Nɔ Alaw Natin fɔ Mek Yu Nɔ Gɛt di Prayz

1, 2. (a) Us prayz Gɔd in savant dɛn de wet fɔ? (b) Wetin go ɛp wi fɔ pe atɛnshɔn pan di prayz? (Luk di pikchɔ nia dis atikul in taytul.)

DI ANƆYNTƐD Kristian dɛn gɛt fayn op. Dɛn de wet fɔ di tɛm we dɛn go de na ɛvin. Di apɔsul Pɔl kɔl dis op “di prayz we Gɔd de gi; dat na layf na ɛvin.” (Lɛta Fɔ Filipay 3:​14) Dɛn go rul wit Jizɔs Krays na in Kiŋdɔm we de na ɛvin ɛn wok wit am fɔ ɛp fɔ mek mɔtalman pafɛkt. (Rɛvɛleshɔn 20:​6) Dat na wɔndaful op! Di ɔda ship dɛn de wet fɔ difrɛn prayz. Dɛn gɛt op fɔ liv na Paradays na dis wɔl sote go ɛn dis op de mek dɛn rili gladi!—Pita In Sɛkɛn Lɛta 3:​13.

² Pɔl bin want fɔ ɛp in kɔmpin anɔyntɛd Kristian dɛn fɔ kɔntinyu fɔ fetful ɛn win di prayz. I bin tɛl dɛn se: “Una fɔ put ɔl una at pan dɛn tin we de na ɛvin.” (Lɛta Fɔ Kɔlɔse 3:​2) Dɛn bin nid fɔ pe atɛnshɔn pan di fayn fayn op we dɛn gɛt fɔ go na ɛvin. (Lɛta Fɔ Kɔlɔse 1:​4, 5) We wi tink bɔt Jiova in blɛsin dɛn, dat go ɛp wi ɔl as Gɔd in savant dɛn fɔ pe atɛnshɔn pan di prayz. Ɛn dat na tru ilɛksɛf wi gɛt op fɔ de na ɛvin ɔ na dis wɔl.—Fɔs Lɛta Fɔ Kɔrint 9:​24.

 3. Wetin Pɔl bin advays Kristian dɛn bɔt?

³ Pɔl bin wɔn di Kristian dɛn bak bɔt di bad tin dɛn we go mek dɛn nɔ gɛt di prayz. Fɔ ɛgzampul, i bin rayt to di Kristian dɛn na Kɔlɔse bɔt lay lay Kristian dɛn we nɔ bin put fet pan Krays we dɛn bin de tray fɔ du wetin Gɔd want, bifo dat dɛn bin de fala di Lɔ we Gɔd bin gi Mozis. (Lɛta Fɔ Kɔlɔse 2:​16-18) Pɔl bin tɔk bak bɔt di bad tin dɛn we stil de tide we go mek wisɛf nɔ win di prayz. I bin ɛksplen wetin go ɛp wi fɔ mek wi nɔ put an pan mami ɛn dadi biznɛs di we aw Gɔd nɔ want ɛn wetin wi go du we wi gɛt prɔblɛm wit wi brɔda ɛn sista dɛn, ɔ insay wi famili. Di fayn advays we Pɔl bin gi go ɛp wisɛf tide. So lɛ wi tɔk bɔt sɔm pan di fayn advays dɛn we de insay di lɛta we Pɔl bin rayt to di Kristian dɛn na Kɔlɔse.

 4. Wetin mek fɔ tink bɔt mami ɛn dadi biznɛs di we aw Gɔd nɔ want, go mek wi nɔ win di prayz?

⁴ Afta Pɔl bin dɔn mɛmba in brɔda dɛn bɔt di fayn fayn op we dɛn gɛt, i bin rayt to dɛn se: “Una fɔ kil di tin we de insay una at we de mek una want fɔ du dɛn bad tin we dɛn ɔda mɔtalman de du, dat na fɔ liv fri ɔ dɔti layf; fɔ want man ɔ uman we nɔto una yon; fɔ want fɔ du ɔl kayn bad tin; fɔ want plɛnti plɛnti tin.” (Lɛta Fɔ Kɔlɔse 3:​5) I nɔ kin rili izi fɔ mek wi nɔ tink bɔt mami ɛn dadi biznɛs di we aw Gɔd nɔ want ɛn i kin mek wi pwɛl wi padi biznɛs wit Jiova, ɛn lɔs wi op fɔ tumara bambay. Wan brɔda we bin gri fɔ du di bad tin we bin de na in at, bɔt we leta i leta kam bak na di kɔngrigeshɔn bin se di we aw i bin de fil fɔ du dis bad tin bin rili strɔng ɛn dat bin mek “i nɔ bin ebul stɔp insɛf igen.”

