Tu Impɔtant Tin dɛn we Go Mek Mared-Os De Sote Go

1, 2. (a) Aw lɔng mared fɔ las? (b) Wetin mek i pɔsibul?

WE Gɔd bin mek mared fɔ di fɔs man ɛn uman, natin nɔ bin de we sho se dɛn mared fɔ de fɔ shɔt tɛm nɔmɔ. Adam ɛn Iv bin fɔ de togɛda sote go. (Jɛnɛsis 2:​24) Di lɔ we Gɔd put fɔ mared na fɔ mek wan man ɛn wan uman de togɛda ɛn gɛt wanwɔd. Di wangren rizin we di Baybul gi we go mek pɔsin dayvɔs ɛn mared to ɔda pɔsin, na if di man ɔ di uman go du mami ɛn dadi biznɛs wit ɔda pɔsin we nɔto in man ɔ in wɛf.—Matyu 5:​32.

² I pɔsibul fɔ lɛ tu pipul dɛn liv togɛda sote go wit gladi at? Yɛs, i pɔsibul ɛn di Baybul sho tu impɔtant tin dɛn we go mek dis pɔsibul. If di man ɛn di uman du dɛn tin ya, dɛn go gɛt gladi at ɛn bɔku blɛsin. Wetin na dɛn impɔtant tin ya?

 3. Us tri kayn lɔv dɛn man ɛn uman we mared fɔ gɛt?

³ Wan impɔtant tin na lɔv. Rili, di Baybul tɔk bɔt difrɛn kayn lɔv dɛn. Di fɔs kayn na di wan we de bitwin tayt padi dɛn. (Jɔn 11:​3) Di sɛkɔn wan na di lɔv we de bitwin fambul dɛn. (Lɛta Fɔ Rom 12:​10) Di tɔd wan na di lɔv we de bitwin man ɛn uman. (Prɔvabs 5:​15-20) Bɔt man ɛn uman we mared fɔ gɛt ɔl dɛn kayn lɔv dɛn ya. Bɔt ɔda kayn lɔv de we na di las wan, we impɔtant pas dɛn ɔl.

 4. Wetin na di las kayn lɔv we di Baybul tɔk bɔt?

⁴ Insay di langwej we dɛn yuz fɔ rayt di Kristian Grik Skripchɔ, di wɔd fɔ dis kayn lɔv na a·gaʹpe. Na dis wɔd dɛn yuz na Jɔn In Fɔs Lɛta 4:​8 we se: “Gɔd na di wan we nɔ de tap fɔ lɛk.” Fɔ tru, “wi lɛk Gɔd ɛn wi kɔmpin bikɔs na Gɔd fɔs lɛk wi.” (Jɔn In Fɔs Lɛta 4:​19) Pɔsin we na Kristian fɔ gɛt dis kayn lɔv fɔs fɔ Jiova Gɔd, dɔn fɔ in kɔmpin mɔtalman. (Mak 12:​29-31) Dɛn yuz di wɔd a·gaʹpe na Lɛta Fɔ Ɛfisɔs 5:​2 we se: “Una fɔ gɛt lɛk na una at, jɛs lɛkɛ aw Krays lɛk wi, dɔn i gi in layf.” Jizɔs bin se na dis kayn lɔv go sho udat dɛn rili de fala am. I bin se: “If una lɛk [a·gaʹpe] una kɔmpin, ɔlman go no se una na mi lanin bɔy dɛn.” (Jɔn 13:​35) Notis bak di we aw Fɔs Lɛta Fɔ Kɔrint 13:​13 yuz di wɔd a·gaʹpe. I se: “Na dɛn tri tin ya pɔsin go de du sote go: biliv, abop, ɛn lɛk, bɔt di wan we pas dɛn ɔl na lɛk [a·gaʹpe].”

5, 6. (a) Wetin mek lɔv pas fet ɛn op? (b) Wetin mek lɔv go ɛp mared-os fɔ de sote go?

