LƐSIN 52

Wetin Mek Wi Fɔ Tek Tɛm wit di We Aw Wi De Drɛs?

Printɛd Ɛdishɔn

Wi ɔl gɛt difrɛn we dɛn aw wi want fɔ drɛs. If wi fala sɔm simpul Baybul prinsipul dɛn, wi nɔ go jɔs pik wetin wi want fɔ wɛr bɔt wi go pik tin dɛn bak we go mek Jiova gladi. Lɛ wi tɔk bɔt sɔm pan dɛn prinsipul dɛn de.

1. Wetin go ɛp wi fɔ disayd wetin fɔ wɛr?

Wi fɔ “drɛs di rayt we, bay we [wi] nɔ de du tin pasmak wan ɛn bay we [wi] du tin wit sɛns.” Dɔn bak, wi fɔ mek shɔ se wetin wi de wɛr klin ɛn sho se wi na pipul dɛn we de “wɔship Gɔd.” (1 Timoti 2:9, 10) Tink bɔt dɛn 4 prinsipul dɛn ya: (1) Wi fɔ drɛs di “rayt we.” As yu dɔn notis na wi kɔngrigeshɔn mitin dɛn, Jiova in pipul dɛn de drɛs difrɛn we dɛn. Bɔt di we aw wi de drɛs ɛn di we aw wi de mek wi ia de sho se wi rɛspɛkt di Gɔd we wi de wɔship. (2) Drɛs di kayn we we go mek yu “nɔ du tin pasmak wan.” Dat min se di we aw wi de drɛs nɔ fɔ mek ɔda pipul dɛn bigin tink bɔt bad tin ɔ mek tumɔs atɛnshɔn de pan wi. (3) Wi de sho se wi de “du tin wit sɛns” bay we wi nɔ de fala ɛnikayn fashɔn ɔ stayl we kɔmɔt. (4) Di we aw wi de drɛs fɔ sho ɔltɛm se wi de “wɔship di [tru] Gɔd, ɛn i fɔ izi fɔ mek ɔda pipul dɛn si dat.—1 Kɔrintians 10:31.

2. Wetin mek wi fɔ tink bɔt wi brɔda ɛn sista dɛn we wi de disayd wetin fɔ wɛr?

Pan ɔl we wi gɛt rayt fɔ pik wetin wi want fɔ wɛr, wi fɔ tink bɔt aw di tin dɛn we wi de disayd fɔ wɛr de afɛkt ɔda pipul dɛn. Wi fɔ du wi bɛst mek ɔda pipul dɛn nɔ fil bad ɛn wi fɔ “du wetin gud to wi neba, so dat wi go ɛp am fɔ tinap tranga wan.”—Rid Romans 15:1, 2.

3. Aw di we aw wi de drɛs go mek ɔda pipul dɛn want fɔ lan bɔt Jiova?

Wi kin du wi bɛst fɔ tray fɔ drɛs fayn ɔltɛm. Bɔt wi kin tek tɛm mɔ wit di we aw wi de drɛs we wi de atɛnd kɔngrigeshɔn mitin ɛn we wi de du di prichin wok. Wi nɔ want fɔ mek di we aw wi de drɛs mek pipul dɛn nɔ pe atɛnshɔn to di impɔtant mɛsej we wi de tɛl dɛn. Bifo dat, wi want mek di we aw wi de drɛs mek pipul dɛn want fɔ no mɔ bɔt Jiova ɛn mek “wi Seviɔ, in tichin fayn mɔ ɛn mɔ.”—Taytɔs 2:10.

LAN MƆ

Lan mɔ bɔt aw wi go mek shɔ se di we aw wi de drɛs de sho se wi na Kristian dɛn.

Tu man dɛn tinap bifo wan jɔj. Wan man wɛr kot ɛn nɛktay, dɔn di ɔda wan wɛr chɛr-chɛr jin wit polo ɛn fesin kap. — Di we aw wi drɛs go sho if wi rɛspɛkt di wan dɛn we de na pawa. Pan ɔl we Jiova de si wetin de na wi at, di we aw wi drɛs go sho bak se wi rɛspɛkt am

4. Wi de sho rɛspɛkt fɔ Jiova we wi drɛs fayn

Wetin na di rizin we impɔtant pas ɔl we mek wi fɔ bisin bɔt di we aw wi de drɛs? Rid Sam 47:2, dɔn una tɔk bɔt dɛn kwɛstyɔn dɛn ya:

Aw wi go disayd fɔ drɛs we wi mɛmba se di we aw wi drɛs de afɛkt di we aw pipul dɛn de si Jiova?
Yu tink se i rili mek sɛns fɔ bisin bɔt di we aw wi de drɛs we wi de atɛnd mitin ɛn we wi de du di prichin wok? Wetin mek yu tink so? Wetin mek yu nɔ tink so?

5. Wetin go ɛp wi fɔ disayd aw fɔ drɛs?

Ple di VIDIO.

VIDIO: “Du Ɔltin fɔ Briŋ Prez to Gɔd” (10:18)

Ilɛksɛf wi klos dia ɔ i nɔ dia bɛtɛ, i fɔ klin ɛn i fɔ fit di program we wi de wɛr am fɔ. Rid 1 Kɔrintians 10:24 ɛn 1 Timoti 2:9, 10. Dɔn, una tɔk bɔt wetin mek wi fɔ avɔyd fɔ wɛr klos dɛn we . . .

nɔ nit ɔ klin.
tayt, we de sho wi bɔdi pat dɛn, ɔ we de mek pɔsin tink bɔt mami ɛn dadi biznɛs.

Kristian dɛn nɔ nid fɔ fala di Lɔ we Gɔd bin gi Mozis, bɔt stil dɛn kin lan bɔku tin frɔm dɛn lɔ dɛn de bɔt di we aw Jiova de tink. Rid Ditarɔnɔmi 22:5, dɔn una tɔk bɔt dis kwɛstyɔn:

Wetin mek wi fɔ avɔyd fɔ wɛr klos dɛn we de mek man luk lɛk uman ɔ uman luk lɛk man?

Rid 1 Kɔrintians 10:32, 33 ɛn 1 Jɔn 2:15, 16, dɔn una tɔk bɔt dɛn kwɛstyɔn dɛn ya:

Wetin mek wi fɔ chɛk if di we aw wi de drɛs de mek pipul dɛn fil bad na di eria ɔ na di kɔngrigeshɔn?
Uskayn drɛsin kɔmɔn na di say we yu de?
Yu tink se sɔm pan dɛn drɛsin dɛn de nɔ go fayn fɔ Kristian? Wetin mek yu tink so? Wetin mek yu nɔ tink so?