Aw Jiova De Protɛkt Wi?

 1. Wetin mek Jizɔs bin aks Jiova fɔ protɛkt in disaypul dɛn?

DI LAS nɛt we Jizɔs bin de na dis wɔl as mɔtalman, i bin de tink bɔt ɔl di prɔblɛm dɛn we in disaypul dɛn go gɛt. Ɛn bikɔs i lɛk in disaypul dɛn we na in padi dɛn, i aks in Papa fɔ “protɛkt dɛn bikɔs ɔf di wikɛd wan.” (Jɔn 17:​14, 15) Jizɔs bin no se afta we i go bak na ɛvin, Setan go kɔntinyu fɔ fɛt ɛnibɔdi we want fɔ sav Jiova. So na dat mek Jiova fɔ protɛkt in pipul dɛn.

 2. Wetin go mek wi shɔ se Jiova go ansa wi prea dɛn?

² Jiova bin ansa Jizɔs in prea bikɔs I lɛk In Pikin. If wi du wi bɛst fɔ du wetin go mek Jiova gladi, i go lɛk wi bak, ɛn i go ansa wi we wi pre to am fɔ lɛ i ɛp ɛn protɛkt wi. Bikɔs Jiova na Papa we gɛt lɔv, i go kɔntinyu fɔ sho se i lɛk ɛn bisin bɔt in pikin dɛn. I de du dis fɔ mek i nɔ gɛt badnem.

 3. Wetin mek na naw wi nid fɔ lɛ Jiova protɛkt wi?

³ Wi nid fɔ lɛ Jiova protɛkt wi naw pas ɛni ɔda tɛm. Dɛn dɔn drɛb Setan kɔmɔt na ɛvin, “ɛn i vɛks bad bad wan.” (Rɛv. 12:​12) I dɔn mek di wan dɛn we de mek wi sɔfa fil se dɛn de “du oli wok fɔ Gɔd.” (Jɔn 16:​2) Ɔda wan dɛn we nɔ biliv Gɔd de mek wi sɔfa bikɔs wi difrɛn frɔm pipul dɛn na di wɔl. Ilɛk wetin mek pipul dɛn de mek wi sɔfa, wi nɔ de fred. Wetin mek? Bikɔs Gɔd in Wɔd se: “Di Masta fetful, i go ɛp una fɔ tinap tranga wan, ɛn i go protɛkt una frɔm di wikɛd wan.” (2 Tɛs. 3:​3) Aw Jiova de protɛkt wi? Lɛ wi tɔk bɔt tu tin dɛn we i dɔn gi wi.

 4. Akɔdin to Ɛfishians 6:​13-17, wetin Jiova dɔn gi wi fɔ protɛkt wi?

⁴ Jiova dɔn gi wi tin dɛn fɔ fɛt we go protɛkt wi frɔm Setan in atak dɛn. (Rid Ɛfishians 6:​13-17.) Dɛn tin dɛn ya we Gɔd dɔn gi wi rili strɔng, ɛn dɛn de wok fayn fayn wan. Bɔt if wi want fɔ lɛ dɛn protɛkt wi, wi fɔ kɔntinyu fɔ de yuz dɛn ɔl. Wetin dɛn tin dɛn ya tinap fɔ? Lɛ wi tɔk mɔ bɔt dɛn.

 5. Wetin na di bɛlt we min tru? Wetin mek wi fɔ tay am?

⁵ Di bɛlt we min tru tinap fɔ di tru tin dɛn we de na Gɔd in Wɔd, di Baybul. Wetin mek wi fɔ tay dis bɛlt? Na bikɔs Setan na “di papa pan lay.” (Jɔn 8:​44) I dɔn de lay fɔ lɔng tɛm, ɛn i dɔn ful “di wan ol wɔl.” (Rɛv. 12:​9) Bɔt di tru we de na di Baybul de protɛkt wi fɔ mek Setan nɔ ful wi. Aw wi go tay dis bɛlt we min tru? Wi go du dat bay we wi de lan di tru bɔt Jiova, we wi de wɔship am “wit spirit ɛn trut,” ɛn we wi de sho se wi ɔnɛs pan ɔltin.—Jɔn 4:​24; Ɛfi. 4:​25; Ibru. 13:​18.

