Jiova na Gɔd we ɔganayz. (1 Kɔrintians 14:​33) So wi de ɛkspɛkt se in pipul dɛn fɔ ɔganayz. Aw di Kristian kɔngrigeshɔn ɔganayz? Wetin wi go du fɔ ɛp fɔ mek di kɔngrigeshɔn ɔganayz?

1. Udat de oba di kɔngrigeshɔn?

Na “Krays de oba di kɔngrigeshɔn.” (Ɛfishians 5:​23) I de na ɛvin de wach wetin Jiova in pipul dɛn de du ɔlsay na di wɔl. Jizɔs bin pik “di slev we fetful ɛn gɛt sɛns” we na machɔ ɛlda dɛn we de na wan smɔl grup we dɛn de kɔl di Gɔvnin Bɔdi. (Rid Matyu 24:​45-​47.) Jɔs lɛk di fɔstɛm Kristian apɔsul dɛn ɛn ɛlda dɛn na Jerusɛlɛm, na di Gɔvnin Bɔdi de dayrɛkt di kɔngrigeshɔn dɛn we de ɔlsay na di wɔl. (Akt 15:​2) Bɔt nɔto dɛn man dɛn ya de oba wi ɔganayzeshɔn. Dɛn de rid di Baybul fɔ no wetin Jiova want dɛn fɔ du ɛn dɛn de du wetin Jizɔs de tɛl dɛn wit ɔl dɛn at.

2. Udat na di ɛlda dɛn ɛn us wok dɛn de du?

Ɛlda dɛn na machɔ Kristian man dɛn we de yuz di Baybul fɔ tich ɛn we de kia fɔ Jiova in pipul dɛn bay we dɛn de ɛp ɛn ɛnkɔrej dɛn. Dɛn nɔ de pe dɛn fɔ di wok we dɛn de du. Bɔt dɛn de ‘du am wit ɔl dɛn at bifo Gɔd; dɛn nɔ de du am bikɔs dɛn want fɔ bɛnifit dɛnsɛf nɔmɔ, bɔt dɛn rɛdi fɔ du am.’ (1 Pita 5:​1, 2) Di ministerial savant dɛn de ɛp di ɛlda dɛn ɛn as tɛm de go dɛnsɛf kin kwalifay fɔ bi ɛlda dɛn.

Di Gɔvnin Bɔdi kin pik sɔm ɛlda dɛn fɔ bi sakit ovasia dɛn. Di sakit ovasia dɛn kin go waka na difrɛn difrɛn kɔngrigeshɔn fɔ go ɛp ɛn ɛnkɔrej di brɔda ɛn sista dɛn. Sakit ovasia dɛn de pik brɔda dɛn we fɔ bi ɛlda ɛn ministerial savant dɛn, ɛn dɛn de yuz di Baybul fɔ no if di brɔda kwalifay fɔ bi ɛlda ɔ ministerial savant.​—1 Timoti 3:​1-​10, 12; Taytɔs 1:​5-9.

3. Us wok we ɔl Jiova Witnɛs dɛn gɛt?

Ɔlman na di kɔngrigeshɔn de prez Jiova in nem bay we dɛn de siŋ, gi kɔmɛnt, gi tɔk, ɔ du dɛmɔnstreshɔn na di kɔngrigeshɔn mitin dɛn ɛn bay we dɛn de du di prichin wok akɔdin to aw dɛn ebul.​—Rid Sam 148:​12, 13.

LAN MƆ

4. Jizɔs na gud lida

Jizɔs gi wi wan fayn inviteshɔn. Rid Matyu 11:​28-​30, dɔn una tɔk bɔt dis kwɛstyɔn:

• Uskayn lida Jizɔs bi ɛn aw i want mek wi fil?

VIDIO: Ɛlda dɛn Bin Ɛp We Atkwek Apin na Nepal (4:​56)

Di Baybul tich klia wan aw ɛlda dɛn fɔ du dɛn wok.

Rid Ayzaya 32:​2 ɛn 1 Pita 5:​1-3, dɔn una tɔk bɔt dɛn kwɛstyɔn dɛn ya:

• Aw yu fil we yu no se jɔs lɛk Jizɔs, di ɛlda dɛnsɛf de du dɛn bɛst fɔ ɛnkɔrej di brɔda ɛn sista dɛn?

• Wetin na sɔm ɔda we dɛn we di ɛlda dɛn de falamakata Jizɔs?

5. Ɛlda dɛn de tich bay ɛgzampul

VIDIO: Ɛlda dɛn De Tek di Lid! (7:​39)

Jizɔs sɛt ɛgzampul fɔ di wan dɛn we de bifo na di kɔngrigeshɔn. Rid Matyu 23:​8-​12, dɔn una tɔk bɔt dis kwɛstyɔn:

• Wetin yu lɛk bɔt di difrɛns bitwin wetin di Baybul se fɔ ɛlda dɛn ɛn wetin yu dɔn si we ɔda bigman dɛn na ɔda rilijɔn dɛn de du?

