“Fala In Futmak Gud Gud Wan”

1-2. Aw wi go ebul fɔ fala Jizɔs in futmak? Gi wan ɛgzampul.

IMAJIN se yu de na wan grup we de waka na bich we gɛt kwik sand, bɔt pɔsin we sabi di bich de gayd yu. As i de waka, i de lɛf in futmak biɛn na di sansan. I rich tɛm we yu nɔ ebul fɔ si di pɔsin we de gayd yu, bɔt yu nɔ fred. Bifo dat, yu ɛn yu kɔmpin dɛn de we de waka na di sansan de fala di pɔsin we de gayd una in futmak gud gud wan.

² As tru Kristian dɛn, i tan lɛk se wi de waka na sansan we gɛt kwik sand na dis wɔl we wikɛd. Wi gladi we Jiova dɔn gi wi di bɛst Gayd we na in Pikin, Jizɔs Krays, we na in futmak wi fɔ fala gud gud wan. (1 Pit. 2:​21) Wan buk we de tɔk bɔt di Baybul se Pita bin kɔmpia Jizɔs as pɔsin we de gayd ɔda pipul dɛn. Jɔs lɛk we pɔsin we de gayd pipul dɛn kin lɛf in futmak biɛn, na so Jizɔs insɛf dɔn lɛf in futmak biɛn fɔ mek wi fala am. Lɛ wi tɔk bɔt tri kwɛstyɔn dɛn we gɛt fɔ du wit di fala we wi de fala Jizɔs in futmak: Wetin i min fɔ fala Jizɔs in futmak? Wetin mek wi fɔ du dat? Ɛn aw wi fɔ du am?

 3. Wetin i min fɔ fala pɔsin in futmak?

³ Wetin i min fɔ fala pɔsin in futmak? Insay di Baybul, di wɔd dɛn “waka” ɛn “fut dɛn” sɔntɛnde kin min di tin dɛn we pɔsin kin du na layf. (Jɛn. 6:​9; Prɔv. 4:​26) Wi kin kɔmpia di we aw pɔsin de liv in layf to di futmak dɛn we pɔsin we de waka de lɛf biɛn. So fɔ fala pɔsin in futmak min se wi fɔ falamakata am.

 4. Wetin i min fɔ fala Jizɔs in futmak?

⁴ Wetin i min fɔ fala Jizɔs in futmak? Fɔ ɛksplen am simpul wan, i min fɔ falamakata in ɛgzampul. Insay wi tim skripchɔ, di apɔsul Pita bin tɔk bɔt di fayn ɛgzampul we Jizɔs bin sɛt bikɔs i bin bia we i de sɔfa; bɔt plɛnti ɔda we dɛn de we wi go ebul fɔ falamakata Jizɔs. (1 Pit. 2:​18-25) Fɔ tru, Jizɔs in wan ol layf, dat na, ɔl di tin dɛn we i tɔk ɛn du, na ɛgzampul fɔ wi fɔ fala.

 5. Fɔ se mɔtalman we nɔ pafɛkt go rili ebul fɔ fala Jizɔs in ɛgzampul pafɛkt wan? Ɛksplen.

⁵ As mɔtalman dɛn we nɔ pafɛkt, yu tink se i go rili izi fɔ fala Jizɔs in ɛgzampul? Yɛs, wi ebul fɔ du dat. Mɛmba se Pita nɔ bin se wi fɔ fala Jizɔs in futmak pafɛkt wan, bɔt i bin tɛl wi se wi “fɔ fala [Jizɔs] in futmak gud gud wan.” Pan ɔl we wi nɔ pafɛkt, bɔt if wi du wi bɛst fɔ fala Jizɔs in futmak gud gud wan, wi go de du wetin di apɔsul Jɔn bin tɔk, we i se: “Kɔntinyu fɔ waka jɔs lɛk aw da wan de [Jizɔs] bin waka.”—1 Jɔn 2:​6.

6-7. Wetin mek wi tɔk se fɔ fala Jizɔs in futmak de mek wi kam nia Jiova mɔ ɛn mɔ?