 6. Wetin na di tin we de protɛkt wi chɛst we min wetin rayt? Wetin mek wi fɔ wɛr am?

⁶ Di tin we de protɛkt wi chɛst we min wetin rayt tinap fɔ Jiova in lɔ dɛn. Wetin mek wi fɔ wɛr dis tin we de protɛkt wi chɛst? Jɔs lɛk aw di wan we sojaman dɛn bin de wɛr bin de protɛkt dɛn at, na so i de protɛkt wi bak fɔ lɛ di wikɛd tin dɛn we de na dis wɔl nɔ go kɔrɔpt udat wi bi insay. (Prɔv. 4:​23) Jiova de ɛkspɛkt se wi fɔ lɛk am ɛn sav am wit ɔl wi at. (Mat. 22:​36, 37) So Setan de tray fɔ mek wi nɔ sav Jiova wit ɔl wi at bay we i de mek wi lɛk di tin dɛn we de na di wɔl ɛn di tin dɛn we Jiova et. (Jems 4:​4; 1 Jɔn 2:​15, 16) Ɛn if da in tatiks de nɔ wok, i go tray fɔ trɛtin wi fɔ mek wi du sɔntin we go mek Jiova nɔ gladi.

 7. Aw wi go wɛr di tin we de protɛkt wi chɛst we min wetin rayt?

⁷ Wi go wɛr di tin we de protɛkt wi chɛst we min wetin rayt bay we wi de obe Jiova in lɔ dɛn ɛn alaw dɛn lɔ dɛn de fɔ gayd wi. (Sam 97:​10) Sɔm pipul dɛn go fil se Jiova in lɔ dɛn de mek wi nɔ gɛt fridɔm. Bɔt if wi stɔp fɔ fala Baybul prinsipul dɛn, wi go tan lɛk sojaman we de fɛt wɔ, bɔt we pul di tin we de protɛkt in chɛst bikɔs i fil se i tu ebi. Dat nɔ mek sɛns atɔl. Di wan dɛn we lɛk Jiova nɔ de si in lɔ dɛn lɛk se na “ɛvi lod,” bɔt dɛn no se in lɔ dɛn de sev dɛn layf.—1 Jɔn 5:​3.

 8. Wetin i min fɔ lɛ wi wɛr sɔntin na wi fut fɔ rɛdi fɔ prich di gud nyuz?

⁸ Pɔl ɛnkɔrej wi bak fɔ wɛr sɔntin na wi fut fɔ rɛdi fɔ prich di gud nyuz bɔt pis. Dat min se wi fɔ rɛdi ɔltɛm fɔ prich di gud nyuz bɔt di Kiŋdɔm. We wi de tɔk to ɔda pipul dɛn bɔt di Baybul, i de mek wisɛf yon fet strɔng mɔ ɛn mɔ. I rili fayn fɔ si aw Jiova in pipul dɛn ɔlsay na di wɔl de yuz ɛni chans we dɛn gɛt fɔ prich ɛnisay we dɛn de. Fɔ ɛgzampul, dɛn de prich na wokples, na skul, os-to-os, ɔ say we pipul dɛn kin du biznɛs. Dɛn kin prich bak we dɛn kin go bay bay, we dɛn kin go fɛn dɛn fambul dɛn we nɔto Jiova Witnɛs, we dɛn kin tɔk to pipul dɛn we dɛn sabi, ɛn ivin we dɛn nɔ kin ebul kɔmɔt na dɛn os fɔ sɔm tɛm. If wi alaw wisɛf fɔ fred te wi stɔp fɔ prich, wi go tan lɛk sojaman we pul in sandal dɛn di tɛm we i de fɛt wɔ; i go izi fɔ lɛ i wund na in fut. Dat go mek i nɔ izi fɔ lɛ i protɛkt insɛf we dɛn atak am, ɛn i nɔ go ebul fɔ du wetin in kɔmanda de tɛl am fɔ du.

 9. Wetin mek wi nid fɔ ol di big shild we min fet?

⁹ Di big shild we min fet tinap fɔ di fet we wi gɛt pan Jiova. Wi gɛt fet se Jiova go du ɔl wetin i dɔn prɔmis. Da fet de go ɛp wi “fɔ ɔt ɔl di aro dɛn we gɛt faya we di wikɛd wan de sɛn.” Wetin mek wi nid fɔ ol dis big shild? Na bikɔs i de protɛkt wi fɔ lɛ pipul dɛn we dɔn lɛf fɔ sav Jiova nɔ ful wi wit dɛn lay lay tichin dɛn, ɛn i de ɛp fɔ lɛ wi at nɔ pwɛl we pipul dɛn de tɔk bad bɔt wetin wi biliv. If wi nɔ gɛt fet, wi nɔ go gɛt di trɛnk fɔ obe Jiova we pipul dɛn de mɔna wi fɔ lɛ wi nɔ obe am. Bɔt ɛnitɛm we wi nɔ gri fɔ du wetin Jiova nɔ want we pipul dɛn de mɔna wi na wokples ɔ skul, dat min se wi de ol wi shild. (1 Pit. 3:​15) Ɛnitɛm we wi nɔ gri fɔ tek wok we go ambɔg wi savis to Jiova, pan ɔl we da wok de go mek wi gɛt bɔku mɔni, dat min se wi de ol wi shild. (Ibru. 13:​5, 6) Ɛn ɛnitɛm we wi kɔntinyu fɔ du wetin Jiova want pan ɔl we pipul dɛn de mek wi sɔfa, dat min se wi shild de protɛkt wi.—1 Tɛs. 2:​2.

