Jiova De Blɛs di Wan dɛn We De Tray Tranga Wan fɔ No Am

1, 2. (a) Aw di lɛk we wi lɛk Jiova ɛn di fet we wi gɛt de wok togɛda? (b) Us kwɛstyɔn dɛn wi go tɔk bɔt?

WI PAPA Jiova dɔn prɔmis fɔ blɛs in savant dɛn we nɔ de kɔmɔt biɛn am. Dis na wan we we de sho se Jiova lɛk wi, ɛn wi lɛk am bikɔs na in “fɔs lɛk wi.” (Jɔn In Fɔs Lɛta 4:​19) As wi de lɛk Jiova mɔ ɛn mɔ, na so wi go gɛt mɔ fet pan am ɛn biliv mɔ ɛn mɔ se Jiova go blɛs di wan dɛn we lɛk am.—Rid Di Ibru Pipul Dɛn 11:​6.

² Jiova na di wan we de blɛs wi! Dis impɔtant bikɔs i de sho udat i bi ɛn wetin i de du. So wi nɔ go se wi rili gɛt fet pan Gɔd pas wi biliv fɔ tru se i go blɛs di wan dɛn we de tray tranga wan fɔ no am. Wetin mek? Na bikɔs “fet na we pɔsin shɔ se i go gɛt wetin i op fɔ.” (Di Ibru Pipul Dɛn 11:​1, NW) Fɔ gɛt fet min se yu rili gɛt kɔnfidɛns fɔ se Gɔd go blɛs in savant dɛn we nɔ de kɔmɔt biɛn am. Bɔt we wi abop fɔ se wi go gɛt blɛsin, aw dat go bɛnifit wi? Aw Jiova bin de blɛs in savant dɛn trade, ɛn aw i de blɛs dɛn insay wi yon tɛm? Lɛ wi si.

 3. Us prɔmis de na Malakay 3:​10?

³ Jiova dɔn prɔmis se i go blɛs in fetful savant dɛn. I tɛl wi fɔ gi am wi bɛst, ɛn abop se i go blɛs wi. Jiova se: “Duya una tɛst mi.” I kɔntinyu fɔ tɔk se: “Ɛn si if a nɔ go opin fɔ una di get dɛn we de na ɛvin ɛn blɛs una sote una nɔ nid natin igen.” (Malakay 3:​10, NW) Wi go sho se wi gladi fɔ wetin Jiova se i go du fɔ wi, if wi gri fɔ tɛst am.

 4. Wetin mek wi fɔ biliv wetin Jizɔs bin prɔmis na Matyu 6:​33?

⁴ Jizɔs bin prɔmis in disaypul dɛn se if dɛn put di Kiŋdɔm fɔs, Gɔd go sɔpɔt dɛn. (Rid Matyu 6:​33.) Jizɔs bin tɔk dat bikɔs i bin no se Gɔd kin du wetin i prɔmis ɔltɛm. (Ayzaya 55:​11) So wisɛf fɔ biliv se if wi rili gɛt fet pan Jiova, i go du wetin i bin dɔn prɔmis we i tɔk se: “A nɔ go lɛf yu, a go de wit yu ɔltɛm fɔ ɛp yu.” (Di Ibru Pipul Dɛn 13:​5) Dis prɔmis we Jiova prɔmis wi de ɛp wi fɔ biliv wetin Jizɔs bin tɔk na Matyu 6:​33.