⁵ Wetin mek a·gaʹpe lɔv pas fet ɛn op? Na bikɔs i gɛt fɔ du wit di advays dɛn we de na di Baybul. (Sam 119:​105) Pɔsin we gɛt dis kayn lɔv nɔ go jɔs bisin bɔt insɛf, bɔt i want fɔ du wetin rayt ɛn gud to ɔda pipul dɛn lɛk aw Gɔd want. I kin du dis ilɛk di pɔsin we i du am to nɔ fit fɔ gɛt dis kayn lɔv. Na dis kayn lɔv go mek man ɛn uman we mared du wetin di Baybul tɔk, fɔ se: “Una nɔ fɔ vɛks if pɔsin du una bad, ɛn una fɔ padin dɛn if dɛn du una ɛnitin. Una fɔ padin una kɔmpin lɛkɛ aw di Masta dɔn padin una.” (Lɛta Fɔ Kɔlɔse 3:​13) Maredman ɛn in wɛf we lɛk dɛnsɛf fɔ ‘lɛk [a·gaʹpe] dɛn kɔmpin wit ɔl dɛn at, bikɔs dɛn pipul we lɛk dɛnsɛf kin rɛdi ɔltɛm fɔ padin dɛn kɔmpin we dɛn kɔmpin du dɛn bad.’ (Pita In Fɔs Lɛta 4:​8) Notis se dis kayn lɔv nɔ de luk fɔ di mistek dɛn we ɔda pɔsin du. Dis kayn lɔv nɔ de stɔp wi nɔ fɔ mek mistek bikɔs mɔtalman nɔ pafɛkt.—Sam 130:​3, 4; Jems 3:​2.

⁶ If maredman ɛn in wɛf gɛt dis kayn lɔv fɔ Gɔd ɛn fɔ dɛnsɛf, dɛn mared-os go de sote go ɛn dɛn go gladi bikɔs “lɛk go de sote go.” (Fɔs Lɛta Fɔ Kɔrint 13:​8) Na lɔv de mek una “gɛt wan at ɛn una go bi wan, ɛn nɔ ambɔg nɔ go de.” (Lɛta Fɔ Kɔlɔse 3:​14) If yu dɔn mared, aw yu ɛn di wan we yu mared to go gɛt dis kayn lɔv? Una rid Gɔd in Wɔd togɛda ɛn tɔk bɔt am. Una lan mɔ bɔt wetin Jizɔs bin tink bɔt lɔv ɛn una tray fɔ falamakata di we aw i bin sho dis kayn lɔv. Dɔn, una fɔ de go mitin usay wi de lan Gɔd in Wɔd. Una pre to Gɔd fɔ mek i ɛp una fɔ gɛt dis kayn lɔv we na wan pan di kwaliti dɛn we in spirit de mek pɔsin gɛt.—Prɔvabs 3:​5, 6; Jɔn 17:​3; Lɛta Fɔ Galeshya 5:​22; Di Ibru Pipul Dɛn 10:​24, 25.

 7. Us kwaliti maredman ɛn mareduman fɔ gɛt fɔ dɛnsɛf? Wetin dat min?

⁷ If maredman ɛn in wɛf rili lɛk dɛnsɛf, dat go mek dɛn gɛt rɛspɛkt fɔ dɛnsɛf; rɛspɛkt na di ɔda impɔtant tin we de mek mared-os gɛt gladi at. Gɔd in Wɔd advays ɔl Kristian dɛn, ivin maredman ɛn mareduman dɛn fɔ se dɛn fɔ “rɛspɛkt” dɛnsɛf. (Lɛta Fɔ Rom 12:​10) Di apɔsul Pita bin tɔk se: “Una dɛn maredman fɔ no se una wɛf nɔ gɛt trɛnk lɛkɛ man, so una fɔ de wit dɛn wit da ɔndastandin de, we rayt.” (Pita In Fɔs Lɛta 3:​7) Di Baybul advays “ɔl mareduman fɔ rɛspɛkt in man.” (Lɛta Fɔ Ɛfisɔs 5:​33) If yu want fɔ sho se yu ɔnɔ pɔsin, yu go du gud to di pɔsin, rɛspɛkt am ɛn wetin i de tɔk, ɛn yu go rɛdi fɔ du wetin i aks yu fɔ du wans yu ebul fɔ du am.

