Na di Lɛk we Gɔd Lɛk Una we Una Nɔ Fit fɔ Gɛt Na In Dɔn Mek Una Fri

1, 2. Aw Lɛta Fɔ Rom 5:​12 go ɛp wi?

LƐTA FƆ ROM 5:​12 tɔk se: “Na wan man mek sin kam na [di] wɔl ɛn sin mek day kam pan mɔtalman. So, bikɔs ɔlman dɔn sin, day de mit ɔlman.” Dis na wan pan di vas dɛn we wi sabi gud gud wan ɛn plɛnti tɛm wi kin yuz am fɔ tich pipul dɛn bɔt di Baybul.

² Dɛn yuz dis vas plɛnti tɛm insay di buk dɛn we nem Wetin Rili di Baybul De Tich? ɛn What Can the Bible Teach Us? We wi de stɔdi chapta 3, 5, ɛn 6 wit wi pikin dɛn ɛn ɔda pipul dɛn, wi go mɔs rid Lɛta Fɔ Rom 5:​12. Sɔmtɛm wi kin yuz dis vas fɔ ɛp dɛn fɔ ɔndastand wetin mek di wɔl nɔto Paradays igen, wetin mek wi nid Jizɔs fɔ day fɔ wi, ɛn wetin mek wi de day. Bɔt dis vas kin ɛp wi bak fɔ sho se wi rili gladi fɔ di padi biznɛs we wi gɛt wit Jiova. I kin ɛp wi fɔ rili mekɔp wi maynd fɔ du wetin i want ɛn kɔntinyu fɔ wet fɔ di tin dɛn we i dɔn prɔmis wi.

 3. Wetin wi fɔ mɛmba bɔt wisɛf?

³ I sɔri fɔ no se wi ɔl de sin. Wi de mek mistek ɛnide. Bɔt Jiova na pɔsin we gɛt sɔri at. I no se wi nɔ pafɛkt, ɛn i rɛdi fɔ fɔgiv wi. (Sam 103:​13, 14) Jizɔs bin tɛl wi se wi fɔ beg Gɔd fɔ lɛ i fɔgiv wi sin dɛn. (Lyuk 11:​2-4) We Jiova fɔgiv wi fɔ di bad tin dɛn we wi bin dɔn du trade, wi nɔ fɔ kɔntinyu fɔ tink bɔt dɛn. Lɛ wi tɔk bɔt aw Jiova ebul fɔ fɔgiv wi.

4, 5. (a) Wetin de ɛp wi fɔ ɔndastand Lɛta Fɔ Rom 5:​12? (b) Wetin di Baybul min we i tɔk bɔt “di lɛk we Gɔd lɛk wi we wi nɔ fit fɔ gɛt”?

⁴ Insay di Baybul, Lɛta Fɔ Rom chapta 6 ɛp wi mɔ fɔ ɔndastand aw Jiova ebul fɔ fɔgiv wi sin dɛn. Insay chapta 3, wi lan se “ɔlman dɔn sin.” Dɔn Pɔl ɛksplen se: “Di lɛk we Gɔd lɛk wi we wi nɔ fit fɔ gɛt dɔn mek ɔltin rayt bitwin Gɔd ɛn mɔtalman, we Jizɔs Krays dɔn bay ɔlman wit in blɔd fɔ mek dɛn fri.” (Lɛta Fɔ Rom 3:​23, 24) Di Grik wɔd we dɛn translet as “di lɛk we Gɔd lɛk wi we wi nɔ fit fɔ gɛt” min fɔ du sɔntin we gud ɛn nɔ op fɔ gɛt ɛnitin.

⁵ Wan masta sabi bukman bin ɛksplen se di Grik wɔd kin min wetin Gɔd ɛn Krays dɔn du fɔ pul mɔtalman pan sin ɛn day. So insay di Inglish New World Translation, dɛn translet dis Grik wɔd as “di lɛk we Gɔd lɛk wi we wi nɔ fit fɔ gɛt.” Lɛ wi si wetin Gɔd dɔn du fɔ wi ɛn aw di lɛk we i lɛk wi we wi nɔ fit fɔ gɛt de bɛnifit wi naw, ɛn mek wi gɛt op fɔ tumara bambay.