1. Ɛlda dɛn gɛt tayt padi biznɛs wit Jiova, ɛn dɛn de ɛp dɛn famili bak fɔ du di sem tin

2. Ɛlda dɛn de kia fɔ ɔl di brɔda ɛn sista dɛn na di kɔngrigeshɔn

3. Ɛlda dɛn de prich ɔltɛm

4. Ɛlda dɛn na ticha dɛn. Dɛn de ɛp bak fɔ klin ɛn du ɔda wok dɛn na di kɔngrigeshɔn

6. Wi kin wok wit di ɛlda dɛn

Di Baybul gi wi wan impɔtant rizin we mek wi fɔ wok wit di ɛlda dɛn. Rid Ibruz 13:​17, dɔn una tɔk bɔt dɛn kwɛstyɔn dɛn ya:

• Yu tink se i mek sɛns we di Baybul ɛnkɔrej wi fɔ rɛdi fɔ obe di wan dɛn we de bifo na di kɔngrigeshɔn? Wetin mek yu tink so, ɔ wetin mek yu nɔ tink so?

Rid Lyuk 16:​10, dɔn una tɔk bɔt dis kwɛstyɔn:

• Wetin mek i impɔtant fɔ wok wit di ɛlda dɛn ivin pan tin dɛn we wi tink se nɔ impɔtant?

WETIN YU DƆN LAN?

Na Jizɔs de oba di kɔngrigeshɔn. Wi gladi fɔ wok wit di ɛlda dɛn we de wok ɔnda am bikɔs dɛn de ɛnkɔrej wi ɛn tich wi bay dɛn ɛgzampul.

Rivyu

• Udat de oba di kɔngrigeshɔn?

• Aw di ɛlda dɛn de ɛp di kɔngrigeshɔn?

• Us wok we ɔl Jiova in savant dɛn gɛt?

DU MƆ RISACH

Si wan ɛgzampul we de sho se di Gɔvnin Bɔdi ɛn di ɛlda dɛn bisin bɔt Kristian dɛn tide.

Ɛnkɔrej di Brɔda dɛn We De Ɔnda Ban (4:​22)

Lan bɔt di wok we sakit ovasia dɛn de du.

Aw Wan Sakit Ovasia De Du In Wok na Vilej Dɛn (4:​51)

Rid bɔt di impɔtant wok we uman dɛn de du na di kɔngrigeshɔn.

“Jiova Witnɛs dɛn Gɛt Uman Minista Dɛn?” (Di Wachtawa, Sɛptɛmba 1, 2012)

Lan bɔt aw ɛlda dɛn de wok tranga wan fɔ ɛnkɔrej dɛn brɔda ɛn sista dɛn.

“Kristian Ɛlda dɛn ‘Na Wi Kɔmpin Wokman dɛn fɔ Mek Wi Gɛt Gladi-At,’” (Di Wachtawa, Janwari 15, 2013)

1. Us advays di Baybul gi to maredman dɛn?

Jiova dɔn pik maredman dɛn fɔ de oba dɛn famili. (Rid Ɛfishians 5:​23.) Jiova ɛkspɛkt dɛn fɔ disayd fɔ du tin dɛn we go bɛnifit dɛn famili. Di Baybul advays maredman dɛn se: “Una kɔntinyu fɔ lɛk una wɛf dɛn.” (Ɛfishians 5:​25) Wetin dis min? Maredman we lɛk in wɛf go trit in wɛf fayn, ilɛksɛf dɛn de na os ɔ dɛn de na pɔblik. I de tray fɔ kip am sef, mek i gladi, ɛn gi am wetin i nid. (1 Timoti 5:​8) Wetin impɔtant pas ɔl, na in kin de bifo fɔ mek in wɛf gɛt tayt padi biznɛs wit Jiova. (Matyu 4:​4) Fɔ ɛgzampul, i kin pre wit in wɛf ɛn rid di Baybul wit am. We maredman sho se i rili bisin bɔt in wɛf, i de mek in padi biznɛs wit Jiova tayt mɔ ɛn mɔ.​—Rid 1 Pita 3:​7.

Na Jizɔs de oba di Kristian kɔngrigeshɔn. (Ɛfishians 5:​23) Tide, Jizɔs de na ɛvin, ɛn i de yuz di “slev we fetful ɛn gɛt sɛns” fɔ dayrɛkt in savant dɛn na di wɔl. (Rid Matyu 24:​45.) Na Krays pik di slev, we min se di slev gɛt rayt fɔ du sɔm tin dɛn. Bɔt i go stil bi slev fɔ Krays ɛn wok fɔ Krays in brɔda dɛn. Udat na da slev de? Aw di slev de kia fɔ wi?