Yu “Rɛdi fɔ Obe?”

 1. Wetin mek i nɔ kin izi fɔ obe?

TƐM dɛn de we yu kin fil se i nɔ izi fɔ obe? Kiŋ Devid bin de fil da we de, so i bin pre to Gɔd se: “Mek lɛ a rɛdi fɔ obe yu.” (Sam 51:​12, NWT) Devid bin lɛk Jiova. Bɔt stil, tɛm dɛn bin de we i nɔ bin izi fɔ am fɔ obe, ɛn na di sem tin kin apin to wi. Wetin mek? Fɔs, dɛn bɔn wi wit abit dɛn we de mek wi nɔ obe. Sɛkɔn, Setan de tray fɔ mek wi nɔ obe Jiova jɔs lɛk am. (2 Kɔr. 11:3) Tɔd, wi de liv wit pipul dɛn we gɛt di spirit we de na di wɔl, dat na “di spirit we de wok insay pipul dɛn we nɔ de obe.” (Ɛfi. 2:2) So wi fɔ wok tranga wan fɔ fɛt agens di pafɛkt we wi nɔ pafɛkt ɛn di Dɛbul ɛn dis wɔl, so dat wi go obe Jiova ɛn di wan dɛn we i dɔn put oba wi.

 2. Wetin i min fɔ “rɛdi fɔ obe”? (Jems 3:17)

² Rid Jems 3:17. Jems we Gɔd bin yuz fɔ rayt pat pan di Baybul bin tɔk se pipul dɛn we gɛt sɛns go “rɛdi fɔ obe.” Tink bɔt wetin dat min. Wi fɔ rɛdi fɔ obe di wan dɛn we Jiova dɔn put oba wi. As wi no, Jiova nɔ de ɛkspɛkt wi fɔ obe pɔsin we nɔ want mek wi obe In lɔ dɛn.​—Akt 4:​18-20.

 3. Wetin mek i impɔtant to Jiova fɔ obe di wan dɛn we gɛt pawa?

³ Sɔntɛm wi kin fil se i izi fɔ obe Jiova pas fɔ obe mɔtalman. Afta ɔl, Jiova de tɛl wi fɔ du pafɛkt tin dɛn ɔltɛm. (Sam 19:7) Bɔt mɔtalman dɛn we de tɛl wi wetin fɔ du nɔ pafɛkt. Bɔt stil, wi Papa we de na ɛvin dɔn gi pawa to mama ɛn papa dɛn, gɔvmɛnt wokman dɛn, ɛn di ɛlda dɛn. (Prɔv. 6:20; 1 Tɛs. 5:12; 1 Pit. 2:​13, 14) We wi obe dɛn, wi de rili obe Jiova. Lɛ wi tɔk bɔt aw wi go obe mɔtalman dɛn we Jiova dɔn put oba wi, pan ɔl we sɔntɛnde i nɔ go izi fɔ mek wi gri wit wetin dɛn tɛl wi fɔ du ɛn obe dɛn.

 4. Wetin mek bɔku pikin dɛn nɔ kin obe dɛn mama ɛn papa dɛn?

⁴ Wi yɔŋ wan dɛn de arawnd dɛn kɔmpin yɔŋ wan dɛn we “nɔ . . . de obe dɛn mama ɛn papa.” (2 Tim. 3:​1, 2) Wetin mek bɔku pan dɛn nɔ de obe? Sɔm mama ɛn papa dɛn nɔ de du wetin dɛn de tɛl dɛn pikin dɛn fɔ du. Ɛn dɛn pikin dɛn kin tink se dat nɔ fia. Ɔda wan dɛn tink se bikɔs di wɔl dɔn rili chenj, di advays we dɛn mama ɛn papa de gi dɛn nɔ go ɛp dɛn ɔ dɛn tu strikt. If yu na yɔŋ pɔsin, na da we de yu de fil? I nɔ kin izi fɔ bɔku yɔŋ wan dɛn fɔ obe Jiova in lɔ we se: “Una obe una mama ɛn papa dɛn lɛk aw di Masta want, bikɔs dis na tin we rayt na Gɔd in yay.” (Ɛfi. 6:1) Wetin go ɛp yu fɔ du dat?