 6. Udat dɛn go bɛnifit frɔm di lɛk we Gɔd lɛk wi pan ɔl we wi nɔ fit fɔ mek i lɛk wi? Aw dɛn go bɛnifit?

⁶ Wi ɔl nɔ pafɛkt ɛn wi ɔl de sin ɛn day bikɔs Adam bin dɔn sin. Na dat mek di Baybul se “bikɔs wan man sin, frɔm da tɛm de, ɔlman bin gɛt fɔ day fɔseka di tin we di wan man du.” Bɔt bikɔs Jiova lɛk wi pan ɔl we wi nɔ fit fɔ mek i lɛk wi, i mek we fɔ sev ɔlman bay we i yuz “Krays.” (Lɛta Fɔ Rom 5:​12, 15, 17) “Gɔd go mek ɔltin rayt bitwin in ɛn plɛnti pipul . . . bikɔs Jizɔs Krays du wetin i tɛl am fɔ du.” Ɛn dɛn kin op fɔ gɛt “layf we go de sote go.” Na “Jizɔs Krays mek dat bi.”—Lɛta Fɔ Rom 5:​19, 21.

 7. Wetin mek wi go se Gɔd du gud we i mek in Pikin kam day fɔ wi, pan ɔl we wi nɔ fit fɔ mek i du dat fɔ wi?

⁷ Tink bɔt dis: Jiova nɔ nid fɔ mek in Pikin day fɔ wi. Bɔt i rili du gud we i mek we fɔ pul wi kɔmɔt pan sin ɛn day. Di tin we Gɔd ɛn Jizɔs du fɔ wi na sɔntin we wi nɔn nɔ fit fɔ lɛ dɛn du fɔ wi. Wi rili gladi bikɔs Gɔd de fɔgiv wi ɛn in ɛn in pikin dɔn mek am pɔsibul fɔ lɛ wi gɛt layf we go de sote go! Wi go tɛl Gɔd tɛnki bay di we aw wi de liv wi layf.

 8. Us we wi nɔ fɔ tink?

⁸ Wi no se Gɔd rɛdi fɔ fɔgiv wi, ivin we wi sin siriɔs wan. Na tru se Jiova lɛk wi pan ɔl we wi nɔ fit fɔ mek i lɛk wi, bɔt dat nɔ fɔ ɛva mek wi du bad ɛn tink se, ‘Jiova go fɔgiv wi.’ Di tɛm we di apɔsul dɛn bin stil de alayf, sɔm Kristian dɛn bin de tink dis kayn we. (Rid Jud In Lɛta 4.) Tide, wisɛf fɔ tek tɛm lɛ wi nɔ fala ɔda pipul dɛn ɛn smɔl smɔl wi bigin fɔ tink da kayn we de.

9, 10. Aw Pɔl ɛn ɔda Kristian dɛn bin kɔmɔt pan sin ɛn day?

⁹ Pɔl bin tɛl Kristian dɛn se i bad if dɛn fɔ kɔntinyu fɔ sin, ɛn tink se Gɔd go fɔgiv dɛn. Pɔl se dɛn fɔ lɛf fɔ tink da we de bikɔs we i kam pan sin, dɛn na dayman. ‘Sin nɔ gɛt pawa fɔ rul dɛn igen.’ (Rid Lɛta Fɔ Rom 6:​1, 2.) Wetin Pɔl bin min?

¹⁰ Na Jizɔs in day mek am pɔsibul fɔ lɛ Gɔd fɔgiv Pɔl ɛn ɔda Kristian dɛn we bin de insay di apɔsul dɛn tɛm. Jiova bin anɔynt dɛn wit in oli spirit so dat dɛn go bi in pikin dɛn. If dɛn kɔntinyu fɔ du wetin Jiova want, dɛn go de na ɛvin ɛn rul wit Krays. Aw dɛn ‘dɔn day so dat sin nɔ go gɛt pawa fɔ rul dɛn igen’ we i bi se dɛn stil de alayf na di wɔl? Pɔl bin kɔmpia dɛn to Jizɔs fɔ sho se dɛn layf dɔn rili chenj. I bin se afta Jizɔs day, Gɔd bin gi am spirit bɔdi we nɔ de ɛva day. Na dat mek “day nɔ gɛt pawa oba am igen.” Semweso, i bin tan lɛk se di Kristian dɛnsɛf dɔn day. Dɛn layf dɔn rili chenj bikɔs dɛn nɔ de alaw di bad tin dɛn we de na dɛn at fɔ kɔntrol dɛn igen. Frɔm da tɛm de, dɛn de du dɛn bɛst fɔ liv dɛn layf di we we go mek Gɔd gladi. Dɛn “dɔn day so dat sin nɔ go gɛt pawa fɔ rul” dɛn igen, ɛn dɛn de “liv naw fɔ pliz Gɔd bikɔs [dɛn] gɛt wanwɔd wit Krays Jizɔs.”—Lɛta Fɔ Rom 6:​9, 11.

