“Protɛkt Wetin Dɛn Bin Dɔn Gi Yu”

1-2. Akɔdin to 1 Timoti 6:​20, wetin dɛn bin dɔn gi Timoti?

BƆKU tɛm, wi kin aks ɔda pipul dɛn fɔ ɛp wi kip sɔntin we gɛt valyu to wi. Fɔ ɛgzampul, wi kin kip wi mɔni na bank. Ɛn we wi du dat, wi de ɛkspɛkt se natin nɔ go du di mɔni; i nɔ go lɔs, ɛn pɔsin nɔ go tif am. So wi no wetin i min fɔ gi ɔda pɔsin sɔntin we gɛt valyu to wi.

² Rid 1 Timoti 6:​20. Apɔsul Pɔl bin mɛmba Timoti se dɛn bin dɔn gi am sɔntin we gɛt valyu. Ɛn da tin de na di tru tin we i bin dɔn lan bɔt wetin Gɔd want fɔ mɔtalman. Dɔn bak, Timoti bin gɛt di big big ɔnɔ fɔ “prich Gɔd in wɔd” ɛn fɔ “kɔntinyu fɔ prich di gud nyuz.” (2 Tim. 4:​2, 5) Pɔl bin ɛnkɔrej Timoti fɔ protɛkt wetin dɛn bin dɔn gi am. Lɛk Timoti, Jiova dɔn gi wi tin dɛn we gɛt valyu. Wetin na dɛn tin dɛn de? Ɛn wetin mek wi fɔ protɛkt dɛn valyu tin dɛn de we Jiova dɔn gi wi?

3-4. Wetin na sɔm rizin dɛn we mek di tru tin dɛn we de insay di Baybul gɛt valyu?

³ Jiova dɔn mek wi lan di tru tin dɛn we de insay in Wɔd, di Baybul. Dɛn tru tin dɛn ya gɛt valyu bikɔs dɛn de mek wi no aw fɔ gɛt tayt padi biznɛs wit Jiova ɛn aw fɔ gɛt tru tru gladi-at. Frɔm di tɛm we wi lan dɛn tru tin dɛn ya ɛn du wetin wi de lan, wi bin lɛf fɔ biliv lay lay tichin dɛn ɛn stat fɔ liv klin layf.—1 Kɔr. 6:​9-11.

⁴ Wan ɔda rizin we mek di tru tin dɛn we de insay Gɔd in Wɔd gɛt valyu na bikɔs Jiova de sho am to ɔmbul pipul dɛn we “rili sho se dɛn want fɔ gɛt layf we go de sote go.” (Akt 13:​48) Dɛn ɔmbul pipul dɛn ya de fala wetin di slev we fetful ɛn gɛt sɛns de tich wi na di Baybul. (Mat. 11:​25; 24:​45) Wi nɔ go ebul fɔ ɔndastand wetin de na di Baybul if pɔsin nɔ ɛp wi, ɛn natin nɔ de we gɛt valyu pas fɔ ɔndastand wetin de na di Baybul.—Prɔv. 3:​13, 15.

 5. Us ɔda tin Jiova dɔn gi wi?

⁵ Jiova dɔn mek wi gɛt big big ɔnɔ bak fɔ tich pipul dɛn di tru tin bɔt am ɛn wetin i want. (Mat. 24:​14) Di mɛsej we wi de prich rili gɛt valyu bikɔs i de ɛp pipul dɛn fɔ de na Jiova in famili ɛn fɔ gɛt di chans fɔ de sote go. (1 Tim. 4:​16) Ilɛk na smɔl ɔ bɔku tɛm wi de yuz fɔ prich, wi stil de ɛp fɔ du di wok we impɔtant pas ɛni ɔda wok we pipul dɛn de du naw. (1 Tim. 2:​3, 4) Na big big ɔnɔ wi gɛt fɔ bi Gɔd in kɔmpin wokman.—1 Kɔr. 3:​9.

