“A Want Lɛ Siza Luk Insay Mi Kes!”

1, 2. (a) Wetin bin apin to Pɔl? (b) We Pɔl beg fɔ mek dɛn kɛr am go to Siza, us kwɛstyɔn dis go mek wi aks?

PƆL bin stil de na prizin na Sizeria ɛn di wan dɛn we bin de gayd in sɛl bin de wach am ɔltɛm. Tu ia bifo dis tɛm, we i bin go bak na Judia, di Ju dɛn bin tray fɔ kil am lɛk tri tɛm so insay shɔt tɛm. (Akt 21:​27-36; 23:​10, 12-15, 27) Te tide, Pɔl in ɛnimi dɛn nɔ ebul fɔ kech am, bɔt dɛn stil nɔ de giv-ɔp. We Pɔl si se sɔntɛm i go stil fɔdɔm na dɛn an, i tɛl di Roman Gɔvnɔ Fɛstɔs se: “A want lɛ Siza luk insay mi kes!”−Akt 25:​11.

² Yu tink se Jiova bin sɔpɔt Pɔl we i disayd fɔ beg di kiŋ na Rom? Di ansa impɔtant to wi we de prich di gud nyuz bɔt Gɔd in Kiŋdɔm insay dis tɛm we di ɛnd de kam. Wi nid fɔ no if Pɔl bin sɛt ɛgzampul fɔ wi fɔ fala we i kam pan fɔ “tinap fɔ di gud nyuz ɛn yuz di lɔ fɔ gɛt rayt fɔ prich di gud nyuz.”​—Fil. 1:​7.

3, 4. (a) Us plan di Ju pipul dɛn bin gɛt we dɛn aks fɔ mek dɛn briŋ Pɔl kam na Jerusɛlɛm? Ɛn aw dɛn nɔ bin ebul fɔ kil am? (b) Jɔs lɛk Pɔl, aw Jiova de sɔpɔt in savant dɛn tide?

³ Tri dez afta Fɛstɔs we na di nyu Roman gɔvnɔ na Judia stat fɔ wok, i go na Jerusɛlɛm.a Na de i lisin as di edman dɛn fɔ di prist dɛn ɛn di impɔtant man dɛn pan di Ju dɛn bigin fɔ tɔk agens Pɔl to am. Dɛn bin no se di wan dɛn we de oba di nyu gɔvnɔ want fɔ mek i gɛt pis wit dɛn ɛn ɔl di Ju pipul dɛn. So dɛn aks Fɛstɔs fɔ du sɔntin fɔ dɛn. Dɛn se mek i sɛn Pɔl na Jerusɛlɛm so dat dɛn go tɔk in kes de. Bɔt dɛn bin gɛt ɔda bad plan we na fɔ kil Pɔl na di rod frɔm Sizeria to Jerusɛlɛm. Bɔt Fɛstɔs nɔ bin gri fɔ du wetin dɛn se, na de i tɛl dɛn se: “Lɛ di wan dɛn we gɛt pawa pan una go dɔŋ wit mi [na Sizeria] ɛn tɔk bɔt di bad tin we una se i du, if na tru se i du ɛni bad tin.” (Akt 25:​5) Dis tɛm bak dɛn nɔ bin ebul fɔ kil Pɔl.

⁴ Insay ɔl di prɔblɛm dɛn we Pɔl bin gɛt, Jiova bin de yuz di Masta Jizɔs Krays fɔ sɔpɔt am. Mɛmba insay wan vishɔn, Jizɔs tɛl in apɔsul se: “Tek kɔrej!” (Akt 23:​11) Tide, Gɔd in savant dɛn bak kin gɛt prɔblɛm dɛn, ɛn pipul dɛn kin trɛtin fɔ kil dɛn. Jiova nɔ de protɛkt wi frɔm ɔl wi prɔblɛm dɛn, bɔt i de gi wi sɛns ɛn trɛnk fɔ bia. Wi kin abop ɔltɛm se wi Gɔd we lɛk wi go gi wi “di pawa we pas mɔtalman in yon.”​—2 Kɔr. 4:​7.