 5. Aw di we we Jizɔs bin ansa Pita de ɛnkɔrej wi ɔl?

⁵ Wan tɛm, di apɔsul Pita bin aks Jizɔs se: “Wi dɔn lɛf ɔltin fɔ fala yu. Wetin Gɔd go gi wi?” (Matyu 19:​27) Jizɔs nɔ bin kɔrɛkt Pita we i aks da kwɛstyɔn de. Bifo dat, Jizɔs bin tɛl in disaypul dɛn se dɛn go gɛt blɛsin fɔ ɔl di tin dɛn we dɛn dɔn lɛf biɛn. Di apɔsul dɛn ɛn ɔda fetful wan dɛn go rul wit Jizɔs na ɛvin tumara bambay. Bɔt Jizɔs bin tɔk bak se dɛn go gɛt blɛsin ivin naw. I bin se: “Ɛnibɔdi we lɛf os, ɔ brɔda, ɔ sista, ɔ papa, ɔ mama, ɔ pikin dɛn, ɔ prɔpati fɔ bi mi lanin bɔy, Gɔd go mek i gɛt bɔku pas wetin i lɛf ɛn i go gi am layf we go de sote go.” (Matyu 19:​29) Tide, ɔl di wan dɛn we de fala Jizɔs go gɛt papa, mama, brɔda, sista, ɛn pikin dɛn insay di kɔngrigeshɔn. Dat na tin we rili valyu pas ɛni ɔda tin we wi go lɛf biɛn fɔ Gɔd in Kiŋdɔm.

 6. Wetin mek Jiova dɔn prɔmis fɔ blɛs in savant dɛn?

⁶ Apat frɔm di blɛsin dɛn we wi de ɛnjɔy rayt naw, wi de wet fɔ tumara bambay we wi go ɛnjɔy bɔku blɛsin dɛn we pas di wan dɛn we wi de ɛnjɔy rayt naw. (Fɔs Lɛta To Timoti 4:​8) We wi no se Jiova dɔn prɔmis fɔ blɛs in savant dɛn we fetful to am, dat de ɛp wi fɔ bia we tin tranga. We wi no se na Jiova “de blɛs di wan dɛn we de tray tranga wan fɔ no am,” dat de mek wi kɔntinyu fɔ fetful to am.—Di Ibru Pipul Dɛn 11:​6, NW.

 7. Aw di op we wi gɛt tan lɛk ankɔ?

⁷ Di tɛm we Jizɔs bin de tich ɔp wan mawnten, i bin se: “Una fɔ gladi bad, bikɔs Gɔd kip gud tin fɔ una na ɛvin. Na so pipul bin mek dɛn prɔfɛt we bin de bifo una, sɔfa.” (Matyu 5:​12) Sɔm pan Gɔd in savant dɛn go gɛt blɛsin na ɛvin. Ɛn ɔda wan dɛn go gɛt dɛn yon blɛsin fɔ gɛt layf we go de sote go insay Paradays na dis wɔl. Dat na ɔda rizin fɔ mek wi “gladi” bad. (Sam 37:​11; Lyuk 18:​30) Bɔt fɔ wi ɔl, di op we wi gɛt tan lɛk “ankɔ fɔ wi layf, we de mek wi tinap traŋa” wan. (Di Ibru Pipul Dɛn 6:​17-20) Jɔs lɛk we ankɔ de mek ship tinap we big briz de blo, na so di strɔng op we wi gɛt go ɛp wi fɔ kɔntinyu fɔ tinap tranga wan. I go gi wi di trɛnk we wi nid fɔ bia we tin tranga.

 8. Aw di op we wi gɛt de mek wi nɔ wɔri tumɔs?

⁸ Di op we wi gɛt go ɛp wi fɔ mek wi nɔ wɔri tumɔs we wi gɛt prɔblɛm. Jɔs lɛk aw ori ɔ dɔni de mek pɔsin fil fayn, na so Gɔd in prɔmis dɛn de mek wi nɔ wɔri tumɔs. Wi de fil fayn we wi no se Jiova go kia fɔ wi we wi lɛf wi prɔblɛm dɛn to am. (Sam 55:​22, NW) Wi biliv gud gud wan se Gɔd ebul fɔ du tin dɛn “we pas wetin wi kin aks fɔ.” (Lɛta Fɔ Ɛfisɔs 3:​20) Jiova nɔ go jɔs ɛp wi af-ɛn-af, bifo dat, i go du tin dɛn we ivin “pas wetin wi kin aks fɔ”!