 5. Akɔdin to Lyuk 2:​46-52, wetin mek Jizɔs na di bɛst ɛgzampul bɔt yɔŋ pɔsin we bin obe in mama ɛn papa?

⁵ Yu go ebul lan fɔ obe frɔm Jizɔs we na di bɛst ɛgzampul. (1 Pit. 2:​21-24) I bin pafɛkt, bɔt in mama ɛn papa nɔ bin pafɛkt. Bɔt Jizɔs bin ɔnɔ in mama ɛn papa pan ɔl we dɛn bin de mek mistek dɛn ɛn sɔntɛnde dɛn nɔ bin de ɔndastand am. (Ɛks. 20:12) Tink bɔt wetin bin apin we Jizɔs bin ol 12 ia. (Rid Lyuk 2:​46-52.) In mama ɛn papa bin lɛf am biɛn na Jerusɛlɛm. Na bin Josɛf ɛn Meri dɛn wok fɔ mek shɔ se ɔl dɛn pikin dɛn de wit dɛn afta di fɛstival fɔ go bak na os. We Josɛf ɛn Meri faynali fɛn Jizɔs, dɛn bin blem am fɔ di wɔri we i mek dɛn wɔri bɔt am! Jizɔs bin fɔ dɔn tɛl dɛn se dɛn nɔ trit am fia wan. Bɔt, i bin tek tɛm ansa dɛn wit rɛspɛkt. Josɛf ɛn Meri “nɔ ɔndastand wetin i bin de tɛl dɛn.” Bɔt stil, Jizɔs bin “kɔntinyu fɔ put insɛf ɔnda dɛn.”

6-7. Wetin go ɛp yɔŋ pipul dɛn fɔ obe dɛn mama ɛn papa dɛn?

⁶ Yɔŋ wan dɛn, yu dɔn ɛva fil se i nɔ izi fɔ obe yu mama ɛn papa we dɛn mek mistek ɔ we dɛn nɔ ɔndastand yu? Wetin go ɛp yu? Fɔs, tink bɔt aw Jiova de fil. Di Baybul tɔk se we yu obe yu mama ɛn papa “dis na tin we di Masta lɛk.” (Kol. 3:20) Jiova no se sɔntɛnde yu mama ɛn papa nɔ kin ɔndastand yu, ɔ sɔntɛm dɛn kin mek lɔ dɛn we nɔ izi fɔ obe. Bɔt we yu disayd fɔ obe dɛn, yu de mek Jiova gladi fɔ yu.

⁷ Sɛkɔn, tink bɔt aw yu mama ɛn papa de fil. We yu obe yu mama ɛn papa, yu de mek dɛn gladi fɔ yu ɛn yu go mek dɛn biliv yu mɔ. (Prɔv. 23:​22-25) Yu padi biznɛs wit dɛn go tayt mɔ ɛn mɔ. Wan brɔda na Bɛljiɔm we nem Alɛgzandra tɔk se, “We a bigin fɔ du wetin mi mama ɛn papa dɛn de tɛl mi fɔ du, dat bin mek wi padi biznɛs tayt ɛn wi bin gladi.”b Tɔd, tink bɔt aw di obe we yu de obe dɛn naw go ɛp yu tumara bambay. Pawlo we de na Brazil tɔk se, “We a bigin fɔ obe mi mama ɛn papa, dat dɔn ɛp mi fɔ obe Jiova ɛn ɔda pipul dɛn we gɛt pawa.” Gɔd in Wɔd dɔn gi yu gud rizin fɔ obe yu mama ɛn papa. I tɔk se: “So dat tin go fayn fɔ yu ɛn yu go liv fɔ lɔng tɛm na di wɔl.”​—Ɛfi. 6:​2, 3.