 5. Aw Fɛstɔs andul Pɔl in kes?

⁵ Afta sɔm dez, Fɛstɔs bin “sidɔm na di jɔjmɛnt chia” na Sizeria.b Pɔl ɛn di wan dɛn we bin de agens am bin tinap bifo am. Fɔ ansa ɔl di bad bad tin dɛn we dɛn se i du we dɛn nɔ gɛt wan pruf fɔ sho se na so i du, Pɔl bigin fɔ tɔk se: “A nɔ brok di Ju dɛn Lɔ. A nɔ sin agens di tɛmpul, ɛn a nɔ sin agens Siza.” Di apɔsul nɔ bin du ɛni bad tin, ɛn i bin fit fɔ lɛ dɛn fri am. Wetin Fɛstɔs go disayd fɔ du? Bikɔs i bin want fɔ mek di Ju dɛn lɛk am, i aks Pɔl se: “Yu go want fɔ go ɔp na Jerusɛlɛm fɔ mek di jɔjmɛnt bɔt dis kes go apin de bifo mi?” (Akt 25:​6-9) Dat nɔ bin mek wan sɛns! Bikɔs if dɛn kɛr Pɔl go bak na Jerusɛlɛm, di wan dɛn we de agens am go bi in jɔj dɛn, ɛn fɔ tru dɛn go kil am de. Insay dis ɛgzampul, Fɛstɔs bin de pik fɔ du wetin go mek di pipul dɛn gladi pas fɔ gi tru tru jɔstis. Wan gɔvnɔ we bin de bifo am we nem Pɔntiɔs Paylet bin du di sem tin pan wan kes we gɛt fɔ du wit wan prizina we impɔtant pas Pɔl. (Jɔn 19:​12-16) So wi nɔ fɔ sɔprayz we kɔt dɛn kin disayd fɔ du tin dɛn we nɔ gri wit di pruf dɛn we dɛn gɛt pan kes dɛn we gɛt fɔ du wit Gɔd in pipul dɛn tide.

6, 7. Wetin mek Pɔl beg fɔ mek dɛn kɛr am go to Siza? Us ɛgzampul i sɛt fɔ tru Kristian dɛn tide?

⁶ Bikɔs Fɛstɔs bin want fɔ mek di Ju pipul dɛn lɛk am, dis bin fɔ dɔn put Pɔl in layf pan denja. So, Pɔl bin yuz di rayt we i gɛt as Roman sitizin fɔ tɔk fɔ insɛf. I bin tɛl Fɛstɔs se: “A tinap bifo Siza in jɔjmɛnt chia usay dɛn fɔ jɔj mi. A nɔ du ɛni bad tin to di Ju dɛn, ɛn yusɛf sɛf dɔn de rili no dat. . . . A want lɛ Siza luk insay mi kes!” We dɛn kin beg fɔ lɛ Siza luk insay kes, bɔku tɛm dɛn nɔ kin ebul fɔ chenj am. Fɛstɔs bin tɔk mɔ bɔt dis we i se: “Ɛnti yu want mek Siza luk insay yu kes, yu de go to Siza.” (Akt 25:​10-12) We Pɔl bin de se i want lɛ di bigman we gɛt mɔ pawa luk insay in kes, i bin sɛt ɛgzampul fɔ tru Kristian dɛn tide. We di wan dɛn we de agens wi de tray fɔ yuz “di lɔ fɔ mek trɔbul,” Jiova Witnɛs dɛn kin yuz di lɔ fɔ ɛksplen bɔt di gud nyuz.c​—Sam 94:​20, NWT.

⁷ So afta Pɔl bin dɔn de na jel fɔ tu ia bikɔs ɔf kraym dɛn we i nɔ kɔmit, dɛn bin gi Pɔl di chans fɔ tɔk bɔt in kes na Rom. Bɔt bifo i go, wan ɔda rula bin want fɔ si am bak.

8, 9. Wetin mek Kiŋ Agripa go na Sizeria?

⁸ Afta sɔm dez we Fɛstɔs bin yɛri we Pɔl bin tɔk se mek Siza luk insay in kes, Kiŋ Agripa ɛn in sista Banis bin go “fɔ grit” di nyu gɔvnɔ.d Insay di Roman tɛm, na bin kɔstɔm fɔ mek di bigman dɛn go to di nyu gɔvnɔ we dɛn jɔs dɔn pik. We Agripa bin go fɔ sho Fɛstɔs se i gladi fɔ we dɛn pik am fɔ bi gɔvnɔ, wan dawt nɔ de se i bin de tray fɔ stat padi biznɛs wit di gɔvnɔ we go leta bɛnifit am as kiŋ.​—Akt 25:​13.

