Wetin Mek Wi De Kam Togɛda fɔ Wɔship?

1-3. (a) Aw Kristian dɛn dɔn sho se dɛn kin gladi fɔ kam togɛda wit dɛn brɔda ɛn sista dɛn? (Luk di pikchɔ nia dis atikul in taytul.) (b) Wetin wi go tɔk bɔt insay dis atikul?

WE WAN sista we nem Kɔrina bin ol 17 ia, dɛn bin ol in mama ɛn kɛr am go usay dɛn de put prizina dɛn ɛn fos dɛn fɔ wok tranga tranga wan. Leta, dɛn bin ol Kɔrina insɛf ɛn pul am na di say we i bɔn ɛn kɛr am go na wan ples we dɛn kɔl Sayberia, we pas ɔmɔs tawzin mayl frɔm usay dɛn bin de. We dɛn kɛr am go de, i bin de wok na fam ɛn dɛn bin de trit am lɛk slev. Sɔntɛnde dɛn kin fos am fɔ wok na do pan ɔl we di ples kol bad bad wan ɛn i nɔ bin ivin gɛt bɛtɛ klos fɔ wɛr. Bɔt pan ɔl dat, Kɔrina ɛn wan ɔda sista bin disayd fɔ du ɔl wetin dɛn ebul fɔ du fɔ lɛf di fam ɛn go mitin.

² Kɔrina bin se: “Ivintɛm, wi bin lɛf usay wi de wok ɛn waka 25 kilomita (dat na 15 mayl) fɔ go na wan tren steshɔn. Di tren bin gɛt fɔ lɛf tu oklɔk mɔnin, ɛn wi rayd fɔ siks awa bifo wi kam dɔŋ di tren ɛn waka tɛn kilomita (dat na siks mayl) fɔ go na di ples usay di mitin de.” Kɔrina bin rili gladi we i ebul fɔ go di mitin. I bin se: “Na di mitin, wi bin stɔdi Di Wachtawa ɛn siŋ Kiŋdɔm siŋ dɛn. Di mitin bin rili ɛp wi ɛn i mek wi gɛt mɔ fet.” Di tu sista dɛn kam bak na di fam afta tri dez, bɔt di fama nɔ bin ivin no se dɛn nɔ bin de.

³ Jiova in pipul dɛn kin gladi ɔltɛm fɔ de wit dɛn brɔda ɛn sista dɛn. Fɔ ɛgzampul, jɔs afta we dɛn bin bigin di Kristian kɔngrigeshɔn, di wan dɛn we bin de fala Jizɔs, bin de “mit na Gɔd in Os ɔltɛm.” (Di Apɔsul Dɛn Wok [Akt] 2:​46) I go mɔs bi se yusɛf kin gladi fɔ go di mitin dɛn. Bɔt jɔs lɛk ɔl yu brɔda ɛn sista dɛn, i nɔ kin izi fɔ mek yu de na di mitin dɛn ɔltɛm. Sɔntɛm yu gɛt fɔ wok lɔng tɛm ɔ yu gɛt plɛnti tin fɔ du ɔ yu de fil taya ɔltɛm. So, wetin go ɛp wi fɔ du ɔl wetin wi ebul fɔ mek wi go de na di mitin dɛn?^[1] (Rid di ɛndnot ɔnda di las paregraf.) Aw wi go ɛnkɔrej wi Baybul stɔdi dɛn ɛn ɔda pipul dɛn fɔ de na di mitin dɛn ɔltɛm? Dis atikul go ɛksplen tri rizin dɛn we mek i fayn fɔ kam di mitin dɛn. (1) I gud fɔ wi, (2) na tin we go ɛp ɔda pipul dɛn, ɛn (3) na tin we go mek Jiova gladi.^[2]—Rid di ɛndnot ɔnda di las paregraf.

