“Una Chenj bay we Una Chenj di We Aw Una De Tink”

1-2. Wetin wi fɔ kɔntinyu fɔ du afta wi baptayz? Ɛksplen.

YU KIN klin yu os ɔltɛm? Sɔntɛm bifo yu go de fɔ di fɔstɛm, yu bin tek tɛm fɔ klin am. Bɔt wetin go apin if yu nɔ klin am igen? I nɔ go te, i go dɔti bak. Fɔ mek yu os go nit ɔltɛm yu nid fɔ de klin am ɔltɛm.

² Wi fɔ kɔntinyu bak fɔ de kɔrɛkt di we aw wi de tink ɛn wi abit dɛn. Bifo wi baptayz, wi bin wok tranga wan fɔ mek sɔm chenj dɛn na wi layf fɔ mek wi “klin wisɛf lɛ no dɔti nɔ de pan wi bɔdi ɛn spirit.” (2 Kɔr. 7:​1) Bɔt naw, wi fɔ obe apɔsul Pɔl in advays fɔ “kɔntinyu fɔ de chenj.” (Ɛfi. 4:​23) Wetin mek wi nid fɔ kɔntinyu fɔ de kɔrɛkt wisɛf? Na bikɔs if wi alaw dis wɔl fɔ shep wi, wi go dɔti na Jiova in yay kwik kwik wan. Fɔ mek wi go kɔntinyu fɔ klin na Jiova in yay, wi nid fɔ de chɛk di we aw wi de tink, wi abit dɛn, ɛn di tin dɛn we wi want ɔltɛm.

 3. Wetin i min fɔ chenj di we aw wi de tink? (Romans 12:​2)

³ Wetin wi nid fɔ du fɔ chenj di we aw wi de tink? (Rid Romans 12:​2.) Di Grik wɔd we dɛn yuz fɔ translet di wɔd dɛn “chenj di we aw una de tink,” kin min fɔ “ajɔst wi maynd.” So, i nɔ min se wi fɔ jɔs du wan ɔ tu gud tin dɛn. Bɔt wi fɔ chɛk udat wi bi insay ɛn mek ɛni chenj we wi nid fɔ mek so dat wi go obe Jiova in lɔ dɛn di bɛst we aw wi ebul. Wi nɔ fɔ du dis wantɛm nɔmɔ, bɔt wi fɔ kɔntinyu fɔ de du am.

 4. Wetin wi go du fɔ mek wi nɔ alaw dis wikɛd wɔl fɔ shep di we aw wi de tink?

⁴ We wi go dɔn pafɛkt, wi go ebul mek Jiova gladi ɔltɛm pan ɔltin we wi de du. Bɔt rayt naw, wi nid fɔ kɔntinyu fɔ wok tranga wan fɔ mek Jiova gladi. Notis se na Romans 12:​2, Pɔl tɔk se wi nid fɔ chenj di we aw wi de tink so dat wi go no wetin Gɔd want wi fɔ du. Bifo wi alaw dis wikɛd wɔl fɔ shep wi, wi nid fɔ chɛk wisɛf fɔs fɔ no if wi rili de alaw di we aw Gɔd de tink, nɔto di we aw di wɔl de tink, fɔ afɛkt wi gol dɛn ɛn di tin dɛn we wi de disayd fɔ du.

 5. Aw wi go chɛk di we aw wi de tink bɔt Jiova in de we go kam jisnɔ? (Luk di pikchɔ.)

⁵ Tink bɔt dis ɛgzampul. Jiova want wi fɔ “tink ɔltɛm bɔt di tɛm we Jiova in de go kam.” (2 Pit. 3:​12) Aks yusɛf: ‘Fɔ se di we aw a de liv mi layf de sho se a ɔndastand se i nɔ go te igen dis wikɛd wɔl go dɔn? Di tin dɛn we a kin disayd we i kam to buk lanin ɛn wok de sho se fɔ sav Jiova na di tin we impɔtant pas ɔl ɔda tin na mi layf? A gɛt fet se Jiova go gi mi ɛn mi famili di tin dɛn we wi nid, ɔ a kin wɔri ɔltɛm bɔt dɛn tin dɛn de?’ Jiova de rili gladi we i de si aw wi de tray fɔ du wetin i want pan ɔltin we wi de du.—Mat. 6:​25-27, 33; Fil. 4:​12, 13.

