Wetin Go Ɛp Yu fɔ Kɔntinyu fɔ Stɔdi di Baybul?

Yu go bɛnifit we yu stɔdi di Baybul. Bɔt i nɔ kin izi ɔltɛm fɔ stɔdi di Baybul. Sɔntɛnde yu go de wɔnda if yu go ebul fɔ kɔntinyu fɔ stɔdi di Baybul. Bɔt wetin mek i impɔtant fɔ mek yu kɔntinyu fɔ stɔdi? Wetin go ɛp yu fɔ mek yu kɔntinyu fɔ stɔdi ilɛk yu gɛt tin dɛn we de ambɔg yu?

1. Wetin mek i impɔtant fɔ mek yu stɔdi di Baybul?

“Gɔd in wɔd de alayv ɛn i gɛt pawa.” (Ibruz 4:​12) Di Baybul impɔtant bikɔs i de sho yu aw Gɔd de tink ɛn fil bɔt yu. I go ɛp yu fɔ gɛt tru tru sɛns ɛn gi yu op. Bɔt di tin we impɔtant pas ɔl na dat di Baybul go ɛp yu fɔ bi Jiova in padi. We yu stɔdi di Baybul, dat go mek yu alaw di pawa we di Baybul gɛt fɔ mek yu layf bɛtɛ.

2. Wetin mek i impɔtant fɔ mek yu no di valyu we di Baybul gɛt?

Di tru tin dɛn we de na di Baybul tan lɛk tin dɛn we rili valyu. Na dat mek di Baybul ɛnkɔrej wi se “spɛnd fɔ lɛ yu no di tru ɛn we yu gɛt am, nɔ mek . . . te yu lɔs am.” (Prɔvabs 23:​23) We wi kɔntinyu fɔ tink bɔt di valyu we di tru tin dɛn na di Baybul gɛt, dat go mek wi wok tranga wan fɔ kɔntinyu fɔ stɔdi ilɛk wi gɛt tin dɛn we de ambɔg wi.​—Rid Prɔvabs 2:​4, 5.

3. Aw Jiova go ɛp yu fɔ mek yu kɔntinyu fɔ stɔdi?

Jiova we na di Ɔlmayti, di Wan we mek ɔltin, ɛn we na yu Padi, want fɔ ɛp yu fɔ lan bɔt am. I go gi yu “trɛnk,” ɛn “mek [yu] want fɔ du sɔntin.” (Rid Filipians 2:​13.) If sɔntɛnde yu nid mɔ ɛp fɔ stɔdi ɔ fɔ du wetin yu de lan, i go ɛp yu. I go ɛp yu bak we yu gɛt tin dɛn we de mɔna yu ɔ we pipul dɛn de tray fɔ stɔp yu fɔ mek yu nɔ stɔdi. Go de pre to Jiova ɔltɛm fɔ mek i ɛp yu fɔ kɔntinyu fɔ stɔdi di Baybul.​—1 Tɛsalonians 5:​17.

LAN MƆ

4. Mek shɔ se yu Baybul stɔdi rili impɔtant to yu

Sɔntɛnde, wi kin fil se wi so bizi dat wi nɔ gɛt bɛtɛ tɛm fɔ stɔdi di Baybul. Wetin go ɛp wi? Rid Filipians 1:​10, dɔn una tɔk bɔt dɛn kwɛstyɔn dɛn ya:

• Wetin yu tink se na sɔm pan “di tin dɛn we rili impɔtant” na layf?

• Wetin yu go du fɔ mek yu tek yu Baybul stɔdi as sɔntin we rili impɔtant?