⁶ If wi fala Jizɔs in futmak, dat go ɛp wi fɔ kam nia Jiova mɔ ɛn mɔ. Wetin mek wi se so? Fɔs, Jizɔs dɔn sɛt pafɛkt ɛgzampul bɔt aw wi fɔ liv wi layf we go mek Gɔd gladi fɔ wi. (Jɔn 8:​29) So we wi de fala Jizɔs in futmak, wi go mek Jiova gladi. Ɛn wi shɔ se wi Papa we de na ɛvin go kam nia di wan dɛn we de tray tranga wan fɔ bi in padi.—Jems 4:​8.

⁷ Sɛkɔn, Jizɔs bin falamakata in Papa pafɛkt wan. Na dat mek Jizɔs bin se: “Ɛnibɔdi we dɔn si mi dɔn si di Papa.” (Jɔn 14:​9) We wi falamakata Jizɔs in kwaliti dɛn ɛn aw i de trit ɔda pipul dɛn, wi de falamakata Jiova. Fɔ ɛgzampul, i bin sɔri fɔ wan man we bin gɛt lɛprɔsi, i bin gɛt sɔri-at fɔ wan uman we bin gɛt bad bad sik, ɛn i bin sɔri fɔ di wan dɛn we dɛn fambul ɛn padi dɛn bin dɔn day. (Mak 1:​40, 41; 5:​25-34; Jɔn 11:​33-35) Di mɔ we wi de falamakata Jiova in kwaliti dɛn, na di mɔ wi de gɛt tayt padi biznɛs wit am.

 8. Ɛksplen wetin mek if wi fala Jizɔs in futmak, dat go ɛp wi fɔ “win” di wɔl.

⁸ If wi fala Jizɔs in futmak, dat go ɛp wi fɔ mek wi nɔ alaw dis wikɛd wɔl fɔ mek wi nɔ pe atɛnshɔn pan wi savis to Jiova. Di nɛt bifo Jizɔs day, i bin ebul fɔ se: “A dɔn win di wɔl.” (Jɔn 16:​33) I min se i nɔ bin alaw di we aw di pipul dɛn na di wɔl de tink, di gol dɛn we dɛn gɛt, ɛn di we aw dɛn de du tin fɔ afɛkt am. Jizɔs nɔ ɛva fɔgɛt di rizin we mek i kam na dis wɔl, we na fɔ pul badnem pan Jiova. We wisɛf? Insay dis wɔl, bɔku bɔku tin dɛn de we go mek wi lɛf fɔ pe atɛnshɔn pan wi savis to Jiova. Jɔs lɛk Jizɔs, if wisɛf kɔntinyu fɔ du wetin Jiova want, wisɛf go ebul fɔ “win” di wɔl.—1 Jɔn 5:​5.

 9. Wetin wi fɔ du fɔ de na di rod we go mek wi gɛt layf we go de sote go?

⁹ If wi fala Jizɔs in futmak, dat go mek wi gɛt layf we go de sote go. Wan yɔŋ jɛntriman bin aks wetin i fɔ du fɔ mek i gɛt layf we go de sote go. Jizɔs bin tɛl am se: “Kam fala mi.” (Mat. 19:​16-21) To sɔm Ju pipul dɛn we nɔ bin biliv se Jizɔs na di Krays, i bin se: “Mi ship dɛn . . . de fala mi. A de gi dɛn layf we go de sote go.” (Jɔn 10:​24-29) Jizɔs bin tɛl Nikodimɔs we na wan pan di mɛmba dɛn na di Sanɛndrin we bin want fɔ no mɔ bɔt di tin dɛn we Jizɔs bin de tich se, di wan dɛn we “sho se [dɛn] gɛt fet pan am” go “gɛt layf we go de sote go.” (Jɔn 3:​16) Wi go sho se wi gɛt fet pan Jizɔs bay we wi du wetin i dɔn tich wi ɛn fala in ɛgzampul. We wi du dat, wi go de na di rod we go mek wi gɛt layf we go de sote go.—Mat. 7:​14.