⁹ Fɛstɔs bin tɛl di kiŋ bɔt Pɔl, ɛn Agripa bin rili want fɔ no mɔ. Di nɛks de, dɛn tu rula ya sidɔm na di jɔjmɛnt chia. Bɔt dɛn pawa ɛn di kayn we aw dɛn bin de blɔf nɔ bin impɔtant pas di wɔd dɛn we di prizina we bin de bifo dɛn bin de kam fɔ tɔk.​—Akt 25:​22-27.

10, 11. Aw Pɔl bin sho se i rɛspɛkt Agripa? Wetin Pɔl bin tɛl di kiŋ bɔt in layf we i bin dɔn liv trade?

¹⁰ Pɔl bin tɛl Kiŋ Agripa tɛnki wit rɛspɛkt fɔ di chans we i gi am fɔ tɔk fɔ insɛf, ɛn i bin gri se di kiŋ sabi ɔl di kɔstɔm dɛn ɛn di kes we di Ju pipul dɛn kin gɛt. Dɔn Pɔl bin tɔk bɔt in layf we i bin dɔn liv trade we i se: “Mi na bin Faresi, ɛn di Faresi dɛn bin strikt pas ɔl di ɔda Ju dɛn we i kam pan di we aw dɛn de wɔship Gɔd.” (Akt 26:​5) Di tɛm we Pɔl na bin Faresi, i bin dɔn de op se di Mɛsaya go kam. Bɔt naw we i dɔn bi Kristian, i bin gɛt maynd fɔ sho se Jizɔs Krays na da pɔsin we dɛn bin dɔn de wet fɔ, fɔ lɔng tɛm. Wan tin we in ɛn di wan dɛn we de agens am bin biliv na dat, dɛn op fɔ mek di tin dɛn we Gɔd bin prɔmis to dɛn gret gret granpa dɛn go apin, we na dis mek dɛn bin de jɔj Pɔl da de de. Dis tin we Pɔl bin de ɛksplen bin mek Agripa want fɔ no mɔ bɔt wetin Pɔl bin gɛt fɔ tɔk.e

¹¹ We Pɔl bin de mɛmba di bad we aw i bin de trit Kristian dɛn trade, i tɔk se: “Mi na wan pɔsin we bin biliv se a fɔ du bɔku bad tin dɛn to Jizɔs di Nazarin. . . . Ɛn bikɔs a bin vɛks pan dɛn [Krays in disaypul dɛn] bad bad wan, a ivin go na ɔda siti dɛn fɔ mek dɛn sɔfa.” (Akt 26:​9-11) Pɔl nɔ bin de mek big tɔk. Bɔku pipul dɛn bin no se i bin de go ɛn mek di Kristian dɛn rili sɔfa. (Gal. 1:​13, 23) Sɔntɛm Agripa go de wɔnda, ‘Wetin go dɔn mek dis man ya chenj?’

12, 13. (a) Wetin Pɔl bin tɔk bɔt di we aw i kam fɔ bi Kristian? (b) Aw i tan lɛk se Pɔl bin de “du bad tin to insɛf”?

¹² Di nɛks wɔd dɛn we Pɔl tɔk bin gi wi di ansa we i se: “We a bin de travul go na Damaskɔs . . . afta di edman dɛn fɔ di prist dɛn dɔn gi mi di pawa ɛn sɛn mi, san santɛm, O Kiŋ, a si wan layt we brayt pas di san kɔmɔt na ɛvin ɛn flash rawnd mi ɛn di wan dɛn we bin de wit mi na di rod. Ɛn we wi ɔl dɔn fɔdɔm na grɔn, a yɛri wan vɔys we tɔk to mi insay di Ibru langwej se: ‘Sɔl, Sɔl, wetin mek yu de mek a sɔfa? Yu de du bad tin to yusɛf we yu de fɛt mi.’ Bɔt a se, ‘Udat na yu, Masta?’ Na de di Masta se, ‘Na mi, Jizɔs, we yu de mek sɔfa.’”f​—Akt 26:​12-15.

