Jiova in Pipul dɛn “Fɔ Lɛf fɔ Du Dɛn Tin we Nɔ Rayt”

 1. Wetin na wan impɔtant tin na wi wɔship?

YU DƆN ɛva si Jiova in nem pan dɛn big bildin ɔ ɔdasay dɛn? Yu go mɔs dɔn gladi we yu si am bikɔs Gɔd in nem na impɔtant tin na wi wɔship ɛn wi na Jiova Witnɛs dɛn! No ɔda grup nɔ de na di wɔl tide we de yuz Gɔd in nem pas wi. Bɔt bikɔs wi gɛt di ɔnɔ fɔ bi Jiova in witnɛs, i min se wi fɔ avɔyd ɛnitin we go briŋ badnem pan am.

 2. As Jiova in witnɛs dɛn, wetin wi fɔ mek shɔ se wi du?

² I nɔ min se bikɔs wi de yuz Jiova in nem go mek i gladi fɔ wi. Bɔt wi fɔ mek shɔ se wi du di tin dɛn we i want wi fɔ du. Na dat mek di Baybul se Jiova in pipul dɛn fɔ “lɛf fɔ du bad ɔltogɛda.” (Sam 34:14) Di apɔsul Pɔl bin mek wi no dis klia wan we i rayt se: “Ɛnibɔdi we se in [de fɔ “Jiova,” NW] fɔ lɛf fɔ du dɛn tin we nɔ rayt.” (Rid Sɛkɛn Lɛta To Timoti 2:19.) As Jiova Witnɛs, bɔku pipul dɛn no se wi de yuz Jiova in nem. Bɔt aw wi go lɛf fɔ du dɛn tin we nɔ rayt?

3, 4. Us skripchɔ sɔm masta sabi bukman dɛn nɔ tu ɔndastand? Wetin mek dɛn nɔ tu ɔndastand am?

³ Insay Sɛkɛn Lɛta To Timoti 2:19, Pɔl bin tɔk bɔt “di traŋa fawndeshɔn we Gɔd dɔn mek” ɛn i se na tu tin bin rayt pan am. Di fɔs wan na, “[“Jiova,” NW] sabi di wan dɛn we nain yon.” Pɔl bin kot dis frɔm Di Nɔmba Dɛm 16:5. (Luk di fɔs atikul.) Di sɛkɔn wan se, “Ɛnibɔdi we se in [de fɔ “Jiova,” NW] fɔ lɛf fɔ du dɛn tin we nɔ rayt.” Sɔm masta sabi bukman dɛn we de stɔdi di Baybul nɔ tu ɔndastand wetin dis sɛkɔn wan min. Wetin mek?

⁴ Dɛn wɔd ya we Pɔl yuz de sho se i bin kot frɔm ɔdasay na di Baybul. Bɔt we yu wach frɔm Jɛnɛsis to Malakay, i tan lɛk se no vas nɔ de we fiba di wan we Pɔl kot. So, wetin di apɔsul Pɔl bin de tɔk bɔt we i se: “Ɛnibɔdi we se in [de fɔ “Jiova,” NW] fɔ lɛf fɔ du dɛn tin we nɔ rayt”? Jɔs bifo Pɔl tɔk dis, i bin dɔn kot frɔm Di Nɔmba Dɛm chapta 16, we tɔk bɔt di bad tin we Kora bin du. Fɔ se di sɛkɔn tin we i tɔk insɛf kɔmɔt frɔm Di Nɔmba Dɛm chapta 16, we tɔk bɔt wetin Kora bin du?

5-7. Wetin bin apin insay Mozis in tɛm we Pɔl tɔk bɔt na Sɛkɛn Lɛta To Timoti 2:19? (Luk di pikchɔ nia dis atikul in taytul.)

⁵ Di Baybul tɔk se Detan ɛn Abiram, we na Ilayab in pikin dɛn, bin jɔyn Kora fɔ de bifo fɔ tɔk bad bɔt Mozis ɛn Erɔn. (Nɔm. 16:1-5) Dɛn bin de mek ɔlman no se dɛn nɔ de rɛspɛkt Mozis, ɛn dɛn nɔ bin de gri fɔ lisin to Mozis we Gɔd bin dɔn put bifo fɔ lid dɛn. Kora, Detan, ɛn Abiram bin kɔntinyu fɔ de wit Jiova in pipul dɛn ɛn dis bin de ambɔg di wan dɛn we bin fetful to Jiova. We di tɛm rich fɔ lɛ Jiova sho di wan dɛn we bin de fɔ am ɛn di wan dɛn we nɔ de fɔ am, i bin tɛl Mozis wan simpul tin we i fɔ tɛl di pipul dɛn.