 4. Aw di mit we wi de mit togɛda de ɛp wi fɔ lan bɔt Jiova?

⁴ Di mitin dɛn de mek wi no bɔku tin. Ɔl di mitin dɛn de ɛp wi fɔ lan mɔ bɔt Jiova. Fɔ ɛgzampul, plɛnti kɔngrigeshɔn dɛn jɔs dɔn stɔdi di buk we nem Draw Close to Jehovah na di Kɔngrigeshɔn Baybul Stɔdi. Aw yu bin fil we wi bin tɔk bɔt Jiova in kwaliti dɛn ɛn we yu bin yɛri aw wi brɔda dɛn fil bɔt Jiova? Dis bin mek yu lɛk Jiova mɔ. Bɔt nɔto dat nɔmɔ, wi de lan mɔ bɔt di Baybul we wi de pe atɛnshɔn to di tɔk dɛn, ɛn we sɔm pɔblisha dɛn kin kam na di stej fɔ sho wi aw wi kin du wetin wi dɔn lan, ɛn we wi de lisin gud wan we dɛn de rid di Baybul. (Nɛimaya 8:​8) Tink bɔt di plɛnti tin dɛn we wi kin lan ɛvri wik we wi kin pripia fɔ di Baybul ridin ɛn lisin to wetin ɔda pipul dɛn dɔn lan frɔm di ridin.

 5. Aw di mitin dɛn dɔn ɛp yu fɔ yuz wetin yu de lan na di Baybul ɛn ɛp yu fɔ no aw fɔ prich fayn mɔ ɛn mɔ?

⁵ Di mitin dɛn de tich wi fɔ du wetin wi dɔn lan na di Baybul. (Fɔs Lɛta Fɔ Tɛsalonayka 4:​9, 10) Fɔ ɛgzampul, yu dɔn ɛva atɛnd ɛni Wachtawa Stɔdi we mek yu want fɔ du mɔ fɔ Jiova, ɔ du sɔntin fɔ mek yu prea gɛt mɔ minin, ɔ fɔgiv yu brɔda ɛn sista dɛn? Di mitin we wi kin gɛt insay di wik, de ɛp wi fɔ no aw fɔ prich di gud nyus ɛn aw wi go ebul fɔ ɛp ɔda pipul dɛn fɔ ɔndastand di tru tin dɛn we de na di Baybul.—Matyu 28:​19, 20.

 6. Aw di mitin dɛn kin ɛnkɔrej ɛn ɛp wi fɔ kɔntinyu fɔ sav Jiova?

⁶ Di mitin dɛn de ɛnkɔrej wi. Setan de tray fɔ mek wi nɔ gɛt bɛtɛ fet ɛn dis kin mek wi fil bad ɛn nɔ gɛt kɔrej. Bɔt wi mitin dɛn de ɛnkɔrej wi ɛn dɛn de ɛp wi fɔ kɔntinyu fɔ sav Jiova. (Rid Di Apɔsul Dɛn Wok [Akt] 15:​30-32.) Plɛnti tɛm, wi kin tɔk bɔt wetin Gɔd dɔn tɔk na di Baybul we ɔlrɛdi dɔn apin. Dis kin ɛp wi fɔ no tru tru wan se wetin Jiova dɔn prɔmis se go apin tumara bambay go mɔs bi. Wi brɔda ɛn sista dɛn de ɛnkɔrej wi bay di tɔk ɛn kɔmɛnt dɛn we dɛn de gi ɛn we dɛn de siŋ wit ɔl dɛn at fɔ prez Jiova. (Fɔs Lɛta Fɔ Kɔrint 14:​26) Ɛn we wi tɔk to dɛn bifo ɛn afta di mitin dɛn, wi kin gladi bikɔs wi gɛt bɔku padi dɛn we rili bisin bɔt wi.—Fɔs Lɛta Fɔ Kɔrint 16:​17, 18.