11. Aw Kristian dɛn tide “dɔn day so dat sin nɔ go gɛt pawa fɔ rul” dɛn?

¹¹ We wi? Aw wi “dɔn day so dat sin nɔ go gɛt pawa fɔ rul” wi? Trade, wi go dɔn du bɔku bad tin dɛn ɛn nɔ ivin no aw Jiova bin de fil bɔt di tin dɛn we wi bin de du. Wi bin tan lɛk “slev fɔ du ɔl kayn wikɛd ɛn dɔti tin we bin de na” wi at, dat na “di tɛm we sin bin de rul” wi. (Lɛta Fɔ Rom 6:​19, 20) Bɔt we wi lan na di Baybul bɔt aw Gɔd want lɛ wi liv wi layf, wi chenj di we aw wi bin de liv, wi pre fɔ gi wi layf to Gɔd dɔn wi baptayz. Wi rili want fɔ obe Jiova ɛn liv wi layf di we we go mek i gladi. Gɔd dɔn pul wi “kɔmɔt ɔnda sin in pawa,” ɛn wi “dɔn bi slev fɔ Gɔd fɔ du wetin rayt.”—Lɛta Fɔ Rom 6:​17, 18.

12. Wetin wi ɔl gɛt fɔ disayd?

¹² Bɔt, wi stil gɛt fɔ disayd. Pɔl bin se: “Una nɔ fɔ mek sin rul una bɔdi we go day, igen, so dat una nɔ go du ɛni bad tin we una at gi una fɔ du.” (Lɛta Fɔ Rom 6:​12) So i lɛf wit wi fɔ disayd fɔ du di bad tin dɛn we wi kin tink bɔt ɔ wi nɔ gri fɔ du dɛn. Aks yusɛf: ‘A kin tink bɔt bad tin te a du am? Ɔ a kin pul mi maynd de wantɛm wantɛm?’ If wi rili gladi fɔ di lɛk we Gɔd lɛk wi we wi nɔ fit fɔ mek i lɛk wi, dat go mek wi du ɔl wetin wi ebul fɔ mek i gladi.

13. Wetin mek wi fɔ biliv se wi go ebul fɔ du wetin rayt?

¹³ Insay di apɔsul dɛn tɛm, sɔm pipul dɛn na Kɔrint we bin de tif, ledɔm wit dɛn kɔmpin man, du mami ɛn dadi biznes wit ɔda pɔsin in maredman ɔ wɛf, wɔship aydɔl dɛn, ɛn drink te dɛn chak bin kam fɔ no Jiova ɛn lɛk am. Ɛn dat bin mek dɛn chenj. Dɛn bin de shem we dɛn tink bɔt wetin dɛn bin de du. (Lɛta Fɔ Rom 6:​21; Fɔs Lɛta Fɔ Kɔrint 6:​9-11) Di Kristian dɛn bak we bin de na Rom bin nid fɔ chenj jɔs lɛk dɛn. Pɔl bin tɛl dɛn se: “Una nɔ fɔ sin wit ɛni pat pan una bɔdi, bɔt una fɔ gi Gɔd ɔl pat na una layf, na so pipul we bin day bɔt we Gɔd dɔn gi nyu layf, fɔ du; una fɔ gi Gɔd ɔl una layf so dat i go mek una du dɛn tin we gud fɔ mɔtalman.” (Lɛta Fɔ Rom 6:​13) Pɔl bin biliv se dɛn go du wetin rayt ɛn kɔntinyu fɔ bɛnifit frɔm di lɛk we Gɔd lɛk dɛn pan ɔl we i nɔ fit fɔ lɛk dɛn.