 6. Wetin bin apin to sɔm pipul dɛn we nɔ bin kɔntinyu fɔ valyu wetin dɛn gɛt?

⁶ Sɔm Kristian dɛn we bin de insay Timoti in tɛm nɔ bin valyu di ɔnɔ we dɛn bin gɛt fɔ bi Gɔd in kɔmpin wokman. Bikɔs Dimas bin lɛk di tin dɛn we de na di wɔl, i nɔ bin kɔntinyu fɔ wok wit Pɔl. (2 Tim. 4:​10) I bin tan lɛk se Fayjɛlɔs ɛn Amɔjinis bin lɛf fɔ du di prichin wok bikɔs dɛn bin de fred se pipul dɛn go mek dɛn sɔfa lɛk aw Pɔl bin de sɔfa. (2 Tim. 1:​15) Aymeniɔs, Alɛgzanda, ɛn Faylitɔs nɔ bin kɔntinyu fɔ wɔship Jiova. (1 Tim. 1:​19, 20; 2 Tim. 2:​16-18) I tan lɛk se ɔl dɛn pipul dɛn ya bin lɛk Jiova, bɔt dɛn nɔ bin kɔntinyu fɔ valyu di tin dɛn we i bin dɔn gi dɛn.

 7. Wetin Setan kin yuz fɔ mek wi du wetin i want?

⁷ Aw Setan kin tray fɔ mek wi du tin dɛn we go sho se wi nɔ valyu di tin dɛn we Jiova dɔn gi wi? Lɛ wi tɔk bɔt sɔm tin dɛn we Setan de yuz. I kin yuz di Intanɛt, tɛlivishɔn program dɛn, redio, fim, nyuzpepa, buk, ɛn magazin dɛn fɔ mek wi bigin tink ɛn du tin dɛn we go mek smɔl smɔl wi lɛf fɔ obe Jiova in lɔ dɛn. I kin tray fɔ mek wi fred wetin ɔda pipul dɛn kin se ɔ we dɛn kin mek wi sɔfa so dat wi go lɛf fɔ prich. Ɛn i kin tray fɔ mek wi lisin to “tɔk dɛn we pipul dɛn we tink se dɛn no sɔntin kin tɔk, pan ɔl we wetin dɛn de tɔk nɔto tru.” I kin du dis so dat wi go lɛf fɔ wɔship Jiova.—1 Tim. 6:​20, 21.

 8. Wetin yu lan frɔm wan brɔda we nem Daniɛl in ɛkspiriɛns?

⁸ If wi nɔ tek tɛm, smɔl smɔl, wi go lɛf fɔ du di tin dɛn we wi de lan bɔt Jiova. Tink bɔt Daniɛlb in ɛkspiriɛns. I bin lɛk vidio gem dɛn. I bin se: “A bigin ple vidio gem dɛn we a bin de lɛk tɛn ia. Di gem dɛn we a bin bigin ple nɔ bin bad. Bɔt smɔl smɔl, a bigin fɔ ple gem dɛn we gɛt fɛt-fɛt ɛn wich biznɛs.” Leta, i bin de ple di gem dɛn fɔ lɛk 15 awa ɛvride. I kɔntinyu fɔ se: “Dip insay mi at, a bin no se di gem dɛn we a bin de ple ɛn di tɛm we a bin de spɛnd fɔ ple dɛn gem dɛn de bin de mek a kɔmɔt nia Jiova. Bɔt a bin dɔn kɔnvins misɛf se a nɔ nid fɔ du wetin di Baybul se.” So if wi nɔ tek tɛm, di tin dɛn we wi de yuz fɔ ɛnjɔy wisɛf go mek smɔl smɔl wi lɛf fɔ du di tin dɛn we wi de lan bɔt Jiova. If dat apin, wi go ɛnd-ɔp fɔ lɔs di valyu tin dɛn we Jiova dɔn gi wi.