 6. Wetin wi nid fɔ kɔntinyu fɔ du?

⁶ Wi nid fɔ de chɛk di we aw wi de tink ɔltɛm ɛn ajɔst if nid de. Pɔl bin tɛl di Kristian dɛn na Kɔrint se: “Una go de chɛk unasɛf fɔ no if una de liv lɛk Kristian; una go de pruv to unasɛf uskayn pɔsin una bi.” (2 Kɔr. 13:​5) Fɔ “liv lɛk Kristian” nɔ jɔs min fɔ de atɛnd Kristian mitin dɛn ɛn fɔ de prich frɔm tɛm to tɛm. Bɔt i min bak wetin wi de tink bɔt, wetin wi want, ɛn wetin mek wi de du sɔntin. So wi nid fɔ kɔntinyu fɔ chenj di we aw wi de tink bay we wi de rid Gɔd in Wɔd, lan fɔ tink lɛk aw i de tink ɛn du ɛnitin we wi nid fɔ du fɔ mek Jiova gladi.—1 Kɔr. 2:​14-16.

 7. Akɔdin to Ɛfishians 4:​31, 32, wetin bak wi nid fɔ du? Wetin mek i nɔ izi?

⁷ Rid Ɛfishians 4:​31, 32. Wan ɔda impɔtant chenj we wi nid fɔ mek na fɔ “gɛt di nyu abit dɛn.” (Ɛfi. 4:​24) Wi fɔ wok tranga wan fɔ du dis. Sɔm pan di bad abit dɛn we wi nid fɔ tray tranga wan fɔ lɛf na badat, wamat, ɛn vɛksteshɔn. Wetin mek dat nɔ izi? Na bikɔs i rili at fɔ lɛf sɔm bad abit dɛn. Fɔ ɛgzampul, di Baybul tɔk se sɔm pipul dɛn “kwik fɔ vɛks” ɛn “gɛt wamat.” (Prɔv. 29:​22, NWT.) I go bi se pɔsin we gɛt dɛn kayn bad abit dɛn ya go nid fɔ kɔntinyu fɔ wok tranga wan fɔ chenj, ivin afta i dɔn baptayz. Na dat di ɛkspiriɛns we wi de kam tɔk bɔt de sho.

8-9. Aw Stivin in ɛkspiriɛns ɛp wi fɔ no se wi nid fɔ kɔntinyu fɔ lɛf wi ol abit dɛn?

⁸ Wan brɔda we nem Stivin nɔ bin ebul fɔ kɔntrol in wamat. I tɔk se, “Ivin afta we a dɔn baptayz, a bin nid fɔ kɔntinyu fɔ kɔntrol mi wamat. Fɔ ɛgzampul, wan tɛm we a bin de prich frɔm os to os, a bin rɔnata wan tifman we bin jɔs dɔn tif di redio na mi motoka. We a rich nia am, i ib di redio ɛn rɔnawe. We a tɛl di ɔda brɔda ɛn sista dɛn se a dɔn gɛt mi redio bak, wan ɛlda na di grup aks mi se, ‘Stivin, wetin yu fɔ dɔn du if yu bin kech am?’ Da kwɛstyɔn de bin mek a tink ɛn i bin muv mi fɔ kɔntinyu fɔ wok tranga wan fɔ bi pɔsin we lɛk pis.”b

⁹ Stivin in ɛgzampul de sho se wi kin sho wi bad abit di tɛm we wi nɔ de ɛkspɛkt, ivin afta wi tink se wi dɔn lɛf am. If dat apin to yu, nɔ pwɛlat ɛn nɔ tink se yu nɔto bɛtɛ Kristian. Ivin apɔsul Pɔl bin tɔk se: “We a want fɔ du wetin rayt, na bad tin a kin fil fɔ du.” (Rom. 7:​21-23) Bikɔs wi nɔ pafɛkt, wi ɔl we na Kristian gɛt sɔm bad abit dɛn we go kɔntinyu fɔ de kam bak jɔs lɛk dɔst ɛn dɔti we de kam na wi os. Wi nid fɔ kɔntinyu fɔ klin wisɛf. Aw wi go du dat?

