Aw Wi Go Put Jiova Fɔs ɛn Put Wetin Ɔda Pipul dɛn Want Bifo Wetin Wi Want?

 1. Aw Jizɔs bin sho se i nɔ bin de du wetin in want nɔmɔ?

WE JIZƆS bin de na di wɔl, i nɔ bin de du wetin in want nɔmɔ. Dis na fayn ɛgzampul fɔ wi. Jizɔs bin put wetin i want na kɔna so dat i go du wetin Gɔd want. (Jɔn 5:30) Jizɔs bin sho dat bay we i kɔntinyu fɔ bi fetful to Gɔd te i day. Dis day we Jizɔs day sho bak se i bin rɛdi fɔ du ɛnitin fɔ ɔda pipul dɛn.—Fil. 2:8.

 2. Wetin go ɛp wi fɔ mek wi nɔ de du wetin wi want nɔmɔ? Wetin mek i fayn fɔ du dat?

² Bikɔs wi de fala Jizɔs in ɛgzampul, wi nɔ fɔ de du wetin wi want nɔmɔ; wi fɔ de du wetin ɔda pipul dɛn want. Wetin i min fɔ lɛ pɔsin nɔ de du wetin i want nɔmɔ? I min se di pɔsin fɔ rɛdi fɔ lɛf fɔ du wetin in want, so dat i go ɛp ɔda pipul dɛn. Dis pɔsin difrɛn frɔm sɔmbɔdi we bisin bɔt insɛf nɔmɔ. (Rid Matyu 16:24.) If wi nɔ de du wetin wi want nɔmɔ, dat go ɛp wi fɔ put di we aw ɔda pipul dɛn de fil ɛn wetin dɛn want bifo wetin wi want. (Fil. 2:3, 4) Infakt, Jizɔs bin se dis na impɔtant tin we gɛt sɔntin fɔ du wit wi wɔship to Gɔd. Aw wi no dat? Wɛl, Jizɔs bin se we Kristian dɛn lɛk dɛn kɔmpin, ɔlman go no se dɛn na in disaypul dɛn. Ɛn we wi lɛk wi kɔmpin Kristian dɛn, dat go mek wi want fɔ du wetin dɛn want. (Jɔn 13:34, 35) Jɔs tink bɔt di blɛsin dɛn we wi de ɛnjɔy bikɔs wi de insay dis famili we gɛt brɔda ɛn sista dɛn we rɛdi fɔ du wetin dɛn kɔmpin want!

 3. Wetin de tray fɔ mek wi du wetin wi want nɔmɔ?

³ Wan ɛnimi de we de tray smɔl smɔl fɔ mek wi du wetin wi want nɔmɔ. Da ɛnimi de na sɔntin we de insay wi, we de mek wi jɔs bisin bɔt wisɛf nɔmɔ. Tink bɔt aw Adam ɛn Iv bin sho se na dɛnsɛf nɔmɔ dɛn bisin bɔt. Iv bin du wetin i want so dat i go tan lɛk Gɔd, ɛn in man insɛf bin du wetin i want so dat in wɛf go gladi. (Jɛn. 3:5, 6) Afta Setan mek Adam ɛn Iv tɔn dɛn bak pan Gɔd, i kɔntinyu fɔ mek ɔda pipul dɛn du wetin dɛn want nɔmɔ. I bin ivin tray fɔ du dat to Jizɔs. (Mat. 4:1-9) Tide, Setan dɔn ebul fɔ ful bɔku pipul dɛn. I dɔn mek dɛn de du plɛnti tin dɛn we de sho se dɛn nɔ bisin bɔt ɔda pipul dɛn; dɛn jɔs de du wetin dɛn want. I fayn mek wi tink bɔt dis bikɔs if wi nɔ tek tɛm, dat go bigin apin to wi.—Ɛfi. 2:2.

 4. (a) Wi go ebul lɛf fɔ bisin bɔt wisɛf nɔmɔ rayt rayt naw? Ɛksplen. (b) Us kwɛstyɔn dɛn wi de kam tɔk bɔt?