 9. Akɔdin to 1 Timoti 1:​18, 19, udat Pɔl bin kɔmpia Timoti wit?

⁹ Rid 1 Timoti 1:​18, 19. Pɔl bin kɔmpia Timoti wit sojaman ɛn i bin ɛnkɔrej am fɔ “kɔntinyu fɔ fɛt di fayn fɛt.” Bɔt Pɔl nɔ bin de tɔk se na mɔtalman sojaman dɛn Timoti fɔ fɛt. So aw Kristian dɛn tan lɛk sojaman dɛn we de fɛt wɔ? Us kwaliti dɛn wi fɔ gɛt fɔ lɛ wi bi Krays in sojaman dɛn? Lɛ wi tɔk bɔt fayv lɛsin dɛn we wi go lan frɔm di ɛgzampul we Pɔl yuz. Dɛn lɛsin dɛn ya go ɛp wi fɔ protɛkt di tin dɛn we Jiova dɔn gi wi.

10. Wetin i min fɔ bi pɔsin we fetful to Gɔd, ɛn wetin mek wi fɔ du dat?

¹⁰ Bi pɔsin we fetful to Gɔd. Gud sojaman nɔ de kɔmɔt biɛn pɔsin we i lɛk ɔ sɔntin we i valyu. So i kin tray tranga wan fɔ protɛkt dɛn. Pɔl bin ɛnkɔrej Timoti fɔ bi pɔsin we fetful to Gɔd, ɛn dat min se i nɔ fɔ ɛva kɔmɔt biɛn Gɔd. (1 Tim. 4:​7) Di mɔ we wi lɛk Jiova na di mɔ wi go want fɔ protɛkt di tin dɛn we i dɔn gi wi.—1 Tim. 4:​8-10; 6:​6.

11. Wetin mek wi nid fɔ tren wisɛf?

¹¹ Tren yusɛf fɔ du wetin rayt. Sojaman fɔ tren insɛf so dat i go rɛdi fɔ fɛt ɔltɛm. Timoti bin kɔntinyu fɔ du wetin Jiova want bikɔs i bin fala Pɔl in advays fɔ mek i nɔ du bad tin dɛn, fɔ mek i tray tranga wan fɔ gɛt gud kwaliti dɛn, ɛn fɔ spɛnd tɛm wit in kɔmpin Kristian dɛn. (2 Tim. 2:​22) I bin nid fɔ tren insɛf fɔ du dat. Wi nid fɔ tren wisɛf fɔ mek wi nɔ du di bad tin dɛn we wi bɔdi want. (Rom. 7:​21-25) Apat frɔm dat, wi nid fɔ tren wisɛf fɔ mek wi go kɔntinyu fɔ lɛf wi ol abit dɛn so dat wi go gɛt nyu abit dɛn. (Ɛfi. 4:​22, 24) Afta we wi kin dɔn taya we wi dɔn du bɔku tin dɛn, wi kin nid fɔ fos wisɛf fɔ go mitin.—Ibru. 10:​24, 25.

12. Wetin wi go du fɔ mek wi sabi yuz di Baybul fayn fayn wan?

¹² Sojaman kin nid fɔ lan aw fɔ yuz di tin dɛn we i de yuz fɔ fɛt. I nid fɔ du dat ɔltɛm so dat i go sabi yuz dɛn fayn fayn wan. Semweso, wisɛf nid fɔ lan aw fɔ yuz Gɔd in Wɔd fayn fayn wan. (2 Tim. 2:​15) Wi kin lan sɔm we dɛn aw wi go du dat na wi mitin dɛn. Bɔt if wi want fɔ ɛp ɔda pipul dɛn fɔ no se di Baybul go ebul ɛp dɛn, wisɛf nid fɔ de stɔdi di Baybul ɔltɛm. Wi nid fɔ yuz Gɔd in Wɔd fɔ mek wi go gɛt strɔng fet. Dis min se wi nɔ fɔ jɔs rid di Baybul. Wi nid fɔ tink gud wan bɔt wetin wi de rid ɛn du risach na wi buk ɛn magazin dɛn so dat wi go ɔndastand di kɔrɛkt tin we di Baybul de tɔk ɛn du wetin wi de lan. (1 Tim. 4:​13-15) Da tɛm de, wi go ebul fɔ tich ɔda pipul dɛn Gɔd in Wɔd. Dɔn bak, dis min se wi nɔ fɔ jɔs rid di vas dɛn nɔmɔ na di Baybul. Wi want fɔ ɛp di wan dɛn we wi de stɔdi wit fɔ ɔndastand di vas ɛn no aw fɔ du di tin dɛn we di vas se. So we wi de stɔdi di Baybul ɔltɛm, wi go sabi aw fɔ yuz am fɔ tich pipul dɛn.—2 Tim. 3:​16, 17.