10. Wetin na di ɛlmɛt we go mek wi sev? Wetin mek wi fɔ wɛr am?

¹⁰ Di ɛlmɛt we go mek wi sev na di op we Jiova dɔn gi wi. Dat na di op fɔ se i go blɛs ɔl di wan dɛn we du wetin i want, ɛn ilɛksɛf dɛn day, i go gi dɛn layf bak. (1 Tɛs. 5:​8; 1 Tim. 4:​10; Tay. 1:​1, 2) Jɔs lɛk aw ɛlmɛt de protɛkt sojaman in ed, na so di op fɔ se wi go sev de protɛkt di we aw wi de tink. Aw? Dis wi op de mek wi kɔntinyu fɔ pe atɛnshɔn pan Gɔd in prɔmis, ɛn i de ɛp wi fɔ si wi prɔblɛm dɛn di rayt we. Aw wi go wɛr dis ɛlmɛt? Wi go du dat bay we wi de tink di we aw Gɔd de tink. Fɔ ɛgzampul, wi nɔ de abop pan jɛntri we kin jɔs go lɛk dat, bɔt wi de abop pan Gɔd.—Sam 26:​2; 104:​34; 1 Tim. 6:​17.

11. Wetin na di spirit in sɔd? Wetin mek wi nid fɔ yuz am?

¹¹ Di spirit in sɔd na Gɔd in Wɔd, di Baybul. Dis sɔd gɛt di pawa fɔ sho wi ɛnitin we na lay, ɛn i de fri pipul dɛn frɔm lay lay tichin dɛn ɛn bad abit dɛn. (2 Kɔr. 10:​4, 5; 2 Tim. 3:​16, 17; Ibru. 4:​12) Wi pasɔnal stɔdi ɛn di trenin we Gɔd in ɔganayzeshɔn de gi wi de ɛp wi fɔ no aw fɔ yuz dis sɔd fayn fayn wan. (2 Tim. 2:​15) Apat frɔm di tin dɛn we Jiova dɔn gi wi fɔ fɛt, i dɔn gi wi ɔda pawaful tin we de protɛkt wi. Wetin na da tin de?

12. Wetin na di ɔda tin we wi nid? Wetin mek?

¹² Sojaman we sabi fɛt no se in wangren nɔ go ebul fɛt bɔku bɔku pipul dɛn ɛn win dɛn; i nid in kɔmpin sojaman dɛn fɔ ɛp am. Semweso, wi wangren nɔ go ebul fɔ fɛt ɛn win Setan ɛn di wan dɛn we de fala am; wi nid wi brɔda ɛn sista dɛn fɔ sɔpɔt wi. Jiova dɔn gi wi bɔku bɔku sojaman dɛn we de ɛp wi. Dat na wi “brɔda dɛn” we de ɔlsay na di wɔl.—1 Pit. 2:​17.

13. Akɔdin to Ibruz 10:​24, 25, aw wi mitin dɛn kin ɛp wi?

¹³ Wan we aw wi de gɛt ɛp na we wi de atɛnd wi mitin dɛn. (Rid Ibruz 10:​24, 25.) Tɛm dɛn kin de we wi ɔl kin gɛt pwɛlat. Bɔt we dat apin, wi mitin dɛn kin ɛnkɔrej wi. Wi brɔda ɛn sista dɛn fayn kɔmɛnt dɛn kin rili ɛnkɔrej wi. Di tɔk dɛn we wi kin lisin to ɛn we sɔm pɔblisha dɛn kin kam na stej fɔ sho wi aw wi kin du wetin wi dɔn lan, kin rili ɛnkɔrej wi fɔ kɔntinyu fɔ sav Jiova. Ɛn wi kin gɛt ɛnkɔrejmɛnt we wi tɔk to wi brɔda ɛn sista dɛn bifo mitin stat ɛn afta mitin. (1 Tɛs. 5:​14) Dɔn bak, wi mitin dɛn de gi wi chans fɔ ɛp ɔda pipul dɛn, ɛn dat de mek wi gladi. (Akt 20:​35; Rom. 1:​11, 12) Wi mitin dɛn de ɛp wi ɔda we dɛn bak. Dɛn de ɛp wi fɔ lan aw fɔ prich ɛn tich fayn fayn wan. Fɔ ɛgzampul, wi kin lan di fayn we aw wi fɔ yuz di tin dɛn na wi Tichin Tulbɔks. So pripia fayn fɔ di mitin dɛn. We di mitin de go ɔn, lisin gud gud wan. Afta di mitin, du wetin yu dɔn lan. We yu du dɛn tin dɛn ya, yu go bi “Krays Jizɔs in fayn sojaman.”—2 Tim. 2:​3.