8-10. Aw rɛspɛkt go ɛp fɔ mek di mared-os go bifo ɛn gɛt gladi at?

⁸ Di wan dɛn we want fɔ gɛt gladi at na dɛn mared-os fɔ sho rɛspɛkt fɔ di pɔsin we dɛn mared to bay we dɛn “nɔ fɔ jɛs de mɛmba [dɛnsɛf] nɔmɔ, [dɛn] fɔ de mɛmba ɔda pipul.” (Lɛta Fɔ Filipay 2:​4) Dɛn nɔ de tink bɔt wetin gud fɔ dɛnsɛf nɔmɔ. Bɔt dɛn de tink bɔt wetin gud fɔ di pɔsin we dɛn mared to. Na wetin di wan we dɛn mared to want na in fɔ impɔtant to dɛn.

⁹ Rɛspɛkt go ɛp maredman ɛn mareduman fɔ no se dɛn ɔl tu nɔ de tink di sem we. I nɔ mek sɛns fɔ lɛ yu tink se tu pipul dɛn go tink di sem we pan ɔltin. Wetin go impɔtant to di man nɔ kin impɔtant to in wɛf, ɛn wetin in wɛf lɛk nɔto in di man go lɛk. Bɔt dɛn ɔl tu fɔ rɛspɛkt di we aw di ɔda pɔsin de tink ɛn wetin i lɛk wans dat nɔ pwɛl Jiova in lɔ ɛn advays dɛn. (Pita In Fɔs Lɛta 2:​16; luk Faylimɔn 14.) Dɔn, dɛn ɔl tu fɔ rɛspɛkt dɛnsɛf bay we wan pɔsin nɔ tɛl in kɔmpin sɔntin we go mek i fil bad ilɛksɛf na pan jok we dɛn de na pɔblik ɔ we na dɛn tu nɔmɔ de.

¹⁰ Rili we una lɛk Gɔd ɛn una gɛt rɛspɛkt fɔ unasɛf na tu impɔtant tin dɛn we de mek mared-os go bifo. Aw una go ebul fɔ du dɛn tu tin ya insay una mared-os?

11. Frɔm wetin di Baybul se, udat de oba di famili?

¹¹ Di Baybul tɛl wi se Gɔd mek man wit sɔm kwaliti dɛn we go ɛp am fɔ de oba in famili fayn fayn wan. So na di man Jiova dɔn gi di wok fɔ kia fɔ in wɛf ɛn in pikin dɛn we i kam pan wetin dɛn nid ɛn aw dɛn fɔ wɔship Gɔd. Di tin dɛn we i de disayd fɔ du fɔ sho wetin Jiova want ɛn i fɔ bi gud ɛgzampul we i kam pan aw i de biev. Di Baybul se: “Wɛf dɛn fɔ put dɛnsɛf dɔŋ to dɛn man dɛn lɛk aw dɛn go put dɛnsɛf dɔŋ to di Masta. . . . Na di man de oba in wɛf jɔs lɛk aw Krays de oba di kɔngrigeshɔn.” (Lɛta Fɔ Ɛfisɔs 5:​22, 23, NW) Bɔt di Baybul se di man bak gɛt udat de oba am, ɛn na Wan we gɛt pawa pas am. Di apɔsul Pɔl bin rayt se: “A want mek una ɔndastand sɔntin: Na Krays de oba ɔlman, na di man de oba in wɛf, ɛn na Gɔd in wangren de oba Krays.” (Fɔs Lɛta Fɔ Kɔrint 11:​3) Man we gɛt sɛns fɔ tray fɔ falamakata di we aw di wan we de oba am we na Krays Jizɔs de du.