¹³ Bifo Pɔl si dis vishɔn, i bin tan lɛk se ’i dɔn de du bad tin to insɛf.’ Jɔs lɛk aw animal we gɛt lod go wund insɛf we i kik di shap say pan tik we gɛt ayɛn, na so Pɔl bin dɔn de du bad to insɛf na Gɔd in yay bay we i nɔ gri wit wetin Gɔd want. We Jizɔs we bin gɛt layf bak bin apia to Pɔl we i bin de go na Damaskɔs, i bin mek dis man we bin rili want fɔ no mɔ, bɔt we nɔ bin de tink di rayt we chenj wetin i de tink.​—Jɔn 16:​1, 2.

14, 15. Wetin Pɔl bin se bɔt di chenj dɛn we i mek na in layf?

¹⁴ Fɔ tru Pɔl bin mek big chenj dɛn na in layf. We i bin de tɔk to Agripa, i tɔk se: “A obe wetin a si na di vishɔn frɔm ɛvin, ɛn a go fɔs to di pipul dɛn na Damaskɔs ɛn leta to di wan dɛn na Jerusɛlɛm ɛn di wan dɛn we de ɔlsay na Judia, ɛn to di pipul dɛn we de na ɔda neshɔn dɛn. A bin de tɛl dɛn se dɛn fɔ ripɛnt ɛn tɔn to Gɔd bay we dɛn de du tin dɛn we de sho se dɛn dɔn ripɛnt.” (Akt 26:​19, 20) Fɔ lɔng tɛm, Pɔl bin dɔn de du di wok we Jizɔs Krays bin gi am insay da vishɔn de we i bin si san santɛm. Wetin bin apin afta dat? Di wan dɛn we bin lisin to di gud nyuz we Pɔl bin de prich bin ripɛnt frɔm di fri layf we dɛn bin de liv, ɛn di wan dɛn we bin ɔnɛs, bin tɔn to Gɔd. Dɛn kayn pipul dɛn de bin bi gud sitizin dɛn bay we dɛn bin de sho rɛspɛkt fɔ lɔ ɛn ɛp mek tin dɛn apin fayn na di siti.

¹⁵ Bɔt dɛn bɛnifit dɛn de nɔ bin min natin to di Ju pipul dɛn we bin de agens Pɔl. Pɔl tɔk se: “Na dat mek di Ju dɛn bin ol mi na di tɛmpul ɛn tray fɔ kil mi. Bɔt bikɔs a dɔn si se Gɔd de ɛp mi, a dɔn de prich to impɔtant pipul dɛn ɛn kɔmɔn pipul dɛn te tide.”​—Akt 26:​21, 22.

16. Aw wi kin falamakata Pɔl we wi de tɔk bɔt di tin dɛn we wi biliv to jɔj dɛn ɛn di wan dɛn we gɛt pawa?

¹⁶ As tru Kristian dɛn, wi nid fɔ “rɛdi ɔltɛm“ fɔ ɛksplen bɔt di tin dɛn we wi biliv. (1 Pit. 3:​15) We wi de tɔk to jɔj dɛn ɛn rula dɛn bɔt wetin wi biliv, wi go si se i go fayn fɔ falamakata di we aw Pɔl bin de tɔk to Agripa ɛn Fɛstɔs. We wi tɔk wit rɛspɛkt to jɔj dɛn ɛn di wan dɛn we gɛt pawa ɛn tɛl dɛn bɔt aw di tru tin dɛn na di Baybul dɔn chenj wi layf, sɔntɛm dɛn go chenj di we aw dɛn de trit wi we dɛn kam fɔ no se wi ɛn ɔda pipul dɛn dɔn chenj wi layf bikɔs ɔf di tru tin dɛn we wi de lan na di Baybul.