 7. Wetin mek i impɔtant fɔ lɛ wi de na di mitin dɛn?

⁷ Gɔd in oli spirit de ɛp wi na di mitin dɛn we wi kin gɛt. Jizɔs de yuz di oli spirit fɔ lid di kɔngrigeshɔn dɛn. Na dat mek i tɛl wi se wi fɔ ‘yɛri di wɔd dɛn we Gɔd in Spirit de tɛl di Kristian dɛn we de na difrɛn ples dɛn.’ (Rɛvɛleshɔn 2:​7) Di oli spirit de ɛp wi fɔ lɛ wi avɔyd di tin dɛn we nɔ gud ɛn i de ɛp wi fɔ gɛt maynd fɔ prich. I kin ɛp wi bak fɔ disayd fɔ du di rayt tin. Na dat mek wi fɔ du ɔl wetin wi ebul fɔ de na di mitin dɛn so dat Gɔd in oli spirit go ɛp wi.

 8. We wi brɔda dɛn si wi na di mitin dɛn ɛn yɛri we wi de kɔmɛnt ɛn siŋ, aw dis kin ɛp dɛn? (Luk di bɔks we se “I Kin Fil Fayn Ɔltɛm Afta Mitin.”)

⁸ Na di mitin dɛn, wi gɛt di chans fɔ sho wi brɔda ɛn sista dɛn se wi lɛk dɛn. Bɔku brɔda ɛn sista dɛn gɛt plɛnti prɔblɛm dɛn we dɛn de bia wit. Di apɔsul Pɔl bin rayt se: “Una lɛ wi tink aw wi go ɛp wisɛf.” (Di Ibru Pipul Dɛn 10:​24, 25) Wi kin sho se wi bisin bɔt wi brɔda dɛn we wi de kam togɛda fɔ ɛnkɔrej wisɛf. We wi go di mitin dɛn, wi de sho wi brɔda dɛn se wi want fɔ de wit dɛn ɛn tɔk wit dɛn ɛn sho se wi bisin bɔt aw dɛn de fil. Wi kin ɛnkɔrej wi brɔda ɛn sista dɛn bak bay di we we wi de kɔmɛnt ɛn siŋ wit ɔl wi at.—Lɛta Fɔ Kɔlɔse 3:​16.

9, 10. (a) Ɛksplen aw di wɔd dɛn we Jizɔs tɔk na Jɔn 10:​16 de sho wi wetin mek i impɔtant fɔ kam togɛda wit wi brɔda dɛn. (b) We wi de na di mitin dɛn ɔltɛm, aw wi go ebul fɔ ɛp wi brɔda dɛn we dɛn famili dɔn tɔn dɛn bak pan dɛn?

⁹ Wi de ɛp wi brɔda ɛn sista dɛn fɔ de togɛda we wi go na di mitin dɛn. (Rid Jɔn 10:​16.) Jizɔs bin kɔmpia insɛf to shɛpad ɛn di wan dɛn we de fala am to ship dɛn we de togɛda. Tink bɔt dis: If tu ship dɛn de pantap wan il, tu ɔda ship dɛn de dɔŋ wan il, ɛn wan ɔda ship de ɔdasay, yu tink se dɛn fayv ship dɛn de, de togɛda? Nɔ-o, bikɔs dɛn nɔ de wan ples ɛn dɛn nɔ de fala di shɛpad. Semweso, fɔ lɛ wi nɔ de fa frɔm wi brɔda dɛn, wi fɔ de kam mitin ɔltɛm. Wi nid fɔ de togɛda wit wi brɔda dɛn, “miks wit dɛn,” ɛn fala “wan shɛpad.”