13. Akɔdin to Ibruz 5:​14, wetin mek wi fɔ no di difrɛns bitwin wetin rayt ɛn wetin rɔng?

¹³ No di difrɛns bitwin wetin rayt ɛn wetin rɔng. Sojaman nid fɔ mɛmba bifo tɛm se denja go kam ɛn avɔyd am. Wisɛf nid fɔ no di tin dɛn we go mek bad mit wi ɛn avɔyd dɛn. (Prɔv. 22:​3; rid Ibruz 5:​14.) Fɔ ɛgzampul, wi nid fɔ tek tɛm pik di tin dɛn we wi de yuz fɔ ɛnjɔy wisɛf. Bɔku tɛm, tɛlivishɔn sho ɛn fim dɛn kin sho we pipul dɛn de du mami ɛn dadi biznɛs di we aw Gɔd nɔ want. Bɔt Jiova nɔ lɛk we pipul dɛn de du dɛn kayn tin dɛn de, ɛn dɛn kin mek bad tin apin to di wan dɛn we de du am ɛn ɔda pipul dɛn. So wi nɔ de yuz tin dɛn fɔ ɛnjɔy wisɛf we go mek smɔl smɔl wi stɔp fɔ lɛk Gɔd.—Ɛfi. 5:​5, 6.

14. We Daniɛl bin kam fɔ no di difrɛns bitwin wetin rayt ɛn wetin rɔng, aw dat bin ɛp am?

¹⁴ Daniɛl we wi bin dɔn tɔk bɔt bin kam fɔ no se i bad fɔ ple vidio gem dɛn we gɛt fɛt-fɛt ɛn wich biznɛs. I bin luk fɔ buk ɛn magazin dɛn na di Watchtower Library we go ɛp am fɔ lɛf fɔ ple dɛn gem dɛn de. Aw dat bin ɛp am? I bin lɛf fɔ ple vidio gem dɛn we nɔ fayn. Ɛn i bin lɛf fɔ ple wit ɔda pipul dɛn we bin de ple dɛn kayn gem dɛn de. Daniɛl se: “Bifo a ple vidio gem dɛn, a bigin fɔ spɛnd tɛm wit mi padi dɛn na di kɔngrigeshɔn de ple gem dɛn we a nɔ nid fɔ sidɔm insay os fɔ ple.” Naw Daniɛl na payɔnia ɛn ɛlda.

15. Wetin mek i bad fɔ lisin to lay lay tɔk dɛn?

¹⁵ Lɛk Timoti, wisɛf fɔ mɛmba se i bad fɔ lisin to di lay lay tɔk dɛn we pipul dɛn we dɔn lɛf fɔ wɔship Jiova kin tɔk. (1 Tim. 4:​1, 7; 2 Tim. 2:​16) Fɔ ɛgzampul, sɔntɛm dɛn go tray fɔ skata lay lay tɔk dɛn bɔt wi brɔda dɛn ɔ mek wi bigin dawt Jiova in ɔganayzeshɔn. Dɛn kayn tɔk dɛn de kin mek wi nɔ kɔntinyu fɔ gɛt strɔng fet. Wi nɔ fɔ biliv dɛn lay lay tɔk dɛn de. Wetin mek? Bikɔs na “man dɛn we dɛn maynd dɔn kɔrɔpt, [ɛn] we nɔ no di trut,” kin skata dɛn kayn tɔk dɛn de. Dɛn kin du dis fɔ mek wi bigin “agyu . . . bɔt wɔd dɛn.” (1 Tim. 6:​4, 5) Dɛn want fɔ mek wi biliv dɛn lay lay tɔk dɛn ɛn stat fɔ dawt wi brɔda dɛn.