12. Us fayn ɛgzampul Jizɔs bin sɛt we i kam pan fɔ de ɔnda pɔsin ɛn fɔ de oba pipul dɛn?

¹² Jizɔs bak gɛt udat de oba am, we na Jiova, ɛn i put insɛf ɔnda am. Jizɔs bin se: “A nɔ de tray fɔ du wetin a want, na wetin di wan we sɛn mi want, na dat nɔmɔ a de du.” (Jɔn 5:​30) Dis na fayn ɛgzampul! Na Jizɔs “fɔs bin de bifo Gɔd mek ɛnitin we de na di wɔl.” (Lɛta Fɔ Kɔlɔse 1:​15) Na in na bin di Mɛsaya. Na in fɔ de oba di kɔngrigeshɔn we gɛt anɔyntɛd Kristian dɛn ɛn na in fɔ bi di Kiŋ fɔ Gɔd in Kiŋdɔm, i ivin pas di enjɛl dɛn. (Lɛta Fɔ Filipay 2:​9-11; Di Ibru Pipul Dɛn 1:​4) Pan ɔl da ay ay pozishɔn we i bin gɛt, Jizɔs nɔ bin de trit pipul dɛn bad, ɔ tink se pawpa na wetin i want na in fɔ bi ɔ aks dɛn fɔ du tin we i no se dɛn nɔ ebul du. I nɔ bin de sho in pawa tumɔs ɛn ɔltɛm de mɛmba in disaypul dɛn fɔ se dɛn fɔ obe am. Jizɔs bin lɛk pipul dɛn ɛn i bin gɛt sɔri-at mɔ fɔ pipul dɛn we bin de sɔfa. I bin se: “Una kam to mi, una ɔl we dɔn taya fɔ tot ebi lod, a go pul di lod kɔmɔt pan una ed, mek una go blo. Una opin una at fɔ di tru tin dɛn we a de lan una, ɛn una lan ɔl wetin a de tɛl una, bikɔs a de bia wit una ɛn a nɔ de tɔk pan una; if una du dat, una go blo. Dɛn tin we a de lan una nɔ at fɔ lan ɛn dɛn tin we a de gi una fɔ du nɔ at fɔ du.” (Matyu 11:​28-30) Pipul dɛn bin rili gladi fɔ de wit Jizɔs.

13, 14. Aw man we lɛk in famili go falamakata Jizɔs we i kam pan aw fɔ de oba in famili?

¹³ Maredman we want fɔ gɛt famili we gɛt gladi at, fɔ falamakata Jizɔs in fayn kwaliti dɛn. Gud man nɔ go trit in wɛf bad, buli am, ɔ du tin di kayn we we go mek in wɛf fred am. I nɔ de se pawpa na in nɔmɔ fɔ tɔk wetin fɔ bi. Bifo dat, i lɛk ɛn rɛspɛkt in wɛf. If Jizɔs we nɔ bin de mek mistek nɔ bin “de tɔk pan” pipul dɛn, di man gɛt mɔ rizin nɔ fɔ de tɔk pan in wɛf bikɔs insɛf de mek mistek. We i kin mek mistek, i kin want lɛ in wɛf ɔndastand am. Na dat mek man we ɔmbul kin gri we i mek mistek pan ɔl we i nɔ kin izi fɔ tɔk se, “A sɔri; yu bin rayt.” I izi fɔ lɛ uman rɛspɛkt man we ɔmbul ɛn we nɔ de mek lɛk se i sabi ɔltin, pas man we prawd ɛn we gɛt pin. Dɔn uman we gɛt rɛspɛkt kin gri fɔ se sɔri we i mek mistek.

