Di Kɔngrigeshɔn “Gɛt Pis fɔ Sɔm Tɛm”

1, 2. Wetin Sɔl bin plan fɔ du na Damaskɔs?

DI WAN dɛn we bin de travul fɔ go Damaskɔs bin siriɔs dɛn fes ɛn dɛn bin plan fɔ go du bad tin dɛn. Dɛn bin et Jizɔs in disaypul dɛn, so dɛn go fos dɛn fɔ kɔmɔt na dɛn os dɛn, tay dɛn, disgres dɛn, ɛn drɛg dɛn go na Jerusɛlɛm usay di Sanɛndrin go pɔnish dɛn.

² Sɔl we bin de lid di grup, bin dɔn ɔlrɛdi gri fɔ mek dɛn kil sɔmbɔdi.a I nɔ bin tu te we Sɔl sɔpɔt in kɔmpin dɛn we dɛn ɔl de na di grup fɔ ston Stivin we na wan pan Jizɔs in fetful disaypul dɛn te dɛn kil am. (Akt 7:57–8:1) Sɔl nɔ bin jɔs satisfay fɔ mek Jizɔs in disaypul dɛn we de na Jerusɛlɛm sɔfa, bɔt i bin want mek di disaypul dɛn we de ɔdasay dɛnsɛf sɔfa jɔs lɛk aw faya de prɛd. I bin want fɔ dɔnawe wit di trangayes grup we dɛn de kɔl “Di We.”​—Akt 9:1, 2; rid di bɔks we gɛt di taytul “Di Pawa we Sɔl Bin Gɛt na Damaskɔs.”

3, 4. (a) Wetin bin apin to Sɔl? (b) Us kwɛstyɔn dɛn wi go tɔk bɔt?

³ Wantɛm wantɛm, wan brayt layt shayn pan Sɔl. Di wan dɛn we bin de travul wit am si di layt, bɔt dɛn nɔ ebul tɔk bikɔs dɛn shɔk. Sɔl blayn ɛn i fɔdɔm na grɔn. Sɔl nɔ ebul fɔ si ɛn i yɛri wan vɔys frɔm ɛvin we aks am se: “Sɔl, Sɔl, wetin mek yu de mek a sɔfa?” Sɔl sɔprayz ɛn i aks am se: “Udat na yu, Masta?” Di ansa we Sɔl yɛri mek i rili shɔk. Di vɔys ansa se: “Mi na Jizɔs, we yu de mek sɔfa.”​—Akt 9:​3-5; 22:​9.

⁴ Wetin wi kin lan frɔm di fɔs tin we Jizɔs tɛl Sɔl? Us bɛnifit wi go gɛt we wi lan bɔt di tin dɛn we bin apin arawnd di tɛm we Sɔl bi Kristian? Ɛn us lɛsin dɛn wi kin lan frɔm di we aw di kɔngrigeshɔn bin yuz di tɛm we dɛn gɛt pis afta Sɔl bi Kristian?

5, 6. Wetin wi kin lan frɔm wetin Jizɔs bin tɛl Sɔl?

⁵ We Jizɔs bin stɔp Sɔl we i bin de go na Damaskɔs, I nɔ bin aks am se: “Wetin mek yu de mek mi disaypul dɛn sɔfa?” As wi bin dɔn tɔk, i bin aks am se: “Wetin mek yu de mek a sɔfa?” (Akt 9:​4) Dis sho se Jizɔs insɛf sɛf de fil am we in disaypul dɛn gɛt prɔblɛm dɛn.​—Mat. 25:​34-40, 45.

⁶ If dɛn de mek yu sɔfa bikɔs yu gɛt fet pan Krays, na fɔ gɛt kɔnfidɛns se Jiova ɛn Jizɔs no bɔt wetin de apin to yu. (Mat. 10:​22, 28-31) Sɔntɛm di prɔblɛm nɔ go dɔn rayt naw. Mɛmba se Jizɔs bin de wach we Sɔl bin de sɔpɔt di wan dɛn we kil Stivin ɛn si we Sɔl bin de drɛg fetful disaypul dɛn fɔ kɔmɔt na dɛn os dɛn na Jerusɛlɛm. (Akt 8:​3) Bɔt Jizɔs nɔ bin du sɔntin da tɛm de. Pan ɔl dat, Jiova bin yuz Krays fɔ ɛp Stivin ɛn di ɔda disaypul dɛn fɔ kɔntinyu fɔ fetful.