⁴ We pɔsin kin bisin bɔt insɛf nɔmɔ, i kin mek i tan lɛk we ayɛn dɔn rɔsti. If ayɛn kɔntinyu fɔ de na say we opin ɛn wata de mit am, dat go mek smɔl smɔl i bigin fɔ rɔsti. I nɔ go fayn fɔ mek wi lɛf di ayɛn fɔ kɔntinyu fɔ rɔsti, bikɔs dat go mek di ayɛn pwɛl. Semweso, wi nɔ go ebul lɛf fɔ sin rayt rayt naw, ɛn wi nɔ go ebul fɔ lɛf fɔ de bisin bɔt wisɛf nɔmɔ. Bɔt wi fɔ kɔntinyu fɔ tray tranga wan so dat dɛn tin ya nɔ go ebul wi. (1 Kɔr. 9:26, 27) Aw wi go ebul no se na wisɛf nɔmɔ wi bisin bɔt? Ɛn aw wi go ebul sho se wi bisin bɔt ɔda pipul dɛn?

 5. (a) Aw di Baybul tan lɛk lukin-glas? (Luk di pikchɔ nia dis atikul in taytul.) (b) We wi de chɛk wisɛf fɔ no if wi jɔs bisin bɔt wisɛf nɔmɔ, wetin wi nɔ fɔ du?

⁵ Wi kin yuz di Baybul fɔ chɛk aw wi de fil insay wi at ɛn fɔ kɔrɛkt ɛni prɔblɛm we wi go si, jɔs lɛk aw wi kin yuz lukin-glas. (Rid Jems 1:22-25.) Lukin-glas go ebul ɛp wi, if wi yuz am fayn. Fɔ ɛgzampul, if wi jɔs luk kwik wan na di lukin-glas, wi nɔ go ebul fɔ si ɛni prɔblɛm we de pan wi klos ɔ bɔdi. Ɔ if wi nɔ tinap bifo di lukin-glas, na ɔda pɔsin wi go si. Semweso, fɔ mek wi go ebul yuz di Baybul fɔ chɛk if wi jɔs bisin bɔt wisɛf nɔmɔ, wi nɔ fɔ jɔs de rid am kwik kwik wan ɔ yuz am fɔ si ɔda pɔsin in prɔblɛm.

 6. Aw wi go kɔntinyu fɔ ‘du wetin Gɔd in Wɔd se’?

⁶ Fɔ ɛgzampul, wi go de rid Gɔd in Wɔd ɛvride, ɛn stil nɔ ebul fɔ si se wi jɔs bisin bɔt wisɛf nɔmɔ. Aw dat kin bi? Tink bɔt dis: We Jems bin de tɔk bɔt pɔsin we de luk insɛf na glas, i nɔ se di prɔblɛm na we di pɔsin nɔ tek tɛm fɔ luk insɛf fayn. I rayt se di pɔsin “luk insɛf.” Insay dis vas, Jems yuz wan wɔd insay Grik we min fɔ chɛk sɔntin fayn fayn wan fɔ si if natin nɔ rɔng wit am. So wetin na di prɔblɛm we Jems tɔk bɔt naya? I kɔntinyu fɔ se: “Wɛn i dɔn luk insɛf na di glas, i go in we ɛn fɔgɛt aw i tan wantɛm.” Di pɔsin kɔmɔt bifo di glas ɛn nɔ du natin bɔt wetin i si. Bɔt di pɔsin we de rid Gɔd in Wɔd ɛn we gɛt sɛns nɔ fɔ jɔs “lisin am nɔmɔ ɛn fɔgɛt,” bɔt i fɔ “du wetin i se.” Dis kayn pɔsin nɔ de fɔgɛt Gɔd in Wɔd, bɔt i de kɔntinyu fɔ du wetin i se. Jizɔs bin tɔk sɔntin we fiba di tin we Jems tɔk. I bin se: “If una de du ɔl wetin a tɛl una fɔ du, una na mi lanin bɔy dɛn fɔ tru.”—Jɔn 8:31.