10. Wetin wi fɔ du “fɔ no” Jizɔs gud gud wan? (Jɔn 17:​3)

¹⁰ Bifo wi go ebul fɔ fala Jizɔs in futmak gud gud wan, wi fɔ no am. (Rid Jɔn 17:​3.) “Fɔ no” Jizɔs na sɔntin we wi fɔ kɔntinyu fɔ du. Wi fɔ kɔntinyu fɔ lan bɔt am mɔ ɛn mɔ, ɛn dat min se wi fɔ lan bɔt in kwaliti dɛn, di we aw i de tink, ɛn aw i de du tin. Ilɛksɛf wi dɔn te na di trut ɔ wi nɔ te yet, wi fɔ kɔntinyu fɔ no bɔt Jiova ɛn in Pikin.

11. Wetin de insay di 4 buk dɛn we na Matyu, Mak, Lyuk, ɛn Jɔn?

¹¹ Bikɔs Jiova lɛk wi, i dɔn mek dɛn rayt 4 buk dɛn na di Baybul we na Matyu, Mak, Lyuk, ɛn Jɔn fɔ mek wi sabi in Pikin. Dɛn 4 buk dɛn ya de tɔk bɔt Jizɔs in layf ɛn in prichin wok we i bin du na dis wɔl. Dɛn buk ya tɔk bɔt wetin Jizɔs bin se, wetin i bin du, ɛn aw i bin fil. Dɛn 4 buk ya de ɛp wi fɔ mek wi “tink gud wan” bɔt Jizɔs in ɛgzampul. (Ibru. 12:​3) Dɛn buk ya gɛt di futmak we Jizɔs lɛf biɛn. So we wi stɔdi dɛn 4 buk ya, wi go kam fɔ no bɔt Jizɔs gud gud wan. Dat go mek wi fala in futmak gud gud wan.

12. Aw wi go rili bɛnifit frɔm di 4 buk dɛn we na Matyu, Mak, Lyuk, ɛn Jɔn?

¹² Fɔ mek wi rili bɛnifit frɔm di 4 buk dɛn we na Matyu, Mak, Lyuk, ɛn Jɔn, wi nɔ fɔ jɔs rid dɛn nɔmɔ. Wi fɔ tek tɛm stɔdi dɛn ɛn tink gud gud wan bɔt wetin wi dɔn lan. (Luk Jɔshwa 1:​8.) Lɛ wi tɔk bɔt tu tin dɛn we go ɛp wi fɔ mek wi tink gud gud wan bɔt dɛn 4 buk dɛn ya ɛn du wetin wi dɔn lan.

13. Aw yu go mek di tin dɛn we de na Matyu, Mak, Lyuk, ɛn Jɔn rial to yu?

¹³ Fɔs, mek di tin dɛn we yu de rid na di 4 buk dɛn, rial to yu. Tray fɔ imajin se yu de si, yɛri, ɛn fil wetin bin de apin. Fɔ mek yu go ebul fɔ du dat, du risach na di pɔblikeshɔn dɛn we wi de stɔdi we Jiova in ɔganayzeshɔn dɔn gi wi. Stɔdi di tin dɛn we apin bifo ɔ afta di tin we yu de stɔdi bɔt. Luk fɔ infɔmeshɔn we sho wetin bin apin ɛn wetin mek i apin. Kɔmpia wetin yu de stɔdi wit di sem tin we de apin na wan pan di ɔda 4 buk dɛn. Sɔm tɛm dɛn de we wan pan di man dɛn we rayt di 4 buk dɛn tɔk bɔt wan patikyula tin we di ɔda wan dɛn nɔ tɔk bɔt.

14-15. Aw wi go ebul du wetin wi lan insay Matyu, Mak, Lyuk, ɛn Jɔn?