 7. Wetin yu fɔ du fɔ mek yu ebul bia we dɛn de mek yu sɔfa?

⁷ Yusɛf go ebul fɔ bia we dɛn de mek yu sɔfa if yu du dɛn tin dɛn ya: (1) Mekɔp yu maynd fɔ kɔntinyu fɔ de biɛn Jiova ɛn Jizɔs ilɛk wetin apin. (2) Pre to Jiova fɔ mek i ɛp yu. (Fil. 4:​6, 7) (3) Alaw Jiova fɔ tɔn-am-gi. (Rom. 12:​17-21) (4) Abop se Jiova go ɛp yu fɔ bia te i pul di prɔblɛm pan yu.​—Fil. 4:​12, 13.

8, 9. Aw Ananayas go dɔn fil bɔt di wok we Jizɔs gi am?

⁸ Afta Jizɔs bin dɔn ansa Sɔl in kwɛstyɔn we i bin aks am se, “Udat na yu Masta?” I tɛl am se: “Grap, go na di siti; sɔmbɔdi go tɛl yu wetin fɔ du.” (Akt 9:​6) Sɔl nɔ bin de si, so dɛn kɛr am go na di say we i fɔ lɔj na Damaskɔs. We i rich de, i pre ɛn fast fɔ tri dez. Insay da tɛm de, Jizɔs tɔk bɔt Sɔl to wan disaypul we de na Damaskɔs. Di disaypul na Ananayas “we ɔl di Ju dɛn we de liv de, de tɔk fayn bɔt.”​—Akt 22:​12.

⁹ Tink bɔt di difrɛn we dɛn we Ananayas go dɔn fil. Di wan we de oba di kɔngrigeshɔn we na Jizɔs Krays we dɔn gɛt layf bak, bin de tɔk to am ɛn pik am fɔ du wan spɛshal wok. Na big ɔnɔ, bɔt nɔto bin izi wok! We Jizɔs tɛl Ananayas fɔ go to Sɔl, Ananayas tɔk se: “Masta, a dɔn yɛri we plɛnti pipul dɛn de tɔk bɔt dis man ɛn bɔt ɔl di bad bad tin dɛn we i dɔn du to yu oli pipul dɛn na Jerusɛlɛm. Ɛn di edman dɛn fɔ di prist dɛn dɔn gi am rayt fɔ mek i kam ya ɛn arɛst ɔl di wan dɛn we de kɔl yu nem.”​—Akt 9:​13, 14.

10. Wetin wi lan bɔt Jizɔs frɔm di we aw i trit Ananayas?

¹⁰ Jizɔs nɔ bin tɔk pan Ananayas fɔ we i tɔk bɔt aw i de fil. Bifo dat, i bin tɛl am wetin fɔ du klia wan. Ɛn Jizɔs bin sho se i rɛspɛkt am bay we i tɛl am wetin mek i want am fɔ du dis wok. Jizɔs tɛl Ananayas se: “A dɔn pik dis man fɔ tɔk bɔt mi nem to di neshɔn dɛn, to kiŋ dɛn, ɛn to Izrɛl in pikin dɛn. A go sho am klia wan di difrɛn difrɛn we dɛn we i go sɔfa fɔ mi nem.” (Akt 9:​15, 16) Ananayas bin du wetin Jizɔs tɛl am wantɛm wantɛm. I go fɛn Sɔl we bin de mek pipul dɛn sɔfa ɛn tɛl am se: “Sɔl, mi brɔda, Masta Jizɔs we apia to yu we yu bin de na rod, sɛn mi so dat yu go si bak ɛn oli spirit go kam insay yu.”​—Akt 9:​17.

