan ples. Na tɛnt Pɔl bin de mek we i bin de sɛl fɔ gɛt mɔni.” We Pɔl se i bin de wok “de ɛn nɛt,” dat nɔ min se i nɔ bin de blo fɔ wok. I bin de rɛst frɔm di wok we i bin de du, lɛk di de fɔ di Sabat. Da de de i bin de yuz di chans we i gɛt fɔ prich to di Ju dɛn bak we nɔ bin de wok di Sabat de.—Akt 13:​14-16, 42-44; 16:​13; 18:​1-4.

13. Wetin wi lan frɔm Pɔl in ɛgzampul?

¹³ Di apɔsul Pɔl sɛt fayn ɛgzampul fɔ wi. Pan ɔl we i bin de wok fɔ sɔpɔt insɛf, i bin de mek shɔ se i “de du oli wok we na fɔ prich di gud nyuz bɔt Gɔd” ɔltɛm. (Rom. 15:​16, NWT; 2 Kɔr. 11:​23) I bin ɛnkɔrej ɔda pipul dɛn bak fɔ de prich ɔltɛm. So Prisila ɛn Akwila bin Pɔl in “kɔmpin wokman dɛn fɔ Krays Jizɔs.” (Rom. 12:​11; 16:​3, NWT) Pɔl bin ɛnkɔrej di Kristian dɛn na Kɔrint fɔ “de du plɛnti wok fɔ di Masta ɔltɛm.” (1 Kɔr. 15:​58 NWT; 2 Kɔr. 9:​8) Jiova bin ivin mek Pɔl rayt se: “Una nɔ fɔ gi ɛnibɔdi we nɔ gri fɔ wok, ɛnitin fɔ it.”—2 Tɛs. 3:​10.

14. Wetin Jizɔs bin min we i tɔk di wɔd dɛn we de na Jɔn 14:​12?

¹⁴ Di wok we impɔtant pas ɔl we wi fɔ de du naw insay dis las dez, na fɔ de prich ɛn mek disaypul dɛn. Infakt, Jizɔs bin tɔk se in disaypul dɛn go du wok dɛn we pas wetin i bin du! (Rid Jɔn 14:​12.) Wetin Jizɔs bin tɔk nɔ bin min se wi go ebul fɔ du mirekul dɛn lɛk am. Bifo dat, i bin min se di wan dɛn we de fala am go prich ɛn tich na bɔku say dɛn, to bɔku pipul dɛn, ɛn fɔ lɔng tɛm pas wetin i bin du.

15. Us kwɛstyɔn dɛn wi fɔ aks wisɛf? Wetin mek?

¹⁵ If yu gɛt wok we yu de du, aks yusɛf dɛn kwɛstyɔn dɛn ya: ‘Dɛn sabi mi na mi wokples as pɔsin we de wok tranga wan? A kin dɔn mi wok di tɛm we a fɔ dɔn am ɛn du am di bɛst we aw a fɔ du am?’ If yu ansa na yɛs, dat go mɔs mek yu bɔs trɔst yu. Ɛn yu go mek bak di pipul dɛn we de na yu wokples rili want fɔ lisin to di gud nyuz. We i kam pan di prichin ɛn tichin wok, yu fɔ aks yusɛf dɛn kwɛstyɔn dɛn ya: ‘Dɛn sabi mi as pɔsin we de wok tranga wan na di prichin wok? A kin pripia gud gud wan fɔ di fɔstɛm we a de prich to pɔsin? A kin go bak wantɛm wantɛm fɔ tɔk wit pɔsin we want fɔ no mɔ? A kin yuz di difrɛn difrɛn we dɛn fɔ prich ɔltɛm?’ If yu ansa na yɛs, yu go gɛt gladi-at we yu de du di prichin wok.

16. Aw Jizɔs ɛn in apɔsul dɛn bin si rɛst? Aw dat difrɛn frɔm di we aw bɔku pipul dɛn na di wɔl de si am tide?

¹⁶ Jizɔs bin no se sɔntɛnde in ɛn in apɔsul dɛn bin nid fɔ blo smɔl. Bɔt, bɔku pipul dɛn we bin de trade ɛn bɔku pipul dɛn we de tide tan lɛk di jɛntri man we Jizɔs bin tɔk bɔt. Da man de bin tɛl insɛf se: “Nɔ wɔri bɔt ɛnitin, jɛs de it, drink ɛn ɛnjɔy yusɛf!” (Lyuk 12:​19; 2 Tim. 3:​4) I bin tink se di tin we impɔtant pas ɔl na layf na fɔ ɛnjɔy insɛf. Bɔt Jizɔs ɛn di apɔsul dɛn bin difrɛn. Dɛn nɔ bin mek ɛnjɔymɛnt bi di tin we impɔtant pas ɔl na dɛn layf.

17. Aw wi de yuz wi tɛm we wi nɔ kin de na wi wokples?

¹⁷ Tide, wi de tray fɔ falamakata Jizɔs bay we wi nɔ jɔs de yuz di tɛm we wi nɔ de wok fɔ rɛst, bɔt wi de yuz am bak fɔ du gud tin dɛn lɛk fɔ prich to ɔda pipul dɛn ɛn fɔ atɛnd wi Kristian mitin dɛn. Infakt, fɔ wi, di prichin wok ɛn di mitin dɛn we wi de atɛnd as tin dɛn we rili impɔtant, so wi de du ɔl wetin wi ebul fɔ kɔntinyu fɔ du dɛn tin dɛn ya fɔ Jiova. (Ibru 10:​24, 25) Pan ɔl we wi kin travul, wi kin kɔntinyu fɔ atɛnd wi mitin dɛn ɛnisay we wi de, ɛn wi kin luk fɔ we dɛn fɔ tɔk bɔt di Baybul to di wan dɛn we wi de mit.—2 Tim. 4:​2.

18. Wetin wi Kiŋ, Krays Jizɔs, want wi fɔ du?

¹⁸ Wi rili gladi we wi Kiŋ we na Krays Jizɔs nɔ de ɛkpɛkt wi fɔ du pas wetin wi ebul fɔ du ɛn i de ɛp wi fɔ tink di rayt we bɔt wok ɛn rɛst! (Ibru 4:​15) I want wi fɔ gɛt di rɛst we wi nid. I want wi bak fɔ wok tranga wan fɔ kia fɔ di tin dɛn we wi nid ɛn tek pat pan di prichin wok we wi kin ɛnjɔy fɔ du. Insay di nɛks atikul, wi go tɔk bɔt wan bad bad we aw mɔtalman bi slev ɛn wetin Jizɔs dɔn du fɔ fri wi.