1. If yu ful-ɔp wan kɔp wit sansan ɛn tray fɔ ad ston dɛn pan am, di ston dɛn nɔ go du insay de

2. If yu put di ston dɛn fɔs, yu go gɛt mɔ spes fɔ ad di sansan. Semweso, if yu put “di tin dɛn we rili impɔtant” fɔs na yu layf, yu go ebul fɔ du dɛn tin dɛn de ɛn stil gɛt tɛm fɔ du ɔda tin dɛn

We wi de stɔdi di Baybul, dat go mek wi gladi fɔ no bɔt Gɔd ɛn wɔship am. Rid Matyu 5:​3, dɔn una tɔk bɔt dis kwɛstyɔn:

• Aw wi go bɛnifit we wi tek wi Baybul stɔdi as sɔntin we rili impɔtant?

5. Kɔntinyu fɔ de stɔdi ilɛk ɔda pipul dɛn de tray fɔ stɔp yu

VIDIO: I Bin Gɛt Bɛnifit We I Kɔntinyu fɔ Stɔdi di Baybul (5:​22)

• Insay di vidio, aw Fransɛsko in padi ɛn fambul dɛn bin biev we i tɛl dɛn wetin i de lan?

• We i kɔntinyu fɔ stɔdi di Baybul, aw dat bin bɛnifit am?

Rid 2 Timoti 2:​24, 25, dɔn una tɔk bɔt dɛn kwɛstyɔn dɛn ya:

• Wetin yu fambul ɛn padi dɛn tink bɔt wetin yu de lan?

• Akɔdin to dɛn vas dɛn ya, wetin yu fɔ du if pɔsin nɔ gladi bikɔs yu de stɔdi di Baybul? Wetin mek yu fɔ du dat?

6. Abop pan Jiova fɔ mek i ɛp yu

VIDIO: Jiova Go Ɛp Yu fɔ Mek Chenj dɛn na Yu Layf (3:​56)

• Insay di vidio, us chenj dɛn Jim bin nid fɔ mek fɔ lɛ Jiova gladi?

• Wetin yu rili lɛk bɔt in ɛgzampul?

Rid Ibruz 11:​6, dɔn una tɔk bɔt dɛn kwɛstyɔn dɛn ya:

• Wetin Jiova go du fɔ di wan dɛn we de “luk fɔ am wit ɔl dɛn at,” dat na di wan dɛn we de tray tranga wan fɔ no am ɛn du wetin i lɛk?

• Wetin dis tɛl yu bɔt aw Jiova de fil we i si se yu de mek ɛfɔt fɔ stɔdi di Baybul?

WETIN YU DƆN LAN?

Yu go ɛnjɔy layf we go de sote go we yu stɔdi di Baybul, pan ɔl we i nɔ kin izi fɔ du dat. Kɔntinyu fɔ abop pan Jiova, ɛn i go blɛs yu.

Rivyu

• Wetin mek yu valyu di tru tin dɛn we de na di Baybul?

• Aw yu go “mek shɔ ɔf di tin dɛn we rili impɔtant”?

• Wetin mek yu fɔ pre to Jiova fɔ mek i ɛp yu fɔ mek yu kɔntinyu fɔ stɔdi di Baybul?

DU MƆ RISACH

Lan bɔt 4 tin dɛn we dɔn ɛp bɔku pipul dɛn fɔ yuz dɛn tɛm di rayt we.

“Aw Yu Go Yuz Yu Tɛm di Rayt We?” (Awek!, Fɛbwari 2014)

Notis aw Jiova bin ɛp wan uman we in man nɔ bin de ɔndastand wetin i bin de du fɔ mek Jiova gladi.

Jiova De Gi Wi Trɛnk fɔ Bia wit Wi Prɔblɛm (5:​05)

Lan bɔt aw wan man bin bɛnifit we in wɛf bin kɔntinyu fɔ stɔdi di Baybul.

A Bin Tɛst di Trut (6:​30)

Bɔku tɛm, pipul dɛn kin tɔk se Jiova Witnɛs dɛn kin skata famili. Bɔt yu tink se dat na tru?

“Jiova Witnɛs dɛn De Skata Famili ɔ Dɛn De Ɛp Dɛn fɔ Gɛt Wanwɔd?” (Atikul na di wɛbsayt)