11, 12. Wetin wi kin lan frɔm di tin dɛn we apin we gɛt fɔ du wit Jizɔs, Ananayas, ɛn Sɔl?

¹¹ Di tin dɛn we apin we gɛt fɔ du wit Jizɔs, Ananayas, ɛn Sɔl ɛp wi fɔ ɔndastand sɔm tin dɛn. Fɔ ɛgzampul, na Jizɔs de bifo fɔ dayrɛkt di prichin wok, jɔs lɛk aw i bin dɔn prɔmis se i go du. (Mat. 28:​20) Pan ɔl we Jizɔs nɔ de tɔk to mɔtalman dɛn tide, i de yuz di slev we fetful fɔ dayrɛkt di prichin wok, ɛn i dɔn pik dɛn fɔ de oba in savant dɛn. (Mat. 24:​45-47) Di Gɔvnin Bɔdi de dayrɛkt pɔblisha dɛn ɛn payɔnia dɛn fɔ go fɛn pipul dɛn we want fɔ no mɔ bɔt Krays. Lɛk aw wi bin dɔn tɔk na di chapta we de bifo dis wan, bɔku pan dɛn kayn pipul dɛn de dɔn pre fɔ mek Gɔd gayd dɛn ɛn Jiova Witnɛs dɛn dɔn prich to dɛn.​—Akt 9:​11.

¹² Ananayas bin gri fɔ du di wok we Jizɔs gi am ɛn i bin gɛt blɛsin. Yu de obe di lɔ fɔ prich gud gud wan, ilɛksɛf di wok kin mek yu wɔri? Fɔ sɔm pipul dɛn, fɔ prich frɔm os to os ɛn fɔ tɔk to strenja dɛn kin mek dɛn wɔri. I nɔ kin izi fɔ mek sɔm ɔda wan dɛn prich to pipul dɛn na di say we dɛn de du biznɛs, na strit, na fon, ɔ wit lɛta. Ananayas bin lɛf fɔ fred ɛn i bin gɛt di ɔnɔ fɔ ɛp Sɔl fɔ gɛt oli spirit.b Ananayas bin ebul fɔ du dis wok fayn bikɔs i bin biliv Jizɔs ɛn i bin si Sɔl lɛk in brɔda. Wi go ebul lɛf fɔ fred if wi tan lɛk Ananayas bay we wi biliv se na Jizɔs de dayrɛkt di prichin wok, wi gɛt sɔri-at fɔ pipul dɛn, ɛn wi si dɛn lɛk wi brɔda dɛn, ilɛksɛf na pipul dɛn we wi de fred.​—Mat. 9:​36.

13, 14. If yu de stɔdi di Baybul bɔt yu nɔ baptayz yet, wetin yu kin lan frɔm Sɔl in ɛgzampul?

¹³ Sɔl bigin fɔ du wetin i dɔn lan kwik kwik wan. We i wɛl, i baptayz ɛn bigin spɛn tɛm wit di disaypul dɛn na Damaskɔs. Bɔt i nɔ stɔp de. “I go na di sinagɔg dɛn wantɛm wantɛm ɛn bigin fɔ prich se Jizɔs na Gɔd in Pikin.”​—Akt 9:​20.

¹⁴ If yu de stɔdi di Baybul bɔt yu nɔ baptayz yet, yu go tan lɛk Sɔl ɛn du wetin yu de lan? Sɔl bin si we Krays pafɔm wan mirekul, ɛn wan dawt nɔ de se dis bin ɛp am fɔ du wetin i de lan. Bɔt ɔda pipul dɛn bin si we Jizɔs pafɔm mirekul dɛn, bɔt dat nɔ bin muv dɛn fɔ du wetin dɛn de lan. Fɔ ɛgzampul, sɔm Faresi dɛn bin si we Jizɔs mɛn wan man we in an day, ɛn bɔku bɔku Ju pipul dɛn bin no se Jizɔs gi layf bak to Lazarɔs. Bɔt dat nɔ bin min natin to bɔku pan dɛn. Infakt, sɔm bin ivin de agens Jizɔs. (Mak 3:​1-6; Jɔn 12:​9, 10) Bɔt Sɔl bin chenj. Wetin mek Sɔl bin chenj we ɔda pipul dɛn nɔ gri fɔ du dat? Na bikɔs i bin de fred Gɔd pas mɔtalman, ɛn i bin rili gladi fɔ di sɔri we Krays sɔri fɔ am. (Fil. 3:​8) If yusɛf fred Gɔd pas mɔtalman ɛn yu gladi fɔ wetin Krays dɔn du fɔ yu, yu nɔ go alaw natin fɔ stɔp yu fɔ prich ɛn kwalifay fɔ baptayz.