 9. Wetin mek wi shɔ se wi go gɛt di blɛsin we Jiova de gi?

⁹ Fɔ mek Jiova go blɛs wi, wi nid fɔ gɛt strɔng fet pan am ɛn obe ɔl di tin dɛn we i de tɛl wi fɔ du. Mozis bin tɛl di Izrɛlayt dɛn se Jiova “go blɛs dɛn ɔl na di land we i gi dɛn” as “prɔpati; wans dɛn du ɔl wetin  . . [i] tɛl dɛn fɔ du; dat na fɔ du ɔl wetin di Lɔ se we nain, i de tɛl dɛn bɔt so.” (Ditarɔnɔmi 15:​4-6) Yu rili biliv se Jiova go blɛs yu if yu kɔntinyu fɔ sav am fetful wan? Yu gɛt gud rizin fɔ biliv dat.

10, 11. Aw Jiova bin blɛs Josɛf?

¹⁰ Dɛn bin rayt di Baybul fɔ bɛnifit wi. Wi go si bɔku ɛgzampul dɛn na di Baybul we de sho aw Jiova bin de blɛs in fetful savant dɛn trade. (Lɛta Fɔ Rom 15:​4) Josɛf na bin fayn ɛgzampul we di Baybul tɔk bɔt. Fɔs, in brɔda dɛn bin sɛl am as slev. Leta, in masta in wɛf bin lay pan am, ɛn dɛn bin put am na prizin insay Ijipt. Fɔ se Jiova nɔ bin de wit Josɛf we i bin de na prizin? Nɔ, nɔto so i bi! Di Baybul se, Jiova “bin de wit Josɛf ɛn i blɛs am.” I “bin de wit am ɛn i bin mek bɛtɛ fala am pan ɔl wetin i bin de du.” (Jɛnɛsis 39:​21, 23) Ivin we Josɛf bin gɛt dɛn prɔblɛm dɛn de, i bin peshɛnt wet fɔ Gɔd.

¹¹ Afta sɔm tɛm, Fɛro bin pul Josɛf na prizin. Ɛn dis slev we bin put insɛf dɔŋ bin kam fɔ bi di sɛkɔn pawaful rula na Ijipt. (Jɛnɛsis 41:​1, 37-43) We Josɛf ɛn in wɛf bɔn tu bɔy pikin dɛn, “Josɛf gi in fɔs-bɔy-pikin nem Manasɛ. I se, ‘PAPA GƆD dɔn mek a fɔgɛt ɔl mi waala ɛn ɔl mi papa in fambul dɛn.’ I gi in sɛkɛn pikin nem Ifrem. I tɔk se, ‘PAPA GƆD dɔn gi mi pikin na di kɔntri usay a sɔfa.’” (Jɛnɛsis 41:​51, 52) Jiova bin blɛs Josɛf fɔ we i kɔntinyu fɔ de biɛn am, ɛn i bin ebul fɔ sev di Izrɛlayt dɛn ɛn di Ijipshian dɛn di tɛm we bad bad angri bin de. Ɛn Josɛf bin kam fɔ no se na Jiova bin blɛs am ɛn gi am ɔl wetin i gɛt.—Jɛnɛsis 45:​5-9.

12. Aw Jizɔs bin kɔntinyu fɔ fetful to Gɔd we i bin gɛt prɔblɛm?

¹² Jizɔs Krays insɛf bin kɔntinyu fɔ obe Gɔd di tɛm we i bin gɛt bɔku prɔblɛm dɛn ɛn Jiova bin blɛs am. Wetin bin ɛp Jizɔs fɔ kɔntinyu fɔ fetful to Gɔd? Gɔd in Wɔd tɛl wi se: “Fɔseka di op we bin de bifo am, dat bin mek i bia di tɛm we dɛn bin nel am na di stik, i nɔ shem atɔl.” (Di Ibru Pipul Dɛn 12:​2, NW) Jizɔs bin rili gladi we i ebul fɔ ɔnɔ Gɔd in nem. Jizɔs in Papa bin blɛs am, ɛn i bin gi am bɔku impɔtant wok dɛn fɔ du. Di Baybul se i “sidɔm na Gɔd in rayt an, nia di chia we Gɔd sidɔm fɔ rul.” Di Baybul tɔk bak se: “Gɔd mek i sidɔm na ples we sho se nain impɔtant pas ɔl ɛn i gi am nem we sho se i impɔtant pas ɔl.”—Lɛta Fɔ Filipay 2:​9.