 7. Aw wi go yuz di Baybul fɔ chɛk if wi jɔs bisin bɔt wisɛf nɔmɔ?

⁷ So fɔ mek yu nɔ jɔs bisin bɔt yusɛf nɔmɔ, na fɔ tek tɛm rid Gɔd in Wɔd. Dat go ɛp yu fɔ si di prɔblɛm we yu nid fɔ kɔrɛkt. Bɔt nɔto fɔ jɔs rid am nɔmɔ ɛn stɔp de. Yu fɔ tray fɔ de rid ɔda buk dɛn so dat yu go no mɔ. We yu rid sɔntin na di Baybul, mek lɛk se na yu di tin de apin to. Aks yusɛf dɛn kwɛstyɔn ya: ‘If na bin mi dis kayn tin apin to, wetin a bin fɔ du? A bin fɔ ebul fɔ du di rayt tin?’ Di tin we impɔtant pas ɔl na dat, afta yu dɔn tink gud wan bɔt wetin yu dɔn rid, na fɔ tray fɔ du am. (Mat. 7:24, 25) Lɛ wi si aw Kiŋ Sɔl ɛn di apɔsul Pita dɛn ɛgzampul go ɛp wi fɔ put wetin ɔda pipul dɛn want bifo wetin wi want.

 8. Uskayn pɔsin Sɔl bin bi we i jɔs bi kiŋ? Aw wi no dat?

⁸ Kiŋ Sɔl in bad ɛgzampul de sho wi se if wi jɔs bisin bɔt wisɛf nɔmɔ, wi nɔ go ebul fɔ put wetin ɔda pipul dɛn want bifo wetin wi want. We Sɔl bin jɔs bi kiŋ, i bin ɔmbul ɛn i bin no se nɔto ɔltin i go ebul fɔ du. (1 Sam. 9:21) I nɔ bin gri fɔ pɔnish di Izrɛlayt dɛn we bin tɔk bad bɔt am we dɛn mek am kiŋ, pan ɔl we i bin gɛt rayt fɔ du dat. (1 Sam. 10:27) Kiŋ Sɔl bin de du wetin Gɔd in spirit tɛl am fɔ du, ɛn dat bin ɛp am fɔ win di Amɔnayt dɛn. We di pipul dɛn bin de prez am fɔ we i win di fɛt, i bin put insɛf dɔŋ ɛn tɛl dɛn se na Jiova ɛp am fɔ win.—1 Sam. 11:6, 11-13.

 9. Aw Sɔl bin bigin fɔ bisin bɔt insɛf nɔmɔ?

⁹ Leta, Sɔl bigin fɔ bisin bɔt insɛf nɔmɔ ɛn smɔl smɔl i bigin de fil prawd, jɔs lɛk aw ayɛn kin bigin rɔsti. Afta i bin fɛt ɛn win di Amalakayt dɛn, i lɛf wetin Jiova tɛl am ɛn du wetin in want fɔ du. Gɔd bin tɛl am fɔ pwɛl ɔl wetin di Amalakayt dɛn bin gɛt. Bɔt Sɔl nɔ bin du dat; i bin kip sɔm pan di tin dɛn. Sɔl bin so prawd dat i bil sɔntin we go mek pipul dɛn mɛmba am. (1 Sam. 15:3, 9, 12) We di prɔfɛt Samiɛl tɛl Sɔl se Jiova nɔ gladi wit am, Sɔl bin tray fɔ mek lɛk se wetin i du nɔto bad tin. Aw i du dis? Na bay we i tɔk se i dɔn du wetin Jiova tɛl am ɛn ivin blem ɔda pipul dɛn fɔ wetin i dɔn du. (1 Sam. 15:16-21) Bikɔs Sɔl bin prawd, i bin de tink mɔ bɔt aw ɔda pipul dɛn go si am pas di we aw Gɔd go si am. (1 Sam. 15:30) Aw Sɔl in bad ɛgzampul sho wi se wi fɔ put wetin ɔda pipul dɛn want bifo wetin wi want?