14. Udat dɛn bak de fɔ ɛp wi?

¹⁴ Di bɔku bɔku pawaful enjɛl dɛn bak kin sɔpɔt wi. Tink bɔt wetin wangren enjɛl ebul fɔ du. (Ayz. 37:​36) Dɔn tink bɔt wetin bɔku bɔku enjɛl dɛn go ebul fɔ du. No mɔtalman ɔ dimɔn nɔ de we go ebul fɔ win Jiova in pawaful sojaman dɛn. Wi dɔn lan se we Jiova de wit wangren wan pan in fetful savant dɛn, dat min se dɛn bɔku pas di wan dɛn we de agens dɛn. (Jɔj 6:​16) Ɛn dat na tru. Ɛnitɛm we yu at pwɛl bikɔs ɔf sɔntin we yu wokmet, yu skulmet, ɔ yu fambul dɛn we nɔto Jiova Witnɛs tɔk ɔ du, mɛmba ɔl udat de wit yu fɔ ɛp yu. Mɛmba se nɔto yu wangren de fɛt dis fɛt. Na wetin Jiova tɛl yu, na in yu de du.

15. Akɔdin to Ayzaya 54:​15, 17, wetin mek nɔbɔdi nɔ go ebul stɔp Gɔd in pipul dɛn fɔ mek dɛn nɔ du di prichin wok?

¹⁵ Di pipul dɛn we de na dis wɔl we Setan de kɔntrol gɛt bɔku rizin dɛn fɔ et wi. Wi nɔ de ɛva sɔpɔt ɛnitin we gɛt fɔ du wit pɔlitiks, ɛn wi nɔ de fɛt wɔ. Wi de tɔk bɔt Gɔd in nem, wi de prich se na Gɔd in Kiŋdɔm nɔmɔ go mek wi gɛt pis, ɛn wi de obe Gɔd in lɔ dɛn. Wi de ɛp pipul dɛn fɔ no se di pɔsin we de rul dis wɔl wikɛd, in na layman, ɛn i de kil. (Jɔn 8:​44) Dɔn bak, wi de anawns se tɛm nɔ de fa igen fɔ lɛ Gɔd dɔnawe wit Setan in wɔl. Bɔt Setan ɛn di wan dɛn we de fala am nɔ go ɛva ebul stɔp wi prichin wok. Bifo dat, wi go kɔntinyu fɔ yuz ɛni chans we wi gɛt fɔ prez Jiova. Pan ɔl we Setan rili pawaful, i nɔ ebul stɔp di Kiŋdɔm mɛsej fɔ mek i nɔ rich pipul dɛn ɔlsay na di wɔl. Na bikɔs Jiova de protɛkt wi, na in mek Setan nɔ ebul fɔ stɔp dis wok.—Rid Ayzaya 54:​15, 17.

16. Aw Jiova go sev in pipul dɛn insay di big big trɔbul?

¹⁶ Wetin gɛt fɔ apin tumara bambay? Jiova go yuz tu we dɛn fɔ sev wi insay di big big trɔbul. Fɔs, i go sev in fetful savant dɛn di tɛm we i gɛt fɔ mek di kiŋ dɛn na di wɔl dɔnawe wit Babilɔn di Gret, we na ɔl dɛn lay lay rilijɔn dɛn. (Rɛv. 17:​16-18; 18:​2, 4) Dɔn, i go sev in pipul dɛn we i go dɔnawe wit ɔl di ɔda tin dɛn we de na Setan in wɔl na Amagɛdɔn.—Rɛv. 7:​9, 10; 16:​14, 16.

17. Us bɛnifit wi go gɛt we wi kɔntinyu fɔ de nia Jiova?

¹⁷ Wans wi kɔntinyu fɔ de nia Jiova, Setan nɔ go ebul du ɛnitin to wi we go mek bad mit wi sote go. Infakt, na in Gɔd gɛt fɔ dɔnawe wit kpatakpata. (Rom. 16:​20) So na fɔ wɛr di tin dɛn we Gɔd dɔn gi wi fɔ fɛt, ɛn nɔ ɛva pul dɛn. Nɔ tray fɔ fɛt Setan ɛn in wɔl yu wangren. Sɔpɔt yu brɔda ɛn sista dɛn. Ɛn du wetin Jiova de tɛl yu fɔ du. If yu du ɔl dis, yu go gɛt kɔnfidɛns se yu Papa we de na ɛvin we lɛk yu go ɛp ɛn protɛkt yu.—Ayz. 41:​10.