 5. Aw wi go protɛkt wisɛf we wi de na say we go mek am izi fɔ mek wi du bad?

⁵ Wi rili nid fɔ tek tɛm mɔ if wi de na say we go mek wi nɔ fala Jiova in lɔ bɔt wetin rayt ɛn wetin rɔng. Fɔ ɛgzampul, we tu pipul dɛn stat fɔ wach dɛnsɛf fɔ mared, i fayn fɔ lɛ dɛn tɔk bɔt usay dɛn fɔ stɔp pan tin dɛn lɛk fɔ tɔch dɛnsɛf, kis, ɛn aw fɔ avɔyd fɔ de togɛda dɛn tu nɔmɔ. (Prɔvabs 22:​3) Ɔda bad tin dɛn kin apin we wi travul fɔ go du biznɛs ɔ we wi de wok wit man ɔ uman we wi nɔ mared to. (Prɔvabs 2:​10-12, 16) Wetin wi go du fɔ protɛkt wisɛf? Mek dɛn no se yu na Jiova Witnɛs. Biev fayn, ɛn nɔ fɔgɛt se we yu mek lɛk se yu want pɔsin we yu nɔ rili want am, dat kin briŋ prɔblɛm. Wi nid fɔ tek tɛm bak we wi at pwɛl ɔ we wi fil se nɔbɔdi nɔ bisin bɔt wi. Wi kin want fɔ lɛ pɔsin mek wi fil lɛk se wi impɔtant. Dis kayn we we wi kin fil kin so strɔng ɛn dat kin mek wi gri fɔ de wit ɛnibɔdi we tink se wi impɔtant. Dat rili bad. If yu de fil da kayn we de, nɔ gri fɔ du ɛnitin we go mek yu nɔ win di prayz. Abop pan Jiova ɛn yu brɔda ɛn sista dɛn fɔ ɛp yu.—Rid Sam 34:​18; Prɔvabs 13:​20.

 6. Wetin wi fɔ mɛmba we wi de disayd wetin fɔ wach, rid, ɛn lisin to?

⁶ Fɔ mek wi go kil di tin dɛn we go mek wi fil fɔ du mami ɛn dadi biznɛs di we we Gɔd nɔ want, wi nid fɔ lɛf fɔ wach, rid, ɔ lisin to tin dɛn we gɛt fɔ du wit mami ɛn dadi biznɛs. Tide, bɔku pan di tin dɛn we wi de wach, rid, ɛn lisin to, de mɛmba wi bɔt wetin bin de apin insay Sɔdɔm ɛn Gɔmɔra. (Jud 7) Di wan dɛn we de mek dɛn tin dɛn de, de mek i tan lɛk se fɔ du mami ɛn dadi biznɛs di we aw Gɔd nɔ want, na tin we nɔ bad. So wi nid fɔ de tek tɛm. Wi nɔ go jɔs gri fɔ yuz ɛnitin we dɛn de mek na di wɔl. Bifo dat, wi fɔ pik di kayn tin dɛn we wi de wach, rid, ɛn lisin to so dat dɛn nɔ go stɔp wi fɔ mek wi nɔ win di prayz fɔ gɛt layf.—Prɔvabs 4:​23.

 7. Wetin kin apin insay di Kristian kɔngrigeshɔn?

⁷ Wi gladi fɔ de na di Kristian kɔngrigeshɔn. Wi kin stɔdi Gɔd in Wɔd na mitin, ɛn wi kin gladi fɔ sɔpɔt wi brɔda ɛn sista dɛn. Ɔl dɛn tin ya de ɛp wi fɔ pe atɛnshɔn pan di prayz. Bɔt sɔntɛnde, sɔm tin dɛn kin apin we kin mek wi gɛt prɔblɛm dɛn wit wi brɔda ɛn sista dɛn. If wi nɔ sɔlv dɛn prɔblɛm dɛn de, i go izi fɔ mek wi bigin kip grɔj na wi at fɔ dɛn.—Rid Pita In Fɔs Lɛta 3:​8, 9.