¹⁴ Gɔd mek uman wit fayn kwaliti dɛn we go ɛp am fɔ mek in famili gɛt gladi at. Man we gɛt sɛns go no dis ɛn i nɔ go de mek in wɛf in at pwɛl bad. Bɔku uman dɛn kin gɛt sɔri-at pasmak ɛn dɛn kwik fɔ ɔndastand aw ɔda pɔsin de fil, dat na kwaliti dɛn we i nid we i de kia fɔ in famili ɛn fɔ mek gud padi biznɛs wit pipul dɛn. Bɔku tɛm di uman kin sabi fɔ mek in famili rili fil fayn. Di “gud wɛf” we Prɔvabs chapta 31 tɔk bɔt, gɛt bɔku wɔndaful kwaliti dɛn ɛn i sabi du fayn fayn tin dɛn, ɛn in famili de rili bɛnifit frɔm di tin dɛn we i de du. Wetin mek? Bikɔs in man dɔn “biliv am.”—Prɔvabs 31:​10, 11.

15. Aw man go sho lɔv ɛn rɛspɛkt fɔ in wɛf lɛk aw Krays bin sho dɛn?

¹⁵ Na sɔm kɔntri dɛn, di man so gɛt pawa dat if in wɛf aks am kwɛstyɔn, di man go se i nɔ rɛspɛkt am. I go de trit in wɛf lɛk slev. Dis kayn we we i de sho se i de oba in famili go pwɛl in padi biznɛs wit in wɛf ɛn ivin wit Gɔd. (Luk Jɔn In Fɔs Lɛta 4:​20, 21.) Bɔt sɔm man dɛn nɔ kin gri fɔ de oba dɛn famili, dat kin mek di uman kɔntrol di os. Man we put insɛf ɔnda Krays nɔ go trit in wɛf bad ɔ mek di uman fil se i nɔ gɛt wan rɛspɛkt fɔ am. Bifo dat, i go tray fɔ falamakata di kayn lɔv we Jizɔs bin gɛt ɛn i go tray fɔ du wetin Pɔl bin advays. I bin se: “Una kɔntinyu fɔ lɛk una wɛf dɛn jɔs lɛk aw Krays lɛk di kɔngrigeshɔn ɛn gi in layf fɔ am.” (Lɛta Fɔ Ɛfisɔs 5:​25, NW) Krays Jizɔs bin rili lɛk in disaypul dɛn ɛn i bin day fɔ dɛn. Gud man go tray fɔ falamakata dis bay we i nɔ jɔs bisin bɔt insɛf nɔmɔ, i go tray fɔ du gud tin dɛn fɔ in wɛf, ɛn i nɔ go de aks am fɔ du tin dɛn we i no se i nɔ ebul du. We di man put insɛf ɔnda Krays ɛn sho lɔv ɛn rɛspɛkt lɛk aw Krays bin sho am, in wɛf go gladi fɔ de ɔnda am.—Lɛta Fɔ Ɛfisɔs 5:​28, 29, 33.

16. Us kwaliti dɛn wɛf fɔ gɛt we go mek i gɛt tayt padi biznɛs wit in man?

¹⁶ Afta sɔm tɛm we Gɔd dɔn mek Adam, “PAPA GƆD se, ‘I nɔ gud fɔ mek di man in wangren de. A go mek sɔmbɔdi we dɛn tu go de, fɔ ɛp am.’” (Jɛnɛsis 2:​18) Gɔd bin mek Iv fɔ “ɛp” Adam, nɔto fɔ chalenj am. Mared nɔ bin fɔ tan lɛk bot we gɛt tu kaptin we de rayd am. Di man fɔ sho lɔv we i de oba in famili, ɛn di uman fɔ sho lɔv, rɛspɛkt ɛn i fɔ gri fɔ de ɔnda in man.

17, 18. Us we dɛn wɛf go ebul fɔ ɛp in man?

¹⁷ Gud wɛf nɔ jɔs de put insɛf ɔnda in man. I kin tray fɔ ɛp in man ɛn sɔpɔt wetin di man dɔn disayd. Dis go izi fɔ du we i gri wit wetin di man dɔn disayd. Bɔt ilɛksɛf i nɔ gri wit wetin in man dɔn disayd, i fɔ sɔpɔt am ɛn ɛp fɔ mek wetin di man dɔn disayd kɔmɔt fayn.