14, 15. Us kwɛstyɔn wi fɔ aks wisɛf?

¹⁴ Na di sem tin de apin tide. Sɔm pan wi brɔda ɛn sista dɛn go dɔn liv dɛn layf lɛk di pipul dɛn we bin de na Kɔrint. Bɔt we dɛn kam fɔ no bɔt Jiova, dɛn chenj ɛn ‘Gɔd pul dɛn sin kɔmɔt pan dɛn.’ Wi ɔl bin chenj di we aw wi bin de liv wi layf fɔ mek Jiova gladi fɔ wi. Ɛn ivin naw, wi want fɔ sho Jiova se wi rili gladi fɔ di lɛk we i lɛk wi pan ɔl we i nɔ fit fɔ lɛk wi. So wi dɔn mekɔp wi maynd fɔ kɔntrol di bad tin dɛn we de na wi at ɛn yuz wi layf fɔ sav Jiova.

¹⁵ Wi fɔ tray fɔ avɔyd di siriɔs sin dɛn we sɔm pipul dɛn na Kɔrint bin de du. Wi nɔ go de du dɛn tin dɛn de dɔn wi de op se Gɔd go kɔntinyu fɔ lɛk wi ɛn fɔgiv wi. Wetin wi go se bɔt di sin dɛn we sɔm pipul dɛn kin se nɔ siriɔs? Wi rɛdi fɔ du ɔl wetin wi ebul fɔ obe Jiova pan ɔltin?—Lɛta Fɔ Rom 6:​14, 17.

16. Aw wi no se wi fɔ avɔyd sin dɛn we dɛn nɔ tɔk bɔt na Fɔs Lɛta Fɔ Kɔrint 6:​9-11?

¹⁶ Tink bɔt di apɔsul Pɔl. I bin rayt se: “Mi na mɔtalman, mi na sin in slev. A nɔ ɔndastand aw a de du: a nɔ de du wetin a want fɔ du, bifo dat, a de du dɛn tin we a nɔ lɛk fɔ du.” (Lɛta Fɔ Rom 7:​14, 15) Pan ɔl we i nɔ bin de du di tin dɛn we de na Fɔs Lɛta Fɔ Kɔrint 6:​9-11, Pɔl se i bin stil de sin. I bin want fɔ du wetin Jiova want, so i bin tray tranga wan nɔ fɔ du bad tin dɛn. (Rid Lɛta Fɔ Rom 7:​21-23.) Lɛ wi ɔl falamakata am ɛn du ɔl wetin wi ebul fɔ obe Jiova.

17. Wetin mek wi want fɔ ɔnɛs?

¹⁷ Fɔ ɛgzampul, wi no se wi fɔ ɔnɛs if wi want fɔ sav Jiova. (Rid Prɔvabs 14:​5; Lɛta Fɔ Ɛfisɔs 4:​25.) Wi nɔ want fɔ tan lɛk Setan, we “na lay man” ɛn we “de mek pipul lay.” Ɛn lɛ wi mɛmba se Ananayas ɛn in wɛf bin day bikɔs dɛn lay. So wi nɔ de lay. (Jɔn 8:​44; Di Apɔsul Dɛn Wok [Akt] 5:​1-11) Bɔt fɔ ɔnɛs nɔ jɔs min se wi nɔ fɔ lay. If wi rili gladi fɔ di lɛk we Gɔd lɛk wi we wi nɔ fit fɔ gɛt, wi go ɔnɛs bak pan ɔltin we wi de du.

18, 19. Wetin i min fɔ bi ɔnɛs pɔsin?

¹⁸ I kin bi se pɔsin nɔ de lay bɔt i nɔ ɔnɛs. Fɔ ɛgzampul, Jiova bin tɛl di Izrɛlayt dɛn se dɛn “nɔ fɔ tif  . . . mek dabaru ɔ lay gi dɛn kɔmpin.” Wetin mek dɛn nɔ fɔ du dɛn tin dɛn de? Jiova bin se: “dɛn fɔ oli” bikɔs in “PAPA GƆD [“Jiova,” NW] we na dɛn Gɔd oli.” (Lɛvitikɔs 19:​2, 11) Pan ɔl we wi nɔ go lay, if wi mek ɔda pipul dɛn biliv sɔntin we nɔto tru, wi nɔ ɔnɛs.