 8. Wetin mek bɔku yɔŋ wan dɛn kin disayd fɔ obe dɛn mama ɛn papa dɛn?

⁸ Bɔku yɔŋ wan dɛn dɔn si aw tin dɔn kɔmɔt fayn fɔ dɛn we dɛn de obe. Luiza we insɛf kɔmɔt na Brazil, nɔ bin ebul ɔndastand fɔs wetin mek in mama ɛn papa nɔ bin alaw am fɔ gɛt fon fɔ sɔm tɛm. Afta ɔl, i bin tink se bɔku pipul dɛn we dɛn ɔl na di sem ej gɛt mobayl fon. Bɔt afta sɔm tɛm, i kam fɔ no se in mama ɛn papa bin rili de protɛkt am. Naw i no se we i de obe in mama ɛn papa, i nɔ fɔ fil se dɛn de tayt am, bikɔs dɛn advays na di rayt tin we i nid. Wan yɔŋ sista we nem Ilizabɛt we de na Amɛrika stil de tray tranga wan sɔntɛnde fɔ obe in mama ɛn papa. I tɔk se, “We a nɔ rili ɔndastand wetin mek mi mama ɛn papa put wan patikyula lɔ, a kin tink bɔt di tɛm we dɛn lɔ dɛn bin dɔn protɛkt mi.” Mɔnika we de na Amenia bin tɔk se tin kin kɔmɔt fayn fɔ am we i obe in mama ɛn papa pas di tɛm dɛn we i nɔ kin obe dɛn.

 9. Aw bɔku pipul dɛn kin fil bɔt fɔ obe lɔ?

⁹ Bɔku pipul dɛn gri se wi nid di gɔvmɛnt dɛn we de na di wɔl ɛn wi fɔ obe sɔm pan di lɔ dɛn we “di wan dɛn we gɛt pawa” dɔn mek. (Rom. 13:1) Bɔt dɛn nɔ go obe sɔm lɔ dɛn we dɛn nɔ lɛk ɔ we dɛn tink se nɔ fia. Fɔ ɛgzampul, lɛk fɔ pe taks. Insay wan kɔntri na Yurop, bɔku pipul dɛn tink se “i nɔ bad if yu nɔ pe taks we yu tink se nɔ fia.” Na dat mek insay da kɔntri de, di sitizin dɛn nɔ de pe ɔl di taks dɛn we di gɔvmɛnt se dɛn fɔ pe.

10. Wetin mek wi de obe ivin lɔ dɛn we wi nɔ lɛk?

¹⁰ Di Baybul gri se mɔtalman gɔvmɛnt dɛn de mek pipul dɛn sɔfa, dɛn de ɔnda Setan in kɔntrol, ɛn i nɔ go te igen dɛn go dɔnawe wit dɛn. (Sam 110:​5, 6; Ɛkli. 8:9; Lyuk 4:​5, 6) I tɛl wi bak se “ɛnibɔdi we de agens di wan dɛn we gɛt pawa de agens Gɔd in arenjmɛnt.” Fɔ naw, Jiova dɔn alaw gɔvmɛnt dɛn fɔ rul so dat dɛn go ebul fɔ kɔntrol di tin dɛn we de apin, ɛn i de ɛkspɛkt wi fɔ obe dɛn. So wi fɔ “gi dɛn ɔl wetin dɛn fɔ gɛt,” lɛk fɔ pe taks, gi dɛn rɛspɛkt, ɛn obe dɛn. (Rom. 13:​1-7) Wi kin si lɔ as sɔntin we nɔ izi fɔ obe ɔltɛm, we nɔ fia, ɔ we rili tranga fɔ obe. Bɔt wi de obe Jiova, ɛn i tɛl wi fɔ obe di wan dɛn we gɛt pawa as lɔng as dɛn nɔ tɛl wi fɔ pwɛl in lɔ dɛn.​—Akt 5:29.