¹⁰ Wi mitin dɛn de ɛp wi fɔ gɛt wanwɔd ɛn lɛk wisɛf as wan famili. (Sam 133:​1) Sɔm pan wi brɔda ɛn sista dɛn famili dɔn tɔn dɛn bak pan dɛn, lɛk dɛn mama ɛn papa, ɔ dɛn brɔda ɛn sista dɛn. Bɔt Jizɔs bin prɔmis se i go gi dɛn famili we go lɛk dɛn ɛn bisin bɔt dɛn. (Mak 10:​29, 30) If yu de kam mitin ɔltɛm, yu go bi lɛk papa, mama, brɔda, ɔ sista to dɛn kayn pipul dɛn ya na di kɔngrigeshɔn. We wi tink bɔt dis, dat go mek wi want fɔ du ɔl wetin wi ebul fɔ de na di mitin dɛn.

11. Aw di mitin dɛn we wi de go de ɛp wi fɔ gi Jiova wetin i fit fɔ gɛt?

¹¹ We wi go mitin, wi de gi Jiova wetin i fit fɔ gɛt. Bikɔs na in mek wi, wi fɔ tɛl am tɛnki, ɔnɔ am, ɛn prez am. (Rid Rɛvɛleshɔn 7:​12.) Wi kin du dis na mitin we wi pre to Jiova, we wi siŋ to am, ɛn we wi tɔk bɔt am. Dis na fayn chans wi gɛt fɔ wɔship Jiova ɛvri wik!

12. We wi obe Jiova in lɔ we se wi fɔ go mitin, aw dat de mek Jiova fil?

¹² Na Jiova mek wi, so wi fɔ obe am. I tɛl wi fɔ de kam togɛda, mɔ we di tɛm fɔ lɛ dis wɔl dɔn de nia. So we wi du wetin Jiova tɛl wi, dat de mek i gladi. (Jɔn In Fɔs Lɛta 3:​22) I no se wi kin rili want fɔ de na di mitin dɛn ɛn i valyu ɔl wetin wi de du fɔ mek wi go di mitin dɛn.—Di Ibru Pipul Dɛn 6:​10.

13, 14. Aw di mitin dɛn de ɛp wi fɔ kam nia Jiova ɛn Jizɔs?

¹³ We wi go na di mitin dɛn, wi de sho Jiova se wi want fɔ kam nia in ɛn in Pikin. Wi kin stɔdi di Baybul na di mitin dɛn, ɛn Jiova kin tich wi wetin wi fɔ du ɛn aw wi fɔ liv wi layf. (Ayzaya 30:​20, 21) Ilɛksɛf pipul dɛn we nɔ de sav Jiova kam wi mitin, dɛn kin kam fɔ no se Gɔd de rili gayd wi. (Fɔs Lɛta Fɔ Kɔrint 14:​23-25) Jiova de yuz in oli spirit fɔ sho wetin-ɛn-wetin wi fɔ du na di mitin dɛn, ɛn na in de tɛl wi wetin wi de lan. So we wi go na mitin, wi de lisin to Jiova, wi de si aw i lɛk wi, ɛn wi de kam nia am mɔ ɛn mɔ.

¹⁴ Jizɔs, we na di edman na di kɔngrigeshɔn, bin se: “Usay tu ɔ tri pipul dɛn kam togɛda fɔseka mi nem, a go de wit dɛn.” (Matyu 18:​20, NW) Di Baybul bin tɔk bak se Jizɔs de “waka” na di kɔngrigeshɔn dɛn. (Rɛvɛleshɔn 1:​20–2:​1) Dis min se i de nia di kɔngrigeshɔn dɛn ɛn na in de sho dɛn wetin fɔ du. Na dat mek we wi atɛnd di mitin dɛn, wi de kam nia am mɔ ɛn mɔ. Dis dɔn sho klia wan se Jiova ɛn Jizɔs de wit wi ɛn dɛn de ɛp wi na di mitin dɛn. Aw yu tink se Jiova de fil we i de si se yu de du ɔl wetin yu ebul fɔ kam nia in ɛn in Pikin?