13, 14. Aw Jiova kin fil bɔt di tin dɛn we wi de du fɔ am?

¹³ Wi fɔ biliv se Jiova valyu ɔl di tin dɛn we wi de du fɔ sav am. I kin ɔndastand di tɛm we wi nɔ biliv wisɛf ɔ we wi de dawt if wi go ebul fɔ du sɔntin. I rili bisin bɔt wi we wi de wɔri bɔt wi wok ɔ we wi de wɔri fɔ kia fɔ wi famili. Ɛn i de ɔndastand we wi nɔ ebul fɔ du bɔku tin fɔ sav am lɛk aw wi bin de du trade, bikɔs wi sik ɔ wi at pwɛl. Wi fɔ rili biliv se Jiova valyu di tin dɛn we wi de du fɔ sho se wi gɛt fet pan ɔl we wi gɛt prɔblɛm dɛn.—Rid Di Ibru Pipul Dɛn 6:​10, 11.

¹⁴ Mɛmba bak se na Jiova na di wan we de “ansa wi prea.” Wi fɔ biliv se we wi pre to am, i go lisin to wi. (Sam 65:​2) Gɔd “de sɔri fɔ wi we nain pikin dɛn ɛn nain de kɔrej wi ɔltɛm,” ɛn i go gi wi ɔl wetin wi nid fɔ kɔntinyu fɔ de nia am. Sɔntɛnde, i kin yuz wi brɔda ɛn sista dɛn fɔ du dat. (Sɛkɛn Lɛta Fɔ Kɔrint 1:​3) Jiova de gladi we wi sho se wi gɛt sɔri at fɔ ɔda pipul dɛn. Di Baybul se: “If yu ɛp poman, i tan lɛkɛ we yu de trɔs PAPA GƆD [“Jiova,” NW] sɔntin; ɛn i go pe yu bak.” (Prɔvabs 19:​17; Matyu 6:​3, 4) So we wi du gud ɛn ɛp wi brɔda ɛn sista dɛn, Jiova de si am lɛk se na trɔs wi trɔs am. Ɛn i prɔmis se i go blɛs wi fɔ di gud we wi du.

15. Us blɛsin yu go rili want fɔ ɛnjɔy tumara bambay? (Luk di pikchɔ nia dis atikul in taytul.)

¹⁵ Anɔyntɛd Kristian dɛn op fɔ gɛt di “prayz” fɔ we dɛn “waka tret wit Gɔd,” ɛn na Jizɔs go gi dɛn da prayz de. (Sɛkɛn Lɛta To Timoti 4:​7, 8) Bɔt Jiova stil valyu yu ilɛk yu gɛt difrɛn op. Bɔku pan Jizɔs in “ɔda ship dɛn” de rili wet fɔ di tɛm we dɛn go gɛt layf we go de sote go tumara bambay na Paradays na dis wɔl. Insay de, dɛn go “ɛnjɔy pis.”—Jɔn 10:​16; Sam 37:​11.

16. Aw Jɔn In Fɔs Lɛta 3:​19, 20 de kɔrej wi?

¹⁶ Sɔntɛnde wi kin fil se wi nɔ de du bɛtɛ tin fɔ sav Jiova, ɔ wi go de wɔnda se if Jiova gladi fɔ wetin wi de du. Sɔntɛm wi kin ivin fil se wi nɔ fit fɔ gɛt di gud tin dɛn we Jiova de du fɔ blɛs wi. Bɔt wi nɔ fɔ ɛva fɔgɛt se, “Gɔd pas wi at ɛn i no ɔltin.” (Rid Jɔn In Fɔs Lɛta 3:​19, 20.) We wi de sav Jiova bikɔs wi gɛt fet ɛn wi lɛk am, dat de mek wi biliv se i go blɛs wi, ilɛksɛf wi fil se wetin wi de du nɔ bɛtɛ.—Mak 12:​41-44.