11-12. Akɔdin to Lyuk 2:​1-6, wetin Josɛf ɛn Meri bin du fɔ obe pan ɔl we i nɔ bin izi fɔ dɛn? Wetin bin apin we dɛn du dat? (Luk bak di pikchɔ dɛn.)

¹¹ Wi kin lan frɔm Josɛf ɛn Meri dɛn ɛgzampul, we bin rɛdi fɔ obe di wan dɛn we gɛt pawa pan ɔl we i nɔ bin izi fɔ dɛn. (Rid Lyuk 2:​1-6.) We Meri in bɛlɛ bin dɔn rich lɛk 9 mɔnt, sɔntin bin apin we bin tɛst if in ɛn Josɛf de obe. Ɔgɔstɔs we bin de rul di Roman Ɛmpaya bin want mek dɛn kɔnt di pipul dɛn. Josɛf ɛn Meri bin gɛt fɔ waka 93 mayl fɔ go na Bɛtliɛm, ɛn dɛn go pas na rod dɛn we gɛt il dɛn. Da patrol de nɔ bin izi mɔ fɔ Meri. Sɔntɛm dɛn bin de wɔri bɔt Meri ɛn di pikin we i nɔ bɔn yet dɛn sef wan. Sɔntɛm dɛn bin de wɔri bɔt wetin go apin if i bɔn na rod. Dɛn bin fɔ dɔn wɔri bɔt aw fɔ kip di pikin sef bikɔs na in na di Mɛsaya we dɛn bin de wet fɔ. Yu tink se ɔl dɛn tin ya fɔ dɔn mek dɛn nɔ obe di gɔvmɛnt?

¹² Josɛf ɛn Meri nɔ bin alaw ɛniwan pan dɛn tin dɛn de fɔ afɛkt dɛn ɛn mek dɛn nɔ obe di lɔ. Jiova bin blɛs dɛn we dɛn obe. Meri bin rich sef wan na Bɛtliɛm, bɔn pikin we gɛt wɛlbɔdi, ɛn i bin ivin ɛp fɔ mek Baybul prɔfɛsi kam tru!​—Mayk. 5:2.

13. Aw di obe we wi de obe kin afɛkt wi brɔda ɛn sista dɛn?

¹³ We wi de obe di wan dɛn we gɛt pawa, wi de bɛnifit wisɛf ɛn ɔda pipul dɛn. Aw? Na bikɔs wi de avɔyd di bad tin dɛn we kin apin to di wan dɛn we nɔ de obe lɔ. (Rom. 13:4) We wi de obe di wan dɛn we gɛt pawa, dɛn go si se Jiova Witnɛs dɛn na gud sitizin dɛn. Fɔ ɛgzampul, sɔm ia bifo dis tɛm insay Nayjiria, sojaman dɛn go insay wan Kiŋdɔm Ɔl we dɛn bin de gɛt dɛn kɔngrigeshɔn mitin fɔ luk fɔ pipul dɛn we de kɔz trɔbul ɛn we de agens di gɔvmɛnt fɔ pe taks dɛn. Bɔt di ɔfisa we bin de oba di sojaman dɛn bin tɛl di sojaman dɛn fɔ kɔmɔt de, ɛn i se: “Jiova Witnɛs dɛn na pipul dɛn we de pe dɛn taks dɛn ɔltɛm.” Ɛnitɛm we yu de obe di lɔ, yu kin mek Jiova in pipul dɛn gɛt gudnem; da gudnem de go ɛp fɔ protɛkt yu kɔmpin Kristian dɛn wande.​—Mat. 5:16.