10, 11. (a) Wetin wi lan frɔm Sɔl in stori we go ɛp wi fɔ put wetin ɔda pipul dɛn want bifo wetin wi want? (b) Wetin wi fɔ du fɔ mek wi nɔ falamakata Sɔl in bad ɛgzampul?

¹⁰ Fɔs, Sɔl in stori sho wi se wi nɔ fɔ biliv wisɛf tumɔs. If wi bin dɔn de put wetin ɔda pipul dɛn want bifo wetin wi want, wi fɔ kɔntinyu fɔ du dat, wi nɔ fɔ stɔp. (1 Tim. 4:10) Mɛmba se Sɔl bin bigin fayn. I bin de du wetin Gɔd want, ɛn i bin de ɛnjɔy Gɔd in blɛsin. Bɔt leta, i bigin bisin bɔt insɛf nɔmɔ, ɛn i nɔ tray fɔ pul da abit de pan insɛf. So Jiova pul an pan Sɔl, bikɔs Sɔl nɔ bin de du wetin i tɛl am.

¹¹ Sɛkɔn, wi nɔ fɔ jɔs de tink bɔt di say dɛn na wi layf we wi de du wɛl, ɛn lɛf di say dɛn we wi nɔ de du wɛl. Dat go jɔs tan lɛk se wi de yuz lukin-glas fɔ kɔle wi nyu klos we wi wɛr, bɔt nɔ ebul fɔ si di dɔti we de na wi fes. Bɔt ilɛksɛf wi nɔ prawd ɔ biliv wisɛf tumɔs lɛk Sɔl, wi fɔ avɔyd ɛnitin we go mek wi falamakata Sɔl in bad ɛgzampul. We dɛn de advays wi, lɛ wi nɔ bigin agyu, ɔ tray fɔ sho se di tin we wi du nɔ bad bɛtɛ, ɔ ivin blem ɔda pipul dɛn. Bifo dat, i go fayn mek wi lisin to di advays we dɛn de gi wi.—Rid Sam 141:5.

12. If wi na pɔsin we nɔ de du wetin wi want nɔmɔ, aw dat go ɛp wi if wi du sɔntin we rili bad na Jiova in yay?

¹² Wetin wi fɔ du if wi du sɔntin we rili bad na Jiova in yay? Sɔl nɔ bin want fɔ shem pan di pipul dɛn, so dis bin mek i nɔ beg Jiova fɔ lɛ i fɔgiv am. Bɔt if wi na pɔsin we nɔ de du wetin wi want nɔmɔ, dat go ɛp wi fɔ du di rayt tin pan ɔl we dat go mek wi shem. (Prɔv. 28:13; Jems 5:14-16) Fɔ ɛgzampul, wan brɔda bin bigin fɔ wach dɛn rud rud pikchɔ dɛn we i bin ol 12 ia. Ɛn i kɔntinyu fɔ du dat fɔ lɛk tɛn ia so, bɔt nɔbɔdi nɔ bin no se i de wach dɛn kayn tin dɛn de. Di brɔda se: “I nɔ bin rili izi fɔ mek a tɛl mi wɛf ɛn di ɛlda dɛn bɔt wetin a bin de du. Bɔt naw we a dɔn tɛl dɛn, i tan lɛk se na big big lod dɔn kɔmɔt na mi ed. Sɔm pan mi padi dɛn nɔ bin gladi we di ɛlda dɛn stɔp mi fɔ bi ministerial savant, dɛn fil se a dɔn mek dɛn shem. Bɔt a no se Jiova gladi wit wetin a de du naw pas wetin a bin de du we a bin de wach dɛn rud rud pikchɔ dɛn, ɛn na di we aw Jiova de si mi na in rili impɔtant.”

13, 14. Aw Pita bin sho se na insɛf nɔmɔ i bisin bɔt?

