Kwɛstyɔn Dɛn We Pipul Dɛn Kin Aks

Pruf de we sho se Jizɔs bi kam fɔ bi Ay Prist insay di ia 29 di tɛm we i bin baptayz. Aw wi no dis? Di tɛm we Jizɔs bin de baptayz, i bin sho se i want fɔ sakrifays in layf na Gɔd in ɔlta fɔ “du wetin Gɔd want.” (Gal. 1:​4; Ibru 10:​5-10) Di ɔlta na impɔtant pat na di tɛmpul, so i go bi bak se di spirichwal tɛmpul bin stat di tɛm we Jizɔs bin de baptayz. Jiova in wɔndaful spirichwal tɛmpul tinap fɔ ɔltin we mek am pɔsibul fɔ wi fɔ wɔship am di rayt we tru Jizɔs in sakrifays.—Mat. 3:​16, 17; Ibru. 5:​4-6.

Di wɔndaful spirichwal tɛmpul bin nid wan ay prist we go wok de. Fɔ du dat, Jiova bin anɔynt Jizɔs wit in “Spirit ɛn in pawa.” (Akt 10:​37, 38; Mak 1:​9-11) Bɔt aw wi shɔ se Gɔd bin pik Jizɔs fɔ bi Ay Prist bifo i day ɛn gɛt layf bak? Wi go sabi di ansa fɔ da kwɛstyɔn de we wi lan bɔt Erɔn ɛn di ay prist dɛn we bin kam afta am di tɛm we dɛn bin de ɔnda di Lɔ we Gɔd bin gi Mozis.

Di Lɔ we Jiova bin gi to Mozis bin se na di ay prist nɔmɔ gɛt rayt fɔ go insay di ples we Oli Pas Ɔl na di tabanakul, ɛn leta, go na di ples we Oli Pas Ɔl na di tɛmpul. Wan kɔtin bin de we bin de sɛpret di ples we Oli frɔm di ples we Oli Pas Ɔl. Na di De fɔ Fɔgiv Sin nɔmɔ di ay prist bin de pas da kɔtin de. (Ibru. 9:​1-3, 6, 7, NWT) Jɔs lɛk aw dɛn anɔynt Erɔn ɛn di ay prist dɛn we bin kam afta am bifo dɛn “pas di [rial] kɔtin” na di tabanakul, na so Jiova go mɔs dɔn pik Jizɔs fɔ bi di Ay Prist na in wɔndaful spirichwal tɛmpul bifo i day ɛn afta dat i “pas di kɔtin, we na in bɔdi” ɛn gɛt layf na ɛvin. (Ibru. 10:​20, NWT) Na da rizin de mek di apɔsul Pɔl bin tɔk se Jizɔs go kam “as ay prist” ɛn i go pas “na di tɛnt we mɔ impɔtant ɛn we pafɛkt pas di fɔs wan, ɛn na tɛnt we dɛn nɔ mek wit an,” dat na “ɛvin.”—Ibru 9:​11, 24, NWT.

▪ Difrɛns nɔ de bitwin ustɛm di nyu agrimɛnt ol wata ɛn ustɛm i bin bigin fɔ wok. Wetin mek? Na bikɔs di tɛm we Jizɔs bin go na ɛvin ɛn gi in pafɛkt layf fɔ wi sek, i bin tek di fɔs stɛp pan di tri stɛp dɛn we ol wata fɔ di nyu agrimɛnt. Na dɛn sem stɛp dɛn de bak bin mek di agrimɛnt bigin fɔ wok. Wetin na bin dɛn stɛp dɛn de?

Fɔs, Jizɔs bin go bifo Jiova; sɛkɔn, Jizɔs gi in pafɛkt layf as sakrifays to Jiova; ɛn di las wan, Jiova bin tek Jizɔs in blɔd we i gi. Di nyu agrimɛnt nɔ go wok pas te ɔl dɛn tin dɛn ya apin.

Di Baybul nɔ tɛl wi di rayt tɛm we Jiova gri fɔ tek Jizɔs in sakrifays. So wi nɔ go ebul fɔ no di patikyula tɛm we di nyu agrimɛnt bigin fɔ wok. Bɔt wi no se Jizɔs bin go na ɛvin tɛn dez bifo Pɛntikɔst. (Akt 1:​3) I go bi se bitwin di tɛm we i go na ɛvin ɛn di tɛm fɔ Pɛtikɔst, na da tɛm de i gi in pafɛkt layf we i bin dɔn sakrifays to Jiova, ɛn Jiova bin tek am. (Ibru 9:​12) Wi bin si di pruf klia wan di tɛm fɔ Pɛntikɔst. (Akt 2:​1-4, 32, 33) Dis sho se di nyu agrimɛnt dɔn stat ɛn i de wok.

Frɔm ɔl wetin wi dɔn tɔk, di nyu agrimɛnt bin bigin fɔ wok afta we Jiova bin tek Jizɔs in pafɛkt layf we i bin dɔn sakrifays. Di agrimɛnt bigin fɔ wok we di Ay Prist we na Jizɔs, de wok as di Midulman.—Ibru 7:​25; 8:​1-3, 6; 9:​13-15.