14. Wetin bin ɛp wan sista fɔ “rɛdi fɔ obe” di wan dɛn we gɛt pawa?

¹⁴ Bɔt stil, sɔntɛm wi nɔ kin want fɔ obe di wan dɛn we gɛt pawa ɔltɛm. Wan sista we de na Amɛrika we nem Joana bin tɔk se: “I nɔ bin rili izi fɔ obe, bikɔs sɔm pipul dɛn na mi famili bin dɔn sɔfa we di wan dɛn we de na pawa nɔ bin trit dɛn fia wan.” Bɔt Joana bin rɛdi fɔ chenj di we aw i bin de tink. Fɔs, i bin stɔp fɔ rid soshal midia post dɛn we bin de mek i fil bad bɔt di wan dɛn we de na pawa. (Prɔv. 20:3) Sɛkɔn, bifo i pre fɔ mek mɔtalman gɔvmɛnt chenj, i bin pre fɔ mek Jiova ɛp am so dat i go abop pan am. (Sam 9:​9, 10) Tɔd, i bin de rid atikul dɛn na wi buk ɛn magazin dɛn we de ɛnkɔrej wi fɔ mek wi nɔ put an pan pɔlitiks. (Jɔn 17:16) Joana tɔk naw se we i de rɛspɛkt ɛn obe di wan dɛn we gɛt pawa, dat dɔn mek i gɛt “kolat we i nɔ go ebul fɔ tɔk bɔt.”

15. Wetin mek i nɔ kin izi fɔ obe di dayrɛkshɔn we Jiova in ɔganayzeshɔn de gi?

¹⁵ Jiova tɛl wi fɔ “obe di wan dɛn we de bifo [wi]” na di kɔngrigeshɔn. (Ibru. 13:17) Pan ɔl we wi Lida we na Jizɔs pafɛkt, di brɔda dɛn we i dɔn pik fɔ de bifo wi nɔ pafɛkt. I nɔ kin izi fɔ obe dɛn, mɔ we dɛn tɛl wi fɔ du sɔntin we wi nɔ want fɔ du. Wantɛm, apɔsul Pita nɔ bin want fɔ obe. We wan enjɛl tɛl am fɔ it animal dɛn we nɔ klin ɔnda di Lɔ we Gɔd Bin Gi Mozis, i nɔ bin gri; nɔto wan tɛm nɔmɔ i bin du dat, bɔt na tri tɛm! (Akt 10:​9-16) Wetin mek? Dis nyu dayrɛkshɔn nɔ bin mek sɛns to am. I bin dɔn yus fɔ du tin difrɛn we. If i nɔ bin izi fɔ Pita fɔ obe di dayrɛkshɔn we pafɛkt enjɛl bin gi am, i go mɔs bi se i nɔ go izi fɔ wi fɔ obe di dayrɛkshɔn we pipul dɛn we nɔ pafɛkt de gi wi!

16. Wetin apɔsul Pɔl bin du pan ɔl we i fɔ dɔn si di dayrɛkshɔn we i bin gɛt as sɔntin we nɔ mek sɛns? (Akt 21:​23, 24, 26)

¹⁶ Apɔsul Pɔl bin “rɛdi fɔ obe” ivin we dɛn tɛl am fɔ du sɔntin we i go dɔn fil se nɔ mek sɛns. Di Ju Kristian dɛn bin dɔn yɛri lay lay tin dɛn bɔt Pɔl fɔ se i bin de go ɛn prich fɔ mek dɛn “lɛf fɔ du wetin Mozis se” ɛn i nɔ rɛspɛkt di Lɔ we Gɔd Bin Gi Mozis. (Akt 21:21) Di Kristian ɛlda dɛn na Jerusɛlɛm bin tɛl Pɔl fɔ tek 4 man dɛn ɛn go na di tɛmpul ɛn klin insɛf fɔ sho se i de fala di Lɔ. Bɔt Pɔl bin no se Kristian dɛn nɔ de ɔnda di Lɔ igen, ɛn i nɔ bin dɔn du ɛnitin we rɔng. Bɔt stil, Pɔl bin du wetin dɛn tɛl am fɔ du. “Di nɛks de,” i “tek di man dɛn, ɛn i klin insɛf ɛn klin di man dɛn lɛk aw di Lɔ se.” (Rid Akt 21:​23, 24, 26.) Bikɔs Pɔl bin obe di dayrɛkshɔn we dɛn bin gi am, i bin ɛp fɔ mek di brɔda dɛn gɛt wanwɔd.​—Rom. 14:​19, 21.