8, 9. (a) Us kwaliti dɛn go ɛp wi fɔ win di prayz? (b) Wetin go ɛp wi fɔ kɔntinyu fɔ gɛt pis if wi kɔmpin Kristian mek wi vɛks?

⁸ Wi nɔ fɔ alaw grɔj fɔ mek wi nɔ win di prayz. Pɔl bin tɛl Kristian dɛn wetin dɛn bin nid fɔ du. I bin se: “Una na Gɔd yon pipul; we i lɛk una, i pik una fɔ bi in yon pipul. Dat fɔ mek una gɛt sɔri at fɔ una kɔmpin, una fɔ de du gud to una kɔmpin, una nɔ fɔ tink se una bɛtɛ pas ɔda pipul, una nɔ fɔ dil wit ɔda pipul traŋa wan, ɛn una fɔ de bia wit pipul. Una nɔ fɔ vɛks if pɔsin du una bad, ɛn una fɔ padin dɛn if dɛn du una ɛnitin. Una fɔ padin una kɔmpin lɛkɛ aw di Masta dɔn padin una. Pantap ɔl dat, una fɔ lɛk una kɔmpin, dat go mek una gɛt wan at ɛn una go bi wan, ɛn nɔ ambɔg nɔ go de.”—Lɛta Fɔ Kɔlɔse 3:​12-14.

⁹ We wi lɛk pipul ɛn du gud to dɛn, dat go ɛp wi fɔ fɔgiv dɛn. If wi fil bad bɔt wetin pɔsin se ɔ du to wi, wi kin tink bɔt di tɛm dɛn we wisɛf dɔn se ɔ du sɔntin we nɔ fayn to ɔda pipul dɛn ɛn aw dɛn bin fɔgiv wi. Wi bin rili gladi fɔ we dɛn sho se dɛn lɛk wi ɛn du gud to wi! (Rid Ɛkliziastis 7:​21, 22.) Wi gladi we Krays de mek wi we de wɔship Gɔd di rayt we gɛt wanwɔd. (Lɛta Fɔ Kɔlɔse 3:​15) Wi ɔl lɛk di sem Gɔd, wi de prich di sem mɛsej, ɛn bɔku pan wi gɛt di sem prɔblɛm dɛn. If wi de du gud, lɛk wi kɔmpin dɛn, ɛn fɔgiv dɛn, di kɔngrigeshɔn go kɔntinyu fɔ gɛt wanwɔd ɛn wi go pe atɛnshɔn pan di prayz.

10, 11. (a) Wetin mek i bad fɔ jɛlɔs? (b) Wetin wi go du fɔ lɛ wi nɔ jɛlɔs wi kɔmpin dɛn we go mek wi nɔ win di prayz?

¹⁰ We wi de jɛlɔs wi kɔmpin, dat nɔ go mek wi win di prayz. Ɛgzampul dɛn na di Baybul dɔn sho se i bad fɔ de jɛlɔs wi kɔmpin dɛn. Fɔ ɛgzampul, Ken jɛlɔs Ebɛl ɛn dat bin mek i kil am. Kora, Detan, ɛn Abiram bin jɛlɔs Mozis ɛn dɛn bin tɔn agens am. Kiŋ Sɔl bin jɛlɔs Devid ɛn tray fɔ kil am. Wetin Gɔd in Wɔd se na tru we i tɔk se: “Ɛni say we pipul de jɛlɔs dɛn kɔmpin ɛn dɛn want ɔltin fɔ dɛnsɛf, una nɔ go fɛn wanwɔd de; na soso bad lib [go de] de.”—Jems 3:​16.