15, 16. Wetin Sɔl bin du na di sinagɔg dɛn? Wetin di Ju dɛn na Damaskɔs bin du?

¹⁵ Yu ebul imajin di kayn we aw pipul dɛn bin sɔprayz, shɔk, ɛn vɛks we dɛn si Sɔl bigin prich bɔt Jizɔs na di sinagɔg dɛn? Dɛn bin de aks se: “Nɔto di man dis we bin de mek di wan dɛn na Jerusɛlɛm we de kɔl dis nem sɔfa bad bad wan?” (Akt 9:​21) We Sɔl bin de ɛksplen wetin mek i chenj di we aw i bin de fil bɔt Jizɔs, “i bin de pruv klia wan se dis na di Krays.” (Akt 9:​22) Bɔt di pruf we Sɔl gi nɔ bin du. I nɔ bin mek di wan dɛn we prawd ɛn we lɛk tradishɔn gri fɔ chenj. Bɔt stil, Sɔl nɔ bin giv-ɔp.

¹⁶ Tri ia leta, di Ju dɛn we bin de na Damaskɔs bin stil de agens Sɔl. Faynali, dɛn tray fɔ kil am. (Akt 9:​23; 2 Kɔr. 11:​32, 33; Gal. 1:​13-18) We Sɔl kam no bɔt wetin dɛn plan fɔ du, i lɛf di siti kwayɛt wan bay we i alaw ɔda pipul dɛn fɔ put am insay baskɛt ɛn pas am na wan say we opin na di siti in wɔl. Lyuk bin se di wan dɛn we bin ɛp Sɔl fɔ ɛskep da nɛt de na bin Sɔl “in disaypul dɛn.” (Akt 9:​25) Dɛn wɔd dɛn ya we Lyuk rayt sho se sɔm pan di pipul dɛn we bin yɛri we Sɔl de prich na Damaskɔs bin kam fɔ bi Krays in disaypul dɛn.

17. (a) Us we dɛn pipul dɛn kin biev we wi tɛl dɛn wetin de na di Baybul? (b) Wetin wi fɔ kɔntinyu fɔ du? Wetin mek?

¹⁷ Di fɔs tɛm we yu bigin fɔ tɛl yu famili, yu padi dɛn, ɛn ɔda pipul dɛn bɔt di gud tin dɛn we yu de lan, sɔntɛm yu bin de ɛkspɛkt se ɔlman go gri wit di tru tin dɛn we de insay di Baybul bikɔs i mek sɛns. Sɔntɛm, sɔm pan dɛn bin biliv, bɔt bɔku nɔ bin gri fɔ biliv. I go bi se pipul dɛn na yu famili bin trit yu lɛk se yu na dɛn ɛnimi. (Mat. 10:​32-38) Bɔt, if yu kɔntinyu fɔ impruv di we aw yu de ɛksplen di Skripchɔ dɛn ɛn if yu kɔntinyu fɔ biev fayn lɛk Kristian, sɔntɛm ivin di wan dɛn we de agens yu go chenj di we aw dɛn de biev.​—Akt 17:​2; 1 Pit. 2:​12; 3:​1, 2, 7.

18, 19. (a) Wetin bin apin we Banabas tɔk fɔ Sɔl? (b) Aw wi go falamakata Banabas ɛn Sɔl?