17. Wetin yu lan frɔm Stɛfani in ɛkspiriɛns?

¹⁷ I nɔ bin izi fɔ wan sista we nem Stɛfani fɔ obe wetin di ɛlda dɛn na in kɔntri bin disayd fɔ du. In ɛn in man bin gladi we dɛn bin de sav na wan grup we de tɔk ɔda langwej. Di branch bin stɔp di grup fɔ kɔntinyu fɔ de, ɛn dɛn bin sɛn Stɛfani ɛn in man bak na wan kɔngrigeshɔn usay dɛn de tɔk dɛn yon langwej. Stɛfani tɔk se: “Mi at bin rili pwɛl. A nɔ bin tink se nid bin rili de na di kɔngrigeshɔn usay dɛn de tɔk wi yon langwej.” Bɔt pan ɔl dat, i bin disayd fɔ sɔpɔt di nyu dayrɛkshɔn. I tɔk se: “Afta sɔm tɛm, a kam fɔ si se wetin dɛn disayd bin rili mek sɛns. Wi dɔn bi spirichwal mama ɛn papa to bɔku pipul dɛn na wi kɔngrigeshɔn we nɔ gɛt famili na di trut. A de stɔdi naw wit wan sista we dɔn kam bak na di trut. Ɛn naw a gɛt mɔ tɛm fɔ du mi pasɔnal stɔdi.” I tɔk bak se, “A gɛt klin kɔnshɛns bikɔs a no se a dɔn du mi bɛst fɔ obe.”

18. Aw wi de bɛnifit we wi obe?

¹⁸ Wi kin lan fɔ obe. Jizɔs bin “lan aw fɔ obe,” frɔm “di sɔfa we i sɔfa.” (Ibru. 5:8) Lɛk Jizɔs, bɔku tɛm wi kin lan fɔ obe we tin dɛn nɔ izi fɔ wi. Fɔ ɛgzampul, fɔ se i nɔ bin izi fɔ yu fɔ obe we dɛn bin tɛl wi fɔ stɔp fɔ go na Kiŋdɔm Ɔl ɛn fɔ stɔp fɔ prich frɔm os to os we di COVID-19 pandɛmik bin jɔs stat? Bɔt di obe we yu obe bin protɛkt yu, i bin ɛp di kɔngrigeshɔn fɔ gɛt wanwɔd, ɛn i bin mek Jiova gladi. Dis dɔn mek wi dɔn rɛdi naw fayn fayn wan fɔ obe ɛni dayrɛkshɔn we wi go gɛt di tɛm fɔ da big big trɔbul. We wi obe dɛn dayrɛkshɔn dɛn de, dat go sev wi layf!—Job 36:11.

19. Wetin mek yu fɔ obe?

¹⁹ Wi dɔn lan se we wi de obe, dat de mek wi gɛt bɔku blɛsin dɛn. Bɔt di men rizin we mek wi de obe Jiova na bikɔs wi lɛk am ɛn wi want fɔ mek i gladi. (1 Jɔn 5:3) Wi nɔ go ɛva ebul pe Jiova fɔ ɔl di tin dɛn we i dɔn du fɔ wi. (Sam 116:12) Bɔt wi go ebul obe am ɛn di wan dɛn we gɛt pawa we de oba wi. If wi obe, wi de sho se wi gɛt sɛns. Ɛn we wi gɛt sɛns, wi de mek Jiova gladi.​—Prɔv. 27:11.