10. Wetin go ɛp wi fɔ lɛf abit dɛn we nɔ fayn? (1 Jɔn 5:​14, 15)

¹⁰ Pre to Jiova bɔt di abit we nɔ izi fɔ lɛ yu chenj, ɛn gɛt kɔnfidɛns se i go yɛri yu prea ɛn ɛp yu. (Rid 1 Jɔn 5:​14, 15.) Pan ɔl we Jiova nɔ go yuz mirekul fɔ pul di bad abit, i go ɛp yu fɔ mek yu nɔ sho da abit de. (1 Pit. 5:​10) Rayt naw, du tin we gri wit yu prea bay we yu de avɔyd fɔ du tin dɛn we go mek yu ol abit kam bak. Fɔ ɛgzampul, tek tɛm wit di kayn fim dɛn we yu de wach, tɛlvishɔn program dɛn, ɔ stori dɛn we yu de rid we de mek i tan lɛk se i fayn fɔ gɛt di bad abit we yu de tray fɔ lɛf. Ɛn nɔ alaw yusɛf fɔ de tink bɔt tin dɛn we nɔ fayn.—Fil. 4:​8; Kol. 3:​2.

11. Wetin wi go du fɔ kɔntinyu fɔ gɛt di nyu abit dɛn?

¹¹ Pan ɔl we yu dɔn lɛf di ol abit dɛn, i impɔtant fɔ gɛt di nyu abit dɛn. Aw yu go ebul du dat? Mek am yu gol fɔ falamakata Jiova as yu de lan bɔt in kwaliti dɛn. (Ɛfi. 5:​1, 2) Fɔ ɛgzampul, we yu de rid Baybul akawnt we de tɔk bɔt Jiova in fɔgivnɛs, aks yusɛf, ‘A kin fɔgiv ɔda pipul dɛn?’ We yu de rid bɔt aw Jiova de sho sɔri-at fɔ di wan dɛn we po, aks yusɛf, ‘Misɛf kin sɔri fɔ mi brɔda ɛn sista dɛn we po, ɛn a kin du sɔntin fɔ ɛp dɛn?’ Kɔntinyu fɔ chenj di we aw yu de tink bay we yu de tray fɔ gɛt di nyu abit dɛn, ɛn peshɛnt wit yusɛf as yu de du dat.

12. Wetin bin apin to Stivin we sho se di Baybul gɛt pawa fɔ chenj pipul dɛn?

¹² Stivin we wi bin dɔn tɔk bɔt, bin kam fɔ si se smɔl smɔl i bin ebul fɔ gɛt di nyu abit dɛn. I tɔk se: “Frɔm we a baptayz, tin dɛn dɔn apin to mi we bin fɔ dɔn mek a vɛks bad bad wan. A dɔn lan se a fɔ kɔmɔt nia di pipul dɛn we de tray fɔ mek a vɛks ɔ du sɔntin fɔ stɔp di prɔblɛm fɔ mek i nɔ wɔs. Bɔku pipul dɛn, ɛn ivin mi wɛf, dɔn tɛl mi tɛnki bikɔs ɔf wetin a du we dɛn prɔblɛm dɛn ya apin. Misɛf kin ivin sɔprayz! Nɔto mi gɛt di prez fɔ di chenj dɛn we a dɔn mek. Bɔt a biliv se dɛn chenj dɛn ya de pruv se di Baybul ebul fɔ chenj pipul dɛn.”