¹⁴ Sɛkɔn, du di tin dɛn we yu lan insay Matyu, Mak, Lyuk, ɛn Jɔn. (Jɔn 13:​17) Afta yu dɔn tek tɛm stɔdi wan pan dɛn 4 buk dɛn ya, aks yusɛf dis kwɛstyɔn: ‘A lan ɛnitin na dis buk we a go ebul aplay na mi layf? Aw a go yuz dis tin we a dɔn lan fɔ ɛp ɔda pɔsin?’ Tray fɔ tink bɔt wan patikyula pɔsin, dɔn fɛn di rayt tɛm we yu go tek tɛm sho am wetin yu dɔn lan.

¹⁵ Lɛ wi tɔk bɔt wan ɛgzampul we go sho wi aw wi go du dɛn tu tin dɛn ya. Wi go tɔk bɔt di po uman we in man bin dɔn day, we Jizɔs bin si na di tɛmpul.

16. Tɔk smɔl bɔt wetin yu imajin se bin de apin na di ɛgzampul na Mak 12:​41.

¹⁶ Mek dis ɛgzampul rial to yu. (Rid Mak 12:​41.) Imajin wetin bin de apin. Na Naysan 11, insay di ia 33, ɛn Jizɔs go day jisnɔ. Jizɔs bin dɔn spɛn plɛnti pan in tɛm da de de fɔ tich na di tɛmpul. Di bigman dɛn pan Gɔd biznɛs bin sho se dɛn rili de agens am. Sɔm pan dɛn bin dɔn aks am udat gi am rayt fɔ du dɛn tin dɛn ya we i bin de du. Ɔda wan dɛn bin de aks am kwɛstyɔn dɛn we dɛn fil se i nɔ go ebul ansa. (Mak 11:​27-33; 12:​13-34) Naw, Jizɔs dɔn go na di ɔdasay na di tɛmpul. I de si di mɔni bɔks dɛn. I go mɔs bi se i de na di say we dɛn kɔl di Say Usay di Uman dɛn Kin De. I sidɔm ɛn bigin fɔ luk di pipul dɛn we de put mɔni insay di mɔni bɔks dɛn. I si bɔku pipul dɛn we gɛt mɔni bin de put bɔku kɔyn dɛn. Sɔntɛm i de nia de ɛn i de yɛri lawd wan we di kɔyn dɛn de fɔdɔm insay di mɔni bɔks.

17. Wetin di po uman we in man dɔn day we Mak 12:​42 tɔk bɔt bin du?

¹⁷ Rid Mak 12:​42. Afta sɔm tɛm, Jizɔs bin de luk wan uman. I bin po, ɛn “in man dɔn day.” (Lyuk 21:​2) Tin nɔ bin izi fɔ am; i go bi se i nɔ bin izi fɔ mek i gɛt di tin dɛn we i nid na in layf. Bɔt stil, i go na wan pan di mɔni bɔks, ɛn i put tu smɔl kɔyn dɛn we sɔntɛm nɔ mek no sawnd as dɛn fɔdɔm insay di bɔks. Jizɔs no wetin di uman put na di bɔks. I put tu lɛpta kɔyn dɛn we bin smɔl pas ɔl di kɔyn dɛn we dɛn bin de yuz da tɛm de. Da mɔni de nɔ ivin du fɔ bay wan smɔl bɔd we na bin wan pan di chip bɔd dɛn we dɛn bin de sɛl fɔ it.

18. Akɔdin to Mak 12:​43, 44, wetin Jizɔs bin se bɔt di kɔntribyushɔn we di uman we in man dɔn day bin gi?

¹⁸ Rid Mak 12:​43, 44. Jizɔs rili kɔle dis uman we in man dɔn day. So Jizɔs kɔl in disaypul dɛn, ɛn i sho dɛn wetin dis uman we in man dɔn day bin du. Dɔn i tɔk se: “Dis po uman we in man dɔn day, put pas ɔl di ɔda pipul dɛn.” I ɛksplen bak se: “Ɔl di wan dɛn we put [mɔ di wan dɛn we gɛt mɔni], na frɔm di ɛkstra mɔni we dɛn gɛt na de dɛn pul, bɔt dis uman, pan ɔl we i po, i put ɔl wetin i gɛt fɔ manej in layf.” We dis fetful uman gi in las ɛn las mɔni fɔ da de de, i bin de abop se Jiova go tek kia ɔf am.—Sam 26:​3.