⁶ Jiova tɛl Mozis “fɔ tɛl di ɔda Izrɛlayt [dɛn] fɔ kɔmɔt nia di tɛnt dɛn we Kora, Detan ɛn Abiram tap. Mozis grap go to Detan ɛn Abiram ɛn di bigman dɛn na Izrɛl fala am. I tɛl di ɔda Izrɛlayt dɛn se mek dɛn muf kɔmɔt nia di tɛnt we dɛn bad man dɛn de tap. I se mek dɛn nɔ tɔch dɛn natin ɔ nɔ so dɛnsɛf go sɔfa fɔ di man dɛn sin dɛn. So ɔlman muf kɔmɔt nia Kora, Detan ɛn Abiram dɛn tɛnt dɛn.” (Nɔm. 16:23-27) Jiova bin kil ɔl di wan dɛn we nɔ bin gri fɔ lisin to Mozis. Bɔt i bin sev ɔl di wan dɛn we lisin to Mozis ɛn kɔmɔt nia Kora dɛn tɛnt dɛn.

⁷ Jiova de si wetin de na wi at! I no di wan dɛn we de fɔ am. Bɔt stil, di wan dɛn we de fɔ am, fɔ du sɔntin; dɛn nɔ fɔ de miks wit di wan dɛn we nɔ de du wetin rayt. So i go mɔs bi se Pɔl bin de kot frɔm Di Nɔmba Dɛm 16:5, 23-27 we i rayt se: “Ɛnibɔdi we se in [de fɔ “Jiova,” NW] fɔ lɛf fɔ du dɛn tin we nɔ rayt.” Dis gri wit wetin Pɔl bin tɔk we i se: “[“Jiova,” NW] sabi di wan dɛn we nain yon.”—2 Tim. 2:19.

 8. Apat frɔm we wi de yuz Jiova in nem ɛn we wi de na di kɔngrigeshɔn, us ɔda tin igen wi fɔ du?

⁸ We Pɔl bin de tɛl Timoti bɔt wetin bin apin insay Mozis in tɛm, i bin de mɛmba Timoti se i fɔ du sɔntin so dat natin nɔ go pwɛl in padi biznɛs wit Jiova. Jɔs lɛk aw di pipul dɛn na Mozis in tɛm nɔ bin jɔs de yuz Jiova in nem ɛn nɔ du natin, na so Kristian dɛn we bin de trade nɔ fɔ jɔs de na di kɔngrigeshɔn ɛn nɔ du natin. Di wan dɛn we biliv Jiova gud gud wan fɔ du sɔntin; dɛn nɔ fɔ miks wit di wan dɛn we de du tin dɛn we nɔ rayt. Wetin dis bin min fɔ Timoti? Us lɛsin Jiova in pipul dɛn tide kin lan frɔm di advays we Pɔl bin gi Timoti?

 9. Aw “fulish agyumɛnt” bin ambɔg di Kristian dɛn we bin de trade?

⁹ Gɔd in Wɔd, di Baybul, sho wi di kayn tin dɛn we nɔ fayn fɔ lɛ Kristian dɛn du. Fɔ ɛgzampul, insay Sɛkɛn Lɛta To Timoti chapta 2, Pɔl tɛl Timoti se mek i nɔ “fɛt fɔseka dɛn wɔd we nɔ min natin” ɛn mek i “nɔ lisin to dɛn fulish tɔk we nɔ gɛt natin fɔ du wit Gɔd.” (Rid Sɛkɛn Lɛta To Timoti 2:14, 16, 23.) Sɔm Kristian dɛn we bin de na di kɔngrigeshɔn bin de tich lay lay tin dɛn. Ɛn ɔda wan dɛn bin de we de tich tin dɛn we bin de mek sɔm Kristian dɛn bin de agyu wit dɛn kɔmpin dɛn. Pan ɔl we sɔm tin dɛn we dɛn bin de tich nɔ bin bad, stil, wetin dɛn bin de tich bin de mek wanwɔd nɔ de na di kɔngrigeshɔn. Ɛn dis bin de ambɔg di Kristian dɛn we bin de trade trade. So na dat mek Pɔl bin tɛl Timoti se lɛ i “nɔ miks pan dɛn fulish agyumɛnt we pipul we nɔ sabi natin de gɛt.”