17. Wetin na sɔm blɛs dɛn we wi de ɛnjɔy naw?

¹⁷ Jiova de blɛs in pipul dɛn, ivin we wi de na Setan in wikɛd wɔl we go dɔn jisnɔ. I de mek shɔ se wi gɛt bɔku tin dɛn we de ɛp wi fɔ lan bɔt am, ɛn i de mek wi gɛt kolat na in ɔganayzeshɔn we de ɔlsay na di wɔl. (Ayzaya 54:​13) Jɔs lɛk wetin Jizɔs bin dɔn prɔmis, Jiova de blɛs wi naw wit famili we gɛt brɔda ɛn sista dɛn we lɛk wi, we de ɔlsay na di wɔl. (Mak 10:​29, 30) Apat frɔm dat, di wan dɛn we de tray tranga wan fɔ no Gɔd go gɛt pis, dɛn go satisfay, ɛn dɛn go gɛt gladi at.—Lɛta Fɔ Filipay 4:​4-7.

18, 19. Aw Jiova in savant dɛn de fil bɔt di blɛsin dɛn we dɛn dɔn gɛt?

¹⁸ Jiova dɔn mek in savant dɛn we de ɔlsay na di wɔl ɛnjɔy in blɛsin dɛn. Fɔ ɛgzampul, Biyanka we de na Jamani se: “A nɔ go ebul fɔ tɛl Jiova tɛnki fɔ di ɛp we i dɔn ɛp mi we a gɛt prɔblɛm dɛn ɛn fɔ we i de nia mi ɛnide. Insay di wɔl, pipul dɛn de fɛt-fɛt ɛn dɛn sɔri. Bɔt as a de nia Jiova, a de fil sef na in an. Ɛnitɛm we a du sɔntin fɔ am, i de blɛs mi bak lɛk 100 tɛm so.”

¹⁹ Ɔ mek wi tɔk bɔt wan 70 ia ol uman na Kanada we nem Pɔla. I nɔ bin ebul fɔ du bɛtɛ tin bikɔs i bin gɛt wan sik we dɛn kɔl spayna bifida, we bin de rili ambɔg in spayn. I bin tɔk se we i nɔ ebul fɔ waka, dat nɔ min se i nɔ go ebul fɔ prich bɛtɛ. I tɔk bak se: “A bin de yuz di difrɛn tin dɛn we wi de yuz fɔ prich, lɛk fɔ prich wit tɛlifon ɛn fɔ prich ɔdasay apat frɔm os to os. Fɔ mek a go kɔrej misɛf, a kin rayt na buk sɔm skripchɔ dɛn ɛn sɔm pɔynt dɛn frɔm wi buk ɛn magazin dɛn we a go de rid wan wan tɛm. A kɔl am ‘My Survival Notebook.’ If wi pe atɛnshɔn to di tin dɛn we Jiova dɔn prɔmis wi, wi at nɔ go pwɛl sote go. Jiova de ɛp wi ɔltɛm, i nɔ mata uskayn prɔblɛm dɛn mit wi.” Sɔntɛm yu yon prɔblɛm dɛn go rili difrɛn frɔm Biyanka ɔ Pɔla in yon. Bɔt yu kin stil tink bɔt we dɛn we Jiova dɔn blɛs yu ɛn di wan dɛn we de nia yu. I rili fayn fɔ mek yu de tink bɔt aw Jiova de blɛs yu naw, ɛn aw i go blɛs yu tumara bambay!

20. Wetin wi go ɛnjɔy tumara bambay if wi kɔntinyu fɔ du wi bɛst fɔ sav Jiova fetful wan?

²⁰ Nɔ ɛva fɔgɛt se yu go gɛt Jiova in “blɛsin” we yu de pre to am wit ɔl yu at. Yu fɔ biliv se we yu “du wetin Gɔd want,” yu go gɛt “wetin i dɔn prɔmis” yu. (Di Ibru Pipul Dɛn 10:​35, 36) So mek wi kɔntinyu fɔ gɛt mɔ fet ɛn du ɔl wetin wi ebul fɔ sav Jiova. Wi biliv gud gud wan se Jiova go blɛs wi!—Rid Lɛta Fɔ Kɔlɔse 3:​23, 24.