¹¹ If wi tray tranga wan fɔ mek wi lɛk wi kɔmpin dɛn ɛn du gud to dɛn, i nɔ go izi fɔ mek wi jɛlɔs dɛn. Gɔd in Wɔd se: “If una lɛk una kɔmpin mɔtalman una go de bia wit dɛn; una go gɛt gud at fɔ dɛn; una nɔ go de jɛlɔs dɛn.” (Fɔs Lɛta Fɔ Kɔrint 13:​4) Fɔ mek shɔ se wi nɔ de jɛlɔs wi kɔmpin dɛn, wi fɔ tray fɔ si tin dɛn di we aw Jiova de si dɛn. Wi nid fɔ si wi brɔda ɛn sista dɛn as difrɛn pat dɛn pan wan bɔdi, we na di kɔngrigeshɔn. Di Baybul se: “If wan pat gɛt rɛspɛkt, ɔl di ɔda pat dɛn go gladi wit am.” (Fɔs Lɛta Fɔ Kɔrint 12:​16-18, 26) If gud tin apin to wan pan wi brɔda dɛn, wi fɔ gladi fɔ am wi nɔ fɔ jɛlɔs am. Tink bɔt di gud ɛgzampul we Kiŋ Sɔl in pikin Jonɛtan bin sɛt fɔ wi. Pan ɔl we na Jonɛtan bin fɔ bi kiŋ, i nɔ bin jɛlɔs Devid we dɛn pik am fɔ bi kiŋ. I bin ɛnkɔrej ɛn sɔpɔt Devid. (Fɔs Samiɛl 23:​16-18) Yu go falamakata Jonɛtan in ɛgzampul fɔ lɛk ɔda pipul dɛn ɛn du gud to dɛn?

12. Us advays na di Baybul go ɛp yu famili fɔ win di prayz?

¹² We ɔlman na di famili fala di Baybul in advays dɛn, pis ɛn gladi at go de na di famili ɛn dɛn go win di prayz. Pɔl bin gi fayn advays fɔ famili dɛn. I bin se: “Una dɛn mareduman, una fɔ put yay dɔŋ to una man. Na so una fɔ du bikɔs una dɔn biliv pan Krays ɛn una de fala am. Una dɛn maredman, una fɔ lɛk una wɛf, una nɔ fɔ dil traŋa wan wit dɛn. Una dɛn pikin, una fɔ de du wetin una mama ɛn papa tɛl una fɔ du ɔltɛm, bikɔs Gɔd go gladi fɔ si se una de du so. Una dɛn mama ɛn papa, una nɔ mek una pikin dɛn at pwɛl we una de tɔk ɔltɛm se wetin dɛn de du nɔ rayt.” (Lɛta Fɔ Kɔlɔse 3:​18-21) Yu ebul si aw dis advays go ɛp yu famili?

13. Aw mareduman we na Kristian go ɛp in man we nɔ de sav Jiova, fɔ kam sav am?

¹³ Sɔntɛm yu na sista we yu man nɔ de sav Jiova. Wetin yu go du if yu fil se i nɔ de trit yu fayn? Sɔntɛm yu go vɛks ɛn agyu wit am, bɔt yu tink se dat go ɛp? Ivin if yu win di agyumɛnt, yu tink se dat go mek i want fɔ sav Jiova? Nɔ, dat nɔ go ɛp. Bɔt if yu sho se yu rɛspɛkt am as di wan we de oba yu, yu go ebul ɛp yu famili fɔ ɛnjɔy pis ɛn dat go briŋ prez to Jiova. Sɔntɛm, yu gud ɛgzampul go mek yu man want fɔ sav Jiova ɛn una ɔl tu go win di prayz.—Rid Pita In Fɔs Lɛta 3:​1, 2.

14. Wetin maredman we na Kristian go du if in wɛf we nɔ de sav Jiova nɔ de rɛspɛkt am?

¹⁴ Sɔntɛm yu na brɔda we yu wɛf nɔ de sav Jiova. Wetin yu go du if yu fil se i nɔ de rɛspɛkt yu? If yu tray fɔ sho am se na yu na di bɔs bay we yu de ala pan am, yu tink se dat go mek i rɛspɛkt yu? Nɔ, i nɔ go rɛspɛkt yu! Gɔd want mek yu bi gud maredman we de falamakata Jizɔs. (Lɛta Fɔ Ɛfisɔs 5:​23) Jizɔs we de oba di kɔngrigeshɔn, de peshɛnt ɛn sho se i lɛk pipul dɛn ɔltɛm. (Lyuk 9:​46-48) If yu falamakata Jizɔs, as tɛm de go yu wɛf insɛf go want fɔ sav Jiova.