¹⁹ Fɔ ɛgzampul, wan man tɛl in bɔs ɔ in kɔmpin wok man dɛn se i go ɔf kwik bikɔs i fɔ go si dɔktɔ. Bɔt dat nɔto di men rizin. I want fɔ kɛr in famili go na bich. Di “dɔktɔ we i wan go si” na fɔ go na famɛsi ɔ fɔ jɔs go pe in dɔktɔ. Yu tink se i ɔnɛs, ɔ i de ful ɔda pipul dɛn? Di man mek ɔda pipul dɛn biliv sɔntin we nɔto tru. Sɔntɛnde, pɔsin kin ful ɔda pipul dɛn fɔ gɛt wetin i want ɔ fɔ mek dɛn nɔ pɔnish am. Bɔt wi de obe Jiova we tɛl wi se wi nɔ fɔ “mek dabaru” ɔ ful ɔda pipul dɛn. Wi want fɔ du wetin Jiova se rayt ɛn oli.—Lɛta Fɔ Rom 6:​19.

20, 21. If wi rili gladi fɔ di lɛk we Gɔd lɛk wi we wi nɔ fit fɔ gɛt, wetin bak wi fɔ avɔyd?

²⁰ Na tru se wi nɔ fɔ ledɔm wit ɔda pɔsin in maredman ɔ wɛf, wi nɔ fɔ drink te wi chak, ɔ put an pan ɔda siriɔs sin dɛn. Bɔt i nɔ tap de nɔmɔ, wi want fɔ avɔyd ɛnitin we go mek Jiova nɔ gladi. Fɔ ɛgzampul, wi nɔ jɔs de avɔyd mami ɛn dadi biznɛs di we aw Gɔd nɔ want, bɔt wi nɔ de ivin ɛnjɔy wisɛf wit fim, myuzik, ɔ buk we gɛt sɔntin fɔ du wit mami ɛn dadi biznɛs. Wi nɔ jɔs de tek wi tɛm fɔ drink lɛ wi nɔ chak, bɔt wi nɔ de drink te i lɛf smɔl mek wi chak. Wi go nid fɔ tray tranga wan fɔ avɔyd dɛn tin dɛn ya, ɛn wi go ebul fɔ avɔyd dɛn.

²¹ Wi want fɔ mekɔp wi maynd fɔ du wetin Pɔl bin tɔk we i se: “Una nɔ fɔ mek sin rul una bɔdi we go day, igen, so dat una nɔ go du ɛni bad tin we una at gi una fɔ du.” (Lɛta Fɔ Rom 6:​12; 7:​18-20) Na tru se wi nɔ go de wi nɔ sin. Bɔt we wi tinap tranga wan nɔ fɔ put an pan ɛnikayn sin, wi de sho se wi rili gladi fɔ di lɛk we Gɔd ɛn Krays lɛk wi pan ɔl we wi nɔ fit fɔ mek dɛn lɛk wi.

22. Us blɛsin wi go op fɔ gɛt if wi rili gladi fɔ di lɛk we Jiova lɛk wi we wi nɔ fit fɔ gɛt?

²² Jiova dɔn fɔgiv wi sin dɛn ɛn i go kɔntinyu fɔ fɔgiv wi. Wi gladi fɔ di lɛk we Gɔd lɛk wi we wi nɔ fit fɔ gɛt! So mek wi tray tranga wan fɔ avɔyd tin dɛn we Jiova se bad, pan ɔl we ɔda pipul dɛn go si am se nɔto sin. Us blɛsin wi op fɔ gɛt if wi du so? Pɔl bin se: “Bɔt naw Gɔd dɔn fri una, mek sin nɔ gɛt pawa fɔ rul una igen; una de lɛkɛ slev to Gɔd naw, so una dɔn gi Gɔd ɔl una layf” ɛn una go “gɛt layf we go de sote go.”—Lɛta Fɔ Rom 6:​22.