¹⁸ Bɔku ɔda we dɛn de we di uman go ɛp in man fɔ bi gud maredman. Bifo di uman tɔk bad ɔ mek in man fil se i nɔ go ɛva ebul fɔ mek i gladi, i fɔ sho se i gladi fɔ di tin dɛn we in man de du we i de oba di famili. We i de tray fɔ du fayn tin dɛn we go mek di man gladi, di tin we i fɔ mɛmba na dat i “fɔ de tɔk ɛn du tin saful saful, . . . na dɛn kayn tin ya Gɔd luk se fayn.” (Pita In Fɔs Lɛta 3:​3, 4; Lɛta Fɔ Kɔlɔse 3:​12) Bɔt if di man nɔto Jiova Witnɛs? Ilɛksɛf di man nɔ to Jiova Witnɛs di Baybul ɛnkɔrej wɛf dɛn fɔ “lɛk dɛn man ɛn dɛn pikin, ɛn dɛn go no se dɛn fɔ ebul kɔntrol dɛnsɛf ɛn dɛn nɔ fɔ miks pan dɔti layf, dɛn fɔ de du dɛn os biznɛs gud, dɛn fɔ de du wetin dɛn man tɛl dɛn fɔ du, so dat nɔbɔdi nɔ go tɔk bad bɔt Gɔd in mɛsej.” (Taytɔs 2:​4, 5) If di man tɛl in wɛf fɔ du sɔntin we di Baybul nɔ rili kɔndɛm, bɔt di uman tink se if i du am dat go mek Gɔd nɔ gladi fɔ am, i fɔ tɔk to in man wit rɛspɛkt ɛn tek tɛm ɛksplen to am wetin mek i nɔ want fɔ du am. I pɔsibul se di man go ɔndastand am. Sɔm man dɛn we nɔto Jiova Witnɛs dɔn kam fɔ “biliv pan Gɔd bay aw una de du. Una nɔ go gɛt fɔ tɔk to dɛn bɔt Gɔd igen sɛf, bikɔs dɛn go si se una de waka tret ɛn una de fred Gɔd.”—Pita In Fɔs Lɛta 3:​1, 2, 15, 16; Fɔs Lɛta Fɔ Kɔrint 7:​13-16.

19. Wetin di uman go du if in man tɛl am fɔ du sɔntin we go pwɛl Gɔd in lɔ?

¹⁹ Wetin di uman go du if in man tɛl am fɔ du sɔntin we go pwɛl Gɔd in lɔ? I fɔ mɛmba se na Gɔd wangren gɛt pawa pas ɔlman. I fɔ tink bɔt di ɛgzampul we di apɔsul dɛn bin sɛt we di wan dɛn we de rul tɛl dɛn fɔ pwɛl Gɔd in lɔ. Di Apɔsul Dɛn Wok [Akt] 5:​29 tɔk se: “Pita ɛn in kɔmpin dɛn ansa dɛn se, ‘Wi nɔ gɛt fɔ du wetin Gɔd tɛl wi fɔ du, wi nɔ gɛt fɔ du wetin mɔtalman tɛl wi fɔ du.’”

20. Us ɔda we de sho se lɔv ɛn rɛspɛkt impɔtant na di mared-os?

²⁰ Ɔda we we lɔv ɛn rɛspɛkt impɔtant na we i kam pan aw una de tɔk to unasɛf. Gud man go tɔk to in wɛf bɔt di wok dɛn we i de du, in prɔblɛm dɛn, ɛn wetin i tink bɔt sɔm tin dɛn. Di uman nid dat. Maredman we de tek tɛm tɔk to in wɛf ɛn rili lisin to wetin i de se, de sho se i lɛk ɛn rɛspɛkt am. (Jems 1:​19) Sɔm uman dɛn kin grɔmbul se dɛn man dɛn nɔ gɛt bɛtɛ tɛm fɔ tɔk to dɛn. Dat nɔ rili fayn. Na tru se, bikɔs tin tranga ɛn ɔlman bizi di man go nid fɔ wok fɔ lɔng tɛm ɛn di uman sɛf go nid fɔ wok. Bɔt maredman ɛn in wɛf fɔ fɛn tɛm fɔ tɔk to dɛnsɛf. If nɔto dat, dɛn ɔl tu nɔ go abop pan dɛnsɛf fɔ du ɛnitin. Dɛn go gɛt siriɔs prɔblɛm if dɛn tray fɔ mek padi wit ɔda pɔsin we dɛn fil se de sɔri fɔ dɛn.