¹³ Di apɔsul Pita bin sho se in na pɔsin we nɔ bisin bɔt insɛf nɔmɔ di tɛm we Jizɔs bin de tren am. (Lyuk 5:3-11) Bɔt i bin stil gɛt fɔ tray tranga wan fɔ mek i put wetin ɔda pipul dɛn want bifo wetin in want. Fɔ ɛgzampul, i bin vɛks we di apɔsul Jems ɛn Jɔn bin go beg Jizɔs fɔ lɛ dɛn sidɔm nia am we i de rul na Gɔd in Kiŋdɔm. Sɔntɛm Pita insɛf bin de tink se na in go bi wan pan di pipul dɛn we go sidɔm nia Jizɔs bikɔs Jizɔs bin dɔn se Pita go gɛt spɛshal wok fɔ du. (Mat. 16:18, 19) Bɔt Jizɔs bin wɔn Jems, Jɔn, Pita, ɛn ɔl di ɔda apɔsul dɛn fɔ mek dɛn lɛf fɔ tink bɔt dɛnsɛf nɔmɔ ɛn mek dɛn lɛf fɔ mek lɛk se dɛn bɛtɛ pas dɛn brɔda dɛn.—Mak 10:35-45.

¹⁴ Ivin afta we Jizɔs tray fɔ kɔrɛkt di we aw Pita bin de tink, Pita bin stil de sho se na insɛf nɔmɔ i bisin bɔt. We Jizɔs bin tɛl in apɔsul dɛn se tɛm go kam we dɛn ɔl go lɛf am fɔ shɔt tɛm, Pita tray fɔ sho se in bɛtɛ pas di ɔda apɔsul dɛn bay we i se ilɛksɛf di ɔda wan dɛn lɛf Jizɔs, in nɔ go ɛva du dat. (Mat. 26:31-33) Bɔt Pita nɔ bin fɔ dɔn biliv insɛf tumɔs. Wetin mek? Na bikɔs da sem nɛt de, i bin sho se na insɛf nɔmɔ i bisin bɔt. Jɔs fɔ mek Pita sev insɛf, i bin gɛt fɔ tɔk tri tɛm se i nɔ wande sabi Jizɔs.—Mat. 26:69-75.

15. Wetin mek Pita in ɛgzampul go rili ɛnkɔrej wi?

¹⁵ Pan ɔl we Pita bin gɛt dis prɔblɛm ya, in ɛgzampul go rili ɛnkɔrej wi. Wetin bin ɛp Pita fɔ lɛf dis abit? Wan tin we bin ɛp am na dat i bin tray tranga wan fɔ pul dis abit pan insɛf. Ɛn di ɔda tin we bin ɛp am, na Gɔd in oli spirit. Leta, Pita bigin kɔntrol insɛf ɛn sho se i nɔ bisin bɔt insɛf nɔmɔ. (Gal. 5:22, 23) I bin ebul fɔ bia tin dɛn we bin bad pas di wan dɛn we i nɔ bin ebul fɔ bia fɔs. Fɔ ɛgzampul, we di apɔsul Pɔl bin kɔrɛkt Pita usay bɔku pipul dɛn de, i nɔ bin vɛks. Bɔt i bin sho se i ɔmbul. (Gal. 2:11-14) Ɛn afta dat, i nɔ bin gɛt Pɔl na at, ɔ fil se na mɔlɛs Pɔl mɔlɛs am bifo dɛn pipul dɛn de. Pita kɔntinyu fɔ tɔk se i lɛk Pɔl. (2 Pit. 3:15) Pita in ɛgzampul go ɛp wi fɔ put wetin ɔda pipul dɛn want bifo wetin wi want.

16. Aw wi go sho se wi nɔ bisin bɔt wisɛf nɔmɔ we bad tin de mit wi?

¹⁶ Tink bɔt wetin yu go du we bad tin mit yu. We dɛn bin put Pita ɛn di ɔda apɔsul dɛn na jel ɛn bit dɛn fɔ we dɛn bin de prich, dɛn bin gladi bikɔs dɛn de “sɔfa fɔseka Jizɔs.” (Akt 5:41) We pipul dɛn de mek yu sɔfa bikɔs yu de du wetin Gɔd want, i fayn mek yu tek am se na chans yu gɛt fɔ falamakata Pita ɛn Jizɔs. Aw yu kin du dis? Na bay we yu sho se yu nɔ bisin bɔt yusɛf nɔmɔ. (Rid Pita In Fɔs Lɛta 2:20, 21.) Dis go ɛp yu we di ɛlda dɛn kɔrɛkt yu. We di ɛlda dɛn go de tɔk to yu, bifo yu vɛks pan dɛn, i go fayn mek yu falamakata Pita in ɛgzampul.—Ɛkli. 7:9.