¹⁸ We Sɔl bin go na Jerusɛlɛm, di disaypul dɛn nɔ bin biliv we i tɔk se insɛf na disaypul naw. Bɔt we Banabas tɔk fɔ Sɔl, di apɔsul dɛn bin wɛlkɔm am ɛn i kɔntinyu fɔ de wit dɛn fɔ sɔm tɛm. (Akt 9:​26-28) Sɔl bin de du tin wit sɛns, bɔt i nɔ bin de shem fɔ prich di gud nyuz. (Rom. 1:​16) I bin gɛt maynd fɔ prich na Jerusɛlɛm we na di sem ples usay i bin mek Jizɔs Krays in disaypul dɛn sɔfa. Di Ju dɛn na Jerusɛlɛm bin sɔprayz fɔ si se di man we dɛn bin tink se go de bifo fɔ dɔnawe wit di Kristian dɛn insɛf dɔn bi Kristian. So dɛn bin plan fɔ kil am. Di akawnt se: “We di brɔda dɛn no bɔt dis, dɛn briŋ am [Sɔl] kam dɔŋ na Sizeria ɛn mek i go na Tasɔs.” (Akt 9:​30) Sɔl bin gri fɔ fala wetin Jizɔs dayrɛkt di kɔngrigeshɔn fɔ du. So Sɔl ɛn di kɔngrigeshɔn bin bɛnifit.

¹⁹ Notis se na Banabas in fɔs bin du sɔntin fɔ ɛp Sɔl. Wan dawt nɔ de se na dis bin mek dɛn tu man dɛn ya we gɛt zil kam fɔ bi tayt padi as dɛn de sav Jiova. Yu de falamakata Banabas fɔ ɛp nyu wan dɛn na di kɔngrigeshɔn bay we yu de wok wit dɛn na fil savis ɛn ɛp dɛn fɔ go bifo na di trut? If yu du dat, yu go gɛt bɔku blɛsin dɛn. If yu na nyu pɔblisha we de prich di gud nyuz, yu de falamakata Sɔl bay we yu de gri fɔ mek dɛn ɛp yu? If yu wok wit pɔblisha dɛn we gɛt mɔ ɛkspiriɛns, yu go sabi prich gud gud wan, yu go gɛt mɔ gladi-at, ɛn yu go mek padi wit pipul dɛn we yu ɛn dɛn go bi padi fɔ lɔng tɛm.

20, 21. Aw Gɔd in savant dɛn we bin de trade ɛn naw dɔn yuz ‘di tɛm dɛn we dɛn gɛt pis’?

²⁰ Afta Sɔl bi Kristian ɛn lɛf di siti sef wan, “di kɔngrigeshɔn dɛn na Judia, Galili, ɛn Sameria gɛt pis fɔ sɔm tɛm.” (Akt 9:​31) Aw di disaypul dɛn bin yuz dis tɛm we tin fayn? (2 Tim. 4:​2) Di akawnt se dɛn bin “gɛt strɔng fet.” Di apɔsul dɛn ɛn di ɔda ɛlda dɛn bin ɛp di disaypul dɛn fɔ gɛt fet bak, ɛn dɛn bin de bifo as di kɔngrigeshɔn “bin de fred Jiova ɛn di oli spirit bin de kɔrej dɛn.” Fɔ ɛgzampul, Pita bin yuz dis tɛm fɔ ɛnkɔrej di disaypul dɛn we de na wan tɔŋ we nem Lida we de na di Flat Grɔn na Sharɔn. Di tin dɛn we i bin du bin mek bɔku pipul dɛn we de na da eria de tɔn “to di Masta.” (Akt 9:​32-35) Di disaypul dɛn nɔ bin alaw ɔda tin dɛn fɔ tek dɛn atɛnshɔn, bɔt dɛn bin wok tranga wan fɔ sho se dɛn bisin bɔt dɛn kɔmpin dɛn ɛn dɛn bin de prich di gud nyuz. Dis bin mek di pipul dɛn na di kɔngrigeshɔn “kɔntinyu fɔ bɔku.”