21. Aw di we aw una de tɔk fayn to unasɛf go mek di mared-os gɛt gladi at?

²¹ Di we aw maredman ɛn in wɛf de tɔk to dɛnsɛf impɔtant. Di Baybul se: “Gud tɔk . . . swit na mɔt ɛn gud fɔ di bɔdi.” (Prɔvabs 16:​24) Ilɛksɛf di wan we yu mared to nɔto Jiova Witnɛs, di advays we di Baybul gi go stil wok fɔ yu. I se: “Wɛn una de tɔk wit pipul, una fɔ tɛl dɛn tin we go mek dɛn gladi fɔ yɛri wetin una de tɔk ɛn we go mek dɛn want fɔ yɛri mɔ”; dat min se yu fɔ tek tɛm tɔk. (Lɛta Fɔ Kɔlɔse 4:​6) If wan pan dɛn gɛt tin we de mɔna am da de de, di we aw di ɔda pɔsin go tɔk fayn to am go mek i fil fayn. Di Baybul se: “Ɛni wɔd we yu tɔk di rayt tɛm tan lɛk we yu tek gold mek fayn dizayn pan silva sɛtin.” (Prɔvabs 25:​11) Di we we yu de mek yu vɔys ɛn di wɔd dɛn we yu de tɔk rili impɔtant. Fɔ ɛgzampul, pɔsin we vɛks kin tɛl di ɔda pɔsin se: “Lɔk da domɔt!” Yu nɔ tink se i bɛtɛ if yu tɔk am wit fayn vɔys ɛn we we i go ɔndastand lɛk, “Duya, lɔk da domɔt?”

22. Wetin maredman ɛn in wɛf fɔ du so dat dɛn go kɔntinyu fɔ de tɔk fayn to dɛnsɛf?

²² Una go ebul tɔk fayn to unasɛf if una de yuz gud wɔd dɛn, una de wach unasɛf fayn we una de tɔk, una gud to unasɛf, una de ɔndastand unasɛf, ɛn de trit unasɛf fayn. We maredman ɛn in wɛf de wok tranga wan fɔ kɔntinyu fɔ tɔk fayn to dɛnsɛf, dɛn go fil fri fɔ tɔk wetin dɛn nid, ɛn dɛn go ɛp fɔ kɔrej dɛnsɛf we dɛn at pwɛl ɔ we dɛn gɛt tin we de mɔna dɛn. Di Baybul ɛnkɔrej wi “fɔ kɔrej dɛn pipul we de fred.” (Fɔs Lɛta Fɔ Tɛsalonayka 5:​14) Tɛm kin de we di man in at kin pwɛl ɛn ɔda tɛm kin de we na di uman in at kin pwɛl. Dɛn fɔ “kɔrej” dɛnsɛf ɛn dɛn fɔ de tɔk tin we go mek di ɔda pɔsin gladi.—Lɛta Fɔ Rom 15:​2.

23, 24. If mared pipul dɛn gɛt lɔv ɛn rɛspɛkt fɔ dɛnsɛf, aw dat go ɛp dɛn we dɛn de tɔk bɔt tin we dɛn ɔl tu nɔ gri pan? Gi wan ɛgzampul.