19. Wetin wi lan frɔm di wɔd dɛn we Jizɔs tɔk bɔt di po uman we in man dɔn day?

¹⁹ Du di tin dɛn we yu lan bɔt di uman we in man bin dɔn day. Aks yusɛf dis kwɛstyɔn, ‘Wetin a lan frɔm di wɔd dɛn we Jizɔs tɔk bɔt dis po uman we in man dɔn day?’ Tink bɔt dis uman we in man dɔn day. I go bi se dis uman want fɔ gi mɔ to Jiova. Bɔt stil, i bin gi wetin i ebul fɔ gi; i bin gi in bɛst to Jiova. Ɛn Jizɔs no se in Papa bin valyu di kɔntribyushɔn we di uman bin gi. Dis na impɔtant lɛsin fɔ wi: Jiova kin gladi we wi gi am wi bɛst, dat na, we wi de sav am wit ɔl wi at ɛn ɔl wi layf. (Mat. 22:​37; Kol. 3:​23) Jiova de gladi we i de si se wi de du ɔl wetin wi ebul fɔ du. Wi go du di sem tin we wi go prich, atɛnd mitin dɛn, yuz wi tɛm ɛn ɛnaji fɔ sav Jiova.

20. Aw yu go du wetin yu dɔn lan frɔm di uman we in man bin dɔn day? Gi wan ɛgzampul.

²⁰ Aw wi go du wetin wi dɔn lan frɔm di uman we in man bin dɔn day? Tray fɔ tink bɔt patikyula pipul dɛn we go gladi fɔ no se Jiova gladi fɔ di tin dɛn we dɛn de du. Fɔ ɛgzampul, yu sabi ɛni ol sista we de fil gilti ɔ de fil se i nɔ gɛt bɛtɛ yus igen bikɔs i nɔ gɛt wɛlbɔdi ɔ bɛtɛ trɛnk fɔ du mɔ lɛk aw i bin dɔn de du na di prichin wok? Ɔ yu de tink bɔt wan brɔda we sik siriɔs wan, ɛn we in at pwɛl bikɔs i nɔ ebul de na di Kiŋdɔm Ɔl fɔ ɔl di mitin dɛn? Ɛp dɛn wan dɛn de bay we yu de tɔk fayn wɔd dɛn we de “ɛp pɔsin fɔ tinap tranga wan.” (Ɛfi. 4:​29) Ɛnkɔrej dɛn wit wetin wi dɔn lan frɔm di uman we in man bin dɔn day. Yu fayn wɔd dɛn we yu go tɛl dɛn go mek dɛn no se Jiova gladi we wi de gi am wi bɛst. (Prɔv. 15:​23; 1 Tɛs. 5:​11) We yu tɛl ɔda pipul dɛn tɛnki bikɔs dɛn de gi Jiova dɛn bɛst, ilɛksɛf na smɔl, yu go de fala Jizɔs in futmak gud gud wan.

21. Wetin yu dɔn mekɔp yu maynd fɔ du?

²¹ Wi rili gladi fɔ di bɔku tin dɛn we di 4 buk dɛn we na Matyu, Mak, Lyuk, ɛn Jɔn tɔk bɔt Jizɔs in layf we go ɛp wi fɔ falamakata am ɛn fala in futmak gud gud wan. Yu nɔ tink se i go fayn fɔ mek yu stɔdi di 4 buk dɛn we yu de du yu pasɔnal stɔdi ɔ Famili Wɔship? Lɛ wi mɛmba se fɔ lɛ wi bɛnifit gud gud wan frɔm dis kayn stɔdi, wi fɔ mek di tin we wi de rid rial to wi ɛn du wetin wi de lan. Apat frɔm we wi de falamakata wetin Jizɔs bin du, wi fɔ lisin to wetin i se. Insay di nɛks atikul, wi go tɔk bɔt wetin wi kin lan frɔm di las wɔd dɛn we Jizɔs bin tɔk as mɔtalman.