13. Wetin go ɛp wi fɔ mek wi want fɔ du di rayt tin dɛn? (Galeshians 5:​16)

¹³ Rid Galeshians 5:​16. Jiova de gi wi in oli spirit fɔ ɛp wi fɔ ebul du di rayt tin. We wi de stɔdi Gɔd in Wɔd, wi de alaw Gɔd in spirit fɔ shep wi. Wi de gɛt oli spirit bak we wi de atɛnd wi mitin dɛn. Na dɛn mitin dɛn de, wi kin spɛn tɛm wit wi brɔda ɛn sista dɛn we de tray tranga wan fɔ du di rayt tin jɔs lɛk wi, ɛn dat kin ɛnkɔrej wi. (Ibru. 10:​24, 25; 13:​7) Ɛn we wi de pre to Jiova wit ɔl wi at ɛn beg am fɔ ɛp wi na di say dɛn we wi wik, i go gi wi in oli spirit fɔ ɛp wi fɔ kɔntinyu fɔ fɛt fɔ lɛ wi nɔ du bad tin dɛn. Pan ɔl we i go bi se dɛn tin dɛn ya we wi de du nɔ go stɔp wi fɔ mek wi nɔ fil fɔ du tin dɛn we bad, dɛn go ɛp wi fɔ mek wi nɔ du dɛn bad tin dɛn de we wi de fil fɔ du. Jɔs lɛk wetin Galeshians 5:​16 se, di wan dɛn we de waka aw di spirit want “nɔ go du ɛnitin we di bɔdi want.”

14. Wetin mek i impɔtant fɔ mek wi kɔntinyu fɔ want fɔ du di rayt tin?

¹⁴ We wi dɔn stat fɔ du tin dɛn we de ɛp wi fɔ gɛt tayt padi biznɛs wit Jiova, i impɔtant fɔ mek wi kɔntinyu fɔ du dɛn tin dɛn de ɛn kɔntinyu fɔ want fɔ du di rayt tin. Wetin mek? Na bikɔs wan pan wi ɛnimi dɛn nɔ de ɛva stɔp fɔ fɛt agens wi. Da ɛnimi de na di tin we de tɛmt wi fɔ du bad. Ivin afta wi dɔn baptayz, sɔntɛm wi go stil want fɔ du di tin dɛn we wi fɔ avɔyd, lɛk fɔ ple gambul, fɔ drink rɔm pasmak, ɔ fɔ de wach dɛn rud rud pikchɔ ɔ fim dɛn. (Ɛfi. 5:​3, 4) Wan yɔŋ brɔda tɔk se: “Wan pan di tin dɛn we nɔ rili izi we a dɔn de fɛt wit na we a kin gɛt filin fɔ mi kɔmpin man. A bin tink se as tɛm de go a go stɔp fɔ fil dɛn we dɛn de, bɔt a stil de fil dɛn we dɛn de.” Wetin go ɛp yu if i nɔ rili izi fɔ mek yu lɛf fɔ fil fɔ du wan patikyula bad tin?

15. We wi no se di fil we wi de fil fɔ du bad na tin we “dɔn mit ɔda pipul dɛn,” wetin mek dat de ɛnkɔrej wi? (Luk di pikchɔ.)

¹⁵ We yu de tray fɔ kɔntrol di fil we yu de fil fɔ du wan patikyula bad tin we rili at fɔ lɛf, mɛmba se nɔto yu wangren de. Di Baybul se: “No tɛmteshɔn nɔ mit una yet we nɔ dɔn mit ɔda pipul dɛn.” (1 Kɔr. 10:​13a) Wan ɔda transleshɔn translet dis vas dis we: “Ɛnitɛm we una fil fɔ du bad, una fɔ mɛmba se ɔda pipul sɛf kin fil fɔ du dɛn sem tin [dɛn] de.” Dɛn bin rayt dɛn wɔd dɛn de to man ɛn uman dɛn we na bin Kristian dɛn we bin de na Kɔrint. Bifo dɛn bi Kristian, sɔm pan dɛn bin de lɛf dɛn wɛf ɔ man ɛn go du mami ɛn dadi biznɛs wit ɔda pɔsin, sɔm bin de du mami ɛn dadi biznɛs wit dɛn kɔmpin man ɔ uman, ɛn sɔm bin de drink te dɛn chak. (1 Kɔr. 6:​9-11) Yu tink se afta dɛn bin dɔn baptayz, dɛn nɔ bin ɛva fɛt fɔ lɛf fɔ fil fɔ du ɛni bad tin? Nɔto so i bi. Na tru se dɛn na bin anɔyntɛd Kristian dɛn, bɔt stil dɛn nɔ bin pafɛkt. Wan dawt nɔ de se wan wantɛm, dɛn bin de tray tranga wan fɔ lɛf fɔ fil fɔ du bad. Dat fɔ ɛnkɔrej wi. Wetin mek? Na bikɔs i de sho se ɔda pɔsin dɔn ebul fɔ lɛf di bad tin we yu de fɛt fɔ lɛf. Fɔ tru, yu go ebul fɔ kɔntinyu fɔ ‘gɛt strɔng fet, bikɔs yu no se di sem kayn tin dɛn we de mek yu de sɔfa na dɛn bak de mek yu brɔda dɛn ɔlsay na di wɔl de sɔfa.’—1 Pit. 5:​9.