17, 18. (a) Wetin wi fɔ aks wisɛf bɔt di tin dɛn we wi dɔn plan fɔ du we wi de sav Jiova? (b) Wetin wi fɔ du if wi si se wi dɔn bigin fɔ bisin bɔt wisɛf nɔmɔ?

¹⁷ Pita in ɛgzampul go ɛp yu fɔ plan fɔ du difrɛn difrɛn tin dɛn we yu de sav Jiova. Yu go ebul du dat bay we yu de sho se yu nɔ de du wetin yu want fɔ yusɛf nɔmɔ. Bɔt yu fɔ tek tɛm mek yu nɔ du dɛn tin ya bikɔs yu want mek ɔlman sabi yu. So, na fɔ aks yusɛf se, ‘Di want we a want fɔ du mɔ fɔ Jiova, na fɔ mek pipul dɛn prez mi ɔ na fɔ mek a gɛt mɔ pawa, lɛk aw Jems ɛn Jɔn bin want?’

¹⁸ If yu si se yu dɔn bigin fɔ bisin bɔt yusɛf nɔmɔ, na fɔ pre to Jiova mek i ɛp yu fɔ kɔrɛkt di we aw yu de tink ɛn fil. Dɔn na fɔ tray tranga wan fɔ du di tin dɛn we go briŋ prez to Jiova, bɔt nɔ du tin dɛn we go mek dɛn prez yu. (Sam 86:11) Tin dɛn de we yu kin du, we nɔ go mek ɔlman no yu. Fɔ ɛgzampul, yu go want fɔ gɛt sɔm kwaliti dɛn we di oli spirit de gi, we yu nɔ gɛt. Ɔ if yu na pɔsin we kin du wɛl fɔ rɛdi fɔ di mitin dɛn bɔt nɔ kin want fɔ jɔyn fɔ klin di Kiŋdɔm Ɔl, i go fayn mek yu tray fɔ fala di advays we de na Lɛta Fɔ Rom 12:16.—Rid.

19. Wetin wi fɔ du fɔ mek wi at nɔ pwɛl we wi luk wisɛf na Gɔd in Wɔd we tan lɛk lukin-glas?

¹⁹ We wi luk wisɛf gud gud wan na Gɔd in Wɔd we tan lɛk lukin-glas ɛn si sɔm prɔblɛm dɛn we wi gɛt, dat kin mek wi at pwɛl. If dat apin to yu, na fɔ tink bɔt di pɔsin we gɛt sɛns we Jems bin tɔk bɔt na di Baybul. Jems nɔ bin tɔk se di pɔsin tray kwik kwik wan fɔ sɔlv di prɔblɛm dɛn we i si. I nɔ ivin tɔk if di pɔsin bin ebul fɔ kɔrɛkt ɔl di prɔblɛm dɛn we i bin gɛt. Bɔt Jems se di pɔsin kɔntinyu fɔ ‘du wetin Gɔd in Wɔd se.’ (Jems 1:25) Di pɔsin bin mɛmba wetin i si na di lukin-glas ɛn kɔntinyu fɔ kɔrɛkt am ɔltɛm. I fayn mek wi de tink gud tin bɔt wisɛf ɛn mɛmba se wi nɔ pafɛkt. (Rid Ɛkliziastis 7:20.) Jiova rɛdi fɔ ɛp yu jɔs lɛk aw i dɔn ɛp bɔku brɔda dɛn we dɛnsɛf nɔ pafɛkt. If yu de fala di tin dɛn we de na di Baybul ɛn kɔntinyu fɔ sho se yu nɔ bisin bɔt yusɛf nɔmɔ, Gɔd go gladi fɔ yu ɛn blɛs yu.