²¹ Bay di ɛnd ɔf di ia 1901 to di ia 2000 [“end of 21st century”], Jiova Witnɛs dɛn we de na bɔku kɔntri dɛn bin “gɛt pis fɔ sɔm tɛm.” Sɔm gɔvmɛnt dɛn we bin de agens Gɔd in pipul dɛn fɔ lɔng tɛm bin kɔmɔt na pawa, ɛn i bin izi fɔ prich na sɔm say dɛn we dɛn bin ban wi wok, ɛn na sɔm ɔdasay dɛn, dɛn bin lift di ban. Bɔku bɔku Jiova Witnɛs dɛn bin yuz dis chans fɔ prich na pɔblik, ɛn fayn tin dɛn bin apin bikɔs ɔf dat.

22. Aw yu go yuz di fridɔm we yu gɛt fɔ prich di bɛst we?

²² Yu de yuz di tɛm we yu gɛt fridɔm gud gud wan? If yu de na kɔntri usay dɛn nɔ de ambɔg di prichin wok, Setan go want fɔ tɛmt yu fɔ mek yu gɛda bɔku mɔni ɛn prɔpati ɛn nɔ put di Kiŋdɔm wok fɔs na yu layf. (Mat. 13:​22) Nɔ alaw am fɔ ful yu. Yuz di tɛm we una gɛt fridɔm fɔ prich gud gud wan. Si am as chans fɔ prich gud gud wan ɛn ɛp di kɔngrigeshɔn fɔ gro. Mɛmba se di tin dɛn we de apin na di say we yu de kin chenj kwik kwik wan.

23, 24. (a) Us pɔynt dɛn wi lan frɔm Tabita in stori? (b) Wetin wi fɔ mekɔp wi maynd fɔ du?

²³ Tink bɔt wetin bin apin to wan disaypul we nem Tabita, ɔ Dɔkas. I bin de na wan tɔŋ we nem Jɔpa we nɔ de fa frɔm Lida. Dis fetful sista bin de yuz in tɛm ɛn in prɔpati dɛn wit sɛns. I bin de “du bɔku gud tin dɛn ɛn gi gift dɛn to po pipul dɛn.” Bɔt i bin sik ɛn day jɔs lɛk dat.c Di disaypul dɛn na Jɔpa bin rili fil am we i day, mɔ di uman dɛn we dɛn man dɛn dɔn day we i bin dɔn du gud tin dɛn fɔ. We Pita rich na di os usay dɛn bin de rɛdi Tabita in bɔdi fɔ go bɛr am, i pafɔm wan mirekul we nɔn pan Jizɔs Krays in apɔsul dɛn nɔ bin dɔn pafɔm yet. Pita bin pre fɔs, dɔn i gi layf bak to Tabita! Yu kin imajin di kayn we aw di uman dɛn we dɛn man dɛn bin dɔn day ɛn di ɔda disaypul dɛn bin gladi we Pita kɔl dɛn insay di rum ɛn dɛn si se Tabita dɔn gɛt layf bak? Dɛn tin dɛn ya we apin go dɔn ɛnkɔrej dɛn fɔ di prɔblɛm dɛn we go mit dɛn! Dis mirekul we Pita pafɔm bin “skata ɔlsay na Jɔpa, ɛn bɔku pipul dɛn biliv di Masta.”​—Akt 9:​36-42.

²⁴ Wi lan tu impɔtant pɔynt dɛn frɔm Tabita in stori. (1) Layf shɔt. So i impɔtant fɔ lɛ wi gɛt gudnem wit Gɔd we wi stil ebul fɔ du dat! (Ɛkli. 7:​1) (2) Di op fɔ se di wan dɛn we dɔn day go gɛt layf bak na sɔntin we gɛt fɔ apin. Jiova bin notis di bɔku fayn fayn tin dɛn we Tabita bin du, ɛn i blɛs am fɔ dat. I go mɛmba di tranga wok we wi dɔn du ɛn gi wi layf bak if wi day bifo Amagɛdɔn. (Ibru. 6:​10) So ilɛksɛf wi de bia di “tɛm we tin tranga” ɔ wi de ɛnjɔy “pis fɔ sɔm tɛm,” lɛ wi kɔntinyu fɔ prich di gud nyuz bɔt Krays gud gud wan.​—2 Tim. 4:​2.