16. Us denja wi fɔ avɔyd? Wetin mek?

¹⁶ Avɔyd di denja fɔ tink se nɔbɔdi nɔ go ebul ɔndastand di patikyula say we yu wik. If yu de tink da we de, i go mek yu fil se yu nɔ gɛt op ɛn yu nɔ go ebul fɔ lɛf fɔ fil fɔ du bad. Wetin di Baybul se difrɛn. I se: “Gɔd fetful, i nɔ go alaw tɛmteshɔn we una nɔ ebul fɔ bia fɔ mit una; bɔt we tɛmteshɔn mit una, i go mek we bak so dat una go ebul fɔ bia am.” (1 Kɔr. 10:​13b) So, ilɛksɛf i nɔ izi fɔ mek wi lɛf fɔ fil fɔ du wan patikyula bad, wi go ebul fetful to Jiova. Wit Jiova in ɛp, wi go ebul avɔyd fɔ du wetin bad.

17. Pan ɔl we sɔntɛm wi nɔ go ebul fɔ avɔyd fɔ fil fɔ du bad, wetin wi ebul fɔ kɔntrol?

¹⁷ Mɛmba dis ɔltɛm: Bikɔs wi nɔ pafɛkt, wi nɔ go ebul avɔyd fɔ fil fɔ du bad. Bɔt we wi fil fɔ du bad, wi go ebul disayd kwik kwik wan nɔ fɔ du di bad, jɔs lɛk aw Josɛf bin du we i nɔ westɛm fɔ rɔnawe frɔm Pɔtifa in wɛf. (Jɛn. 39:​12) Yu nɔ nid fɔ du di bad tin we yu de fil fɔ du!

18-19. Us kwɛstyɔn dɛn wi fɔ aks wisɛf as wi de tray tranga wan fɔ chenj di we aw wi de tink?

¹⁸ Fɔ chenj di we aw wi de tink min se wi fɔ kɔntinyu fɔ mek shɔ se di tin dɛn we wi de tink bɔt ɛn di tin dɛn we wi de du de mek Jiova gladi. So wi fɔ chɛk wisɛf ɔltɛm ɛn aks: ‘Wetin a de du de sho se a no se i nɔ de fa igen fɔ mek dis wɔl dɔn? A de du wɛl fɔ gɛt di nyu abit dɛn? A de alaw Jiova in spirit fɔ dayrɛkt mi layf so dat a go avɔyd fɔ du wetin di bɔdi want?’

¹⁹ We yu de chɛk yusɛf, nɔ ɛkspɛkt se yu fɔ pafɛkt, bɔt gladi fɔ wetin yu dɔn ebul fɔ du. If yu notis se yu nid fɔ du mɔ, nɔ pwɛlat. Bifo dat, na fɔ fala di advays we de na Filipians 3:​16, we se: “Ilɛk aw wi dɔn go bifo, lɛ wi kɔntinyu fɔ waka di kɔrɛkt we lɛk aw wi dɔn de du.” We yu du dat, na fɔ biliv tranga wan se Jiova go blɛs di tray we yu de tray fɔ chenj di we aw yu de tink.