15. Aw maredman we na Kristian go sho se i lɛk in wɛf?

¹⁵ Jiova tɛl maredman dɛn se: “Una dɛn maredman dɛn, una fɔ lɛk una wɛf, una nɔ fɔ dil traŋa wan wit dɛn.” (Lɛta Fɔ Kɔlɔse 3:​19) Maredman we lɛk in wɛf, go sho se i rɛspɛkt am. Aw i go du dat? I de lisin to wetin in wɛf de se, ɛn mek i no se wetin i de se impɔtant to am. (Pita In Fɔs Lɛta 3:​7) Ilɛksɛf nɔto ɔltɛm di man de du wetin in wɛf se, we i lisin to am dat go ɛp am fɔ disayd fɔ du wetin rayt. (Prɔvabs 15:​22) Maredman we lɛk in wɛf nɔ de fos in wɛf fɔ rɛspɛkt am. Bifo dat, i go tray fɔ du tin dɛn we go mek in wɛf rɛspɛkt am. We maredman lɛk in wɛf ɛn in pikin dɛn, dɛn go gladi we dɛn de sav Jiova ɛn win di prayz fɔ layf.

16, 17. As yɔŋ pɔsin, wetin go ɛp yu fɔ mek yu nɔ vɛks pasmak pan yu mama ɛn papa?

¹⁶ Sɔntɛm yu na yɔŋ pɔsin we tink se yu mama ɛn papa nɔ ɔndastand yu ɔ yu fil se dɛn tu strikt. Dis go mek yu fil bad ɛn mek yu bigin wɔnda if yu go ivin want fɔ sav Jiova. Bɔt if yu lɛf fɔ sav Jiova, yu go kam fɔ si se nɔbɔdi nɔ de na di wɔl we go lɛk yu lɛk aw yu mama, papa, ɛn yu padi dɛn na di kɔngrigeshɔn lɛk yu.

¹⁷ Tink bɔt dis: If yu mama ɛn papa dɛn nɔ ɛva kɔrɛkt yu, aw yu go no if dɛn rili bisin bɔt yu? (Di Ibru Pipul Dɛn 12:​8) Fɔ tru, dɛn nɔ pafɛkt, so di we aw dɛn go kɔrɛkt yu go mek yu fil bad. Bɔt nɔ pe atɛnshɔn to dat. Bifo dat, tray fɔ ɔndastand di rizin fɔ wetin dɛn du ɛn wetin dɛn se. Tray nɔ fɔ vɛks. Gɔd in Wɔd se: “Udat gɛt sɛns nɔ de tɔk bɔku, semweso udat ebul kɔntrol insɛf, gɛt sɛns.” (Prɔvabs 17:​27) Tray fɔ bi machɔ pɔsin we ilɛk aw dɛn advays am, i rɛdi fɔ lisin ɛn lan frɔm wetin dɛn de tɛl am. (Prɔvabs 1:​8) Nɔ ɛva fɔgɛt se, na fayn gift fɔ gɛt mama ɛn papa dɛn we lɛk Jiova. Dɛn want fɔ ɛp yu fɔ de sote go.

18. Wetin mek yu dɔn mekɔp yu maynd fɔ pe atɛnshɔn pan di prayz?

¹⁸ Ilɛksɛf wi gɛt op fɔ go na ɛvin ɔ fɔ de na Paradays na dis wɔl, wi ɔl de wet fɔ si di blɛsin dɛn we wi go gɛt tumara bambay. Di op we wi gɛt rial. Na prɔmis we kɔmɔt frɔm di wan we mek di wan ol wɔl, we se: “Di wɔl go no bɔt PAPA GƆD [“Jiova,” NW] bɛtɛ bɛtɛ wan.” (Ayzaya 11:​9) I nɔ go te igen, ɔlman we go de na di wɔl go bi pɔsin we Gɔd de tich. Dat na wɔndaful prayz we wi fɔ tray fɔ gɛt. So mɛmba ɔltɛm wetin Jiova dɔn prɔmis yu ɛn nɔ mek natin stɔp yu fɔ mek yu nɔ win di prayz!