10. Wetin wi fɔ du we wi yɛri lay lay tichin?

¹⁰ Insay wi yon tɛm tide, i nɔ izi so nɔmɔ fɔ lɛ wi gɛt pipul dɛn insay di kɔngrigeshɔn we de tich lay lay tin dɛn. Bɔt stil, we wi yɛri ɛni lay lay tichin, no mata usay i kɔmɔt, wi nɔ fɔ gri wit am atɔl. I nɔ mek sɛns fɔ lɛ wi agyu wit di wan dɛn we de tich lay lay tin dɛn ɛn wi nɔ fɔ ivin tɔk to dɛn na di Intanɛt ɔ ɛni ɔda we. Pan ɔl we na ɛp wi go want fɔ ɛp di pɔsin, wi nɔ fɔ stil tɔk wit am bikɔs if wi du dat, wi dɔn pwɛl Gɔd in lɔ. Jiova se wi nɔ fɔ gɛt ɛnitin fɔ du wit di wan dɛn we dɔn tɔn dɛn bak pan am ɛn bigin fɔ tich lay lay tin dɛn. Wi nɔ fɔ gri wit dɛn atɔl!

11. Wetin kin briŋ kam “fulish agyumɛnt”? Aw ɛlda dɛn go bi gud ɛgzampul?

¹¹ Apat frɔm dɛn lay lay tichin dɛn, ɔda tin dɛn de bak we kin mek wanwɔd nɔ de na di kɔngrigeshɔn. Fɔ ɛgzampul, wi ɔl kin gɛt difrɛn difrɛn we aw wi kin ɛnjɔy wisɛf. If wi tray fɔ fos ɔda pipul dɛn fɔ fala di we aw wi de ɛnjɔy wisɛf, dis kin kam wit “fulish agyumɛnt.” Bɔt if sɔmbɔdi na di kɔngrigeshɔn de ɛnjɔy insɛf di we aw Jiova nɔ want, di ɛlda dɛn nɔ fɔ alaw dat jɔs bikɔs dɛn nɔ want lɛ agyumɛnt de na di kɔngrigeshɔn. (Sam 11:5; Ɛfi. 5:3-5) Bɔt stil, ɛlda dɛn fɔ tek tɛm mek dɛn nɔ fos di brɔda dɛn fɔ du wetin dɛn want. Bifo dat, dɛn fɔ fala di advays dɛn we Gɔd gi dɛn na di Baybul. Wan pan dɛn advays ya se: “Una fɔ kia fɔ dɛn pipul we Gɔd lɛf na una an lɛkɛ shɛpad we de mɛn ship. . . . Una nɔ fɔ de trit dɛn pipul ya we Gɔd gi una fɔ kia fɔ, lɛkɛ slev, bɔt una fɔ de du gud we go mek di pipul dɛnsɛf want fɔ tan lɛkɛ una.”—1 Pit. 5:2, 3; rid Sɛkɛn Lɛta Fɔ Kɔrint 1:24.

12, 13. (a) Aw Jiova Witnɛs dɛn kin disayd di kayn we we dɛn fɔ ɛnjɔy dɛnsɛf? Us advays dɛn na di Baybul kin ɛp dɛn fɔ disayd fɔ du di rayt tin? (b) Aw di advays dɛn we wi dɔn tɔk bɔt na paregraf 12 go ɛp wi we i kam pan difrɛn difrɛn tin dɛn?

¹² We i kam pan di we aw wi fɔ ɛnjɔy wisɛf, wi ɔganayzeshɔn nɔ de tɛl wi us patikyula fim, vidio gem, buk, ɔ myuzik we wi fɔ avɔyd. Wetin mek? Na bikɔs di Baybul ɛnkɔrej ɔlman fɔ “lan aw fɔ no wetin gud ɛn bad.” (Ibru 5:14) Di Baybul gɛt plɛnti advays dɛn we go ɛp Kristian dɛn fɔ no uskayn we dɛn fɔ ɛnjɔy dɛnsɛf. We i kam pan di we aw wi de ɛnjɔy wisɛf, wi fɔ mek shɔ se wi “tray fɔ lan wetin di Masta want.” (Ɛfi. 5:10) Di Baybul se na papa dɛn de oba dɛn famili, so dɛn gɛt di rayt fɔ disayd uskayn we dɛn famili fɔ ɛnjɔy dɛnsɛf.a—1 Kɔr. 11:3; Ɛfi. 6:1-4.