²³ Maredman ɛn in wɛf we lɛk ɛn rɛspɛkt dɛnsɛf nɔ go gɛt smɔl cham-mɔt ɛn tink se na big prɔblɛm. Dɛn go tray mek dɛn nɔ “dil traŋa wan” wit dɛnsɛf. (Lɛta Fɔ Kɔlɔse 3:​19) Dɛn ɔl tu fɔ mɛmba wetin di Baybul tɔk we i se: “We pɔsin vɛks, if yu tɔk fayn to am, i nɔ go vɛks igen.” (Prɔvabs 15:​1) Tek tɛm lɛ yu nɔ kɔndɛm ɔ mek di ɔda pɔsin fil bad we i de tɔk wetin de na in at. Bifo dat, tek am se yu dɔn gɛt chans fɔ rili ɔndastand aw di ɔda pɔsin de fil. Una tray fɔ wok togɛda fɔ sɔlv una prɔblɛm dɛn so dat una go gɛt wanwɔd.

²⁴ Tink bɔt di tɛm we Sera bin tɛl in man Ebraam aw fɔ sɔlv wan prɔblɛm, bɔt Ebraam nɔ bin lɛk wetin i se. Gɔd bin tɛl Ebraam se: “Du ɛnitin we Sera se.” (Jɛnɛsis 21:​9-12) Ebraam bin du am ɛn i bin gɛt blɛsin. Semweso, if di wɛf tɔk sɔntin we difrɛn frɔm wetin in man de tink fɔ du, di man fɔ lisin to wetin in wɛf gɛt fɔ se. Bɔt nɔto di wɛf nɔmɔ fɔ de tɔk, i fɔ lisin to wetin in man gɛt fɔ se. (Prɔvabs 25:​24) I nɔ go sho lɔv ɛn rɛspɛkt if di man ɔ di uman pin se pawpa wetin i dɔn se na in fɔ bi.

25. Aw di fayn tɔk we man ɛn uman we mared de tɔk to dɛnsɛf, go ɛp fɔ mek gladi at de na di mared-os we i kam pan mami ɛn dadi biznɛs?

²⁵ Fɔ tɔk fayn to dɛnsɛf impɔtant bak we i kam pan mami ɛn dadi biznɛs. If wan pɔsin jɔs de tink bɔt insɛf nɔmɔ ɛn nɔ ebul kɔntrol insɛf, dat go mek dɛn gɛt siriɔs prɔblɛm na di mared-os. Fɔ tɔk to dɛnsɛf ɛn fɔ peshɛnt wit dɛnsɛf rili impɔtant. If dɛn ɔl tu nɔ jɔs want fɔ tink bɔt dɛnsɛf nɔmɔ, dɛn nɔ go gɛt prɔblɛm we i kam pan mami ɛn dadi biznɛs. We i kam pan mami ɛn dadi biznɛs ɛn ɔl ɔda tin dɛn, i go fayn fɔ tek di advays we di Baybul gi we i se: “Ɔlman nɔ fɔ jɛs de luk fɔ dɛn yon bɛtɛ wan nɔmɔ, dɛn fɔ de tray fɔ mek bɛtɛ fala dɛn kɔmpin.”—Fɔs Lɛta Fɔ Kɔrint 7:​3-5; 10:​24.

26. Pan ɔl we ɔl mared-os go gɛt tɛm we dɛn gladi ɛn tɛm we dɛn gɛt prɔblɛm, aw we dɛn lisin to Gɔd in Wɔd go ɛp dɛn fɔ gɛt gladi at?

²⁶ Di advays dɛn we de na di Baybul rili fayn! Na tru se ɔl mared-os go gɛt tɛm we dɛn gladi ɛn tɛm we dɛn gɛt prɔblɛm. Bɔt if di man ɛn in wɛf du tin lɛk aw Jiova sho dɛn na di Baybul, dɔn dɛn gɛt lɔv ɛn rɛspɛkt fɔ dɛnsɛf, dɛn go shɔ fɔ se dɛn mared-os go las ɛn dɛn go gɛt gladi at. Dɛn nɔ go jɔs rɛspɛkt dɛnsɛf nɔmɔ bɔt dɛn go rɛspɛkt di Wan we mek mared we na Jiova Gɔd.