15. We wi go di mitin dɛn, aw dat de sho se wi want fɔ obe Gɔd?

¹⁵ We wi go na di mitin dɛn, wi de sho Jiova se wi want fɔ obe am. Jiova nɔ de fos wi fɔ du wetin i se. (Ayzaya 43:​23) So we wi obe in lɔ we se wi fɔ go mitin, wi de sho am se wi lɛk am ɛn wi biliv se i gɛt rayt fɔ tɛl wi wetin fɔ du. (Lɛta Fɔ Rom 6:​17) Fɔ ɛgzampul, wetin wi go du if wi bɔs want wi fɔ wok sote wi nɔ ebul fɔ atɛnd di mitin dɛn ɔltɛm? Ɔ sɔntɛm di gɔvmɛnt tɔk se if ɛnibɔdi gɛda fɔ wɔship Jiova, i go pe fayn, i go go na prizin, ɔ dɛn go pɔnish am bad bad wan. Ɔ sɔntɛnde wi kin want fɔ du ɔda tin ɛn nɔ go di mitin dɛn. Pan ɔl dɛn tin ya, wi fɔ disayd wetin wi fɔ du. (Di Apɔsul Dɛn Wok [Akt] 5:​29) Bɔt ɛnitɛm we wi obe Jiova, wi de mek i gladi.—Prɔvabs 27:​11.

16, 17. (a) Aw wi no se di mitin dɛn bin impɔtant to dɛn fɔstɛm Kristian dɛn? (b) Aw Brɔda Jɔj Gangas bin de fil bɔt di mitin dɛn?

¹⁶ Afta di mitin we di Kristian dɛn bin gɛt insay Pɛntikɔst 33, dɛn bin de mit ɔltɛm fɔ wɔship Jiova. Dɛn bin de ‘tink aw dɛn go ɛp dɛnsɛf’ ɛn dɛn nɔ bin de “tap fɔ de mit.” (Di Ibru Pipul Dɛn 10:​24, 25) Dɛn nɔ bin stɔp fɔ de kam togɛda ivin we di Roman gɔvmɛnt ɛn di edman dɛn pan Gɔd biznɛs na di Ju rilijɔn bin de mek dɛn sɔfa. Pan ɔl we i nɔ bin izi, dɛn bin de du ɔl wetin dɛn ebul fɔ kɔntinyu fɔ de kam togɛda.

¹⁷ Tide sɛf, Jiova in pipul dɛn gladi fɔ di mitin dɛn ɛn dɛn kin ɛnjɔy we dɛn go mitin. Wan brɔda we nem Jɔj Gangas, we bin dɔn tek pas 22 ia as wan pan di Gɔvnin Bɔdi mɛmba dɛn, bin se: “Wan pan di tin dɛn we kin mek a rili gladi na layf ɛn we kin ɛnkɔrej mi na we a de mit wit mi brɔda dɛn. A lɛk fɔ bi wan pan di fɔs pipul dɛn we de go na di Kiŋdɔm Ɔl, ɛn if i pɔsibul, a want fɔ bi wan pan di las pipul dɛn we de lɛf de. A kin gladi insay mi at we a de tɔk to Gɔd in pipul dɛn. We a de wit dɛn, a de fil lɛk se a de wit mi famili, a de ɛnjɔy di pis we Jiova de gi.” I kɔntinyu fɔ se: “Insay mi at, di tin we a de tink bɔt mɔ ɛn we a want fɔ du, na fɔ de go di mitin dɛn.”

18. Aw yu de fil bɔt di mitin dɛn? Wetin yu dɔn mekɔp yu maynd fɔ du?

¹⁸ Wetin yu tink, na dis kayn we yu de fil we yu de wɔship Jiova? If na so i bi, kɔntinyu fɔ de du ɔl wetin yu ebul fɔ de wit di brɔda dɛn na di mitin dɛn, ivin we i nɔ izi. Sho Jiova se yu rili de fil lɛk aw Kiŋ Devid bin de fil, we i se: “PAPA GƆD a lɛk usay yu de.”—Sam 26:​8.