17. We Pɔl bin de tɔk fɔ insɛf, aw Fɛstɔs bin biev? Aw wisɛf de si dat tide?

¹⁷ As di tu rula dɛn bin de lisin to di tin dɛn we Pɔl bin de tɔk fɔ mek dɛn biliv, dɛn bin de tink bɔt wetin Pɔl bin de tɔk. Notis wetin bin apin: “As Pɔl de tɔk dɛn tin ya we i de ɛksplen fɔ sho se i nɔ du ɛnitin bad, Fɛstɔs tɔk lawd wan se: ‘Na kres yu de kres so, Pɔl! Bɔku buk lanin de mek yu kres!’” (Akt 26:​24) Tide, wi ivin de si di sem kayn we aw Fɛstɔs bin biev. Fɔ bɔku pipul dɛn, di wan dɛn we de tich wetin di Baybul rili se na pipul dɛn we gɛt zil pasmak fɔ dɛn rilijɔn. Bɔku tɛm, i nɔ kin izi fɔ di wan dɛn we gɛt sɛns na di wɔl fɔ gri wit di tin dɛn we di Baybul de tich fɔ se di wan dɛn we dɔn day go gɛt layf bak.

18. Aw Pɔl bin ansa Fɛstɔs? Wetin dis bin mek Agripa se?

¹⁸ Pɔl bin gɛt ansa fɔ di gɔvnɔ: “Nɔto kres a de kres, Ɔnarebul Fɛstɔs. Di tin dɛn we a de tɔk na tru ɛn dɛn mek sɛns. Infakt, a nɔ de fred fɔ tɔk, bikɔs di kiŋ we a de tɔk to no bɔt dɛn tin ya gud gud wan . . . Kiŋ Agripa, yu biliv di Prɔfɛt dɛn? A no se yu biliv.” Bɔt Agripa tɛl Pɔl se: “I nɔ go te igen, yu go mek a bi Kristian.” (Akt 26:​25-28) Dɛn wɔd dɛn ya, ilɛksɛf na tru ɔ nɔto tru, sho se di tin we Pɔl bin tɔk bin rili tɔch di kiŋ in at.

19. Wetin Fɛstɔs ɛn Agripa bin disayd fɔ du bɔt Pɔl?

¹⁹ Dɔn Agripa ɛn Fɛstɔs tinap fɔ sho se di tɔk dɔn dɔn. “We dɛn de go, dɛn bigin fɔ tɔk to dɛn kɔmpin dɛn se: ‘Dis man nɔ de du ɛnitin we fɔ mek i day ɔ de na prizin.’ Agripa tɛl Fɛstɔs se: ‘Yu fɔ dɔn fri dis man if i nɔ bin se i want mek Siza luk insay in kes.’” (Akt 26:​31, 32) Dɛn bin no se di man we tinap bifo dɛn nɔ du ɛnitin we bad. Sɔntɛm naw, dɛn go de trit di Kristian dɛn fayn.

20. Wetin bin apin afta Pɔl prich to di bigman dɛn?

²⁰ I tan lɛk se Fɛstɔs ɛn Agripa nɔ bin gri fɔ tek di gud nyuz bɔt Gɔd in Kiŋdɔm. Yu tink se i mek sɛns we apɔsul Pɔl bin tinap bifo dɛn man dɛn de? Di ansa na yɛs. Pɔl “go bifo kiŋ ɛn gɔvnɔ dɛn” na Judia we bin mek i ebul fɔ prich to di Roman ɔfisa dɛn we i nɔ bin ebul fɔ prich to da tɛm de. (Lyuk 21:​12, 13) Dɔn bak, di tin dɛn we bin apin to am ɛn di fetful we i bin fetful di tɛm we i gɛt prɔblɛm bin rili ɛnkɔrej in Kristian brɔda ɛn sista dɛn.​—Fil. 1:​12-14.

21. We wi de kɔntinyu fɔ du di prichin wok, us gud tin dɛn go apin?

²¹ Na di sem tin de apin tide. We wi de kɔntinyu fɔ du di prichin wok pan ɔl we wi gɛt prɔblɛm dɛn ɛn pipul dɛn de agens wi, wi go si se bɔku gud tin dɛn go apin. Wi kin prich to bigman dɛn na pawa we nɔ kin izi fɔ go tɔk to. We wi bia fetful wan, dat kin ɛnkɔrej wi Kristian brɔda ɛn sista dɛn, ɛn dis kin mek dɛn sho se dɛn gɛt maynd mɔ fɔ prich gud gud wan bɔt Gɔd in Kiŋdɔm.