¹³ Di Baybul in advays dɛn we wi jɔs dɔn tɔk bɔt nɔ de nɔmɔ fɔ ɛp wi fɔ no aw wi fɔ ɛnjɔy wisɛf bɔt dɛn kin ɛp wi fɔ disayd we i kam pan ɔda tin dɛn bak. Fɔ ɛgzampul, wi ɔl gɛt difrɛn we aw wi de drɛs, aw wi de kia fɔ wi wɛlbɔdi biznɛs, di kayn tin dɛn we wi de it, ɛn wi ɔl gɛt difrɛn we aw wi de tink bɔt ɔda tin dɛn. Sɔm pipul dɛn go want fɔ fos ɔda pipul dɛn fɔ lɛk di tin dɛn we dɛn lɛk ɛn dis kin briŋ kam cham-mɔt na di kɔngrigeshɔn. Bɔt if nɔbɔdi nɔ pwɛl Gɔd in lɔ, no nid nɔ de fɔ agyu bɔt wetin pɔsin fɔ du ɔ wetin i nɔ fɔ du, bikɔs “pɔsin we de du Gɔd wok nɔ fɔ mek plaba, i fɔ gud to ɔlman.”—2 Tim. 2:24.

14. Us ɛgzampul Pɔl bin yuz fɔ ɛp Kristian dɛn fɔ avɔyd bad padi?

¹⁴ Us ɔda we Jiova in pipul dɛn go avɔyd fɔ “du dɛn tin we nɔ rayt”? Na we wi nɔ mek padi biznɛs wit di wan dɛn we nɔ de du wetin Gɔd want. Afta Pɔl bin dɔn tɔk bɔt “di traŋa fawndeshɔn we Gɔd dɔn mek,” i yuz wan ɔda ɛgzampul. I bin rayt se “insay jɛntri man os yu kin gɛt ɔl kayn plet ɛn pan: silva wan dɛn, gold wan dɛn, sɔm we dɛn tek bod mek, sɔm we dɛn tek kle mek; sɔm na fɔ yus wan tɛm nɔmɔ fɔ big biznɛs, sɔm na fɔ yus ɛvri de.” (2 Tim. 2:20, 21) Afta Pɔl dɔn tɔk dis, i bin ɛnkɔrej Kristian dɛn fɔ “lɛf fɔ du ɔl kayn bad tin” ɛn dɛn nɔ fɔ miks wit di wan dɛn we nɔ de du wetin Gɔd want.

15, 16. Wetin wi lan frɔm di ɛgzampul we Pɔl gi bɔt da “jɛntri man os”?

¹⁵ Wetin Pɔl bin min we i yuz dis ɛgzampul? We Pɔl bin yuz dis ɛgzampul, i bin de kɔmpia di kɔngrigeshɔn to “jɛntri man os” ɛn di wan dɛn we de na di kɔngrigeshɔn to “plet ɛn pan.” Sɔm plet ɛn pan dɛn we dɛn kin yuz na os kin so dɔti dat dɛn nɔ kin miks dɛn wit di klin wan dɛn we dɛn kin yuz fɔ kuk.

¹⁶ Semweso, Jiova in pipul dɛn we de tray fɔ liv klin layf nɔ fɔ mek padi biznɛs wit ɛnibɔdi na di kɔngrigeshɔn we nɔ de gri fɔ fala di advays dɛn we Jiova de gi. (Rid Fɔs Lɛta Fɔ Kɔrint 15:33.) If wi fɔ avɔyd bad padi dɛn insay di kɔngrigeshɔn, yu nɔ tink se wi nɔ fɔ “miks” atɔl wit di wan dɛn we nɔ de insay di kɔngrigeshɔn, we plɛnti pan dɛn ‘want ɔltin fɔ dɛnsɛf, we nɔ de yɛri dɛn mami ɛn dadi wɔd, we nɔ lɛk Gɔd biznɛs, we de tɔk bad bɔt pipul dɛn, we kin wayl if pɔsin ambɔg dɛn, we nɔ lɛk ɛnitin we gud, we dɛn nɔto pipul we ɛnibɔdi go abop pan, we lɛk fɔ ɛnjɔy dɛnsɛf pas aw dɛn lɛk Gɔd’?—2 Tim. 3:1-5.

17. Aw sɔm Izrɛlayt dɛn we bin de fɔ Jiova bin sho se dɛn nɔ bin de sɔpɔt di bad tin dɛn we di ɔda wan dɛn bin de du?

¹⁷ Di Baybul tɛl wi wetin di Izrɛlayt dɛn bin du we dɛn bin tɛl dɛn fɔ kɔmɔt nia Kora, Detan, ɛn Abiram dɛn tɛnt dɛn. Di Baybul se dɛn kɔmɔt de “wantɛm wantɛm.” (Nɔm. 16:24, 27, NW) Dɛn nɔ bin westɛm atɔl fɔ kɔmɔt nia dɛn bad man dɛn de ɔ bigin mek lɛk se dɛn nɔ no wetin fɔ du. Di Baybul tɔk bak se di wan dɛn we bin de fɔ Jiova bin du ɔl wetin Mozis bin tɛl dɛn. Dɛn nɔ bin want fɔ put dɛn layf pan denja. So dɛn bin obe Jiova wit ɔl dɛn at. Dɛn bin tinap tranga wan fɔ Jiova bɔt dɛn nɔ bin sɔpɔt di bad tin dɛn we di ɔda wan dɛn bin de du. Wetin na di lɛsin we wi lan frɔm dis ɛgzampul?