16. Wetin wi nɔ fɔ pe atɛnshɔn pan?

¹⁶ Pe atɛnshɔn pan di prichin wok. Bikɔs Timoti na “Krays Jizɔs in fayn sojaman,” i bin gɛt fɔ kɔntinyu fɔ pe atɛnshɔn pan di prichin wok ɛn nɔ alaw ɔda wok ɔ mɔni ɛn prɔpati fɔ pul in maynd pan di prichin wok. (2 Tim. 2:​3, 4) Lɛk Timoti, wisɛf nɔ fɔ alaw mɔni ɛn prɔpati fɔ mek wi nɔ pe atɛnshɔn pan di prichin wok. Bikɔs if wi alaw dat, “di ful we jɛntri kin ful pɔsin” go mek wi lɛf fɔ lɛk Jiova, wi nɔ go gladi fɔ in Wɔd, ɛn wi nɔ go want fɔ tɛl ɔda pipul dɛn bɔt am. (Mat. 13:​22) Wi fɔ liv simpul layf ɛn yuz wi tɛm ɛn trɛnk fɔ “kɔntinyu fɔ put di Kiŋdɔm . . . fɔs.”—Mat. 6:​22-25, 33.

17-18. Wetin wi go du fɔ protɛkt wi padi biznɛs wit Jiova?

¹⁷ Rɛdi fɔ du sɔntin kwik kwik wan. Sojaman nid fɔ plan wetin i go du fɔ protɛkt insɛf bifo denja kam. Fɔ lɛ wi protɛkt di tin dɛn we Jiova dɔn gi wi, wi nid fɔ du sɔntin kwik kwik wan we wi si denja de kam. Wetin go ɛp wi fɔ du dat? Na we wi plan wetin wi go du bifo bad tin apin.

¹⁸ Fɔ ɛgzampul, we wɔ kin de na kɔntri, sɔm pipul dɛn kin tink bɔt ples fɔ ayd ɔ say we dɛn go rɔn go sef wan. Wetin mek dɛn kin du dat? So dat dɛn go ebul fɔ rɔn ɛn ayd kwik wan if dɛn yɛri se di wɔ dɔn rich nia usay dɛn de. Semweso, wisɛf fɔ dɔn plan wetin wi go du if wi de yuz di Intanɛt, ɔ wi de wach fim ɔ tɛlivishɔn program ɛn dɛn bigin sho rud rud tin dɛn, fɛt-fɛt, ɔ tin dɛn we pipul dɛn we dɔn lɛf fɔ wɔship Jiova kin tɔk. If wi pripia wisɛf fɔ sɔntin we go apin, wi go ebul fɔ du sɔntin kwik kwik wan so dat wi go protɛkt wi padi biznɛs wit Jiova ɛn kɔntinyu fɔ bi klin pipul dɛn na in yay.—Sam 101:​3; 1 Tim. 4:​12.

19. Us blɛsin dɛn wi go gɛt if wi protɛkt di valyu tin dɛn we Jiova dɔn gi wi?

¹⁹ Wi fɔ protɛkt di valyu tin dɛn we Jiova dɔn gi wi, dat na di tru tin dɛn we de insay di Baybul, ɛn di big big ɔnɔ fɔ tich pipul dɛn bɔt dɛn tin dɛn de. If wi du dat, wi go gɛt klin kɔnshɛns, wi layf go gɛt tru tru minin, ɛn wi go gladi we wi ɛp ɔda pipul dɛn fɔ lan bɔt Jiova. Wit Jiova in ɛp, wi go ebul fɔ protɛkt di tin dɛn we i dɔn gi wi.—1 Tim. 6:​12, 19.