18. Wetin Pɔl bin min we i tɛl Timoti se i nɔ fɔ “du dɛn tin we dɛn yɔŋ pipul dɛn at kin gi dɛn fɔ du”?

¹⁸ Fɔ lɛ wi ɛnjɔy wi padi biznɛs wit Jiova, wi fɔ tinap tranga wan ɛn du sɔntin wantɛm wantɛm so dat wi padi biznɛs wit am nɔ go pwɛl. We Pɔl bin de rayt to Timoti, i bin advays am se i nɔ fɔ “du dɛn tin we dɛn yɔŋ pipul dɛn at kin gi dɛn fɔ du.” (Na wi mek am italiks; 2 Tim. 2:22) Di tɛm we Pɔl bin gi Timoti dis advays, i go bi se Timoti bin dɔn pas 30 ia, we min se in na bin big man naw. Dis de tɛl wi se ivin we pɔsin dɔn big, i kin stil du dɛn fulish “tin we dɛn yɔŋ pipul dɛn at kin gi dɛn fɔ du.” So Pɔl bin de ɛp Timoti fɔ no se if in at tɛl am fɔ du bad tin i “nɔ” fɔ du am atɔl. Dis min se Timoti nɔ fɔ “du dɛn tin we nɔ rayt.” Jizɔs insɛf bin tɔk sɔntin lɛk dis we i se: “If yu yay mek yu sin, pul am kɔmɔt ɛn trowe am.” (Mat. 18:9) Tide, Kristian dɛn we nɔ want mek dɛn padi biznɛs wit Jiova pwɛl fɔ tinap tranga wan ɛn fala dis advays wantɛm wantɛm we bad tin kam dɛn we.

19. Wetin sɔm brɔda dɛn dɔn du fɔ mek dɛn nɔ pwɛl dɛn padi biznɛs wit Jiova?

¹⁹ Sɔm pipul dɛn we bin de drink rɔm pasmak ɔ we bin de drink te dɛn chak bifo dɛn kam bi Jiova Witnɛs dɔn disayd se dɛn nɔ go drink rɔm igen. Ɔda wan dɛn de we dɔn lɛf di we aw dɛn bin de ɛnjɔy dɛnsɛf. Pan ɔl we di we aw dɛn bin de ɛnjɔy dɛnsɛf nɔ bad, dɛn stil dɔn disayd fɔ avɔyd dɛn bikɔs dat kin mek dɛn bigin fil fɔ du bad tin. (Sam 101:3) Fɔ ɛgzampul, bifo wan brɔda bi Jiova Witnɛs, i bin lɛk fɔ go dɛn pati dɛn usay pipul dɛn bin de dans ɛn biev rud rud we. Bɔt afta i dɔn lan bɔt Jiova, i bin lɛf fɔ dans, ivin we i kin go dɛn pati dɛn we Jiova Witnɛs dɛn kin mek, i nɔ kin dans. I de fred se if i dans, i go bigin tink bɔt di bad we aw i bin de ɛnjɔy insɛf trade. Dis nɔ min se Kristian dɛn nɔ fɔ drink rɔm, dans, ɔ du ɔda tin dɛn we nɔ bad atɔl. Bɔt wi ɔl fɔ tek tɛm lɛ wi nɔ du sɔntin we go pwɛl wi padi biznɛs wit Jiova.

20. Pan ɔl we i nɔ izi “fɔ lɛf fɔ du dɛn tin we nɔ rayt,” wetin wi fɔ mɛmba?

²⁰ Na big big ɔnɔ wi gɛt fɔ bi Jiova in witnɛs. Dis min se wi “fɔ lɛf fɔ du dɛn tin we nɔ rayt” ɛn wi “fɔ lɛf fɔ du bad ɔltogɛda.” (Sam 34:14) Na tru se, i nɔ izi fɔ du wetin Gɔd want ɔltɛm. Bɔt wi fɔ mɛmba se Jiova lɛk “di wan dɛn we nain yon” ɛn we de du wetin i want.—2 Tim. 2:19; rid Sɛkɛn Kronikul 16:9a.